Kuliza no-1 Vakolinte 15:8, Paurusa kwa uyungire asi: “Moruhura ta ya monekere nge ame ogu na fana ngwendi mukeke ogu va hampuruka ago mazuva ga hana kusika mo.” Nare, ose kwa yi kwete egano asi apa Paurusa ga uyungire nonkango odo age kwa tembe kweyi ya mu horokerere apa ga mwene emoneko lyaJesus age opo mouyerere wemeguru ana kara. Ayo kwa monekere ngwendi asi Paurusa kwa mu pere mpito zokumuhampuruka hena ndi zokumuvhumbura koufe pampepo, komeho li tameke evhumbuko lyovagwavekwa eli lya ya tamekere konyima zonomvhura dononzi. Nye nampili ngoso, konyima zokukonakona velise ezi momunene, ayo kulikida asi pwa hepa ekwatogano lyepe kuhamena velise ezi.

Yosili, Paurusa apa kwa tembe kweyi ya mu horokerere. Nye yisinke ga tembe apa ga uyungire asi age kwa fene ngwendi “mukeke ogu va hampuruka ago mazuva ga hana kusika mo”? Pana kara yininke yimwe eyi nampo ga tembe.

Eyi ya mu horokerere kuna kara sininke esi ga dilire kundindira. Ayo kutetukisa vantu apa mukeke ava mu hampuruka ago mazuva gendi go kumuhampuruka ga hana kusika mo. Apa Sauru (ogu va ya tumbwire konyima asi Paurusa) ga zire koDamasikusi a ka hepeke Vakriste, age kapi ga yi ndindilire asi na ka mona emoneko lyaJesus ogu va vhumbwire koufe. Eyi ya mu horokerere, kapisi gelike tupu ya tetukisire, nye ayo kwa tetukisire hena Vakriste ava ga here kukahepeka mositata. Mokugwederera ko, emoneko eli ga mwene Paurusa, kwa kere lyokutetukisa morwa kapi ga vhulire kumona ure womazuva gongandi.—Yirug. 9:1-9, 17-19.

Paurusa kwa tulire po malitjindjo “posiruwo sepuko.” Nkango zomoRugereka ezi va toroka asi “mukeke ogu va hampuruka ago mazuva ga hana kusika mo” kuvhura hena ku zi toroka asi “mukeke ogu va hampuruka posiruwo sepuko.” Bibeli zovaJerusarema kwa toroka nkango ozo asi: “Ayo kwa monekere ngwendi asi kwa hampurukire nge posiruwo esi va dilire kuyindindira vantu.” Apa Paurusa ga tulire po erunduruko, posiruwo oso Jesus age nare ga tengura meguru. Mokulisiga novantu ava ga tembe Paurusa, ava va tumbura monovelise dimwe domo-1 Vakolinte eganuno 15, age kapi ga mwene Jesus ogu va vhumbwire koufe komeho a tengure meguru. (1 Kol. 15:4-8) Nye nampili ngoso, Paurusa ga gwene mpito zokumona Jesus konyima zapa va mu vhumbwire, nampili ngomu ya horokere “posiruwo sepuko.”

Paurusa kwa uyungire kuhamena mwene monkedi zokulinunupika. Valirongi vamwe kwa uyunga asi ntanto ezi ga ruganesere Paurusa apa, kuvhura kugava egano lyedona. Nsene asi yiyo ga tembe Paurusa oyo, eyi kulikida asi age kwa tembe asi situmbukira sokukara murongwa gwaJesus kapi sa mu waperere. Ntani age kwa uyungire hena asi: “Nyame gekuto lyenunu po kovapositoli navenye ntani kapi na fira kutumbura nge asi mupositoli, morwa ngani hepeke mbungakriste zaKarunga. Nye konkenda zaKarunga zonene na ya gwana situmbukira esi.”—1 Kol. 15:9, 10.

Ayo kumoneka asi Paurusa kwa tembe kemoneko ndi monkedi ezi ga dilire kundindira apa Jesus ga mu monekerere, elitjindjo eli ga tulire po posiruwo esi ga dilire kundindira, ndi nampo age kwa gazarere asi emoneko eli ga mwene kapi lya mu fililire. Nye yikare asi yisinke eyi ga tembe Paurusa, eyi ya mu horokerere kwa kere nomulyo unene kwendi. Eyi kwa mu ninkisire a yi pure nawa-nawa asi Jesus vana mu vhumbura koufe. Eyi nampo yiyo ya mu ninkisire a ruganese nkenye apa sihorokwa esi sa mu horokerere esi ga dilire kundindira apa nga rongo wopeke kuhamena evhumbuko lyaJesus.—Yirug. 22:6-11; 26:13-18.