1-2. Yisinke twa hepa kurugana ngomu tuna kundindira uzuni woupe?

 OSE KWA KARA norupandu ketumbwidiro lyaJehova lyokukagusa po yininke yoyidona mouzuni ou noku ka pinganesera po uzuni woupe omu ngamu kara uhungami. (2 Pet. 3:13) Nampili ngomu twa dira kudiva asi siruwo musinke uzuni woupe ngau kara po, ose twa kara nomaumbangi aga aga likida asi ose kapi ngatu ndindira siruwo sosire.—Mat. 24:32-34, 36; Yirug. 1:7.

² Nye posiruwo esi, yi kare asi siruwo sokuhura kupi twa kara mousili, natuvenye twa hepa kunkondopeka epuro lyetu metumbwidiro olyo. Morwasinke? Morwa nampili epuro lyokupama kuvhura kusesupa. Mupositoli Paurusa kwa tumbwire epuro lyokudira kupama asi kwa fana ngwendi “nonzo edi adi tu lidingire.” (Heb. 12:1) Mokuninka asi epuro lyetu li dire kusesupa, twa hepa kugazadara ko nkenye apa koyininke eyi ayi likida asi uzuni woupe ntaantani u wize.—Heb. 11:1.

3. Yisinke natu ka zogera mosirongwa esi?

³ Mosirongwa esi natu ka zogera nonkedi ntatu omu natu nkondopeka epuro lyetu momatumbwidiro gaJehova kuhamena uzuni woupe: (1) pokuteda ko kosizoweseso (2) pokugazadara ko kononkondo daJehova ntani (3) pokulitulira po siruwo sokurugana yininke yopampepo. Ntani natu ka zogera omu mbudi ezi Jehova ga tanterere Habakuku nazi nkondopeka epuro lyetu neina. Nye pomuhowo, tu zeni tu ka zogere maukaro gamwe aga tuna kuligwanekera nago ngesi, aga gana hepa epuro lyenene metumbwidiro lyaJehova lyokuhamena uzuni woupe.

 MAUKARO AGA TWA HEPA KULIKIDA EPURO LYOKUPAMA

4. Matokoro musinke ga hepa epuro lyokupama?

⁴ Nkenye ezuva ose kutura po matokoro omu twa hepa kulikida epuro lyokupama. Pasihonena, ose kutura po matokoro kuhamena vakaume, yilihafeso, elirongo, nonkwara, vanona ntani yirugana. Twa hepa kulipura nyamwetu asi: ‘Matokoro gange kulikida asi na yi pura nawa-nawa asi uzuni ou wopokaruwogona tupu ntani asi ntaantani ngau wize uzuni woupe ndi? Ndi ame kurugana yininke yokulifana ngwendi yeyi ava rugana vantu ava va dira kupura asi ngatu ka paruka narunye komeho ndi?’ (Mat. 6:19, 20; Ruk. 12:16-21) Ose ngatu tura po matokoro gomawa nsene tu kara nepuro lyokupama asi uzuni woupe ntaantani u wize.

5-6. Morwasinke twa hepera kukara nepuro lyokupama moyiruwo yomaudigu? Yifanekesa.

⁵ Ose hena kuligwanekera nomaudigu aga aga hepa epuro lyukupama. Ose kuvhura kuligwanekera nomahepeko, uvera wounene ndi yininke yimwe hena eyi nayi tu ninkisa tu dompe. Pomuhowo, ose kuvhura nampo tu lizuvhe asi kuvhura yi tu tompoke kulididimikira udigu wetu. Nye rorunzi maudigu aga kugusa siruwo sosire. Yipo nye, twa hepa epuro lyokupama yipo tu lididimikire ntani noku twikira kukarera Jehova noruhafo.—Rom. 12:12; 1 Pet. 1:6, 7.

⁶ Nsene kuna kuligwanekera noudigu, ose kuvhura nampo tu lizuvhe asi uzuni woupe kapi ngau wiza. Eyi kutanta nye asi epuro lyetu kapi lya pama ndi? Hawe. Tu tareni sifanekeso esi sina kukwama ko. Apa a kukara mufu gomunene, ose namo kuvhura tu lizuvhe asi kwenye kapi nga ku wiza. Nye nampili ngoso, kwenye yiko a ku kara nkenye apa. Mokulifana, apa atu dompo unene, ose nampo kuvhura tu lizuvhe asi uzuni woupe kapi ngau wiza. Nsene epuro lyetu li pama, ose nga tu yidiva asi matumbwidiro gaKarunga nga ka sika mo. (Epis. 94:3, 14, 15; Heb. 6:17-19) Nsene tu kara nehuguvaro lyangoso, ayo ngayi tu vatera tu twikire kutura ukareli waJehova muhowo meparu lyetu.

