1. Ngapi omu natu yi diva nsene asi kuvhura tu huguvare muntu gongandi?

 MUNTU gokuhuguvara kwa tokomena kusikisa mo matumbwidiro gendi ntani age kuuyunga usili. (Epis. 15:4) Vantu va yi diva asi kuvhura va mu huguvare. Ose tuna hara vanavazinyetu va tu tare monkedi zangoso. Yisinke natu vhura kurugana yipo va tu huguvare?

2. Ngapi omu natu yi likida asi kuvhura kutuhuguvara?

² Ose kapi tatu vhuru kusininika wopeke va tu huguvare. Twa hepa kurugana yuma eyi nayi likida asi kuvhura va tu huguvare. Vantu kuuyunga asi kuhuguvara muntu gongandi kwa fana ngwendi kukara noyimaliwa. Ayo udigu kuyigwana nye ureru kuyizumbanesa. Jehova ga tu likida asi kuvhura tu mu huguvare. Ose kuvhura kuhuguvara nkenye apa Jehova morwa “yirugana yendi kuyihuguvara tupu.” (Epis. 33:4) Ntani age kuna tu harere tu mu honene. (Efe. 5:1) Tu zeni tu ka konakone yihonena yimwe yovakareli vaJehova ava va honenene Guhyetu gemeguru nokuyilikida asi kuvhura kuvahuguvara. Ntani natu ka dimburura hena yikara yitano eyi nayi tu vatera yipo tu kare vantu wokuvhura kuhuguvara.

3-4. Ngapi omu muporofete Ndaniyera ga yi likidire asi kuvhura kumuhuguvara ntani mapuro musinke natu vhura kulipura?

³ Muporofete Ndaniyera kuna kara sihonena sosiwa sagumwe ogu va huguvarere. Nampili ngomu va mu twere mounkwate waBabironi, konyima zosiruwo age kwa yi likidire asi kuvhura kumuhuguvara. Vantu kwa mu huguvarere unene apa Jehova ga mu vaterere  a fatwilire hompa gwaBabironi Nebukadenesara kuhamena eyi da tente nonzodi dendi. Sikando simwe Ndaniyera ga hepere kutantera hompa Nebukadenesara asi Jehova kapi ga mu haferere. Odo kwa kere dimwe donombudi edi ga dilire kuhara kuzuvha hompa. (Ndan. 2:12; 4:20-22, 25) Konyima zonomvhura dononzi, Ndaniyera kwa yi likidire hena asi kuvhura kumuhuguvara apa ga fatwilire nonkango edi va tjenge kekuma lyomombara zaBabironi. (Ndan. 5:5, 25-29) Ano konyima zosiruwo, Daliusi gomuMede nonoministeli dendi ntani novaforomani vendi nawo kwa dimbwilire asi Ndaniyera kwa kere “nompepo zongwa unene.” Awo va yi dimbwilire asi Ndaniyera “kwa kere gokulimburukwa, kapi nga rugana yepuko ndi ya hana kuvyuka.” (Ndan. 6:3, 4) Yosili, nampili vapangeli wovapagani nawo va yi dimbwilire asi mukareli ogu gwaJehova kuvhura kumuhuguvara!

⁴ Ngomu tuna kuteda ko kosihonena saNdaniyera, ose kuvhura tu lipure nyamwetu asi: ‘Ngapi omu va diva nge vantu ava va dira kukara Nombangi daJehova? Vantu kwa diva nge asi ame kusikisa mo yitumbukira yange ntani kuvhura kuhuguvara nge ndi?’ Morwasinke yina karere nomulyo tu lipure mapuro aga? Morwa ose kuyererepeka Jehova apa ava tu huguvara wopeke.

