1. Morwasinke atu gavere malimbururo momapongo?

 MORWASINKE atu wizire komapongo? Somulyo po unene, ose kuwiza komapongo yipo tu ya hamberere Jehova. (Epis. 26:12; 111:1) Ose hena kuwiza komapongo yipo tu ya likorangede-korangede moyiruwo eyi yoyidigu. (1 Tes. 5:11) Apa atu gava malimbururo momapongo, ose kusikisa mo yininke oyo.

2. Poyiruwo musinke natu vhura kugava malimbururo momapongo?

² Nkenye sivike ose kukara nonompito dokugava malimbururo komapongo. Pasihonena, moyikondovike, ose kuvhura kulihameka mo pokugava malimbururo poruha rwElirongo lyoRuhungu. Ano momapongo gomokatji komosivike ose kuvhura kugava malimbururo poruha Papara ugawo womoBibeli, pElirongo lyoBibeli lyombunga ntani pomaruha gamwe aga ava pitisire omu a mu hamene mapuro.

3. Yininke musinke nayi tu ninkisa yi tu karere udigu kugava malimbururo ntani ngapi omu etjangwa lyomoVahebeli 10:24, 25 na li tu vatera?

³ Natuvenye tuna hara kuhamberera Jehova ntani noku korangeda vapuli vakwetu. Nye pwa kara yininke eyi nayi tu ninkisa yi tu karere udigu kugava malimbururo. Kuvhura tulizuvhe woma wokugava malimbururo ndi kuvhura tu hare kugava malimbururo gomanzi nye poyiruwo yimwe kapi ava tu like. Yisinke nayi tuvatera? Ose kuvhura kugwana elimbururo mombilive ezi ga tjenge mupositoli Paurusa koVahebeli. Apa Paurusa ga uyungire mulyo gokuponga kumwe, age kwa uyungire asi twa hepa kudemenena po ‘mokulikorangeda-korangeda.’ (Resa Vahebeli 10:24, 25.) Ose kapi ngatu lizuvha woma wounene wokugava elimbururo nsene tu diworoka asi ose kuvhura tu korangede wopeke nampili kuna gava elimbururo lyesupi tupu. Ano nsene kapi vana ku tu lika yikando yoyinzi, kuvhura tu kare noruhafo  asi vamwe womombungakriste nava kara nompito zokugava malimbururo.—1 Pet. 3:8.

4. Yitwa musinke yitatu natu ka zogera mosirongwa esi?

⁴ Mosirongwa esi, pomuhowo ta tu ka zogera omu natu likorangeda-korangeda nsene asi ose kwa kara mombungakriste zonunu omu mwa kara vantu wovasesu ava ava gava malimbururo. Ntani, natu kazogera omu natu likorangeda-korangeda nsene asi ose kwa kara mombungakriste zonene omu mwa kara vantu wovanzi ava ava like yipo va gave malimbururo. Ano mokukahulisa, natu ka zogera nonkedi dimwe omu natu gava malimbururo getu yipo ga korangede wopeke.

5. Ngapi natu vhura kulikorangeda-korangeda nsene asi mombungakriste zetu kwa kara mo vantu wovasesu?

⁵ Mombungakriste zonunu ndi mokambunga, kapi a mu kara vantu wovanzi ava na vhura kupa mpito ogu ana kupitisitisira yipo va gave malimbururo. Poyiruwo yimwe, ogu ana kupitisira kuvhura nampo a ndindire ko siruwo songandi komeho gumwe a lizambere a like. Epongo kuvhura kumoneka ngwendi kapi lina kutovara, ano oyo kapi ayi korangeda vanavazinyetu. Yisinke no vhura kurugana? Lika nkenye apa. Pokuyirugana ngoso, ayo kuvhura ngayi tumangede wopeke yipo va li hameke mo nkenye apa.

6-7. Yisinke nampo natu rugana yipo tu dire kukara nowoma wounene wokugava malimbururo?

⁶ Yisinke norugana nsene asi ove kulizuvha woma wokugava malimbururo? Sinzi sovantu nawo yimo ava lizuvhu ngoso. Nye nampili ngoso, mokuninka asi o korangede vapuli vakweni, kuvhura o gazadare ko nonkedi dimwe edi na di kuvatera o dire kukara nowoma wounene wokugava malimbururo. Ngapi omu nampo noyirugana oyo?

