SIRONGWA SELIRONGO 40
‘Vantu wovanzi ngava ka va ronga va ka rugane youhunga’
‘Ava ngava ka ronga vantu wovanzi va rugane youhunga, ngava paima ngwendi nombungururu.’—NDAN. 12:3.
RUSUMO 151 Nga zigida
ETWAROMO *
1. Yihorokwa musinke yokuhafesa tuna kundindira ngayi ka horoka moNomvhura Eyovi dEpangero lyaJesus Kristusa?
ALYO NGALI kara ezuva lyoruhafo apa evhumbuko ngali tameka paapa pevhu moNomvhura Eyovi dEpangero lyaKristusa. Navenye ava va zumbanesa vahali vawo kuna kundindira nononkondo mokukavamona hena. Jehova nage yimo a lizuvhu ngoso. (Joba 14:15) Gazara tupu omu ngava ka hafa vantu apa ngava mona vahali vawo vana va vhumbura. Ngwendi moomu katu yi lirongere mosirongwa sina ka pita, vantu ‘wovahungami’ ava va tjanga mobuke zomwenyo, “ngava vhumbukira mwenyo gwanarunye.” (Yirug. 24:15; Joh. 5:29) Nampo sinzi sovahali vetu kuna kara vamwe ava ngava vhumbura konyima zoyita yaHarumagedoni. * Mokugwederera ko, vantu ava “va dira kuhungama” pasihonena, ava va dilire kugwana mpito zokulironga kuhamena Jehova ndi zokumukarera noulimburukwi komeho va fe, “ngava vhumbukira mpanguro.”
2-3. (a) Kuliza naJesaya 11:9, 10, sirugana musinke somulyo po esi ngava ka rugana komeho? (b) Yisinke natu ka kona-kona mosirongwa esi?
2 Navenye ava ngava ka vhumbura, ngava hepa ku ka va vyukisa. (Jes. 26:9; 61:11) Mokuninka asi va ka yi rugane oyo, sirugana somulyo po unene sokuronga esi va rugana mouzuni mudima, ngava ka si rugana. (Resa Jesaya 11:9, 10.) Morwasinke ngava ka si ruganena? Konda zimwe kuna kara asi morwa vantu wokudira kuhungama ava ngava ka vhumbura, ngava ka hepa kulironga kuhamena Jesus Kristusa, Uhompa waKarunga, sizoweseso ntani mulyo gwedina lyaJehova ntani neyi ya mu wapera kupangera gelike. Nampili vantu wovahungami ava ngava ka vhumbura, nawo ngava ka lironga kuhamena eyi ga ronga Jehova vantu vendi kuhamena sitambo sendi kevhu posiruwo esi va fire. Vakareli vaJehova vamwe wovalimburukwi kwa fire azo Bibeli simpe kapi zina pu kuzitjanga. Vantu wokudira kuhungama nava wokuhungama, navenye ngava ka hepa kukalironga yininke yoyinzi.
3 Mosirongwa esi tatu ka kona-kona mapuro aga gana ku kwama ko: Ngapi omu sirugana esi sokuronga somulyo po unene ngava ka si rugana? Eyi ngava ka rugana ko vantu kosirugana oso somulyo sokuronga, ngayi likida nsene asi madina gawo kuvhura ngaga karerere mobuke zomwenyo ndi hawe. Malimbururo komapuro aga, ga kara nomulyo kwetu nose neina. Ngomu natu ka yi mona, mauporofete gamwe aga ga kara mobuke zaNdaniyera ntani mEhororo, naga ka tuvatera tu kwate egano eyi ngayi horokera vantu ava ngava vhumbura. Pomuhowo, tu zeni tu ka konakone yihorokwa yokuhafesa eyi va pumba mwaNdaniyera 12:1, 2.
AVA “VA FA NARE NGAVA KARA HENA NOMWENYO”
4-5. Kuliza naNdaniyera 12:1, yisinke azi tu tantere kuhamena eyi ngayi ka horoka kehagero lyouhura wouzuni?
