1. Ngapi omu Abirahamu ga likidire epuro asi Jehova kurugana youhunga? (Tara efano.)

“NTUDI mupanguli gouzuni kapi nga ka hungika kupangura nani.” (Gen. 18:25) Pokuuyunga nonkango odo, Abirahamu ga kere nepuro asi Jehova nga pangura pauhunga sitata saSodoma naGomora. Abirahamu ga yi divire asi Jehova kapi nga ‘zonagura muhungami kumwe novadinikarunga.’ Age ga yi divire asi Jehova kapi nga ‘rugana’ yininke oyo. Konyima zonomvhura 400 kutunda opo, Jehova kwa uyungire asi: “HOMPA mupopeli gweni gononkondo, nonzira dendi nadinye nongwa, ado kwa hungama. Karunga gweni Mulimburukwi age Munasili, age kurugana eyi ya vyuka, ya hungama.”—Deut. 31:19; 32:4.

2. Morwasinke natu uyungire asi Jehova kupangura pauhunga?

² Morwasinke Abirahamu ga karerere nepuro asi Jehova nkenye apa kupangura pauhunga? Morwa Jehova age Muhungami. Mokumona asi nompango daJehova kwa hungama,  age nkenye apa kupangura pauhunga. Bibeli kwa tanta asi age “kwa hara eyi ya hungama, ayo yosili.”—Epis. 33:5.

3. Gava sihonena omu vantu ava va tekura momudona.

³ Morwa mouzuni kwa zura mo udona, vantu kuvahengagwida apa ava ya lirongo asi Jehova kurugana eyi ya hungama. Vantu wovanzi kuvatekura momudona. Pasihonena, vamwe kwa va tura modorongo va hana usima. Ano konyima zonomvhura dononzi apa va rugana ekonakono lyokulikarera ntani va ya va pwagesa mo. Nampili ngomu ukaro owo kuninkisa vantu va nyegenye nokuhanduka, nye kouli ukaro ou au digopere Vakriste kulididimikira.

4. Yisinke nayi vhura kuheteka epuro lyoMukriste?

⁴ Vakriste kuyindindira asi vantu wokulikarera ngava va tekura momudona. Nampili ngoso, ayo kuvhura kuheteka epuro lyetu nsene tu lizuvha asi gumwe ndi nyamwetu kuna kututekura momudona mombungakriste. Yisinke ngo rugana nsene ngo lizuvha asi mombungakriste ndi mupuli mukweni kuna kukutekura momudona? Ove ngo pulisira ukaro owo u kupundukise ndi?

5. Morwasinke Mukriste nayi dilira kumutetukisa nsene kuna kumutekura momudona ndi gwapeke yina kuhorokera mombungakriste?

⁵ Mokumona asi kapi twa sikilira mo, twa hepa kuyidiva asi kuvhura ngava tu tekure momudona ndi nga tu tekure gumwe mombungakriste momudona. (1 Joh. 1:8) Nampili ngomu ayi dili kuhorauka, Vakriste wovalimburukwi kapi ayi va tetukisa ndi yi va pundukise nsene yi horoka. Jehova ga tu pa mapukururo moNonkango dendi aga naga tu vatera tu kwaterere koulimburukwi wetu nampili vapuli vakwetu va tu tekure momudona.—Epis. 55:12-14.

6, 7. Ukaro musinke woudona ga pitire munanzinyetu gumwe mombungakriste ntani yisinke ya mu vaterere a pite moudigu owo?

⁶ Tu tareni sihonena saWilli Diehl. Kutundilira momvhura 1931, munazinyetu Willi nga rugana koBeteli mositata saBern, mosirongo Swisiranda. Momvhura 1946 yipo ga zire koSikora saGiliyata moAmerika. Konyima zosikora, tava mu tumu a ka kare mutareli gonombunga moSwisiranda. Munazinyetu Willi kwa simwitira asi: “Momvhura 1949 mwaKudumonkuru yipo na divisire Beteli zomoBern asi tani kwara.” Yisinke va ka limbwilire? “Tatu ku gusa yitumbukira yoge, to kara tupu muzuvhisi gokukarerera.” Munazinyetu Willi kwa simwitira asi: “Kapi va pulisilire nge ni gave yiuyungwa . . . Vanavazinyetu wovanzi kapi ngava tu morora namukadange, awo ngava tu tekura ngwendi vantu ava va gusa mombunga.”

⁷ Yisinke ga rugene munazinyetu Willi moukaro owo? Age kwa tanta asi: “Ose twa yi divire asi Bibeli kapi za silika nonkwara, yipo nye ose kwa kandererere nokuhuguvara mwaJehova.” Mwaza siruwo, egano lyepuko eli va kere nalyo vanavazinyetu kuhamena nonkwara tava li kohonona po ano munazinyetu Willi tava mu tengwidire yitumbukira yendi. Jehova ga mu tungikire morwa ulimburukwi wendi. * Twa hepa kulipura asi: ‘Name ngani rugana yokulifana nsene ngava tekura nge momudona ndi?  Ame ngani ndindira kwaJehova a kohonone po udigu ndi ngani yi rugana mononkondo danyamwange?’—Yis. 11:2; resa Mika 7:7.

