1, 2. (a) Faturura eyi ekuho lya karera sininke somulyo po. (b) Yisinke na rugana muntu komeho a ka gwane ekuho, ntani morwasinke?

OVE mudinkantu ogu ana hara kugwana ekuho ndi? Nsene yimo, azo kuna kara mfumwa zonene. Ngomu twa yi zogerere mosirongwa sa ka pita, ekuho kuna kara etokoro lyenene. Alyo kulikida wopeke asi wa ligava kwaJehova, pokumutumbwidira asi sininke somulyo meparu lyoge kuna kara kumukarera nokurugana mpango zendi. Mokumona asi alyo etumbwidiro lyenene kwaKarunga, wa hepa tupu kugwana ekuho nsene ono kuru nokutura po etokoro lyanyamoge ntani nokukwata egano eyi ayi tanta kuligava kwaJehova.

² Nampo kapi ono kulizuvha asi ono wapere kugwana ekuho. Ndi kuna kulizuvha asi ono wapere nye vakurona woge kuna kukutantera asi o ndindire dogoro ngo kure ko nokugwana ediwo lyenzi. Yisinke no rugana?  Wa ha dompa mutjima. Nye, ruganesa siruwo soge mokutura po marunduruko yipo ngo vhure kuwapera ekuho. Nsene yimo ngoso, ove kuvhura o ture po yitambo eyi yitatu meparu lyoge: (1) kunkondopeka epuro lyoge, (2) kuwapukurura nkareso zoge, ntani (3) kunkondopeka rupandu roge.

3, 4. Yisinke nava lirongera ko vadinkantu kwaTimoteusa?

³ Gazara omu no limburura mapuro aga: Morwasinke na pulira asi Karunga yipo ga kara? Morwasinke nayi pulira asi Bibeli Karunga ga zi retesa po? Morwasinke ani limburukwire nompango daKarunga mevango lyokuhonena nkareso zomouzuni? Mapuro ogo ngaga ku vatera o sikise mo epukururo lyomupositoli Paurusa eli asi: ‘Koneka mpango zaKarunga neyi yoyiwa ya ku wapera ayo ya sikilira mo.’ (Varoma 12:2) Morwasinke?

⁴ Sihonena saTimoteusa kuvhura si ku vatere. Age kwa divire nawa Matjangwa morwa ozina nozinakuru kwa ga mu rongere. Paurusa kwa tanterere Timoteusa asi: “Kara mousili ou wa lironga, yiyo wa u pura nawa-nawa.” (2 Timoteusa 3:14, 15) Nkango ‘nawa-nawa’ kutanta asi “kupura sininke oso asi usili.” Timoteusa ga pulire asi usili kuugwana moMatjangwa. Age kwa u tambwire morwa ga yi pulire asi eyi va mu rongere usili, kapisi morwa yeeyi va yi mu tanterere ozina nozinakuru.—Resa Vahebeli 5:14.

5, 6. Morwasinke ya karera nomulyo mokulironga kuruganesa nawa nondunge doge ove simpe mudinkantu?

⁵ Ove ngapi? Nampo wa diva usili siruwo sosire. Nsene yimo, si kare sitambo soge mokugazadara ko nokonda deyi wa pulira. Ayo ngayi ku vatera o nkondopeke epuro lyoge nokunyokera po kutura po matokoro gomadona morwa makondjeso govakaume ndi magazaro gomouzuni ndi malizuvho ganyamoge.

⁶ Nsene o lironga kuruganesa nawa nondunge doge ove simpe mudinkantu, ngo vhura kulimburura mapuro govadinkantu vakweni aga asi: ‘Ngapi omu wa yi diva asi Karunga yipo ga kara? Nsene asi Karunga ga tu hara, morwasinke a pulisilire udona? Nsene asi Karunga yige ga sita nayinye, age yilye ga mu sita?’ Nsene wa liwapaikira, mapuro gangoso kapi ngaga kuretera masinganyeko nye ngaga ku tumangeda o liture mo unene mokukonakona Bibeli.

7-9. Ngapi omu no nkondopeka epuro lyoge?

⁷ Elirongo lyanyamoge lyoBibeli kuvhura li ku vatere o limburure mapuro nokugusa po masinganyeko ntani nokunkondopeka epuro lyoge. (Yirugana 17:11) Ose kwa kara noyimbapiratjangwa eyi nayi ku vatera o yi sikise mo oyo. Wovanzi kwa va vatera pokulironga simbapiratjangwa The Origin of Life—Five Questions Worth Asking ntani buke Is There a Creator Who Cares About You?

⁸ Ove murongwa goBibeli, ntani nampo wa diva nare malimbururo komapuro gamwe gomarongo gomoBibeli. Nye wa yi pura asi malimbururo ogo usili ndi? Ove kuvhura o rugane elirongo lyanyamoge pokurugana mapaparo moyimbapiratjangwa yetu mokukuvatera o nkondopeke epuro lyoge. Eyi ngayi ku vatera o dive omu no faturura epuro lyoge kwava wopeke.

