OSE kwa tu reta vanona ntantatu, ame gwauntambali. Vakurona vetu kwa kere wokurugana unene ava va kere momukunda gwaKarítsa gomoGereka. Ame kwa hampurukire nge momvhura 1926.

Komeho zomvhura ozo vakurona vetu yipo va ligwene naJohn Papparizos Mulirongi goBibeli goupampi, kutanta asi gumwe goNombangi daJehova. Awo kwa haferere efatururo lyaJohn lyokutunda moMatjangwa, yipo va tamekere kuza komapongo goValirongi woBibeli momukunda gwetu. Onane kwa kere nepuro lyenene mwaJehova Karunga nampili ngomu va dilire kudiva kuresa nokutjanga, awo ngava zuvhisire ko wopeke pwankenye mpito ngava gwana. Otate konyima va ya hagekere kuza komapongo goSikriste, morwa kwa demenene unene komapuko gava wopeke.

Name novakuru vange kwa fumadekere Bibeli, nye apa twa kulire madowo gosiudinkantu kwa tu donganesere. Makura momvhura 1939 apa yita yauvali youzuni ya li hanenene moEuropa nazinye, tapa horoka sihorokwa esi sa tu tukukisire. Gumwe gekoro lyetu Nicolas Psarras ogu ga kere musinda zetu kwa mu zigidire a ka kare mukwayita gepangero lyoVagereka age opo ntani ana kugwana ekuho. Nicolaus ogu ga kere nonomvhura 20 kwa tanterere vakurona wovakwayita asi: “Ame nokulihamekasi moyita morwa ame mukwayita gwaKristusa.” Age kwa mu pangwire mohofa zovakwayita nokumutokwera nomvhura murongo modorongo. Ayo ya tu tetukisire.

Ketamekero lyomvhura 1941, vakwayita wokoyirongo yapeke kwa wizire mosirongo saGereka makura Nicolas tava mu pwagesa mo modorongo. Age kwa tengwire koKarítsa, makura mukurwange Ilias nga mu puragere mapuro gokuhamena koBibeli. Ame ngani purakene nelituromo. Konyima name naIlias ntani mumbyetu gomukadona Efmorfia tatu tameke kulironga Bibeli, ntani ngatu pongo kumwe noNombangi. Mvhura zokukwama ko natuvenye tuvatatu yipo twa ligeve kwaJehova nokugwana  ekuho. Konyima vakuru vetu nawo tava ya kara Nombangi.

Momvhura 1942 mbungakriste zaKarítsa kwa kere mo vamati novakadona ntane ava va kere nonomvhura dopokatji ko-15 dogoro 25. Natuvenye twa yi divire asi ngatu ligwanekera nomahepeko. Mokulinkondopeka nyamwetu, ose ngatu kara kumwe pokulironga Bibeli, kudimba nonsumo dopampepo ntani nokukanderera. Ngoyitundwamo epuro lyetu lya nkondoparere.

Apa tupu ya hege yita yauvali youzuni mbunga zimwe zovarwanesi yipo za tamekere kurwisa epangero lyaGereka nokuretesa po yita mosirongo. Vakwayita wombunga ozo ngava kara unene konomukunda nokusininika vantu asi va va kwatese ko. Apa va ya homwene mukunda gwetu tava ya henesa vadinkantu vatatu woNombangi daJehova, Antonio Tsoukaris, Ilias ntani name. Ose kwa li kwamberere nokuvatantera asi ose Vakriste kapi atu lihameke moyita, nye tava tu sininike tu ze kondundu zaOlympus apo kugenda po novili 12.

Apa twa ka sikire, mukurona gombunga ozo tatu pangere asi tu lipakerere nombunga zawo. Konyima zokumutantera asi Vakriste wousili kapi ava ru yita, makura ta handuka nokututwara komukurona gwawo. Tatu ka mu tantera nage yokulifana. Makura age tatu pangere asi: “Tomu gusa nkambe nokukadamagura ava vana kuremana moyita nokuvatwara kosipangero.”

Tatu mu limburura asi: “Ngapi nsene ngava tu gwana vakwayita vepangero, kapi ngava tu gazarera asi nose kuna kulihameka moyita ndi?” Makura tatu tantere asi: “Ngomu tware nye nomboroto oku vana kurwira vakwayita.” Makura ta tu mu tantere asi: “Ngapi nsene mukwayita ngatu mona nonkambe nokutusininika asi tu tware yirwiso oku vana kurwira vakwayita? Makura mukurona govakwayita ta gazadara ko momunene. Yipo ga tente asi: “Katakameseni nonzwi. Tomu ka kara kondundu mu ka lise nonzwi!”

