SIRONGWA SELIRONGO 15
Yisinke natu lirongera ko koyitetu yaJesus?
‘Age nga ngendi mosirongo ta rugana yoyiwa ntani nokuverura.’—YIRUG. 10:38.
RUSUMO 13 Kristusa, sihonena setu
ETWAROMO a
1. Faturura eyi ya horokere apa Jesus ga rugene sitetu sendi sokuhova.
GAZARA tupu eyi ya horokere koyiha yehagero lyomvhura 29 mosiruwo setu, apa Jesus ga tamekere nosirugana sendi pevhu. Jesus nozina Mariya ntani novarongwa vendi vamwe, vana va zigida kosipito sononkwara moKana, mukunda ogu kwa karera komukuro godoropa zaNasareta, ezi ga kulilire Jesus. Mariya kuna kara kaume govalikwali owo ntani age nampo kuna kuvatera mokupakera mbili vagenda. Nye posiruwo sosipito, ta pa horoka udigu umwe ou ngano wa swaukisire epata olyo novalikwali wovanona wovape. Vhinyu ta zi pu. b Nampo sivaro sovagenda sinzi kupitakana omu va na yi ndindire. Mariya ta dukire usimbu kwa munendi noku ka mu tantera asi: “Awo kapi vana kara hena novhinyu.” (Joh. 2:1-3) Yisinke ga rugene ko Jesus? Age kwa rugene sininke sokutetukisa; age kwa tjindjire mema pasitetu ga kare “vyinyu zongwa.”—Joh. 2:9, 10.
2-3. (a) Ngapi omu Jesus ga ruganesere nonkondo dendi dopasitetu? (b) Mauwa musinke natu ka gwanena mo pokukona-kona yitetu yaJesus?
2 Jesus nga rugana yitetu yapeke yoyinzi mosirugana sendi sokuzuvhisa. c Age nga ruganesa nonkondo dendi dopasitetu yipo a vatere vantu mayovi nomayovi. Pasihonena, moyitetu yendi yivali omu ga kutikire vagara 5 000 ntani posiruwo sapeke vagara 4 000, amo nampo kwa hamenene mo vantu wokusika ko-27 000 mokuvapakerera navenye nsene o tura ko vakadi novanona ava va kere po. (Mat. 14:15-21; 15:32-38) Moyihorokwa nayinye oyo, Jesus kwa verwire hena vantu wovanzi ava va verere. (Mat. 14:14; 15:30, 31) Gazara tupu omu ya tetukisire mbunga apa Jesus ga va verwire pasitetu ntani noku va pa nondya pasitetu.
3 Ose kuvhura kulirongera ko yoyinzi koyitetu yaJesus neina. Mosirongwa esi, ta tu ka lironga yirongwa yimwe eyi natu lirongera ko koyitetu eyi ga rugene Jesus, eyi nayi vhura kunkondopeka epuro lyetu. Ntani natu ka zogera hena omu natu vhura kuhonena sikara selinunupiko ntani nosikara sonkenda, eyi ga likidire Jesus apa nga rugana yitetu.
YIRONGWA EYI NATU LIRONGERA KO KUHAMENA JEHOVA NAJESUS
4. Yitetu eyi ga rugene Jesus kuturonga yirongwa yomulyo kuhamena yilye?
4 Yitetu eyi ga rugene Jesus kapi tupu ayi tu rongo kuhamena Jesus, nye ayo kuturonga hena kuhamena oGuhwe. Yitetu eyi kwa horokere morwa Jehova yige ntundiliro zononkondo edi da ninkisire yitetu oyo yi horoke. Yirugana 10:38 kututantera mo asi: ‘Karunga kwa gwavekere Jesus nompepo zokupongoka noku mu pa nonkondo, nomu nga rugana uwa nokuverura ava nga hepeke Muzonaguli, yeeyi Karunga kwa kere nage.’ Diworokeni hena asi nayinye eyi nga uyunga Jesus ntani neyi ga rugene, kukwateramo yiyetu eyi ga rugene, age kwa honenene nawa magazaro goGuhwe ntani nomalizuvho gawo. (Joh. 14:9) Tu tareni yirongwa yitatu eyi natu lirongera ko koyitetu yaJesus.