4 Resa Ndaniyera 12:1. Buke zaNdaniyera kututantera yihorokwa yokuhafesa eyi ngayi horoka kehagero lyouhura wouzuni. Pasihonena, Ndaniyera 12:1 kututantera asi Mikayera ogu ava tumbura asi Jesus Kristusa, nga ‘gamena vantu vaKarunga.’ Ano uporofete owo kwa tameka kusika mo mo-1914, apa Jesus va mu tulire a kare Hompa goUhompa waKarunga wemeguru.
5 Ndaniyera kwa mu tanterere hena asi Jesus nga gamena vantu posiruwo “somaudigu, sosidona unene esi sa dira kukara po rumwe, hada tamekera kukara po nomuhoko.” ‘Siruwo oso somaudigu,’ kuna kara “udigu wounene” ou va tumbura mwaMateusa 24:21. Jesus nga gamena ndi nga rugana ko yuma mokupopera vantu vaKarunga, kehagero lyosiruwo esi somaudigu, eyi kutanta asi poHarumagedoni. Buke zEhororo kutumbura vantu owo asi ‘emukurumbunga lyava va pita moudigu wounene.’—Ehor. 7:9, 14.
6. Yisinke ngayi horoka konyima zapa emukurumbunga lyovantu ngava pita moudigu wounene? Faturura. (Tara hena moRuhungu oru “Mapuro gokutunda kovaresi” kuhamena evhumbuko eli ngali ka horokera paapa pevhu.)
6 Resa Ndaniyera 12:2. Yisinke ngayi horoka konyima zapa emukurumbunga ngali ka pita moudigu wounene? Pwanare, ose kwa gazarere asi Ndaniyera 12:2 kwa tamba kevhumbuko lyemeguru ndi kosirugana sokuzuvhisa esi ngasi li gwederera konyima zapa hambara tupu va si hagekese varwanesi mo-1918. * Nye nampili ngoso, ngesi tuna kwata nye egano asi nonkango edi kwa tamba kevhumbuko eli ngali ka kara mouzuni woupe ou una kara komeho. Evhumbuko eli ngali horoka konyima zomazuva gopouhura ntani konyima zoYita yaHarumagedoni.
7. (a) Ngapi omu vantu vamwe ngava vhumbukira “mwenyo gwanarunye”? (b) Morwasinke evhumbuko eli lina karere “lyewa po”?
7 Yisinke nye lyatamba etjangwa lyaNdaniyera 12:2 apa ali uyunga asi “vamwe ngava vhumbukira mwenyo gwanarunye”? Alyo kwa tamba asi vantu ava ngava ka vhumbura yipo va ka dive ndi kuka twikira kudiva nokukalimburukwa Jehova naJesus posiruwo sonomvhura eyovi, ngava ka gwana mwenyo gwanarunye. (Joh. 17:3) Eli ngali kara “evhumbuko lyewa po” kupitakana evhumbuko lyanare apa vantu vamwe va va vhumbwire. (Heb. 11:35) Morwasinke tuna kuuyungira ngoso? Morwa vantu owo wokudira kusikilira mo, va ya fire hena konyima.
8. Ngapi omu vantu vamwe ngava vhumbukira “nomuga noruhepo rwanarunye”?
8 Nye kapisi vantu navenye ava ngava ka vhumbura ngava ka tambura erongo lyaJehova eli ngava ka va ronga mouzuni woupe. Uporofete ou wa kara mwaNdaniyera kuuyunga asi ‘ano ava vamwe mo ngava va vhumbwira nomuga noruhepo rwanarunye.’ Mokumona asi vamwe ngava ka kara nonkareso zourwanesi, madina gawo kapi ngava ka ga tjanga mobuke zomwenyo ntani awo kapi ngava ka gwana mwenyo gwanarunye. Nye mevango lyoyo, awo ngava ka gwana ‘ruhepo rwanarunye’ ndi asi ngava kava zonagura po. Yipo nye, etjangwa lyaNdaniyera 12:2, kuuyunga kuhamena yitundwamo yokuhulilira eyi ngayi ka horokera vantu navenye ava ngava ka vhumbura kuliza noyirugana eyi ngava ka rugana konyima zapa ngava kava vhumbura. * (Ehor. 20:12) Vamwe ngava ka gwana mwenyo gwanarunye ano vamwe kapi ngava ka gu gwana.
