1, 2. (a) Yisinke ayi retere ruhafo vantu vaKarunga naina? (b) Ngapi vakurona woVakriste novakuronambunga nava vatera vadinkantu va kwate egano eyi ali tanta ekuho?

MUKURONAMBUNGA kwa tanterere Christopher asi: “Ame kwa kudiva kutunda unona woge, ntani nina hafa mokuzuvha asi ono hara kugwana ekuho. Nina hara kukupura: ‘Morwasinke ono harere kugwana ekuho?’” Mukuronambunga gwina ga kere nokonda zongwa zeyi ga pulilire epuro olyo. Ayo kutuhafesa pokumona vadinkantu wovanzi kuna kugwana ekuho nkenye mvhura. (Muudisi 12:1) Vareti woVakriste novakuronambunga va hepa kudivilisa asi vadinkantu kuna kutura po matokoro gavene ntani asi vana kwata egano eyi ali tanta ekuho.

² MoBibeli, ose kulironga asi kuligava nokugwana ekuho kuna kara etameko lyeparu lyepe koMukriste. Alyo kureta  matungiko gokutunda kwaJehova ntani marwaneso gokutunda kwaSatana. (Yisewe 10:22; 1 Peturusa 5:8) Eyi yiyo vakurona woVakriste va hepera kulitulira po siruwo sokuronga vana vawo eyi ayi tanta kukara murongwa gwaKristusa. Vakuronambunga kuvatera vadinkantu ava va dira kukara novakurona woVakriste yipo va kwate egano eyi ayi tanta kuligava nokugwana ekuho. (Resa Rukasa 14:27-30.) Ngwendi moomu pwa hepa eliwapaikiro komeho zokutunga etungo, vadinkantu va hepa kuliwapaikira komeho va gwane ekuho yipo va karere Jehova noulimburukwi “dogoro kouhura.” (Mateusa 24:13) Yisinke nayi vatera vadinkantu va twikire kukarera Jehova dogoro narunye? Ngesi tatu ka yi konakona.

3. (a) Yisinke adi tu rongo nonkango daJesus naPeturusa kuhamena mulyo gokugwana ekuho? (Mateusa 28:19, 20; 1 Peturusa 3:21) (b) Mapuro musinke natu ka zogera, ntani morwasinke?

³ Ove mudinkantu ogu ana hara kugwana ekuho ndi? Nsene yimo, aso kuna kara sitambo sosiwa! Azo mfumwa zonene mokugwana ekuho ngagumwe goNombangi daJehova. Eyi yiyo va hepa kurugana Vakriste, ntani ayo mulyo kowo ngava ka paruka poudigu wounene. (Mateusa 28:19, 20; 1 Peturusa 3:21) Pokugwana ekuho, ove ngoso kuna kulikida asi ono tumbwidire kukarera Jehova dogoro narunye. Nsene ono hara kusikisa mo etumbwidiro olyo, mapuro aga gana kukwama ko naga ku vatera o dimburure nsene asi ono wapere kugwana ekuho: (1) Ame nina kuru mokutura po etokoro lyangoso ndi? (2) Alyo kuna kara etokoro lyanyamwange ndi? (3) Ame nina yi kwata egano eyi ayi tanta kuligava kwaJehova ndi? Ngesi tatu ka zogera mapuro ogo.

4, 5. (a)  Morwasinke ekuho lya dilira kukara tupu lyovakondi? (b) Yisinke au tanta ukurona?

⁴ Bibeli kapi za tanta asi wokugwana ekuho va hepa kukara vakondi ndi va sike po nomvhura dongandi. MoYisewe 20:11 kutanta asi: “Nomunona kulihorora moyirugana yendi, mwayo kuvhura kumona asi muhungami ndi muwa.” Yipo nye, nampili munona kuvhura kukwata egano eyi ayi tanta kurugana youhunga nokuligava koMusiti gwendi. Ekuho mulyo ntani azo ntambo zongwa komudinkantu ogu ana kuyilikida asi ana wapere mokuligava kwaJehova.​—Yisewe 20:7.

⁵ Yisinke au tanta ukurona? Ukurona kapi tupu au tamba konomvhura ndi komusika gomuntu.  Bibeli kuuyunga kuhamena vakurona ava va yikisa ‘nondunge’ dawo mokuhangura uwa koudona. (Vahebeli 5:14) Mukurona ga diva youhunga ntani kutokora kuyirugana momutjima gwendi. Age kapisi ureru kumupukisa mokurugana udona. Age hena kapi ga hepa nkenye apa muntu gokumutantera mokurugana youhunga. Ose kundindira ko komudinkantu ogu ga gwana ekuho mokurugana youhunga nampili kapi pana kara vakurona vendi ndi wopeke.​—Hetakanesa Vafilipi 2:12.

6, 7. (a) Singonona ukaro waNdaniyera apa ga kere moBabironi. (b) Ngapi Ndaniyera ga likidire ukurona?