⁷ Kuvhura o gwane magano gamwe gomawa aga na ga kuvatera moyirongwa yomo maRuhungu b aga va pwagesa nare. Pasihonena, liwapayikira nawa. (Yis. 21:5) Nsene o diva unene eyi muna ku ya lironga, ayo nga yi kuvatera o dire kukara nowoma wounene wokulika yipo o gave elimbururo. Ntani hena, gava elimbururo lyesupi lyokuvyukilira positwa. (Yis. 15:23; 17:27) Ove kapi ngo kara nowoma wounene nsene o gava elimbururo lyesupi, kupitakana kugava elimbururo lyere. Elimbururo lyesupi, nampo lyontanto zimwe ndi mbali ngoso, kuvhura kurerupira vanavazinyetu va li kwate egano kupitakana elimbururo lyere lyomagano gomanzi. Pokugava elimbururo lyesupi monokango danyamoge, ove ngo yi likida asi ono liwapayikire nawa ntani asi ono kwata nawa egano sirongwa esi muna ku ya zogera.

8. Ngapi omu Jehova a tara elituromo lyetu?

⁸ Ngapi nsene asi wa hetekera ko kuruganesa magano gamwe ogo nye simpe kulizuvha woma wokugava elimbururo limwe ndi kupita opo? Kara nehuguvaro asi Jehova kuhafera elituromo lyoge lyokurugana eyi o vhuru kurugana. (Ruk. 21:1-4) Jehova kapi a tu pura tu rugane yininke yoyinzi eyi natu dira kusikisamo. (Fil. 4:5) Demenena kweyi no vhura kurugana ko noku litulira po sitambo so ku yi sikisamo ntani kanderera yipo o kare ono litura. Pomuhowo, sitambo soge kuvhura nampo si kare sokugava elimbururo lyesupi.

9. Morwasinke nampo na yi karera udigu kugava malimbururo mombungakriste zonene?

⁹ Nsene mombungakriste zeni kwa kara mo vazuvhisi wovanzi, kuvhura yi retese po hena udigu umwe wapeke. Nampo vanavazinyetu wovanzi ku va pa mpito yipo va gave malimbururo, ano ove kapi ava ku pe nkenye apa mpito.  Pasihonena, Danielle nga hafere nkenye apa kugava malimbururo momapongo. c Age kwa tere kugava malimbururo ngoruha roukareli wendi ntani ngonkedi zokukorangeda wopeke ntani hena ngonkedi zokunkondopeka epuro lyanyamwendi momarongo goBibeli. Nye apa ga dirukilire kombungakriste zonene, kapi ngava mu like nkenye apa, poyiruwo yimwe mepongo nalinye kapi nga gwana mpito zokugava elimbururo. Age kwa tanta asi: “Ame kwa lizuvhire ngwendi asi kapi nina kugwana hena mpito zokulimburura. Ano apa ayi horoka oyo nkenye apa, kuvhura o ya tameke kugazara nsene asi kuna ku yi ruganena mowina.

10. Yisinke nampo natu vhura kurugana yipo tu gwane nompito dokugava malimbururo?

¹⁰ Nove wa lizuvha rumwe ngwendi moomu ga li zuvhire Danielle ndi? Nsene yimo, ayo nampo kuvhura yi ku ninkise o hageke kugava malimbururo ntani nokupurakena tupu mepongo. Nye wa ha hageka kugava malimbururo. Yisinke novhura kurugana? Ayo kuvhura ngayi kuvatere nsene o liwapayikira malimbururo gomanzi mwankenye epongo lyomombungakriste. Makura nsene kapi vana ku pe mpito o limburure ketamekero lyosirongwa, ove kuvhura simpe kugwana nompito dimwe yipo o limburure mwaza epongo. Nsene kuna kuliwapayikira Ruhungu, gazadara ko omu nkenye paragarafu zina li zi nosiparatjangwa. Nsene o yi rugana ngoso, ove kuvhura ngo gave malimbururo mwaza sirongwa nasinye. Mokugwederera ko, nampo kuvhura o li wapayikire mo kuka gava elimbururo monoparagarafu omu va zogera marongo gomoBibeli aga ga kara udigu mo ku ga faturura. (1 Kol. 2:10) Morwasinke? Morwa posiruwo oso, vantu wovasesu tupu ava like va gave malimbururo. Nye yisinke novhura kurugana nsene asi konyima zokutura pasirugana magano aga ntani konyima zomapongo gomanzi, ove simpe kapi ono kugwana mpito zokugava elimbururo? Kuvhura nampo o uyunge nogu na ka pitisira nzogera komeho li tameke epongo ntani noku mu tantera epuro eli ono hara kukalimburura.