⁹ Wa hepa kuyipura nyamoge asi wa gwana usili. Eyi ngayi ku vatera o liwapaikire kugwana ekuho. Mudinkantu gumwe kwa tanta asi: “Komeho ni tokore kugwana ekuho, ame kwa lirongere Bibeli yipo na dimbwilire asi ou ukareli wousili. Ntani nkenye ezuva, ngani nkondopeke epuro lyange.”

10. Morwasinke ya wapera asi Mukriste ogu ga gwana ekuho a likide epuro lyendi moyirugana?

¹⁰ Bibeli kutanta asi: “Nepuro nalyo ngosikwawo, nsene kapi lya paka yirugana, lya fa.” (Jakopo 2:17) Nsene wa kara nepuro lyokupama, ove ngo yi likida monkareso zoge. Ove hena ngo kara ‘ono pongoka oku to tjira Karunga.’​—Resa 2 Peturusa 3:11.

11. Yisinke ayi tanta kukara ono ‘pongoka’?

 ¹¹ Yisinke ayi tanta kukara ono ‘pongoka’? Nsene asi ove kwa pongoka, ove ngoso wa kuhuka pamukaro. Pasihonena, gazara kuhamena makwedi ntazimwe ga ka pita. Apa va ku hetekere o rugane yoyidona, wa gazadarere ko nawa kuhamena yoyiwa neyi yoyidona ndi? (Vahebeli 5:14) To diworoka sikando simwe apa wa dilire kugwira meheteko ndi momakondjeso govakaume ndi? Kosure, ove kugava sihonena sosiwa kwava wopeke ndi? Ove kulimburukwa kwaJehova ndi kuhetekera ko kukara ngwendi vanasure vakweni yipo va dire kukuninkagura? (1 Peturusa 4:3, 4) Yosili, kwato ogu ga sikilira mo. Poyiruwo yimwe, nampili ava va karera Jehova nomvhura dononzi pamwe kulizuvha nomuga ntani kuvadigopera kuzuvhisira wopeke. Nye ogu ga ligava kwaKarunga age kulikanganga mokukara gumwe goNombangi daJehova, ano eyi kuyilikida monkareso zendi zongwa.

12. Yisinke ayi tanta ‘kutjira Karunga,’ ntani ngapi omu no yi tara?

¹² Yisinke ayi tanta ‘kutjira Karunga’? Kwa hamena mo eyi o rugana mombungakriste, ngwendi kuza komapongo nomokuzuvhisa. Ntani kwa hamena mo hena yirugana eyi ava dili kumona wopeke, ngwendi makanderero goge ntani elirongo lyanyamoge lyoBibeli. Muntu ogu ga ligava kwaJehova kapi a gazara asi yirugana yangoso mudigo. Age kulizuvha ngwendi hompa Ndafita ogu ga tente asi: “Ame kuna tokomene po yokurugana eharo lyoge Karunga gwange! Erongo lyoge tani li paka komutjima.”—Episarome 40:8.

13, 14. Yisinke nayi ku vatera o kare ‘netjiro Karunga,’ ntani ngapi vadinkantu vamwe va gwanena mo uwa?

¹³ Mokukuvatera o ture po yitambo, pwa kara mapuro gamwe aga no vhura kukonakona nokutjanga malimbururo goge komapuro ngwendi gaaga: “Ove kuvyukilira kutumbura yuma momakanderero goge, ntani yisinke aga horora kuhamena eharo lyoge kwaJehova?” “Yisinke o hamesere mo melirongo lyanyamoge?” “Ove kuza mokuzuvhisa nampili vakurona woge kapi vana kuza mo ndi?” Ntani hena kuvhura o tjange yitambo eyi ono hara kulitulira po kuhamena makanderero goge nelirongo lyanyamoge ntani nokuzuvhisa.

¹⁴ Vadinkantu wovanzi ava ava gazara kugwana ekuho va gwanena mo uwa pokutjanga yitambo yawo. Mudinkantu gomukadona gedina Tilda kwa tanta asi: “Ame kwa tjenge yitambo yange. Apa na sikisire mo yitambo oyo nayinye, konyima zomvhura zimwe, ame na waperere kugwana ekuho.” Mudinkantu gomumati gedina Patrick nage kwa rugene yokulifana. Age kwa tanta asi: “Ame na divire nare yitambo yange, nye mokuyitjanga ya vaterere nge ni kondje mokuyisikisa mo.”