⁶ Mudinkantu kuvhura sili a likide nkareso zangoso zoukurona ndi? Tarurura sihonena saNdaniyera. Age kwa kere mudinkantu apa va mu gusire kovakurona vendi va mu tware koBabironi. Ndaniyera kwa ka kere mokatji kovantu ava ngava dili kulimburukwa nompango daKarunga. Ngesi tatu ka konakona ukaro waNdaniyera. MoBabironi, ngava mu tekura monkedi zokulikarera. Age kwa kere gumwe govadinkantu ava va horowere va ka ruganene hompa. (Ndaniyera 1:3-5, 13) Kulikida asi Ndaniyera kwa parukire nawa moBabironi kupitakana apa ga kere moIsraeli.

⁷ Ngapi Ndaniyera ga lizuvhire? Vantu womoBabironi va rundwilire nkareso zendi ndi va sesupike epuro lyendi? Hawe! Bibeli kutanta asi apa ga kere Ndaniyera moBabironi, age kwa tokwere asi “age nokulinyateka si mwene,”  yipo ga ligorere ko kwanayinye eyi ya likwatakanene noukareli woyimpempa. (Ndaniyera 1:8) Eyi kwa likidire ukurona wene-wene!

8. Yisinke no lirongera ko kosihonena saNdaniyera?

⁸ Yisinke no lirongera ko kosihonena saNdaniyera? Mudinkantu ogu ga kura nga kwaterera kweyi ga pura, nampili moukaro woudigu. Age kapi nga kara ngwendi rugongoro, ogu a tjindji ruvara rwendi kuliza nevango eli ana kara. Age kapi a kara kaume kaKarunga koSinyanga soUhompa, ano kosure kaume gouzuni. Nye age kulimburukwa nampili kuna kumuheteka.​—Resa Vaefeso 4:14, 15.

9, 10. (a) Ngapi mudinkantu na gwanena mo uwa mokugazadara ko eyi ga rugene apa va hetekere epuro lyendi? (b) Yisinke ali tanta ekuho?

⁹ Kwato ogu ga sikilira mo. Vadinkantu novakurona poyiruwo yimwe kulipuka. (Muudisi 7:20) Nsene ono hara kugwana ekuho, ya wapa kudivilisa nsene ove wa tokomena kulimburukwa nompango daJehova. Lipura asi: ‘Ame kwa limburukwa Jehova siruwo sosire ndi?’ Gazara eyi wa rugene sikando sokuhulilira apa va hetekere epuro lyoge. Wa vhulire kutokora eyi ya kere uhunga kurugana ndi? Ngwendi Ndaniyera, kweli ogu ga ku korangedere mokuruganesa udivi woge mouzuni waSatana ndi? Apa ukaro wangoso au horoka, ove kukwata egano mpango zaJehova ndi?​—Vaefeso 5:17.

¹⁰ Morwasinke ya karera nomulyo o dive malimbururo komapuro gangoso? Morwa ngaga ku vatera o dimburure omu ekuho lya kara nomulyo. Ekuho kulikida wopeke asi ono tumbwidire Jehova. Ono mu tumbwidire asi ngo mu hara nokumukarera nomutjima goge nagunye. (Marukusa 12:30) Navenye ava ava gwana ekuho va hepa kutokomena kusikisa mo etumbwidiro lyawo kwaJehova.​—Resa Muudisi 5:4, 5.

11, 12. (a) Yisinke ga hepa kudiva muntu ogu ana hara kugwana ekuho? (b) Yisinke nayi ku vatera o tare ekuho moomu ali tara Jehova?

¹¹ Bibeli kutanta asi vantu vaKarunga navenye, nampili vadinkantu, ngava “ligava” kwendi va mu karere. (Episarome 110:3) Muntu ogu ana hara kugwana ekuho ga hepa kudiva asi alyo kuna kara etokoro lyanyamwendi. Wa hepa kukonakona etokoro lyoge lyokuligava, unene po nsene kwa ku rerera mousili.

¹² Apa wa kura, ove wa mona wovanzi kuna kugwana ekuho, nampo vakaume woge ndi vemepata lyeni. Kapisi o gwane ekuho morwa ono siki ponomvhura dongandi ndi morwa  navenye kuna kugwana ekuho. Ngapi no diva asi ove kuna kutara ekuho moomu ali tara Jehova? Teda ko kweyi ekuho lya karera nomulyo. Ove no ka dimburura nokonda donongwa mosirongwa esi nesi sokukwama ko.

13. Ngapi no diva nsene asi etokoro lyokugwana ekuho kuna tundu komutjima?

¹³ Nkedi zimwe omu no diva nsene etokoro lyoge lyokugwana ekuho kuna kutunda komutjima kuna kara mokukonakona makanderero goge. Rungapi o kanderere kwaJehova? Ove kuvyukilira kutumbura yuma momakanderero goge ndi? Malimbururo komapuro aga kulikida nsene asi wa kara nelikwatakano lyewa naJehova. (Episarome 25:4) Yikando yoyinzi Jehova kulimburura makanderero getu kupitira moBibeli. Ntani nkedi zimwe hena no diva nsene asi kuna kuhedera Jehova nokumukarera kutundilira komutjima kuna kara pokukonakona elikwamo lyelirongo lyanyamoge. (Josuwa 1:8) Lipura asi: ‘Ame nkenye apa kurugana elirongo lyanyamwange lyoBibeli ndi? Ame kulihameka moukareli wetu wepata ndi?’ Malimbururo komapuro ogo naga ku vatera o dive nsene asi alyo etokoro lyanyamoge lyokugwana ekuho.

