SIRONGWA SELIRONGO 39
Edina lyoge va li tjanga ‘mobuke zomwenyo ndi’?
“Komeho zendi yiko va tjangerere mobuke elikwamo lyava ava tjira HOMPA.”—MARA. 3:16.
RUSUMO 61 Twikireni Nombangi!
ETWAROMO *
Jehova kwa twikira kutjanga madina govantu ‘mobuke zomwenyo’ kutundilira mosiruwo saAbeli (Tara paragarafu 1-2)
1. Kuliza naMarakiya 3:16, buke musinke ga tameka kutjanga Jehova ntani yisinke ya kara mo?
MONOMVHURA mayovi, Jehova kwa tjanga buke zokulikarera ntani kuna kutwikira kuzitjanga. Mobuke ezi kwa kara mo elikwamo lyomadina govantu, ano edina lyokuhova eli va tjanga mo kuna kara mbangi zokuhova zoulimburukwi Abeli. * (Ruk. 11:50, 51) Kutunda nye opo, Jehova kwa twikira kutjanga madina govantu mobuke ozo, ntani neina mobuke ozo kwa kara mo madina mamiliyona. MoBibeli, buke ozo kuzitumbura asi ‘buke zelikwamo lyava ava tjira HOMPA’ ndi asi “buke zomwenyo” ntani asi ‘bukegango zomwenyo.’ Ano mosirongwa esi, tatu ka zi tumbura asi “buke zomwenyo.”—Resa Marakiya 3:16; Ehor. 3:5; 17:8.
2. Madina govantu musinke va tjanga mobuke zomwenyo ntani yisinke natu rugana yipo madina getu va ga tjange mobuke ozo?
2 Mobuke ozo zokulikarera kwa kara mo madina govantu navenye ava ava karere Jehova noutjirwe nava ava mu fumadeke ntani ava va hara edina lyendi. Awo va kara nompito zokukagwana mwenyo gwanarunye. Neina madina getu kuvhura ku ga tjanga mobuke ozo nsene tu kara nelikwatakano lyewa naJehova, kuliza nonzambo zaMunendi Jesus Kristusa. (Joh. 3:16, 36) Natuvenye tuna hara madina getu va ga tjange mobuke ozo, yikare asi ose kwa kara nehuguvaro lyokukaparukira meguru ndi paapa pevhu.
3-4. (a) Kuvhura ngatu paruke narunye nsene madina getu va ga tjanga mobuke zomwenyo ndi? Faturura. (b) Yisinke natu ka zogera mosirongwa esi nesi sokukwama ko?
3 Ngoso oyo kutanta asi navenye ava va tjanga madina gawo mobuke ozo ngava ka gwana mwenyo gwanarunye ndi? Ose kugwana elimbururo kepuro olyo mononkango edi Jehova ga tanterere Mosesa, edi da kara mwaExodus 32:33. Jehova kwa uyungire mo asi: “Ogu ana zono kwange, yige nani dongonona mo mobuke zange.” Eyi kutanta asi, madina aga ga kara mobuke ozo kuvhura ku ga gusa mo ndi kuvhura ku ga dongonona mo. Ayo kwa fana ngwendi asi pomuhowo Jehova kwa tjanga madina gawo nopena zekara. (Ehor. 3:5) Yipo nye, ose twa hepa kudivilisa asi madina getu ga twikire kukara mobuke ozo dogoro apa ngava ka ga tjanga nopena zoinka zopasifanekeso.
4 Oyo kuvhura kutuninkisa tu li pure mapuro gamwe. Pasihonena, yisinke azi uyunga ko Bibeli kuhamena madina gava va tjanga mobuke zomwenyo ntani madina gava va dira kutjanga mobuke ozo? Siruwo musinke vantu ava va tjanga madina gawo mobuke ozo ngava ka gwana mwenyo gwanarunye? Ngapi kuhamena ava va fa ava va dilire kukara nompito zokulironga kuhamena Jehova? Kuvhura madina gawo ngava ka ga tjange mobuke zomwenyo ndi? Mapuro ogo nava ka ga limburura mosirongwa esi ntani nesi sokukwama ko.
MADINA GOVANTU MUSINKE VA TJANGA MOBUKE ZOMWENYO?
5-6. (a) Ngomu tupu va yi likida moVafilipi 4:3, madina govantu musinke va tjanga mobuke zomwenyo? (b) Siruwo musinke madina gawo ngaga twikira kukara mobuke zomwenyo?