5. Yisinke ya ninkisire Hananiya va mu huguvare?

⁵ Momvhura 455, komeho Jesus a wize pevhu, konyima zapa nguuru Nehemiya ga tungwilire ekuma lyaJerusarema, age kwa paparere mugara ogu na vhura kuhuguvara a pakere mbili sitata. Nehemiya kwa horowere Hananiya mukurona gohotepopero. Bibeli kwa faturura Hananiya asi mugara “gokuvhura kuhuguvara, age hena kwa tjira Karunga ga pitakana wovanzi.” (Neh. 7:2) Mokumona asi Hananiya kwa here unene  Jehova ntani kapi ga here kumuguvisa, ayo kwa mu tumangedere a sikise mo nkenye sirugana esi va mu pere. Yikara oyo kuvhura kutuvatera nose yipo va tu huguvare mosirugana saJehova.

6. Ngapi omu Tikikusi ga yi likidire asi age kaume gwaPaurusa gokuvhura kuhuguvara?

⁶ Tu tareni sihonena saTikikusi, kaume kaPaurusa ogu ga huguvarere. Apa Paurusa ga kere modorongo zemembo, age kwa huguvarere Tikikusi nokuuyunga asi age “mukareli gokulimburukwa.” (Efe. 6:21, 22) Paurusa kapi tupu ga mu huguvarere yipo asi a twarere nombilive vapuli vakwawo womoEfeso nomoKorosi nye hena nokuvakorangeda. Tikikusi kutudiworokesa vagara wovalimburukwi wokuvhura kuhuguvara ava ava pakere mbili yihepwa yetu neina.—Koros. 4:7-9.

7. Yisinke no lirongera ko kovakuronambunga novakwafimbunga monkedi omu vava huguvara womombungakriste?

⁷ Neina ose tuna hafa unene kweyi twa kara novakuronambunga ntani novakwafimbunga wokuhuguvara. Ngwendi Ndaniyera naHananiya ntani naTikikusi, awo kulitura mo unene va sikise mo yitumbukira yawo. Pasihonena, apa atu kara nomapongo gomokatji kosivike, ose kukara nehuguvaro nawa-nawa asi natu kara nomaruha nagenye gemepongo. Vakuronambunga kuyihafera apa vanavazinyetu ava ava kara nomaruha momapongo ava liwapaikire nawa ntani nokukagava maruha gawo kepongo. Ntani hena apa atu zigida varongwa vetu woBibeli yipo va wize komapongo getu gomosikondovike, ose nkenye apa kukara nehuguvaro asi kweli munazinyetu ogu ana liwapaikire yipo a ka gave siuyungwa sanavenye. Ntani ose kukara nehuguvaro asi natu ka gwana yimbapiratjangwa koSinyanga eyi natu hepa mokuzuvhisa. Vanavazinyetu ava wovagara wovalimburukwi kutupakera nawa mbili pampepo ntani ose kupandura Jehova kweyi twa kara novanavazinyetu ava! Nye mononkedi musinke natu yi likida asi nose kuvhura va tu huguvare?

8. Nampili ngomu atu yi hafere kudiva omu vana karere vanavazinyetu, yininke yawo musinke twa hepa kufumadeka? (Yisewe 11:13)

⁸ Ose kwa hara vanavazinyetu ntani ose narunye kwa hara kudivilisa omu vana karere. Nye nampili ngoso, ose twa hepa kufumadeka yininke yawo eyi ava tu tantere yemehoramo. Vakriste vamwe womosiruwo sovapositoli kwa kere “norugambo ntani nokulitura moyininke yovantu oku tava uyunga yininke eyi ya dira kuvafira.” (1 Tim. 5:13) Ose kapi tuna hara kuhonena nkareso zawo. Nye tu tante asi gumwe nampo ta tu tantere yuma yendi yemehoramo noku tu tantera asi kapisi tu yi tantere wopeke. Pasihonena, munazinyetu gomukadi kuvhura nampo a tu tantere kuhamena uvera ou ana kuligwanekera nawo ndi nampo kuhamena maudigu gapeke aga ana kuligwanekera nago, noku tu tantera asi kapisi tu yi tantere wopeke. Ose twa hepa kusikisa mo eyi ga tu tantera pokudira ku yi tantera wopeke. * (Resa Yisewe 11:13.) Ngesi tu zeni tu ka zogere ko maukaro gongandi aga naga ka likida eyi ya karera nomulyo kudira kutantera wopeke yininke yemehoramo.