14. Faturura elisigo pokatji keligawo nekuho.

¹⁴ Vadinkantu vamwe kuvhura va dire kudiva malisigo pokatji keligawo nekuho. Vamwe kuvhura va uyunge asi va ligava nare kwaJehova nye simpe kapi vana liwapaikire kugwana ekuho. Oyo kuvhura kuhoroka ndi? Eligawo kuna kara ekanderero lyokutumbwidira Jehova asi ngo mu karera gelike. Nsene o gwana ekuho, ove kuna kulikida wopeke asi wa ligava kwaJehova. Komeho zokugwana ekuho, wa hepa kukwata egano eyi ayi tanta kuligava kwaKarunga.

15. Yisinke ali tanta eligawo?

¹⁵ Nsene o ligava kwaJehova, ove ngoso kuna kumutantera asi ngesi ono hama kwendi. Ove kutumbwidira asi kumukarera ngasi kara sininke somulyo po meparu lyoge. (Resa Mateusa 16:24.) Etumbwidiro lyangoso mulyo unene! (Mateusa 5:33) Ngapi omu no yi likida asi ono diva asi kapi hena ono hama kwanyamoge nye kwaJehova?—Varoma 14:8.

16, 17. (a) Fanekesa eyi ayi tanta kuligava kwaJehova. (b) Yisinke muntu a tantere Jehova apa a ligava?

¹⁶ Ngesi tatu ka konakona sihonena simwe. Gazara asi kaume koge ta ku pe etuwa ngouhwi. Ta ku pe nombapirapulisiro detuwa nokutanta asi: “Etuwa eli lyoge.” Nye ta gweda ko asi: “Tani pungura nonsapi. Nyame ngani li singa, kapisi nyove.” Ngapi ngo lizuvha kuhamena uhwi wangoso? Ngapi ngo lizuvha kuhamena kaume koge ogu ana ku pe olyo etuwa?

¹⁷ Apa muntu a ligava kwaJehova, age kutantera Jehova asi: “Ame kuna kuligava koge. Tani hamene koge.” Jehova nga ndindira ko komuntu ogo a sikise mo etumbwidiro lyendi. Nye ngapi nsene a tameka kudira kulimburukwa Jehova mokulivandekera mokahore-hore nomuntu ogu a dili kumukarera? Ndi ngapi nsene a tambura yirugana eyi nayi dira  kumupa siruwo sokuza mokuzuvhisa ndi komapongo nkenye apa? Muntu gwangoso kapi ana kusikisa mo etumbwidiro lyendi kwaJehova. Ayo ya lifana nosihonena sokupungura nonsapi detuwa eli ono pe kaume koge. Apa atu ligava kwaJehova, ose kumutantera asi: “Eparu lyange koge lya hamena, kapisi kwange.” Monkedi zangoso, ngatu rugana eyi ana tu harere Jehova nampili yi kare asi kapi tuna hara kuyirugana. Tu honeneni Jesus ogu ga tente asi: “Ame kapi na tundira meguru asi, ni ya rugane eharo lyanyamwange, nye asi ni ya rugane eharo lyogu ga tuma nge.”​—Johanesa 6:38.

18, 19. (a) Ngapi omu nonkango daRose naChristopher adi likida asi kugwana ekuho kureta matungiko? (b) Ngapi ono kulizuvha kuhamena kugwana ekuho?

¹⁸ Ekuho kuna kara etokoro lyenene. Azo mfumwa zongwa mokuligava kwaJehova nokugwana ekuho. Vadinkantu ava va hara Jehova nokukwata egano eyi ali tanta eligawo kapi ava likata-kata mokuligava kwaKarunga nokugwana ekuho. Kapi ava livere ketokoro lyawo. Mudinkantu gedina Rose kwa tanta asi: “Ame na hara Jehova, kwato eyi ayi retere nge ruhafo ya hana asi yokumukarera. Etokoro lyokugwana ekuho kuna kara sininke somulyo po meparu lyange.”

¹⁹ Ngapi kuhamena Christopher, ogu vana tumbura ketamekero lyosirongwa esi? Ngapi a lizuvhu kuhamena etokoro lyendi lyokugwana ekuho apa ga kere nonomvhura 12? Age kwa tanta asi ana hafa kweyi ga tulire po etokoro olyo. Apa ga kere nonomvhura 17, ta tameke kurugana uzuvhisi wokukarerera, ano ponomvhura 18 ta kara mukwafimbunga. Ngesi kuna kurugana koBeteli. Age kwa tanta asi: “Kugwana ekuho kwa kere etokoro lyouhunga. Eparu lyange lina wapa morwa kuruganena Jehova nombunga zendi.” Nsene ono hara kugwana ekuho, ngapi omu no liwapaikira? Sirongwa sokukwama ko ngasi ka limburura epuro olyo.