5 Madina govantu musinke va tjanga mobuke zomwenyo zopasifanekeso? Mokukagwana elimbururo, tatu ka zogera nombunga ntano dovantu. Mokatji kovantu womonombunga odo, vamwe madina gawo kwa ga tjanga mobuke zomwenyo ano vamwe madina gawo kapi va ga tjanga mo.
6 Mbunga zokuhova kuna kara vantu ava va horowora yipo va ka pangere kumwe naJesus meguru. Ngoso madina gawo va ga tjanga mobuke zomwenyo ndi? Nhi. Kuliza nononkango edi mupositoli Paurusa ga tjangerere ‘varugani vakwawo’ womoFilipi, madina govagwavekwa, ava va zigida yipo va ka pangere kumwe naJesus, ngesi kuvhura ku ga gwana mobuke zomwenyo. (Resa Vafilipi 4:3.) Nye mokuninka asi madina gawo ga twikire kukara mobuke ozo zopasifanekeso, awo ntudi va hepa kutwikira kukara valimburukwi. Konyima zapa ngava gwana sinongweneso sokuhulilira, madina gawo ngaga twikira kukara mobuke zomwenyo zopasifanekeso. Eyi kuhoroka komeho vafe ndi komeho udigu wounene ngau tameke.—Ehor. 7:3.
7. Kuliza nEhororo 7:16, 17 siruwo musinke madina gemukurumbunga lyomononzwi dapeke ngava ka ga tjanga mobuke zomwenyo yipo ga ka karerere mo narunye?
7 Mombunga zauvali kwa hamena mo emukurumbunga lyomononzwi dapeke. Ngoso madina gawo ngesi va ga tjanga mobuke zomwenyo ndi? Nhi. Ngoso madina gawo nga ga twikira kukara mobuke zomwenyo konyima zapa ngava paruka yita yaHarumagedoni ndi? Nhi. (Ehor. 7:14) Jesus kwa uyungire asi nonzwi odo nga di gwana “mwenyo gwanarunye.” (Mat. 25:46) Nye ava ngava kaparuka yita yaHarumagedoni kapi ngava ka gwana poopo mwenyo gwanarunye. Madina gawo nga ga twikira kukara mobuke zomwenyo mopena zekara zopasifanekeso. Monomvhura eyovi edi nga ka pangera Jesus, age nga ka “va takamesa nokuvapitisira komarunone aga ga kara nomema gomwenyo.” Ava ngava ka limburukwa komavyukiso aga nga ka gava Jesus nava ngava ka twikira kukalimburukwa Jehova, madina gawo nga ga ka twikira ku ka kara mobuke zomwenyo.—Resa Ehororo 7:16, 17.
8. Madina govantu musinke va dira kutjanga mobuke zomwenyo ntani yisinke ngayi ka va horokera?
8 Mombunga zautatu kwa hamena mo yikombo. Ava kuna kara vantu ava ngava ka zonagura poyita yaHarumagedoni. Madina gawo kapi va ga tjanga mobuke zomwenyo. Jesus kwa uyungire asi awo “ngava va zonagwilira po.” (Mat. 25:46) Paurusa kwa tjenge asi vantu owo ‘ngava va pangura nokuvazonagura po narunye.’ (2 Tes. 1:9; 2 Pet. 2:9) Vantu ava va zonena nokuswaukisa mpepo zokupongoka, nawo ngava va zonagura po narunye. Eyi kulikida nawa-nawa asi awo kapi ngava ka va vhumbura. (Mat. 12:32; Mar. 3:28, 29; Heb. 6:4-6) Ngesi tu zeni tu ka zogere kuhamena nombunga mbali dovantu ava ngava ka vhumbwira paapa pevhu.
VANTU AVA NGAVA KA VHUMBURA
9. Ngomu tupu va yi likida moYirugana 24:15, nombunga musinke mbali dovantu ava ngava ka vhumbwira pevhu, ntani elisigo musinke lya kara pokatji konombunga odo mbali?
9 Bibeli kwa uyunga kuhamena nombunga mbali dovantu ava ngava ka vhumbura ava va kara nehuguvaro lyokukaparukira paapa pevhu, “vahungami ntani nava “va dira kuhungama.” (Resa Yirugana 24:15.) “Vahungami” kuna kara vantu ava ngava karere Jehova noulimburukwi apa va kere awo simpe vazuni. Ano vantu ava “va dira kuhungama,” kuna kara vantu ava va dilire kukarera Jehova komeho va fe. Ntani yikando yoyinzi awo ngava rugana yirugana yokudira kuhungama. Mokumona asi nombunga nadinye mbali ngava ka di vhumbura, ngoso kuvhura tu uyunge asi madina gawo va ga tjanga mobuke zomwenyo ndi? Mokukagwana elimbururo, tu zeni tu ka zogere nombunga odo mbali zimwe nazimwe.