7. Magazaro musinke twa hepa kunyokera po?

⁷ Ose hena twa hepa epuro lyokupama yipo tu li hameke mo mosirugana sokuzuvhisa. Sinzi sovantu ava atu zuvhisire kulizuvha asi “mbudi zongwa” zokuhamena uzuni woupe waKarunga ou ngau wiza, kapisi usili. (Mat. 24:14; Hes. 33:32) Twa hepa kutakamesa yipo tu dire kukara nomasinganyeko ogo kuhamena eyi atu rongo Jehova. Mokunyokera po oyo yipo yi dire kuhoroka twa hepa kutwikira kunkondopeka epuro lyetu. Tu zeni tu ka zogere ko nonkedi ntatu omu natu yi rugana oyo.

TEDA KO KOSIZOWESESO

8-9. Ngapi omu kuteda ko kosizoweseso na yi nkondopeka epuro lyetu?

⁸ Nkedi zimwe omu natu nkondopeka epuro lyetu kuna kara pokuteda ko kosizoweseso. Sizoweseso ku tu pa ehuguvaro asi matumbwidiro gaKarunga nga ga kasika mo. Apa atu gazadara ko kokonda zeyi Jehova ga gaverere sizoweseso ntani neyi ya hamena mo, ayo kunkondopeka epuro lyetu asi matumbwidiro gaKarunga nga ga kasika mo. Morwasinke twa kuuyungira ngoso?

⁹ Yisinke ya hamenene mo mosizoweseso? Jehova kwa tumine mbeli zendi ogu ga hara yipo va ya mu hampurukire pevhu ngomuntu gokusikilira mo. Apa Jesus ga ya kere pevhu, age kwa li didimikilire maudigu gokulisiga-siga. Ano konyima kwa mu hepekere ntani kwa fire nomfa dokukora. Ozo kwa kere mfuto zondiro unene ezi ga futire Jehova! Karunga gwetu geharo kapi ngano ga pulisilire munendi a ya hepe nokufa yipo ngano asi tu hafere eparu pokaruwogona tupu. (Joh. 3:16; 1 Pet. 1:18, 19) Mokumona asi Jehova kwa geve munendi  ogu ga hara yipo a ya tu vatere, age nga divilisa asi ose nga tu ka paruka narunye mouzuni woupe.

GAZADARA KO KONONKONDO DAJEHOVA

10. Kuliza noVaefeso 3:20, yisinke a vhuru kurugana Jehova?

¹⁰ Nkedi zauvali omu natu nkondopeka epuro lyetu kuna kara pokugazadara ko kononkondo daJehova. Age ga kara nononkondo dokuka sikisa mo nayinye eyi ga tumbwidira kukarugana. Sinzi sovantu neina kugazara asi eparu lyanarunye mouzuni woupe, kapi ngali horoka. Nye Jehova nkenye apa kutumbwidira yininke eyi na va dira kusikisa mo vantu. Age kuvhura a yi rugane oyo, morwa age Munankondo nadinye. (Joba 42:2; Mar. 10:27) Yipo nye ayo kapi ayi tu tetukisa apa Jehova a tu tumbwidire yininke yokutetukisa.—Resa Vaefeso 3:20.

11. Gava ko sihonena simwe somatumbwidiro gaKarunga gokutetukisa. (Tara kakende “ Matumbwidiro gamwe gokutetukisa aga ga sikilire mo.”)

¹¹ Tu tareni ko yininke yimwe eyi Jehova ga tumbwidilire vakareli vendi mosiruwo sanare, eyi ya monekere ngwendi kapi ta yi vhuru kusika mo. Age kwa tanterere Abirahamu naSara asi ngava kara nomuna gomumati moukurupe wawo. (Gen. 17:15-17) Age hena kwa tanterere Abirahamu asi ruvharo rwendi ngava ru pa sirongo saKanani. Nomvhura nadinye dononzi apa ruvharo rwaAbirahamu roVaisraeli va ka kere vapika moEgipite, ayo nampo kwa monekere ngwendi asi etumbwidiro olyo kapi ngali sika mo. Nye etumbwidiro olyo lya ya sikire mo. Konyima, Jehova kwa divisire asi Elisabeta nga reta munona moukurupe wendi. Age hena kwa tanterere Mariya, mukadona ogu ga dira kuligwanekera rumwe panyama nomugara, asi nga hampuruka munona gomumati ogu ga tumbwidilire Jehova nare-nare mosikunino saEdeni. Eli kuna kara etumbwidiro limwe eli lyasikilire mo.—Gen. 3:15.