Ngomu ya twikilire yita natuvenye moutatu wetu, ezwi lyetu lyokomutjima kwa tu pulisilire mokulisa nonzwi. Konyima zomvhura zimwe Ilias mukurwetu kwa mu pulisilire a tengure kembo nokukapakera mbili onane ava va kere mufisayawo. Ano Antonio kwa verere makura yipo va mu mangwilire. Nye ame kwa kere simpe nkwate.

Mwaza siruwo vakwayita woVagereka kwa twikililire kufunda mbunga ozo zovarwanesi. Makura kambunga aka ka tulire nge mounkwate tava tjwayuka nokuvyuka kosirongo saAlbania. Apa twa ka sikire pomurudi, hararasi vakwayita woVagereka tava tu kundurukida. Varwanesi kwa tukukire makura tava duka. Ame yipo na vende konyima zegogwa, oyo yiyo ya twaredesere nge ni ka ligwanekere novakwayita vena nina tumbura petamekero.

Apa na tanterere vakwayita woVagereka asi ame kwa kwete nge varwanesi, yipo va twere nge kokamba zovakwayita zopepi naVéroia nokukapuragera nge. Kwina kwa ka ninkire nge nisime makero govakwayita. Apa na nyokere, mukurona govakwayita ta tumu nge koMakrónisos aso sirudi sokutjilisa.

Sirudi sosidona, sokudira mema, soupyu unene, somamanya esi ngava tumbura asi Makrónisos kwa kara mefuta lyaAttica nokilometa 50 kutunda koAtena. Sirudi esi ure waso nokilometa 13 ano mounene waso nometa 500. Nampili ngoso kutunda momvhura 1947 dogoro 1958 kwa kere po vanadorongo wokupitakana 100 000 kukwatera mo ava ngava rwanesa epangero ntani noNombangi daJehova.

Momvhura 1949 apa na ka sikire, vanadorongo kwa va tulire monokamba dokulisiga-siga. Ame kwa tulire nge mokamba novagara vamwe, omu ngatu gwana umanguruki wokugenda. Vagara wokusika po-40 ngatu rara pevhu motenta zokuvhura kurara tupu ngano vantu 10. Ose ngatu nu mema gokunyata nokulya makunde ntani nontururu. Mbundu nompepo kwa digopesere eparu. Nye hansa ko tupu morwa kapi ngatu sindaike mamanya ehepeko eli lya rorwere sinzi sovanadorongo parutu nopanandunge.

Ezuva limwe ame kuna kugenda konontere defuta, tani gwanekere noNombangi wokonokamba dapeke. Ose kwa hefe mokukara kumwe. Mokuninka asi va ha yi dimburura va dire kutukwata, ngatu pongo tupu apa ngayi tu vhulika. Ntani ose ngatu zuvhisire vanadorongo vapeke mokahore-hore, konyima vamwe va ya kere Nombangi daJehova. Kukanderera ntani neyi ngatu rugana ya tu vaterere tu pame pampepo.

Konyima zomakwedi murongo gokukara posirudi, ava va kwete nge yipo va tokwere asi siruwo sa siki ni dware mudwaro govakwayita. Apa na nyokere tava twara nge komukurona gokamba zovakwayita. Yipo na mu pere eyi na tjenge posipepa ame kwa tente asi: “Ame kuna hara kukara mukwayita gwaKristusa.” Konyima zokutjilisa nge makura ta gava nge hena kwamukwawo ogu ga mu kwama mosipundi, mubisofi gongereka zaOrthodox ogu ga dwere mudwaro ngwendi goukarelikarunga. Apa na limbwilire mapuro gendi pokuruganesa Bibeli ta handuka nokutanta asi: “Mu guseni po,” ga zaruka.

Ngurangura zokukwama ko vakwayita tava sininike nge hena asi ni dware mudwaro govakwayita. Apa na nyokere, tava toona nge nononyongo ntani nosipirangi. Makura tava twara nge kosipangero va ka tare nsene nina teka yisupa makura tava tengwida nge kotenta. Yininke eyi ngayi horoka nkenye ezuva ure womakwedi gavali.