10. Morwasinke ngava ka va vhumbwira “vahungami,” ntani situmbukira musinke ngava ka gwana vamwe? (Tara hena mosirongwa esi “Mapuro gokutunda kovaresi” kuhamena ava ngava ka vhumbwira pevhu.)
10 Mbunga zaune kuna kara “vahungami.” Madina gawo kwa ga tjenge mobuke zomwenyo komeho va fe. Ngoso madina gawo kwa ga gusire mo mobuke zomwenyo konyima zapa va fire ndi? Hawe, morwa Jehova kuvatara simpe ‘ngovanamwenyo.’ Jehova age “Karunga govanamwenyo, nye kapisi Karunga govafe, yeeyi kwendi navenye vanamwenyo.” (Ruk. 20:38) Eyi kutanta asi apa vahungami ngava ka va vhumbwira pevhu, madina gawo nga ga ka kara mobuke zomwenyo, nampili ngomu nga ga ka kara mopena zekara. (Ruk. 14:14) Vamwe ava ngava ka vhumbura ngava ka va pa situmbukira sokukakara ‘vapangeli wouzuni mudima.’—Epis. 45:16.
11. Yisinke ngava hepa ku ka lironga vantu “ava va dira kuhungama” komeho madina gawo va ka ga tjange mobuke zomwenyo?
11 Ngesi tu zeni tu ka zogereni kuhamena mbunga zokuhulilira zautano, zovantu “ava va dira kuhungama.” Awo nampo kapi va divire nompango daJehova, yipo nye awo kapi va parukire monkedi zokuhungama komeho va fe. Yipo nye madina gawo kapi va ga tjanga mobuke zomwenyo. Nye Jehova Karunga nga ka va vhumbura pokuka va pa mpito zokukalironga kumuhamena yipo asi madina gawo nawo ngava ka ga tjange mobuke ozo zomwenyo. Yosili vantu “ava va dira kuhungama” ngava ka hepa evatero lyenene. Vamwe vawo kwa rugene yininke yoyidona unene komeho vafe. Yipo nye awo ngava hepa ku ka va ronga omu nava vhura kuparuka kuliza nonompango daJehova douhunga. Mokuninka asi va ka va ronge yipo va ka yisikisemo oyo, Uhompa waKarunga ngau hepa ku ka pitisira sirugana somulyo unene esi va rugana po unene mouzuni mudima.
12. (a) Wolye ngava ka ronga vantu ava va dira kuhungama? (b) Yisinke ngayi ka horokera vantu ava ngava ka nyoka kukatura pasirugana eyi ngava ka lironga?
12 Wolye ava ngava ka ronga vantu ava va dira kuhungama? Awo kuna kara emukurumbunga ntani vantu wovahungami ava ngava ka vhumbura. Mokuninka asi madina govantu ava va dira kuhungama va ka ga tjange mobuke zomwenyo, awo ngava ka hepa ku ka tulisa po elikwatakano naJehova ntani noku ka ligava kwendi yipo va ka mu karere. Jesus Kristusa novagwavekwa ngava ka nomena nawa vantu ava va dira kuhungama ntani noku ka tara asi ngapi omu vana kutura pasirugana eyi vana ku va ronga. (Ehor. 20:4) Nkenye ogu nga ka nyoka ku ka kwama evatero eli nga ka gwana age kapi ngava ka mu pulisira a twikire kuparuka nampili ngava ka kare asi nomvhura dawo 100. (Jes. 65:20) Jehova naJesus kumona eyi ya kara monomutjima dovantu, ntani awo kapi ngava ka pulisira nkenye gumwe a ka retese po yininke yoyidona mouzuni woupe.—Jes. 11:9; 60:18; 65:25; Joh. 2:25.
AVA NGAVA VHUMBUKIRA MWENYO GWANARUNYE NTANI NAVA NGAVA VHUMBUKIRA MPANGURO
13-14. (a) Ngapi omu twa kwete egano nare nonkango daJesus edi da kara mwaJohanesa 5:29? (b) Yisinke twa hepa kudiva kuhamena nonkango odo?
13 Jesus kwa uyungire hena kuhamena vantu ava ngava ka vhumbwira paapa pevhu. Pasihonena, age kwa uyungire asi: “Siruwo tasi wiza apa navenye ava va kara monontoko ngava zuvha ezwi lyendi makura tava pwaga mo, ava va rugana yoyiwa ngava vhumbukira mwenyo gwanarunye ano ava va rugana yoyidona ngava vhumbukira mpanguro.” (Joh. 5:28, 29) Yisinke ga tembe Jesus?