12. Yisinke a li tu huguvaresa etjangwa lyaJosuwa 23:14 ntani Jesaya 55:10, 11 kuhamena nonkondo daJehova?

¹² Apa atu gazadara ko komatumbwidiro nagenye aga ga tulire po Jehova ntani nomu ga ga sikisa mo, ayo kutuvatera tu kwate egano asi age ga kara nononkondo dononene. Eyi kuninkisa epuro lyetu linkondopare. (Resa Josuwa 23:14; Jesaya 55:10, 11.) Eyi kutuvatera yipo tu liwapayikire mokuvatera wopeke yipo va kwate egano asi etumbwidiro lyaJehova kuhamena uzuni woupe nga li ka sika mo. Jehova mwene kwa uyungire kuhamena eguru lyepe nevhu lyepe asi: “Nonkango edi usili ntani kuvhura kudihuguvara.”—Ehor. 21:1, 5.

RUGANA YININKE EYI NAYI KUHEDESERA PEPI NAJEHOVA

13. Ngapi omu mapongo gombungakriste na ga tuvatera tu nkondopeke epuro lyetu? Faturura.

¹³ Nkedi zautatu omu natu nkondopeka epuro lyetu kuna kara pokulitulira po siruwo sokurugana yininke yopampepo. Pasihonena, tu tareni omu atu gwanene mo mauwa momapongo getu gombungakriste. Anna, ogu ga lihameka mosirugana sokuzuvhisa nomvhura dononzi mononkedi dokulisiga-siga, kwa tanta asi: “Mapongo kwa vatera nge ni twikire kunkondopeka epuro lyange. Nampili yi kare asi mupitisili kapisi murongi gomuwa ndi kapi a uyunga nkenye eyi yoyipe, ame narunye kugwanena mo yuma eyi nayi vatera nge ni kwate nawa egano Bibeli, ntani ayo kunkondopeka epuro lyange.” b Yosili nose epuro lyetu kuvhura kunkondopara nsene tu purakena komalimbururo govanavazinyetu apa atu kara komapongo.—Rom. 1:11, 12; 10:17.

14. Ngapi omu sirugana sokuzuvhisa a si nkondopeke epuro lyetu?

¹⁴ Ose hena kunkondopeka epuro lyetu apa atu li hameke mo mosirugana sokuzuvhisa. (Heb. 10:23) Barbara, ogu ga karera Jehova  nomvhura dokupitaka po 70, kwa tanta asi: “Ame kwa dimburura asi sirugana sokuzuvhisa kunkondopeka epuro lyange. Moomu ani litura mo unene mokutantera ko wopeke kuhamena matumbwidiro gaJehova gokuhafesa, yimo hena epuro lyange a li nkondopara unene.

15. Ngapi omu elirongo lyanyamwetu lyoBibeli ali nkondopeke epuro lyetu? (Tara hena mafano.)

¹⁵ Pwa kara sininke hena simwe esi a si tu vatere tu nkondopeke epuro lyetu: elirongo lyanyamwetu lyoBibeli. Susan kwa tanta asi ayo ku mu vatera apa a tura po elikwamo lyanyamwendi lyokulironga. Age kwa uyunga asi: “MoSondaha, ame kulironga sirongwa sokukwamako somoRuhungu. Ano moMandaha nomoUvali, ame kuliwapayikira epongo lyomokatji kosivike. Ano momazuva gokuhupa ko, ame kurugana elirongo lyanyamwange lyoBibeli.” Mokumona asi age nkenye apa kukwama elikwamo eli ga tura po lyokulironga Bibeli, Susan kutwikira kunkondopeka epuro lyendi. Irene, ogu ga kere komberewa zonene zoNombangi daJehova nomvhura dononzi, kwa tanta asi ayo kunkondopeka epuro lyendi apa a lirongo mauporefete gomoBibeli. Age kwa tanta asi: “Ayo kutetukisa nge sili mokumona asi mauporofete gaJehova kusikiliramo nampili moyininke tupu yoyinunu. c

“AYO YIYO TUPU KUHOROKA”