‘VANTU WOVANZI NGAVA KA VA RONGA VA KA RUGANE YOUHUNGA’
9-10. Yisinke hena ngayi horoka konyima zoudigu wounene ntani wolye “ngava ka paima ngwendi uzera weguru”?
9 Resa Ndaniyera 12:3. Yisinke hena eyi ngayi horoka konyima zoudigu wounene? Kugusa ko eyi va uyunga mwaNdaniyera 12:2, movelise zau-3, kwa faturura yuma yimwe eyi ngayi horoka konyima zoudigu wounene.
10 Wolye “ngava ka paima ngwendi uzera weguru”? Etjangwa lyaMateusa 13:43, kutuvatera tu dimburure asi vantu musinke owo apa ali uyunga asi: “Posiruwo oso, vahungami ngava paima ngwendi ezuva moUhompa waGuhyawo.” Mononkango edi, Jesus kwa uyungire kuhamena ava va “hamena koUhompa” ndi asi vagwavekwa ava ngava ka pangera kumwe nendi moUhompa wemeguru. (Mat. 13:38) Yipo nye, etjangwa lyaNdaniyera 12:3, kwa tamba kovagwavekwa ntani kosirugana esi ngava ka rugana moNomvhura Eyovi, edi ngaka pangera Jesus Kristusa.
Ava va hamena kosivaro so-144 000, ngava ka ruganena kumwe naJesus Kristusa mokukapitisira sirugana sokuronga esi ngasi ka horoka monomvhura eyovi (Tara paragarafu 11)
11-12. Sirugana musinke ngava ka rugana ava va hamena kosivaro 144 000 moNomvhura Eyovi edi nga ka pangera Jesus?
11 Ngapi omu vagwavekwa ngava vatera “vantu wovanzi va rugane youhunga”? Vagwavekwa ngava ruganena kumwe naJesus Kristusa, mokupitisira sirugana sokuronga esi ngasi horokera paapa pevhu monomvhura eyovi. Ava va hamena kosivaro 144 000, kapi tupu ngava ka kara vahompa nye ngava ka kara hena vapristeli. (Ehor. 1:6; 5:10; 20:6) Yipo nye, awo ngava ka vatera ‘mokukaverura nomuhoko’ ntani ngava ka vatera vantu yipo ngava ka sikilire mo hena. (Ehor. 22:1, 2; Hes. 47:12) Oso ngasi ka kara siruwo soruhafo sili kovagwavekwa!
12 Wolye ava ngava ka hamena mosivaro sovantu “wovanzi” ava ngava ka ronga yipo va ka rugane youhunga? Amo ngamu ka hamena ava ngava ka vhumbura ntani nava ngava ka paruka yita yaHarumagedoni, kumwe novanona ava ngava ka retera mouzuni woupe. Ano kouhura wonomvhura eyovi, vantu navenye ava ngava ka paruka pevhu, ngava ka sikilira mo. Makura posiruwo musinke nye madina gawo ngava ka ga tjanga mobuke zomwenyo nopena zoinka nye kapisi nopena zekara zopasifanekeso yipo ga ka karerere mo narunye?
EHETEKO LYOKUHULILIRA
13-14. Yisinke ngava hepa kukarugana vantu navenye wokusikilira mo komeho va ka gwane mwenyo gwanarunye?
13 Twa hepa kudiworoka asi kukara muntu gokusikilira mo kapi ayi tanta asi muntu gwangoso ngaka gwana mwenyo gwanarunye. Gazadareni ko kuhamena Adamu naEva. Awo kwa sikilire mo, nye awo va hepere kutwikira kulimburukwa Jehova yipo va gwane mwenyo gwanarunye. Nye ehudi, awo kapi va twikilire kulimburukwa Jehova.—Rom. 5:12.