5. Yisinke ya tumangedere Jesus yipo a rugane yitetu? (Mateusa 20:30-34)
5 Sokuhova, Jesus noGuhwe kwa tu hara unene. Apa Jesus ga kere pevhu, age kwa likidire eharo lyenene kovantu pokuruganesa nonkondo dendi dopasitetu yipo a vatere vantu ava ngava hepa. Sikando simwe, vagara vavali wovatwiku kwa mu li kwamberere yipo ava vatere. (Resa Mateusa 20:30-34.) Koneka asi Jesus kwa va ‘fililire nkenda’ makura yipo ga va verwire. Nkango rugano zoRugereka ezi va toroka asi “ta va fire nkenda” kwa tamba konkenda zonene ezi ga kara nazo muntu. Nkenda ozo zonene kuna kara nkedi zokulikida eharo, azo hena kwa tumangedere Jesus a kutike vantu panyama ntani noku verura munayingondwe. (Mat. 15:32; Mar. 1:41) Ose kuvhura kukara nehuguvaro asi Jehova, ‘Karunga ogu ga kara nonkenda,’ ntani naMunendi kwa tu hara unene ntani ayo kuvakoresa apa atu hepa. (Ruk. 1:78; 1 Pet. 5:7) Awo kuna kundindira nononkondo mokukagusa po maudigu nagenye aga aga kundama vantu!
6. Nonkondo musinke ga gava Jehova Karunga kwaJesus?
6 Sauvali, Karunga kwa pa Jesus nonkondo dokugusa po maudigu nagenye govantu. Kupitira moyitetu eyi nga rugana Jesus, age kwa yi likidire asi age ga kara nononkondo dokufunda po maudigu nagenye aga natu dira kufunda po nononkondo danyamwetu. Pasihonena, age ga kara nononkondo dokutumangurura komaudigu nagenye aga za retesa po nzo ezi twa pinga ntani noyitundwamo nayinye eyi azi retesa po nzo, kukwatera mo mauvera ntani nonomfa. (Mat. 9:1-6; Rom. 5:12, 18, 19) Yirugana yendi yoyitetu eyi ga rugene kulikida asi age kuvhura kuverura “nkenye” mauvera ntani nokuvhumbura vafe. (Mat. 4:23; Joh. 11:43, 44) Age hena ga kara nononkondo dokupangera makundungu gosiponga ntani nokumangurura vantu konompepo donondona. (Mar. 4:37-39; Ruk. 8:2) Ayo kutuhengagwida pokudiva asi Jehova kwa gava nonkondo odo kwaMunendi!
7-8. (a) Ehuguvaro musinke ayi tu pe yitetu eyi ga rugene Jesus? (b) Sitetu musinke ono kundindira nononkondo kukamona mouzuni woupe?
7 Zautatu, ose kuvhura tu kare nehuguvaro asi matumbwidiro gokomeho goUhompa waKarunga nga ga ka sikamo. Yitetu eyi ga ya rugene Jesus apa ga ya kere pevhu kuturonga eyi nga ka rugana mouzuni mudima, morwa age kuna kara Hompa gemeguru goUhompa waKarunga. Konekeni asi yisinke eyi ngatu ka limonena ntaantani apa Kristusa nga ka pangera evhu nalinye. Ose ngatu ka hafera ukanguki wouwa morwa nga ka gusa po mauvera nagenye ntani nanayinye eyi ayi ninkisa vantu va hepe. (Jes. 33:24; 35:5, 6; Ehor. 21:3, 4) Kapi ngatu ka fa nzara hena ndi asi tu ka hepe morwa yimpagwa. (Jes. 25:6; Mar. 4:41) Ose ngatu ka kara noruhafo rorunene apa ngatu ka tambura vantu ava twa hara apa ngava vhumbuka “monontoko.” (Joh. 5:28, 29) Sitetu musinke ono kundindira nononkondo kukamona mouzuni woupe?
8 Apa Jesus nga rugana yitetu, age nga likida elinunupiko nonkenda, yikara eyi atu honene nose. Tu zeni tu ka zogere ko yihonena yivali, ta tu ka tameka nosihorokwa sosipito sekwareko esi sa karerere moKana.