9. Ngapi omu nkenye gumwe gemepata nayi likida asi kuvhura kumuhuguvara?

⁹ Kara muntu ogu nava vhura kuhuguvara vemepata. Nkenye gumwe gemepata ga kara nositumbukira sokudivilisa asi kapi ana kutantera wopeke kuhamena yuma yemepata yemehoramo. Pasihonena, mukadi goMukriste ogu ga kwara nampo ga kara nonkareso zoutwini sili. Ngoso mugara gwendi kuvhura a tantere wopeke kuhamena nkareso zamukadendi yipo a mu swaukise ndi? Hawe, kapi ta yi rugana oyo! Age ga hara mukadendi ntani kapi ana hara kurugana  nkenye eyi nayi mu koresa. (Efe. 5:33) Vadinkantu kwa hara kuvatekura nefumadeko. Ayo ya kara nomulyo kovakurona mokudiworoka nkenye apa sitwa oso. Vakurona kapisi va swaukise vana vawo pokutantera wopeke kuhamena mapuko aga ava rugana. (Koros. 3:21) Vanona va hepa kumwena ntani kapisi va tantere wopeke yininke yemehoramo eyi nayi vhura kuswaukisa vemepata lyawo. (Deut. 5:16) Apa nkenye gumwe gemepata a rugana paapa ga hulira pokudira kutantera wopeke kuhamena yininke yemepata yemehoramo, elikwatakano lyemepata ngali nkondopara unene.

10. Yisinke ya hamena mo mokukara kaume gousili? (Yisewe 17:17)

¹⁰ Kara kaume gokuvhura kuhuguvara. Poyiruwo yimwe, sinzi setu kulizuvha asi twa hepa ko kaume ogu natu vhura kutantera omu tuna kulizuvha. Oyo kuvhura kukara udigu poyiruwo yimwe. Kuvhura yi dire ku tu karera ureru kutantera gumwe kuhamena omu tuna kulizuvha ntani kuvhura ngayi tu tukukise unene nsene ngatu zuvha asi kaume gwetu ga ka tantera wopeke kuhamena eyi twa mu tantera. Nye nampili ngoso, ose kupandura kweyi twa kara novakaume ava atu tantere omu atu lizuvhu ntani nokukara nehuguvaro asi kapi nava ka yi tantera nkenye ogu. Age kuna kuna kara kaume gousili.—Resa Yisewe 17:17.

11. (a) Ngapi omu vakuronambunga novakadi vawo ava yi likida asi awo vantu wokuvhura kuhuguvara? (b) Sirongwa musinke natu lirongera ko komukuronambunga ogu nga dili kutantera epata lyendi yininke yemehoramo eyi nga zogere kumwe novanavazinyetu? (Tara efano.)