14 Ngapi omu ngava ka kara vantu kehagero lyonomvhura eyovi? Posiruwo oso vantu navenye ngava ka sikilira mo. Ngoso vantu navenye ava ngava ka sikilira mo ngava ka kwatesa ko upangeli waJehova narunye ndi? Ndi vamwe ngava ka kara ngwendi Adamu naEva, ava va sikilire mo nye kwa tokwere kudira kulimburukwa Jehova? Twa hepa kugwana malimbururo komapuro aga. Nye ngapi?
15-16. (a) Siruwo musinke vantu navenye wovahungami, ngava gwana mpito zokulikida ulimburukwi wawo kwaJehova? (b) Yitundwamo musinke ngayi kara yeheteko eli lyokuhulilira?
15 Satana ngava ka mu tura monomango nomvhura eyovi. Monomvhura odo, age kapi nga vhura ku ka pukisa nkenye ogu. Nye nampili ngoso, kehagero lyonomvhura eyovi, Satana ngava ka mu mangurura mo monomango. Ano apa ngava mu mangurura, age nga hetekera ko kupukisa vantu wokusikilira mo. Posiruwo seheteko olyo, vantu navenye wokusikilira mo ava ngava kara pevhu, ngava ka gwana mpito zokukayilikida nsene asi awo va fumadeka edina lyaKarunga ntani nsene asi va fumadeka upangeli wendi. (Ehor. 20:7-10) Eyi ngava rugana posiruwo oso ngayi likida nsene asi madina gawo kuvhura ngava ga tjange mobuke zomwenyo yipo ngaga karerere mo narunye.
16 Bibeli kututantera asi vantu vamwe kapi ngava ka limburukwa ngwendi Adamu naEva ntani ngava ka nyoka upangeli waJehova. Makura yinke ngayi horokera vantu vangoso? Ehororo 20:15 kututantera asi: “Nkenye ogu va dilire kutjanga edina lyendi mobuke zomwenyo, kwa mu zuguminine mediva lyomundiro.” Vantu wovarwanesi ngava va zonagwilira po narunye nanarunye. Nye sinzi sovantu wokusikilira mo ngava ka pita meheteko olyo lyokuhulilira. Ano madina gawo ngava ga tjanga mobuke zomwenyo yipo ngaga karerere mo narunye nanarunye.
POSIRUWO ‘SEHAGERO LYOUZUNI’
17. Yisinke muengeli ga tanterere Ndaniyera eyi ngayi horoka mosiruwo setu? (Ndaniyera 12:4, 8-10)
17 Ayo kutuhafesa apa atu gazadara ko koyihorokwa eyi yokomeho. Ndaniyera kwa gwene mbudi zomulyo komuengeli, zokuhamena siruwo setu ‘sehagero lyouzuni.’ (Resa Ndaniyera 12:4, 8-10; 2 Tim. 3:1-5) Muengeli kwa tanterere Ndaniyera asi ediwo lyousili ngali vhuka. Nonkango odo douporofete domobuke zaNdaniyera, ngava di kwata nawa egano vantu vaKarunga. Muengeli kwa mu tanterere hena asi posiruwo nye oso “vadinikarunga kapi ngava yi zuvha, ngava twikira ngorooro noudinikarunga wawo.”
18. Yisinke ngayi ka horokera ntaantani vantu wovadona?
18 Neina kuvhura yi moneke ngwendi asi vantu wovadona kapi ava va tengeke koyirugana yawo yoyidona eyi ava rugana. (Mara. 3:14, 15) Nye Jesus ntaantani tupu nga ka pangure vantu ava va fanekesa koyikombo ntani noku va hangura kononzwi edi da fanekesa kovantu wovahungami. (Mat. 25:31-33) Vantu owo wovadona kapi ngava paruka poudigu wounene ntani kapi ngava kava vhumbura yipo va ka paruke mouzuni woupe. Madina gawo kapi ngava ga tjanga ‘mobuke zelikwamo lyava va tjira HOMPA’ ezi va tumbura mwaMarakiya 3:16.