SIRONGWA ESI NATU LIRONGERA KO KUHAMENA KULINUNUPIKA
9. Yisinke ga rugene Jesus posipito sekwareko? (Johanesa 2:6-10)
9 Resa Johanesa 2:6-10. Apa vhinyu za pwire posipito sekwareko, ngoso Jesus ga hepere kurugana ko yuma ndi? Hawe. Kapi pwa kere uporofete ou wa pumbire asi Mesiyasa nga rugana vhinyu pasitetu. Nye gazara tupu omu nolizuvha nsene vhinyu zi pwa sikatji posipito soge sononkwara. Jesus nampo kwa fililire nkenda epata lina, unene po vafuko ntani kapi ga here va life nomuga. Ngwendi moomu tupu ka tu yi tumbura ketameko lyosirongwa, age kwa rugene sitetu. Age kwa tjindjire nolita domema dokusika po 390 (nogarona 103), ga kare vhinyu zongwa. Age nampo kwa rugene vhinyu zonzi yipo asi zimwe zi hupe ko yipo ngava zi ruganese komeho ndi yipo ngava zi randese yipo valikwali owo ngava gwane ko yimaliwa yokulivateresa ko. Yosili valikwali owo wovape nampo va kere norupandu rorunene!
Honena Jesus pokudira kulikangangera yininke eyi wa tompora (Tara paragarafu 10-11) e
10. Mauzera musinke gamwe gomulyo aga ga kara mosihorokwa esi va tumbura mwaJohanesa egaununo 2? (Tara hena efano.)
10 Tu kona-koneni mauzera gamwe gomulyo aga ga kara mosihorokwa esi va tumbura mwaJohanesa egaununo 2. Muna koneke asi Jesus kapi ga tulire mema motuvaza tomamanya ndi? Mevango lyokulipaparera mwene mfumwa, age kwa tanterere vakareli va zwide tuvaza. (Velise zo 6, 7) Ntani konyima zapa ga tjindjire mema ga kare vhinyu, Jesus kapi ga gusire mwene vhinyu zimwe a zi tware komugendesi gosipito. Nye age kwa tanterere vakareli va yi rugane oyo. (Velise 8) Jesus kapi ga gusire nkinda zovhinyu noku zi kwaterera komeho zovantu ava va wizire kosipito noku uyunga nelinenepeko asi ‘Makereni vhinyu ezi nina rugana!’
11. Yisinke natu lirongera ko kositetu saJesus?
11 Yisinke natu lirongera ko kositetu saJesus sokutjindja mema ga kare vhinyu? Ta tu lirongere ko sirongwa sokuhamena elinunupiko. Jesus kapi ga likangangere sitetu esi ga rugene, ntani age kapi ga linenepekere nampili rumwe kuhamena yininke eyi ga sikisire mo. Nye mevango lyoyo, age kwa linunupikire ntani kwa twikilire kugava efumano nalinye koGuhwe. (Joh. 5:19, 30; 8:28) Nsene tu honena Jesus pokukara nelinunupiko, ose kapi ngatu linenepekera yininke eyi atu sikisa mo. Yikare asi yisinke eyi atu rugana mosirugana saJehova, kapisi tu likangange tupu kulihamena nyamwetu, nye twa hepa kulikangangera Karunga gomuwa ogu atu karere. (Jer. 9:23, 24) Twa hepa ku mu pa efumano eli lya mu fira. Ose kapi tatu vhuru kusikisa mo nkenye yininke yoyiwa pwa hana evatero lyaJehova.—1 Kol. 1:26-31.
12. Nkedi musinke hena zimwe omu natu vhura kuhonena elinunupiko lyaJesus? Yifanekesa.
12 Tu tareni nkedi zimwe omu natu honena elinunupiko lyaJesus. Gazadareni ko kosihorokwa esi: Mukuronambunga kuna kuruganesa siruwo sendi sosinzi yipo a vatere mukwafimbunga gomudinkantu yipo a liwapayikire siuyungwa sendi sanavenye sokuhova. Ano ngoyitundwamo, munazinyetu ogo gomugara gomudinkantu ta gava siuyungwa sokukorangeda esi na zi hafera mbungakriste. Konyima zepongo, gumwe ta hedere mukuronambunga noku tanta asi: ‘Munazinyetu ngandi ana gava siuyungwa sosiwa, ndi ngapi?’ Ngoso mukuronambunga kuvhura nye a uyunge asi: ‘Yii, kani ruganesere siruwo sange sosinzi mokumuvatera?’ Ndi age nampo kuvhura a uyunge nelinunupiko asi: ‘Yii, ana gava siuyungwa sosiwa sili, ana rugana sili nawa.’ Nsene tu linunupika, ose kapi ngatu lipaparera mfumwa koyininke yoyiwa eyi atu ruganene wopeke. Ose ya tu gwanena po, morwa twa yidiva asi Jehova kumona ntani kutara eyi atu mu ruganene asi mulyo. (Hetakenesa Mateusa 6:2-4; Vahebeli 13:16) Yosili, ose kuhafesa Jehova apa atu honene Jesus pokulikida elinunupiko.—1 Pet. 5:6.
