Tu zeni tu ka tare omu Bibeli za limburura mapuro ogo.

Yirugana 24:15 kututantera asi Karunga nga ka “vhumbura vahungami nava va dira kuhungama.” Vahungami kuna kara vantu ava ngava limburukwa Karunga komeho va fe, yipo nye madina gawo va ga tjanga mobuke zomwenyo. (Mara. 3:16) Ano vantu ava va dira kuhungama kwa kwatera mo vantu ava va dilire kukara nompito zokulironga kuhamena Jehova komeho va fe, yipo nye madina gawo kapi va ga tjanga mobuke zomwenyo.

MwaJohanesa 5:28, 29 kwa tumbura mo hena nombunga dokulifana ngwendi edi va tumbura moYirugana 24:15. Jesus kwa uyungire asi: “Ava va rugana yoyiwa ngava vhumbukira mwenyo gwanarunye ano ava va rugana yoyidona ngava vhumbukira mpanguro.” Vahungami kwa rugene yininke yoyiwa komeho va fe. Yipo nye awo ngava vhumbukira mwenyo gwanarunye morwa madina gawo mogeli simpe mobuke zomwenyo. Nye nampili ngoso, vantu ava va dira kuhungama kwa rugene yininke yoyidona komeho va fe. Awo ngava vhumbukira mpanguro. Madina gawo kapi va ga tjanga mobuke zomwenyo ntani awo ngava ka kara nosiruwo sompanguro ndi sokukavatarera nawa-nawa. Posiruwo oso, awo ngava ka gwana mpito zokukalironga kuhamena Jehova, kutunda nye opo madina gawo ntani nye ngava ka ga tjanga mobuke zomwenyo.

MEhororo 20:12, 13 kwa faturura mo asi navenye ava ngava ka vhumbura ngava ka hepa kukalimburukwa yininke eyi “va tjanga monobukegango.” Ado kuna kara noveta edi ngaka tu pa Karunga mouzuni woupe. Jehova ngaka zonagura po ava ngava dira kukamulimburukwa.—Jes. 65:20.

Ndaniyera 12:2 kwa pumba asi vantu vamwe “ngava vhumbukira mwenyo gwanarunye, ano ava vamwe nomuga noruhepo rwanarunye.” Velise ezi kwa uyunga yitundwamo yokuhulilira yovantu ava ngava ka vhumbura. Awo ngava ka gwana “mwenyo gwanarunye” ndi “nomuga noruhepo rwanarunye.” Ano kehagero lyonomvhura eyovi, vamwe ngava ka gwana mwenyo gwanarunye ano vamwe ngava kava zonagura po narunye.—Ehor. 20:15; 21:3, 4.

Tu tareni sihonena esi sina kukwama ko. Ukaro wovantu ava ngava ka vhumbura kuvhura kuuhetakanesa kovanayirongo ava vana hara ku ka tunga mosirongo naso peke. Vantu wovahungami kwa fana ngwendi vanayirongo ava ava pe epulisiro lyokukatunga mosirongo naso peke morwa yirugana yawo ndi mokukakara vatungi mosirongo sapeke. Ano mokulisiga, vantu ava va dira kuhungama kwa fana ngwendi vanayirongo ava a li pe epangero epulisiro lyokukara mosirongo mosiruwo tupu sosisupi ngovadinguli. Nye nampili ngoso, vanayirongo owo navenye va hepa kulimburukwa noveta domosirongo oso, yipo asi va gwane epulisiro lyokutwikira kukara vatungi womosirongo oso, ano nsene va dira kuyirugana oyo epangero lyosirongo oso kapi nga li va pulisira va twikire kukara mosirongo oso. Mokulifana, vantu ava va dira kuhungama ava ngava ka vhumbura, mokuninka asi va ka twikire kukaparuka moParadisa, awo ngava hepa kuka limburukwa nompango daJehova ntani noku ka yi likida asi awo vahungami. Ntani hena yikare asi epulisiro musinke ava gwana vanayirongo komeho va ka tunge mosirongo naso peke, komeho vamwe kuvhura ngava ka gwane epulisiro lyoku ka twikira kuka tunga mosirongo oso ano vamwe epangero kuvhura nga li tokore ku va gusa mo mosirongo. Etokoro lyokuhulilira eli ava gwana vanayirongo, kwa korera konkareso zawo noyirugana yawo eyi ava rugana mosirongo sosipe. Mokulifana, yitundwamo yokuhulilira yava ngava ka vhumbura ngayi ka korera koulimburukwi wawo kwaJehova ntani nokoyirugana yawo eyi ngava ka rugana mouzuni woupe.

Jehova kapisi Karunga tupu gonkenda nye hena age Karunga ogu ga hara uhungami. (Deut. 32:4; Epis. 33:5) Age nga likida eharo lyendi kovantu navenye pokukavhumbura vahungami nava va dira kuhungama. Nye age nga ndindira ko kwawo navenye ngava ka limburukwe konompango dendi. Vaava tupu ngava ka mu hara nokukalimburukwa konompango dendi yiwo tupu ngava ka pulisira yipo va ka twikire kukaparuka mouzuni woupe.