KOMEHO a ze meguru, Jesus kwa tanterere varongwa vendi asi: “Ngomu kare nombangi dange . . . dogoro nokooku wa ka twa uzuni.” (Yirugana 1:8) Ngapi ngayi va vhulika mokuzuvhisira uzuni mudima?

Martin Goodman, profesora gokoUnivesiti Oxford kwa tanta asi: “Sirugana esi va pa Vakriste kuvaninkisa va lisige nomaukarelikarunga gamwe, kukwatera mo Vajuda, ava va kere mepangero lyahompa gwaRoma.” Jesus nga zi tunda mukunda zende mukunda a ka zuvhise. Vakriste wousili va hepere kukwama sihonena sendi ntani nokuzuvhisa ‘mbudi zongwa zoUhompa waKarunga’ nkenye oku. Va hepere kupapara vantu ava va here kudiva usili. (Rukasa 4:43) Eyi yiyo mosiruwo sanare, pwa karerere “vapostoli,” nkango ezi azi tanta asi ava va tuma va ka rugane yuma. (Marukusa 3:14) Jesus kwa pangerere vasikuli vendi asi: “Yipo nye nomu zira konomuhoko nadinye, mu ka di ninke di kare varongwa vange.”​—Mateusa 28:18-20.

Vapositoli 12 vaJesus ngesi va fa, nye vakareli vaJehova wovanzi kukwama sihonena sawo mosirugana sokuzuvhisa. Apa ava va zigida va ka zuvhisire oku kuna hepa evatero, awo kuuyunga asi: “Nyame ogu, tuma nge!” (Jesaya 6:8) Vamwe kwa dirukira koyirongo yokoure, ngwendi sinzi sava va ka tunda koSikora zaGiliyata. Vamwe kwa dirukira komukunda nagopeke mosirongo sawo. Wovanzi kwa  lironga eraka lyepe mokuvatera mbungakriste ndi kambunga. Ayo kapi ayi kara ureru, nye vanavazinyetu owo kwa kara neharo lyokulizambera mokulikida eharo lyawo kwaJehova nokovantu. Yipo nye ava tulire po mawapaiko nokuruganesa nawa siruwo nononkondo noyimaliwa yawo va ka zuvhisire oku kuna hepa evatero. (Rukasa 14:28-30) Eyi vana kurugana vanavazinyetu owo, mulyo sili unene.

Natuvenye kapi tatu vhuru kudirukira oku kuna hepa evatero ndi tu lironge eraka lyepe. Nye kuvhura tu kare ngwendi vatumwa mombungakriste zetu.

Mosiruwo sanare, Vakriste kwa kere nomupampi mosirugana sokuzuvhisa nampili ngomu sinzi sawo va dilire kukara vatumwa. Paurusa kwa tanterere Timoteusa asi: “To rugana sirugana somuudisi goMbudi zoNgwa, to sikisa mo sirugana soge.” (2 Timoteusa 4:5) Nonkango odo kwa tembe koVakriste wokuhova, ntani simpe kuvhura kutamba kwetu. Vakriste navenye va hepa kulimburukwa mpangera zokuzuvhisa mbudi zoUhompa ntani nokutulisa po varongwa. Nampili monombungakriste detu, pwa kara nonkedi dononzi omu natu vhura kukara ngwendi vatumwa.

Pasihonena, apa vatumwa ava dirukire kosirongo nasopeke, yininke kulisiga ntani va hepa kupapara nonkedi omu nava tambura maukaro gomape. Nampili tu dire kuvhura kudirukira oku kuna hepa evatero, kuvhura tu gwane nonkedi donompe mokuzuvhisira vantu ndi? Pasihonena, mo-1940, vanavazinyetu pomuhowo kwa va korangedere va zuvhisire mononzira nkenye sivike ezuva limwe. Wa hetekera ko kuzuvhisira mononzira ndi? Wa ruganesa rumwe sitoroli nositafura ndi? Ove wa kara neharo lyokuruganesa nonkedi donompe mokuzuvhisa mbudi zongwa ndi?

Nsene o kara nomutaro gouhunga, ngo kara nomupampi ntani ngo litura mo unene mokuzuvhisa. Ava va dirukira oku kuna hepa evatero ndi va lironga eraka lyapeke, awo vazuvhisi wokuwapera ntani kuvhura va vatere mbungakriste momunene. Pasihonena, awo kupitisira mosirugana sokuzuvhisa. Vatumwa nawo kupitisira nombungakriste dogoro vanavazinyetu womomukunda va wapere. Nsene ove munazinyetugara wa gwana ekuho, ono  ‘hara kukara mupitisili,’ pokuruganena vanavazinyetu womombungakriste ngomukwafimbunga ndi ngomukuronambunga?​—1 Timoteusa 3:1.

Ose kuvhura tu vatere mbungakriste zetu mononkedi dokulisiga-siga. Natuvenye, tu kare vadinkantu ndi vakondi, vagara ndi vakadi, kuvhura kugava ‘ekwafo’ kovapuli vakwetetu.—Vakorosi 4:11.

Nsene tuna hara kuvatera vanavazinyetu, twa hepa kuvadiva nawa. Bibeli kutukorangeda tu ‘likoraike-koraike’ ndi tu gazare eyi vana hepa vanavazinyetu, apa atu kara nawo. (Vahebeli 10:24) Eyi kapi yina kutanta asi tu hetekere ko kudiva nayinye eyi yina kuvahorokera meparu, nye asi twa hepa kuhetekera ko kukwata egano vanavazinyetu neyi vana hepa. Awo kuvhura kuhepa evatero, lyopamalizuvho ndi ekorangedo lyokutunda moBibeli. Yosili momaukaro gamwe vakuronambunga novakwafimbunga tupu nava vhura kugava evatero. (Vagarata 6:1) Nye natuvenye kuvhura kugava evatero kovanavazinyetu wovakurupe ndi komapata aga gana kuligwanekera nomaudigu.

Salvatore kwa gwene evatero lyangoso. Morwa udigu woyimaliwa, age ga hepere kurandesa ngesefa zendi nembo lyendi ntani noyininke eyi ga wekere. Age kwa kere nosinka kuhamena epata lyendi. Epata limwe lyomombungakriste zawo kwa yi dimbwilire asi ana hepa evatero. Yipo va pere Salvatore yimaliwa nokumuvatera namukadendi va gwane yirugana. Ntani awo ngava kara kumwe nawo nokuvapurakena ntani nokuvakorangeda. Yipo va ya kere vakaume wovanene. Ngesi mapata ogo gavali kudiworoka siruwo esi ngava kara kumwe poyiruwo yomaudigu.

Vakriste wousili kapi ava likata-kata kutantera ko wopeke eyi va pura. Twa hepa kuhonena Jesus nokutantera ko wopeke matumbwidiro gomawa aga nga ka sikisa mo Karunga. Yi kare asi kuvhura tu diruke ndi hawe natuvenye kuvhura tu kondje mokuvatera wopeke mombungakriste zetu. (Vagarata 6:10) Nsene tu gava kwava wopeke, ose ngatu hafa ntani ngatu “yima yiyimwa yoyirugana nayinye yoyiwa.”—Vakorosi 1:10; Yirugana 20:35.