SIRONGWA ESI NATU LIRONGERA KO KUHAMENA NKENDA
13. Yisinke ga mwene Jesus apa ga kere pepi nositata saNayini ntani yisinke ga rugene ko? (Rukasa 7:11-15)
13 Resa Rukasa 7:11-15. Gazadareni ko sihorokwa simwe esi sa horokere sikando simwe, posiruwo oso age Jesus ana tameke nare nosirugana sendi sokuzuvhisa. Age kwa zire kositata somoGalireya, Nayini, esi sa kara pepi naSunemu, omu muporofete Eliya ga pindwire muna gomumati gomukadi gumwe, posiruwo oso apo pana piti nomvhura 900. (2 Vah. 4:32-37) Ngomu Jesus ga hederere pepi nevero, age kwa mwene mbunga zovantu ezi zina simbi simpu. Sihorokwa oso kwa kere sokuguvisa unene morwa mufisayendi ogo kwa fisire munendi gelike a huru. Nye zinya ogo ga guvire kapisi gelike ga kere, mbunga zonene zovantu ava va tundire mositata kwa kere kumwe nendi. Makura Jesus ta kondere mbunga ozo ntani noku rugana yuma yokutetukisa kwa zinya ogu ga guvire pokupindura munendi koufe. Eli kuna kara evhumbuko lyokuhova pomavhumbuko gatatu aga ga rugene Jesus ntani aga va tjanga moMavangeli.
Honena Jesus pokulikida nkenda kwa va vana guwu (Tara paragarafu 14-16)
14. Mauzera musinke gamwe gomulyo aga ga kara mosihorokwa esi va tumbura mwaRukasa egaununo 7? (Tara hena efano.)
14 Tu kona-koneni mauzera gamwe gomulyo gomosihorokwa esi sa kara mwaRukasa eganuno 7. Mwa koneke asi Jesus kwa “mwene mufisayendi” ogu ga guvire ntani noku ‘mu fira nkenda’ ndi? (Velise 13) Nampo Jesus kwa mwene omu mufisayendi ogo ga lilire ngomu ga gendere pepi nosimpu samunendi, makura yipo ga mu fililire nkenda. Jesus kapi tupu ga fililire nkenda zinya ogo, nye age kwa mu likidire hena nkenda. Age kwa mu uyungisire nezwi lyokulitura, pokumutantera nonkango edi asi: “Wa ha lira.” Makura yipo ga rugene ko yuma a mu vatere. Age kwa pindwire munendi koufe ntani noku mu “gava kozina.”—Velise 14, 15.
15. Yisinke natu lirongera ko kositetu esi ga rugene Jesus?
15 Yisinke natu lirongera ko kositetu esi ga rugene Jesus sokupindura muna gomufisayendi? Tuna lirongere ko asi twa hepa kulikida nkenda kwa va vana guwu. Yimo, ose kapi tatu vhuru kupindura vafe, nye ngwendi Jesus ose kuvhura tu likide nkenda kwa va vafisa pokukara nosinka kwawo. Kuvhura tu li tulire po siruwo yipo tu va likide nkenda pokuuyunga yuma ndi pokurugana yuma eyi natu vhura kurugana ko yipo tu va vatere noku va hengagwida. d (Yis. 17:17; 2 Kol. 1:3, 4; 1 Pet. 3:8) Nampili nonkango dononsesu tupu tuna uyunga ndi nampili yininke yoyinunu tuna va ruganene, kuvhura kuvakorangeda ntani noku va hengagwida unene.
16. Ngwendi moomu tupu vana yilikida pefano, yisinke ono lirongere ko kosihorokwa sazinya ogu ga fisire munendi?
16 Tu tareni sihorokwa esi sina kukwama ko. Nomvhura dongandi dina ka pita, munazinyetu gumwe gomukadi kwa mwene zinya gumwe kuna kulira mosinyanga ngomu va dimbire rusumo rokuhulilira mepongo. Morusumo oro kwa tumbwire mo kuhamena ehuguvaro lyevhumbuko ntani posiruwo oso age zinya ntani tupu ka fisire munendi gomukadona. Apa munazinyetu gomukadi ga yi dimbwilire oyo, yipo ga mu hederere usimbu a sikame kumwe nage ntani noku lidingira zinya ogo nokudimba kumwe nage rusumo dogoro papa rwa pwire. Konyima zosiruwo, zinya ogo kwa ya uyungire asi: “Ame kwa lizuvhire asi vanavazinyetu kwa here nge unene.” Age kwa kere norupandu rorunene kweyi ga zire kepongo. Age kwa tanta asi: “KoSinyanga soUhompa yiko atu gwana evatero.” Kuvhura tu kare nehuguvaro asi Jehova kudimburura ntani kumona mulyo goyininke nampili yoyisesu eyi atu rugana mokulikida nkenda ava va fisa, “ava lina pu ehuguvaro.”—Epis. 34:18.