15. Faturura eyi eligawo lya karera etokoro lyomuntu mwene.

 ¹⁵ Epuro limwe kuna kara asi: “Ove ngo twikira kukarera Jehova nampili vakaume novakurona woge va ku nyokese ndi?” Nsene o ligava kwaJehova nokugwana ekuho, ove kuna kutura po elikwatakano lyanyamoge nendi. Yipo nye, mokumuruganena kapisi o korere movakurona woge ndi movantu. Yirugana yoge yokupongoka ntani netjiro Karunga kulikida asi wa yi pura nawa-nawa asi wa gwana usili ntani ono hara kukwama nompango daKarunga. Makura ngo wapera kugwana ekuho.

16, 17. (a) Yisinke nayi tumangeda muntu a kare Mukriste? (b) Ngapi no vhura kufanekesa rupandu roge kosizoweseso?

¹⁶ Ezuva limwe, mugara ogu ga divire nawa Veta zaMosesa kwa pulire Jesus asi: “Murongi, sipango esi sa pitakana po yikwawo moVeta zaKarunga nani sipi so po?” Jesus makura ta mu limburura asi: “O hare Hompa Karunga goge nomutjima goge nagunye nomwenyo goge nagunye nonondunge doge nadinye.” (Mateusa 22:35-37) Jesus kwa fatwilire asi eharo  lyokuhara Jehova yilyo ali tumangeda muntu a gwane ekuho nokukara Mukriste. Nkedi zimwe zongwa zokunkondopeka eharo lyoge kwaJehova kuna kara pokugazadara ko unene kuhamena sizoweseso, uhwi wounene ou ga pa vantu. (Resa 2 Vakolinte 5:14, 15; 1 Johanesa 4:9, 19.) Nsene o rugana ngoso, ove ngo likida rupandu roge kouhwi owo.

¹⁷ Rupandu roge kosizoweseso kuvhura kurufanekesa monkedi ezi: Gazara asi ove kuna kudama momukuro makura muntu ta ku popere. Ove ngo likokota mema nokuza kembo nokudivara eyi ana ku ruganene ogo muntu ndi? Hawe! Ove nkenye apa ngo pandura muntu ogo! Mokulifana, twa hepa kupandura unene Jehova naJesus mokutupa sizoweseso. Eparu lyetu kwa korera mwawo! Awo kwa tu zowora konzo nokonomfa. Morwa awo kwa tu hara, ose ngesi twa kara nehuguvaro lyokukaparuka narunye moParadisa apa pevhu!

18, 19. (a) Morwasinke no dira kutjira kuhama kwaJehova? (b) Ngapi omu kukarera Jehova aku ninkisa eparu lyoge li wape?

¹⁸ Ove kupandura kweyi ga ku ruganena Jehova ndi? Nsene yimo, kuligava nokugwana ekuho kuna kara sininke souhunga kurugana. Eligawo lyoge kuna kara etumbwidiro kwaKarunga asi ngo rugana mpango zendi meparu lyoge nalinye. Hepero o tjire kutura po etumbwidiro lyangoso ndi? Hawe! Jehova kuna ku harere yoyiwa po, ntani nga futa ava ava rugana mpango zendi. (Vahebeli 11:6) Nsene o ligava kwaKarunga nokugwana ekuho, eparu lyoge kapi ngali yipa nye ngali wapa unene. Munazinyetugara gonomvhura 24 ogu ga gwene ekuho age munona, kwa tanta asi: “Ngano na ndindilire ni kure ko ngano na kwete nawa egano yininke, nye mokutura po etokoro lyokuligava nyamwange kwaJehova kwa vatera nge ni dire kukondjera yininke yomouzuni.”

¹⁹ Jehova kuna ku harere yoyiwa po. Nye, Satana kuligazara tupu mwene ntani kapi a ku fire sinka. Nsene o mu kwama kwato yoyiwa eyi nga ku pa. Ngapi omu na ku pa yininke eyi ga dira kukara nayo? Age kapi ga kara nombudi zongwa, ntani kapi ga kara nehuguvaro. Age nga ku pa tupu meho zondona, morwa yizo zelike zina kumundindira!​—Ehororo 20:10.

20. Yisinke ga hepa kurugana mudinkantu yipo a wapere kuligava nokugwana ekuho? (Tara hena kakende “Mokukuvatera o ture po ezokomeho.”)

²⁰ Kuligava kwaJehova kuna kara etokoro lyewa eli no tura po. Ono liwapaikire kuyirugana ndi? Nsene yimo, kapisi o tjire kutura po etumbwidiro lyangoso. Nye nsene kuna kulizuvha asi kapi ono wapere, ruganesa magano gomosirongwa esi yipo o twikire kutura po ezokomeho. Paurusa kwa tanterere Vafilipi va twikire kutura po ezokomeho. (Vafilipi 3:16) Nsene o kwama epukururo eli, ngali ku vatera o hare kuligava kwaJehova nokugwana ekuho.