Morwa ame kwa kwatererere kepuro lyange, vakwayita yipo va hetekere kuruganesa nkedi zimwe zapeke. Awo ngava manga mawoko gange konyima yipo va sopore nge nonongora konompadi. Mokukora kwange oko makura tani diworoka nonkango daJesus edi asi: “None vanerago, nsene vantu tava mu swaura oku tava mu hepeke  .  Omu hafe oku tomu hamberere, yeeyi asi mfeto zeni nene unene meguru. Yimo ngorooro va hepekere sa novaporofete, ava va mu hoverere.” (Mat. 5:11, 12) Konyima zokumoneka ngwendi kapi nayi haga makura tani pwilire.

Apa naya pwirurukire tani dimburura asi modorongo zoutenda unene, kwato mboroto nomema ntani nguwo. Nampili ngoso kapi na tukukire. “Mbili zaKarunga” kwa ‘kungire mutjima gwange nomagazaro gange ngwendi moomu ga yi tumbwidira moBibeli. (Fil. 4:7.) Ezuva lyokukwama ko mukwayita ogu ga fililire nge nkenda kwa pere nge mboroto nomema ntani nombaikisa. Ntani hena gumwe ta penge nondya dendi. Moyihorokwa oyo ntani nayimwe hena yoyinzi ame kwa lizuvhire asi Jehova kuna kupakera nge mbili.

Epangero kwa tere nge ngwendi murwanesi ogu a dili kulitjindja, yipo va twere nge koAtena va ka pangure nge. Mompanguro kwa ka tokwerere nge nomvhura ntatu modorongo zaYíaros sirudi esi sa kere nokilometa 50 koupumezuva waMakrónisos.

Dorongo zaYíaros kwa kere etungo lyenene lyonodopi donongeha omu mwa kere vanadorongo woupolitika wokupita 5 000. Ntani mwa kere hena Nombangi daJehova ntambali ava va tulire modorongo morwa kunyoka kulihameka moyita. Natuvenye ntambali ngatu pongo kumwe mokahore-hore mokulironga Bibeli nampili ngomu va yi silikire. Nkenye apa ose ngatu gwana Ruhungu mokahore-hore, oru ngatu tjangurura nomawoko yipo tu ru ruganese melirongo lyetu.

Ezuva limwe mutakamesi godorongo ta ya tu kondekeda ose kuna kulironga mokahore-hore makura  tatu hakana yimbapiratjangwa yetu. Tava tu zigida komberewa zomukurona godorongo, ose twa yi ndindilire asi tava ka tu gwederera ko konomvhura detu dokukara modorongo. Nye mukurona godorongo ta tanta asi: “Twa yi diva asi nyone wolye, ntani ose kwa fumadeka matokoro geni. Twa yi diva asi kuvhura tu mu huguvare. Tengureni mu ka rugane.” Age hena kwa pere vamwe vetu yirugana youreru. Ose kwa hefe unene. Nampili modorongo kudira kulihameka kwetu moyita kwa reterere Jehova efumano.

Elididimikiro lyetu lya retere hena yitundwamo yimwe yoyiwa. Konyima zokunongonona nkareso zetu zongwa, munadorongo ogu ga kere profesora gomuvaru ya mu tumangedere atu pure kuhamena epuliro lyetu. Apa va tu pwagesere modorongo ketamekero lyomvhura 1951, nage kwa mu pwagesere mo. Konyima ga ya gwene ekuho nokukara muzuvhisi gosiruwo nasinye.

Apa va pwagesere nge modorongo ame kwa tengwire kekoro lyange koKarítsa. Konyima name novakwetu vamwe, yipo twa dirukilire koMelbourne moAustralia. Yipo na ka ligwene naJanette age kwa kere munazinyetukadi gosihonena sosiwa, konyima tatu likwara, ose kwa rerere vana vetu vane, mumati gumwe novakadona vatatu monkedi zoSikriste.

Naina nomvhura dange da pitakana po-90, nye ame simpe nimukuronambunga. Morwa urema wange wanare rutu rwange nonompadi dange poyiruwo yimwe kukora, unene po apa ani lihameke moyirugana yokuzuvhisa. Nampili ngoso, ame simpe nina tokomene kukara ‘mukwayita gwaKristusa.’—2 Tim. 2:3.