11. Yisinke a li tu korangeda etjangwa lyomoVafilipi 2:4 tu rugane?

¹¹ Resa Vafilipi 2:4. Mupositoli Paurusa kwa korangedere Vakriste va kondjere uwa wa va wopeke. Ngapi omu natu tura pasirugana epukururo  eli nsene mepongo tuna kara? Kuna kara pokudiworoka asi vakwetetu nawo vana hara kulihameka mo mokugava malimbururo ngwendi nyose.

12. Nkedi musinke zongwa zokukorangeda wopeke momapongo? (Tara hena efano.)

¹² Gazadara ko kositwa esi. Nsene asi ove kuna kuzogera novakaume woge, ngoso ove nouyunga unene yipo va dire kugwana mpito zokuuyunga ndi? Hawe! Ove ono hara nawo va li hameke mo monzogera. Mokulifana, ose tuna hara kugava mpito kovanavazinyetu wovanzi yipo nawo va gave malimbururo mepongo. Nkedi zimwe zongwa omu natu vhura kukorangeda vanavazinyetu kuna kara poku va pa ko mpito yipo va gave malimbururo. (1 Kol. 10:24) Tu zeni tu ka zogere omu natu vhura kuyirugana oyo.

13. Yisinke natu rugana yipo tu gave ko mpito kovantu wovanzi yipo nawo va gave malimbururo?

¹³ Sininke simwe natu rugana kuna kara pokusupipika malimbururo getu ntani ga vyukilire positwa, yipo tu pe ko wopeke mpito va gave malimbururo gawo. Vakuronambunga ntani novazuvhisi ava va kara nediwo kuvhura va ture po sihonena sosiwa. Nampili kuna kugava elimbururo lyesupi, nyokera po kuuyunga yitwa yoyinzi. Nsene o uyunga hambara yitwa nayinye yomoparagarafu, wopeke kapi nava kara neyi yoyinzi yokulimburura. Pasihonena, moparagarafu ezi kuna gava mo magano gavali. Ago kuna kara kusupipika malimbururo getu, ntani kunyokera po kuuyunga yitwa yoyinzi. Nsene nyove vana howo ku pa mpito yipo o gave elimbururo moparagarafu ezi, hetekera ko kulimburura sitwa simwe tupu.

14. Yisinke na yi tu vatera yipo tu tokore asi yikando yingapi natu vhura kulika? (Tara hena efano.)

¹⁴ Ruganesa nondunge nsene kuna kutokora asi yikando yingapi no gava malimbururo. Nsene tu lika nkenye apa, kuvhura yi ninkise ogu ana kupitisira nzogera a tu like nkenye apa nampili yikare asi wopeke simpe kapi vana gwana mpito zokugava malimbururo. Ano eyi kuvhura kudompesa wopeke yipo va dire kulika.—Muud. 3:7.

15. (a) Yisinke natu rugana nsene kapi vana tu pe mpito tu gave elimbururo? (b) Ngapi omu vanavazinyetu ava ava pitisire maruha momapongo nava gazadara ko kuhamena nkenye gumwe? (Tara kakende “ Nsene kuna kupitisira nzogera.”)