14 Nare, ose kwa kwete egano nonkango daJesus asi kwa tamba koyirugana yovantu eyi ngava ka rugana konyima zevhumbuko lyawo, eyi kutanta asi vamwe ngava ka va vhumbwira keparu noku ka rugana yininke yoyiwa, ano vamwe ngava ka va vhumbwira keparu noku ka rugana yininke yoyidona. Nye nampili ngoso, Jesus kapi ga uyungire asi vantu ava ngava ka vhumbura ngava rugana yininke yoyiwa ndi asi ngava rugana yininke yoyidona. Age kwa ruganesere nkango zomosiruwo sanare. Jesus kwa uyungire kuhamena “ava va rugana yoyiwa” ntani “ava va rugana yoyidona.” Eyi kulikida asi awo kwa yi rugene komeho zonomfa dawo. Oyo kutuvatera tu yi kwate nawa egano, morwa mouzuni woupe kwato ogu ngava ka pulisira a ka rugane yininke yoyidona. Eyi kulikida nawa-nawa asi vantu ava va dira kuhungama, kwa rugene yininke oyo yoyidona komeho zonomfa dawo. Nye yinke nye adi tanta nonkango daJesus kuhamena ‘kuvhumbukira mwenyo gwanarunye’ ntani ‘kuvhumbukira mpanguro’?
15. Wolye ava ngava “vhumbukira mwenyo gwanarunye” ntani morwasinke?
15 Vahungami ava va rugana yoyiwa komeho va fe, ngava ka “vhumbukira mwenyo gwanarunye” morwa madina gawo va ga tjanga nare mobuke zomwenyo. Eyi kutanta asi evhumbuko lyovantu ava “va rugana yoyiwa” eli va tumbura mwaJohanesa 5:29, lyalifana nevhumbuko ‘lyovahungami’ eli va tumbura moYirugana 24:15. Ekwatogano eli lya liza nononkango edi da kara moVaroma 6:7, edi adi uyunga asi “ogu a fu, kumanguruka mo mononzo dendi.” Yipo nye, apa va fire vahungami owo, Jehova kwa va dongwenene po nonzo dawo, nye nampili ngoso age nga diworoka yirugana yawo youlimburukwi eyi va rugene komeho va fe. (Heb. 6:10) Yosili, vahungami ava ngava ka vhumbura ngava hepa kukatwikira kukakara valimburukwi yipo madina gawo ga ka twikire kukara mobuke zomwenyo.
16. Yisinke ayi tanta ‘kuvhumbukira mpanguro?’
16 Nye ngapi kuhamena vantu ava va rugana yoyidona komeho va fe? Nampili ngomu nonzo dawo va di va dongwenena po, awo kapi va karerere Jehova noulimburukwi apa va kere awo simpe vazuni. Madina gawo kapi va ga tjanga mobuke zomwenyo. Ntani hena, evhumbuko lyava “va rugana yoyidona,” lyalifana nevhumbuko lyovantu ava “va dira kuhungama,” ava va tumbura moYirugana 24:15. Awo ngava “vhumbukira mpanguro.” * Eyi kutanta asi Jesus nga ka nomena nawa vantu owo va dira kuhungama. (Ruk. 22:30) Konyima zapa ngapa pita siruwo songandi, Jesus nga divilisa nsene asi madina gawo kuvhura va ga tjange mobuke zomwenyo. Madina gawo ngava ga tjanga tupu mobuke zomwenyo nsene asi ngava siga yirugana yawo yoyidona ntani nokuligava kwaJehova.
17-18. Yisinke ngava ka hepa ku ka rugana vantu navenye ava ngava ka vhumbwira keparu paapa pevhu, ntani “yirugana” musinke va tamba eyi va tumbura mEhororo 20:12, 13?
17 Yikare asi vantu ava ngava ka vhumbura kwa kere vantu wokuhungama ndi vantu ava va dilire kuhungama, navenye ngava ka hepa kukalimburukwa konoveta domonobukegango edi ngava ka va ronga monomvhura 1 000. Mupositoli Johanesa kwa fatwilire eyi ga mwene memoneko apa ga uyungire asi: “Makura tani mono vafe, ava va fumana nava va dira kufumana vana sikama komeho zosipundi souhompa, makura nobukegango tava di paturura. Nye bukegango zapeke tava zi paturura, azo bukegango zomwenyo. Vafe tava va pangura koyirugana yawo kuliza neyi va tjanga monobukegango odo.”—Ehor. 20:12, 13.