16. Morwasinke ehuguvaro eli Jehova ga geve kwaHabakuku lyakarera nomulyo kwetu nose neina? (Vahebeli 10:36, 37)

¹⁶ Vakareli vaJehova vamwe kwa ndindira siruwo sosire yipo uzuni ngano u hage po. Vantu vamwe kugazara asi ehagero lyouzuni ou kuna kuliranga. Nye Jehova ga diva omu vakareli vendi ava lizuvhu. Age kwa huguvaresere muporofete Habakuku asi: “Yi tjanga tupu, yeeyi ruveze simpe kapi runa siki mo yi horoke. Nye siruwo kuna kugenderera unene, asi eyi nina kukulikida yi ka sike mo. Kuvhura yi liwore, nye yi ndindira tupu. Ayo yiyo tupu kuhoroka nogu si ogu na yi rangesa.” (Hab. 2:3) Ngoso Karunga kwa geve ehuguvareso olyo kwaHabukuku  tupu ndi? Ndi nonkango dendi kwa tamba hena noku kwetu neina? Jehova kwa gendesere mupositoli Paurusa a tjangere Vakriste nonkango odo, ava vana kundindira nononkondo uzuni woupe. (Resa Vahebeli 10:36, 37.) Yosili, ose kuvhura tu kare nehuguvaro asi nampili ngomu etumbwidiro lyaJehova lyo ku ya tu zowora lina kumoneka ngwendi kuna kugusa siruwo, “ayo yiyo tupu kuhoroka nogu si ogu na yi rangesa.”

17. Ngapi omu munazinyetu gumwe gomukadi ga tulire pasirugana epukururo lyaJehova eli ga geve kwaHabakuku?

¹⁷ Sinzi sovakareli vaJehova kwa tura pasirugana epukururo eli asi ‘yindindireni tupu.’ Vamwe kwa yi rugana ure wonomvhura dononzi. Pasihonena, Louise kwa tamekere kukarera Jehova mo 1939. Age kwa uyunga asi: “Posiruwo sina, ame kwa gazarere asi Harumagedoni nga zi wiza komeho ni manese sekondere zange. Nye oyo kapi ya horokere. Yihorokwa yovantu ava va tumbura moBibeli ava va ndindilire mwaJehova yipo a sikisemo matumbwidiro gendi, kwa vaterere nge ni ndindire mwaJehova yipo nga ka sikise mo matumbwidiro gendi. Ame kwa resere kuhamena Nowa, Abirahamu, Josefa ntani navamwe hena ava va ndindilire siruwo sosire komeho Jehova a ya va pe eyi ga va tumbwidilire. Kukara nendindiro kwa vatera nge ntani navamwe yipo tu yi pure nawa-nawa asi uzuni woupe pepi una kara.” Vanavazineyetu wovanzi ava va karera Jehova nomvhura dononzi nawo va yi kwatesa ko eyi.

18. Ngapi omu kukara nepuro mounsitwe na yi nkondopeka epuro lyetu asi uzuni woupe ngau wiza?

¹⁸ Ayo usili asi uzuni woupe simpe kapi una wiza. Nye gazadara ko koyininke yimwe eyi ya kara po ngesi, pasihonena nombunguru, yitji, yikorama ntani vantu. Kwato muntu ogu na vhura kusinganyeka asi yininke eyi kapi ya kara po, nampili ngomu posiruwo simwe ya dilire kukara ko. Ayo kwa kara po morwa Jehova yige ga yi sita. (Gen. 1:1, 26, 27) Karunga gwetu kwa tumbwidira hena asi age nga retesa po uzuni woupe. Yosili age nga ka sikisa mo etumbwidiro olyo. Mouzuni woupe, vantu ngava ka hafera eparu lyanarunye noukanguki wouwa. Kuvhura tu kare nehuguvaro asi uzuni woupe ngau wiza posiruwo esi ga tura po Karunga mwene.—Jes. 65:17; Ehor. 21:3, 4.

19. Ngapi omu nonkondopeka epuro lyoge?

¹⁹ Ano posiruwo esi, rugana paapa wa hulira yipo o nkondopeke epuro lyoge. Kara nkenye apa norupandu kosizoweseso. Gazadara ko kononkondo daJehova. Rugana yininke eyieyi nayi kuhedesera pepi naJehova. Nsene o yi rugana ngoso, nove ngo kara gumwe govantu ava ngava kapinga eyi ga ‘tumbwidira Karunga morwa kulididimika ntani kulikida epuro.’—Heb. 6:11, 12; Rom. 5:5.