 ¹⁵ Apa vazuvhisi wovanzi ava like posiruwo selirongo, ose nampo kapi natu vhura kugwana mpito zokugava malimbururo gomanzi ngwendi moomu tuna yi harere. Poyiruwo yimwe, munazinyetu ogu ana kupitisira kuvhura a dire kutulika nampili rumwe. Oyo kuvhura kutudompesa, nye nampili ngoso twa hepa kuhetekera ko kunyokera po kuhanduka nsene kapi vana tu pe mpito tu gave elimbururo.—Muud. 7:9.

16. Ngapi omu nampo natu vhura kukorangeda wopeke ava ava gava malimbururo?

¹⁶ Nsene kapi ono kuvhura kugava malimbururo gomanzi ngwendi moomu ono yi harere, purakena nawa ngomu wopeke vana kugava malimbururo, ano konyima zepongo, va pandadeka komalimbururo gawo. Epandadeko olyo kuvhura likorangede vanavazinyetu ngwendi moomu tupu hambara li va korangede elimbururo lyoge. (Yis. 10:21) Kupandadeka wopeke kuna kara nkedi zimwe omu natu likorangeda-korangeda.

17. (a) Ngapi omu vakurona nava vatera vana vawo yipo va li wapayikire kugava malimbururo gokuliza nonomvhura dawo? (b) Kuliza novidiyo, yitwa musinke yine na yi tuvatera mokuliwapayikira malimbururo? (Tara hena nonkango dokonhi.)

¹⁷ Ngapi omu hena natu vhura kulikorangeda-korangeda komapongo getu? Nsene asi ove  o mukurona, vatera vana woge wovanona va li wapayikire malimbururo kuliza nonomvhura dawo. (Mat. 21:16) Poyiruwo yimwe, yininke youdigu unene, ngwendi maudigu gomononkwara ndi nonkareso donondona, kuyizogera mosirongwa. Nye nampili ngoso, kuvhura mu kare paragarafu zimwe ndi mbali ngoso edi na vhura kugava malimbururo munona. Ntani vatera vana woge va kwate egano konda zeyi nava dilira ku va pa mpito zokulimburura nkenye apa nava lika. Nsene o va fatwilira monkedi zangoso, ayo ngayi va vatera yipo va dire kudompa nsene wopeke vana va pe mpito zokulimburura mevango lyo ku va lika awo.—1 Tim. 6:18. d

18. Ngapi omu natu nyokera po kuuyunga unene kulihamena nyamwetu nsene kuna kugava elimbururo? (Yisewe 27:2)

¹⁸ Natuvenye kuvhura kuliwapayikira malimbururo aga aga retere Jehova mfumwa ntani noku korangeda vanavazinyetu. (Yis. 25:11) Nampili ngomu poyiruwo yimwe atu gava pausupi elimbururo kuhamena eyi twa li monena, twa hepa kunyokera po kuuyunga yininke yoyinzi yokuhamena kwanyamwetu. (Resa Yisewe 27:2; 2 Kol. 10:18) Mevango lyokuyirugana oyo, twa hepa kudemenena kwaJehova nononkango dendi ntani nokovantu vendi navenye. (Ehor. 4:11) Nye nampili ngoso, nsene asi epuro lyomoparagarafu kuna kutupura tu limburure kuhamena eyi twa li monena, kuvhura tu yi rugane ngoso. Paragarafu zokukwama ko nazi ka likida sihonena sepuro lyangoso.

19. (a) Yitundwamo musinke nga yi kara nsene tu gazadara ko vakwetetu navenye ava ava kara mepongo? (Varoma 1:11, 12) (b) Morwasinke o haferere kugava malimbururo mepongo?

¹⁹ Nampili ngomu pwa dira kukara noveta kuhamena omu natu gava malimbururo, natuvenye kuvhura kuhetekera ko kukorangeda vakwetu. Eyi kuvhura kutanta asi kapi ta tu vhuru kugava nkenye apa malimbururo gomanzi. Ndi kuvhura kutanta hena asi nkenye mpito ezi tuna gwana mokugava elimbururo za hepa kukara zina tu gwanene po. Ntani twa hepa kuhafa pokumona asi wopeke nawo vana gwana mpito yipo va gave malimbururo. Nsene tu demenena kouwa wovakwetu apa atu kara momapongo, natuvenye ngatu hafera ‘kulikorangeda-korangeda.’—Resa Varoma 1:11, 12.