¹¹ Kara muntu ogu nava vhura kuhuguvara womombungakriste. Vakuronambunga kwa kara ngwendi “utjiliro wompepo ndi ngwendi uvando” wovanavazinyetu. (Jes. 32:2) Ose kuvhura kuzogera novakuronambunga pokuvatantera nkenye eyi ntani nokukara nehuguvaro asi kapi ngava yi tantera wopeke. Ose kapi atu va sininike va tu tantere yininke eyi ya fira ngano kukara mehoramo. Mokugwedera ko, twa hepa kupandura vakadi wovakuronambunga morwa awo kapi ava hetekere ko kusininika vagara vawo yipo va va tantere yininke yemehoramo yava wopeke. Yosili, ayo kutuhafesa kweyi vakuronambunga ava dili kutantera vakadi vawo yininke  yemehoramo yovanavazinyetu. Mukada mukuronambunga gumwe kwa tente asi: “Ame kuhafa kweyi mugara gwange a dili kutantera nge yininke yemehoramo yovanavazinyetu ava ava hepa evatero pampepo ntani kapi a tantere nge nampili madina gawo gaaga. Ayo kuhafesa nge kweyi mugara gwange a dili kutantera nge mauzera gemehoramo yipo ni dire kukara nosinka soyininke eyi nani dira kuvhura kurugana ko yuma. Ano morwa konda zoyo, ayo kurerupira nge kuzogera nankenye gumwe gomombungakriste. Ntani apa ani tantere mugara gwange kuhamena malizuvho gange ndi maudigu gange, ame kukara nehuguvaro asi kapi na ka yi tantera wopeke.” Yosili, natuvenye tuna hara vantu va tu dive asi ose vantu wokuvhura kuhuguvara. Yikara musinke nayi tu vatera yipo tu yi sikise mo oyo? Tu zeni tu ka zogere ko yikara yitano.

12. Morwasinke eharo lya karera sikara somulyo unene esi nasi tu vatera tu kare vantu wokuhuguvara? Gava sihonena.

¹² Mokuninka asi tu kare vantu wokuhuguvara, ntudi twa hepa kukara nosikara seharo. Jesus kwa uyungire asi yipango yivali yoyinene po kuna kara kuhara Jehova ntani nokuhara vakwetu. (Mat. 22:37-39) Jehova age Karunga gokuhuguvara, yipo nye ose twa mu hara ntani tuna hara kumuhonena. Pasihonena, eharo lyetu lyokuhara vanavazinyetu kututumangeda yipo tu dire kutantera wopeke yininke yemehoramo yovanavazinyetu. Kapisi tu tantere wopeke yininke eyi ngayi vhura kukoresa wopeke ndi eyi nayi va swaukisa.—Joh. 15:12.

13. Ngapi omu elinunupiko nali tu vatera tu kare vantu wokuhuguvara?

¹³ Elinunupiko kuvhura kutuvatera tu kare vantu wokuhuguvara. Mukriste ogu ga linunupika kapi a hetekere ko kukara muntu gokuhova mokutantera vakwawo yuma yongandi. (Fil. 2:3) Age kapi a hetekere ko kuninkisa vakwawo va lizuvhe asi age ga diva yininke yomulyo eyi ga dira kukara nononkondo dayo mokuyipwagesa. Elinunupiko ngali tu vatera hena tu nyokere po kutantera vantu kuhamena yininke eyi va dira kutjanga moBibeli ndi moyimbapiratjangwa yetu.

14. Ngapi omu nondunge nadi tu vatera tu kare vantu wokuhuguvara?

¹⁴ Nondunge kuvhura kuvatera Mukriste a dive “siruwo sokumwena nosiruwo sokuuyunga.” (Muud. 3:7) Monompo dimwe kwa kara mo mbuyungiso ezi asi ‘kumwena hansa kupitakana kuuyunga unene.’ Eyi kutanta asi poyiruwo yimwe twa hepa kumwena mevango lyokuuyunga yuma yongandi. Eyi yiyo nye etjangwa lyomoYisewe 11:12 ali tu rondwere asi: “Nsene asi o munandunge, to mwena teete.” Tu tareni sihonena esi sina kukwama ko. Mukuronambunga gumwe nkenye apa kumupura yipo a ka vatere nombungakriste edi adi ligwanekere nomaudigu. Tu tareni eyi ga uyungire mukuronambunga gumwe kumuhamena. Age kwa tente asi: “Age nkenye apa kutakamesa yipo a dire kuuyunga yininke yemehoramo yomonombungakriste dapeke.” Mokumona asi mukuronambunga ogo kuruganesa nawa nondunge dendi, vakuronambunga womombungakriste zawo va mu fumadeka. Awo kukara nehuguvaro asi age kapi naka tantera wopeke yininke yemehoramo.