18 Koyirugana musinke ngava ka va pangwira ava ngava ka vhumbura? Ngoso ngava ka va pangwira koyirugana eyi va rugene komeho va fe ndi? Hawe! Diworokeni asi nonzo dawo kwa di va dongwenene po apa va fire. Yipo nye, eyi kutanta asi “yirugana yawo” eyi ngava ka va pangwira kapi ta yi vhuru kukara yirugana eyi va rugene apa va kere awo simpe vazuni. Nye ayo kwa tamba koyirugana eyi ngava ka rugana kuliza nedeuro eli ngava ka gwana mouzuni woupe. Nampili vagara wovalimburukwi ngwendi Nowa naSamwere naNdafita ntani naNdaniyera, nawo ngava ka hepa kukalironga kuhamena Jesus Kristusa ntani noku ka tura epuro monzambo zendi. Mokumona asi vagara owo va kara noyininke yoyinzi eyi ngava hepa ku ka lironga, eyi kulikida nawa-nawa asi vantu ava va dira kuhungama nawo ngava ka kara noyininke yoyinzi eyi ngava ka hepa ku ka lironga.
19. Yitundwamo musinke yokuhulilira ngayi ka horokera vantu ava ngava ka nyoka kukatambura mpito ezi ngava ka va pa mokukalironga kuhamena Jehova?
19 Yitundwamo musinke yokuhililira ngayi ka horokera vantu ava ngava ka nyoka ku ka tambura mpito ezi ngava ka va pa mokukalironga kuhamena Jehova? Ehororo 20:15 kututantera asi: “Ano nkenye ogu va dilire kutjanga edina lyendi mobuke zomwenyo, kwa mu zuguminine mediva lyomundiro.” Eyi kutanta asi ngava ka va zonagwilira po narunye. Yipo nye, ayo ya kara nomulyo tu divilise asi madina getu va ga tjange mobuke zomwenyo ntani ga twikire kukara moomo!
Munazinyetu gomugara kuna kulihameka mosirugana somulyo sokuronga esi ngasi ka horoka monomvhura eyovi (Tara paragarafu 20)
20. Sirugana musinke somulyo unene ngava ka rugana monomvhura eyovi edi nga ka pangera Jesus Kristusa? (Tara efano lyopontunda.)
20 Aso nga si ka kara sili siruwo soruhafo apa Jesus nga ka pangera nomvhura eyovi! Amo ngamu ka hamena sirugana somulyo unene sokukaronga vantu, esi va rugana po unene vantu vaKarunga mouzuni mudima. Nye ngapa ka kara hena siruwo apa vantu wovahungami ntani nava wokudira kuhungama ngava ka va pangwira koyirugana yawo. (Jes. 26:9; Yirug. 17:31) Ngapi omu sirugana sokuronga vantu ngava ka si rugana? Sirongwa sokukwama ko nga si katuvatera tu ka kwate egano asi ngapi omu ngava ka si rugana ntani nomu natu likida rupandu kewapaiko eli lyewa.
RUSUMO 147 Mwenyo gwanarunye kwa gu tumbwidira
^ Mosirongwa esi kwa zogera mo ekwatogano lyepe lyononkango daJesus edi da kara mwaJohanesa 5:28, 29 kuhamena ava “ngava vhumbukira mwenyo gwanarunye” ntani nava “ngava vhumbukira mpanguro.” Natu ka lironga eyi aga tanta mavhumbuko aga gavali ntani nava va hamena mo.
^ Buke ezi kwa tameka kuzitjanga “kutunda ketameko lyouzuni,” uzuni owo kwa tamba kovantu ava va kara nompito zokugwanena mo uwa monzambo zaJesus Kristusa. (Mat. 25:34; Ehor. 17:8) Yipo nye mugara gomuhungami Abeli nampo kuna kara muntu gokuhova ogu va tjanga edina lyendi mobuke zomwenyo.
^ Nare, ose ngatu faturura nkango “mpanguro” mokutamba kokupangura muntu gongandi koyirugana yendi yoyidona. Yimo, nkango “mpanguro” kuvhura kutamba ketanto lyangoso. Nye kuliza nonkango “mpanguro” ezi ga ruganesere Jesus, ayo kumoneka asi azo kwa tamba kokutarera muntu gongandi ndi mokumuheteka ndi ngwendi moomu bukenkango zoRugereka azi uyunga asi “kukonakona yirugana yomuntu gongandi.”