19. Yisinke twa hepa kurugana ngesi ntani morwasinke? (Marakiya 3:16-18)
19 Ngesi esi kuna kara siruwo sokuyilikida kupitira moyirugana yetu asi ose kapi twa hamena kovantu wovadona. (Resa Marakiya 3:16-18.) Ngesi, Jehova kuna kupongaika vantu ava a tara asi vantu vendi ndi vantu ava a tara asi mulyo unene kwendi. Yosili, ose tuna hara kuhamena kovantu vangoso.
Ayo ngayi ka tu hafesa apa ngatu ka mona Ndaniyera novahali vetu ntani navamwe hena wovanzi kuna ‘kuvhumbukira’ mfeto zawo mouzuni woupe! (Tara paragarafu 20)
20. Etumbwidiro musinke lyokuhulilira va tanterere Ndaniyera ntani morwasinke ono kundindilira nononkondo kukamona esikiliro mo lyetumbwidiro olyo?
20 Yosili, ose kuna kuparuka moyiruwo yomaudigu. Nye yininke yoyiwa, ntaantani tupu yi horoke. Ntaantani tupu ngatu mone vantu wovadona omu vana ku va zonagura po. Konyima zoyo, ose ngatu ka mona etumbwidiro lyaJehova eli ga tanterere Ndaniyera asi: “Ngo vhumbuka to tambura mfeto zoge pehagero lyosiruwo.” (Ndan. 12:13) Ove kuna kundindira nononkondo siruwo apa Ndaniyera kumwe novantu ava wa hara, ngava ka “vhumbuka” ndi? Nsene yimo, twikira kulimburukwa Jehova ntani ove kuvhura o kare nehuguvaro asi edina lyoge ngali twikira kukara mobuke zaJehova zomwenyo.
RUSUMO 80 ‘Tara omu ga wapa Jehova’
^ Mosirongwa esi, kuna kara mo ekwatogano lyepe kuhamena sirugana sokuronga esi ngava ka rugana po unene, va tumbura mwaNdaniyera 12:2, 3. Tatu ka konakona asi siruwo musinke ngava ka si rugana ntani wolye ngava ka lihameka mo. Na tu kalironga hena omu sirugana somulyo unene sokuronga nasi vatera vantu ava vana kara pevhu yipo va liwapaikire eheteko lyokuhulilira eli ngali kara kehagero lyoNomvhura Eyovi dEpangero lyaJesus.
^ Vantu wokuhova ava ngava vhumbura nampo kuna kara ava vana kufa ngesi pomazuva gopouhura, ntani nye ngaku kwama ava va fa nare. Nsene yimo ngayi kara ngoso, ava ngava ka vhumbura, nawo ngava ka dimburura vantu ava va divire ava va fa nare. Yikare asi monkedi musinke ngali ka kara evhumbuko, Matjangwa kuuyunga kuhamena ava ngava ka vhumbwira keparu lyemeguru asi nkenye ogu “ngava mu pindura koufe posiruwo sendi” ntani twasihuguvara asi evhumbuko lyepevhu nalyo yimo ngali ka kara ngorooro.—1 Kol. 14:33; 15:23.
^ Eli kuna kara ekwatogano lyepe kekwatogano eli lyakara mobuke Pay Attention to Daniel’s Prophecy egaununo 17 ntani kekwatogano eli lya kara moRuhungu romo-1 Pembankuru 1987, epe. 21-25.
^ Nye mokulisiga, nonkango ‘vantu wovahungami’ ntani ava ‘va dira kuhungama’ edi da kara moYirugana 24:15 ntani nonkango “ava va rugana yoyiwa” ntani “ava va rugana yoyidona” edi da kara mwaJohanesa 5:29, kwa demenena koyirugana eyi va rugene vantu ava ngava ka vhumbura komeho vafe.