MAUWA AGA NATU GWANENA MO POKULIRONGA YITETU
17. Yisinke tuna lirongo mosirongwa esi?
17 Yitetu eyi ga rugene Jesus eyi ya kara moMavangeli kuvhura kutuvatera tu gwanene mo mauwa apa atu yi lirongo. Ayo kuturonga asi Jehova naJesus va tu hara unene ntani asi Jesus ga kara nononkondo dokukagusa po maudigu nagenye govantu ntani asi kuvhura tu kare nehuguvaro momatumbwidiro gaKarunga aga nga ga ka sikamo ntaantani moUhompa waKarunga. Apa atu kona-kona yihorokwa oyo, ayo kutuvatera tu tede ko kuhamena nonkedi dimwe omu natu honena yikara yaJesus. Nampo kuvhura o li tulire po elikwamo yipo o lironge yitetu yimwe yaJesus pelirongo lyanyamoge lyoBibeli ndi poUkareli wEpata. Koneka asi yirongwa musinke eyi novhura kulirongera ko ntani tantera ko wopeke eyi ono lirongo. Nsene o yirugana ngoso, ove ngo vhura kulikorangeda-korangeda unene novakweni!—Rom. 1:11, 12.
18. Yisinke ngatu ka zogera mosirongwa sokukwama ko?
18 Koyiha yehagero lyosirugana saJesus sokuzuvhisa, age kwa rugene sitetu sendi sokuhulilira moyitetu yitatu yevhumbuko eyi va tumbura moBibeli. Nye sitetu esi kwa lisigire noyikwawo morwa age kwa vhumbwire kaume kendi gokuhara ntani age kwa yi rugene monkedi ezi za dira kuhwa kuhoroka. Yirongwa musinke natu lirongera ko kositetu oso? Ntani ngapi omu natu nkondopeka epuro lyetu mehuguvaro lyevhumbuko? Sirongwa sokukwama ko nga si ka zogera mapuro ogo.
RUSUMO 20 Wa tu pa Munoge
a Ayo kuhafesa unene pokuresa yitetu eyi nga rugana Jesus. Pasihonena, age kwa mwenekedere ekundungu lyosiponga, nga verura ava ngava vere ntani nga pindura vafe. Yihorokwa oyo kwa yi tjangera moBibeli nositambo sokuturonga nye kapisi sokutuhafesa tupu. Ngomu natu ka yi kona-kona, natu ka lirongera ko yirongwa eyi nayi nkondopeka epuro lyetu kuhamena Jehova naJesus ntani noku ka dimburura yikara eyi twa hepa kutunga po.
b Mulirongi gumwe goBibeli kwa faturura asi: “Moyirongo yomosiruwo sanare, vantu ngava gazara asi aso kwa kere situmbukira sawo sokutambura vagenda, ntani muntu ogu nga tambura vagenda ga hepere kudivilisa asi pana kara yoyinzi kupitakana eyi va hepere vagenda vendi. Muntu gomuwa ogu nga tambura vagenda, unene po poyipito yekwareko, ga hepere kugava kovagenda vendi nondya dononzi ntani noyikunwa, kupitakana eyi va hepere.”
c MoMavangeli kwa kara mo yitetu yokupitakana po-30 eyi ga rugene Jesus. Jesus kwa rugene hena yitetu yimwe yoyinzi, nye Bibeli kapi za uyunga asi nkenye esi kwa horokere pwaselike. Sikando simwe, “vantu navenye womositata” kwa wizire kwendi ntani age kwa verwire vaveli “wovanzi womauvera gokulisiga-siga.”—Mar. 1:32-34.
d Komagano gamwe kuhamena eyi nouyunga ndi eyi norugana yipo o hengagwide ava vana guwu, tara sorongwa “Comfort the Bereaved, as Jesus Did” moRuhungu ro mo- 1 Mangundu 2010, moRuhingilisa.
e EFANO PEPENUNO: Ngomu Jesus ana sikama, vafuko ntani novagenda kuna kuhafera kunwa vhinyu zongwa.