15. Gava sihonena esi sina kulikida konda zeyi nava kuhuguvarera nsene asi ove kuuyunga usili.

¹⁵ Kuuyunga usili kuna kara sikara simwe esi nasi tu vatera tu kare vantu wokuhuguvara. Ose kuhuguvara muntu ogu a uyunga usili morwa twa yi diva asi age nkenye apa nga uyunga usili. (Efe. 4:25; Heb. 13:18) Pasihonena, tu tante asi ono hara kuwapukurura nkedi zoge zokuronga. Ove kuvhura kupura ko gumwe a purakene koruha roge oru ono kara naro mepongo ntani nokukupa ko magano yipo o dive apa no wapukurura. Yilye ogu no vhura kuhuguvara yipo a ku pe ko evyukiso lyouhunga? No huguvara muntu ogu naku tantera yuma eyi ono hara kuzuvha  ndi ogu naku tantera usili? Twa yi diva asi ove no vhura kurugana youhunga. Bibeli kutanta asi: “Kupukurura muntu moyitarameho yendi hasa, kupitakana pokumugazaresa asi ove kapi o mu pakere mbili nampili nakauke. Mukweni nsene ta ku zuvhisa kukora komutjima, nawa tupu.” (Yis. 27:5, 6) Nampili ngomu nayi tu karera udigu kutambura epukururo eli ava tu pe, nye mwaza siruwo ose ngatu gwanena mo uwa mepukururo eli atu pe kaume gwetu ogu a uyunga usili.

16. Ngapi omu etjangwa lyomoYisewe 10:19 ali likida mulyo gokukara nelipangero?

¹⁶ Ayo ya kara nomulyo tu kare nelipangero nsene tuna hara wopeke va tu huguvare. Sikara oso ngasi tu vatera tu mwene apa ngava tu sininika tu uyunge yininke yemehoramo. (Resa Yisewe 10:19.) Ayo kuvhura kutudigopera kukara nelipangero nsene kuna kuruganesa malikwamo gokointaneta. Nsene kapi tuna kutakamesa, ose kuvhura kupwagesa yininke yemehoramo kovantu wovanzi twa hana kuyidivira. Nsene tu pwagesa mauzera ogo kosikwakonentu setu, ose kwato eyi ngatu vhura kurugana ko monkedi omu vantu ngava ruganesa mauzera ogo ndi maudigu aga ngayi vhura kuretesa po. Elipangero kutuvatera hena yipo tu mwene apa varwanesi ava hetekere ko kutusininika tu uyunge yininke eyi nayi tura vanavazinyetu mosiponga. Ano eyi kuvhura kuhoroka apa ava tu puragere vaporosi womosirongo esi va silika sirugana setu. Ose kuvhura kutura pasirugana mpango ezi ‘pokuhonza kokana ketu’ moukaro ou ndi momaukaro gamwe hena. (Epis. 39:1) Twa hepa kukara wokuhuguvara kovantu navenye, yikare asi kovanekoro, kovakaume, kovanavazinyetu ndi kwankenye ogu. Mokuninka asi va tu huguvare, ntudi twa hepa kukara nelipangero.

17. Yisinke natu rugana yipo mombungakriste mu kare vantu ava va li huguvara-huguvara?

¹⁷ Tuna hafa kweyi Jehova ga tu kokera kombunga zovanavazinyetu omu mwa kara vantu veharo ntani wokuhuguvara. Natuvenye twa kara nositumbukira sokurugana ko yuma yipo vanavazinyetu va tu huguvare. Nsene natuvenye pamundinda tu likida eharo nelinunupiko nonondunge nokuuyunga usili ntani nelipangero, natuvenye womombungakriste ngatu li huguvara. Twa hepa kutwikira kurugana paapa twa hulira yipo vantu va tu huguvare. Ngano tu honeneni Karunga gwetu Jehova nokutwikira kuyilikida asi kuvhura kutuhuguvara.