8. Morwasinke pamwe natu lipukira kugazara asi ose ndi gumwe mombungakriste kuna kumutekura momudona?

⁸ Diworoka asi kuvhura o lipuke kugazara asi ove ndi gumwe gombungakriste kuna kumutekura momudona. Kuvhura yi horoke oyo morwa kudira kusikilira mo ndi morwa kudira kudiva mauzera nagenye. Yi kare asi mouhunga ndi mepuko tuna kara, nsene tu kanderera kwaJehova nokukwaterera koulimburukwi wetu, ose kapi ngatu ‘pa usima’ Jehova.—Resa Yisewe 19:3.

9. Yisinke natu ka konakona mosirongwa esi nesi sokukwama ko?

⁹ Tu konakoneni yihonena yitatu yovantu vaJehova va nare ava va tekwire momudona. Mosirongwa esi tatu ka konakona kuhamena Josefa novakuru vendi. Ano mosirongwa sokukwama ko ngatu ka konakona omu Jehova ga tekwire hompa Ahaba gwaIsraeli ntani eyi ya horokerere Peturusa moAntiyokiya zomoSiliya. Ngomu tuna ka konakona yihonena eyi, koneka mo eyi nayi vhura kukuvatera o kwaterere koulimburukwi woge ntani nokupameka elikwatakano lyoge naJehova unene po nsene kuna kulizuvha asi kuna kukutekura momudona.

10, 11. (a) Ukaro musinke woudona ga ligwanekerere nawo Josefa? (b) Mpito musinke ga gwene Josefa apa ga kere modorongo?

¹⁰ Josefa mukareli gwaJehova gomulimburukwi kwa mu tekwire momudona, kapisi vantu wokulikarera tupu, nye unene po vakuru vendi. Apa ga kere mudinkantu vakuru vendi kwa mu randesere koupika. Age kwa mu twere koEgipite. (Gen. 37:23-28; 42:21) Konyima zosiruwo apa ga ka kere mosirongo oso, age kwa mu rundilire asi ana kwatere mukadavantu kononkondo ntani kwa mu tulire modorongo. (Gen. 39:17-20) Ruhepo rwendi rokukara mupika nomunadorongo kwa gusire konyara nomvhura 13. Yisinke natu lirongera ko kwaJosefa eyi ngayi tu vatera nsene ngava tu tekura momudona vapuli vakwetetu?

¹¹ Josefa ga kere nompito zokutantera ko munadorongo mukwawo kuhamena ukaro wendi. Munadorongo ogo kwa kere mupindi gwahompa. Siruwo esi va kere modorongo mukwawo kwa rotere nzodi, makura Josefa ta zi mu fatwilire. Josefa kwa fatwilire asi mupindi gwahompa ngava mu tengwidira sirugana sendi sanare. Apa Josefa ga fatwilire nzodi zamukwawo, age hena ga ruganesere mpito ozo a mu tantere ko ukaro wendi. Ose kuvhura tu lirongere ko sirongwa somulyo kapisi kweyi tupu Josefa ga uyungire nye kweyi hena ga dilire kuuyunga.—Gen. 40:5-13.

12, 13. (a) Ngapi omu tuna yi diva asi Josefa kapi ga haferere moukaro ou ga kere? (b) Yininke musinke Josefa ga dilire kutumbura monzogera zendi nomupindi gwahompa?

¹² Resa Genesis 40:14, 15. Josefa kwa tantere munadorongo mukwawo asi age kwa mu ‘veke.’ Kulikida asi age kwa mu tekwire momudona. Josefa hena ga uyungire asi kapi ga peke usima kweyi va mu tulilire modorongo. Morwa oyo, age kwa hundilire mupindi gwahompa a ka mu diworoke kwaFarawo. Morwasinke? Age kwa tente asi: “Nkumwe ngo tundise nge mo monzugo ezi.”

 ¹³ Nonkango odo kulikida asi Josefa kapi ga haferere moukaro ou ga kere. Age ga yidivire asi kwa mu tekwire momudona. Age kwa tanterere mupindi gwahompa usili yipo a vhure kumuvatera. Nye nampili ngoso, Matjangwa kapi ga uyunga asi Josefa ga tanterere ko nkenye ogu ndi Farawo asi vakuru vendi kwa mu randesere. Apa vakuru vendi va wizire koEgipite ntani nokuyaligusira po naJosefa, Farawo ga va tambwire nokuvapulisira va tunge moEgipite nokuhafera ‘yininke’ yomosirongo.—Gen. 45:16-20.

14. Yisinke nga yi tu vatera tu dire kuuyunga nonkango donondona nsene tava tu tekura momudona mombungakriste?

¹⁴ Nsene Mukriste kuna kulizuvha asi kuna kumutekura momudona mombungakriste, kapisi a hanese ukaro ana kupita. Ayo ya wapa kupura evatero kovakuronambunga ntani kuvatantera nsene gumwe gomombungakriste ana tura nzo zonene. (Lev. 5:1) Nampili ngoso, momaukaro omu mwa dira kuhamena nzo zonene, ya wapa kuyizogera nokulipa mbili nogu muna lizonene mwa hana kuhamesera mo wopeke ndi vakuronambunga. (Resa Mateusa 5:23, 24; 18:15.) Twa hepa kukohonona po udigu owo kuliza nonompango doBibeli. Poyiruwo yimwe, kuvhura tu ya dimburure asi kapisi nyose vana kutekura momudona. Yiyo ya karera nomulyo tu dire kuuyunga momudona Mukriste mukwetu. Twa hepa kudiworoka asi yi kare asi mouhunga tuna kara ndi mepuko nsene tu uyunga nonkango donondona ngayi gwederera koudigu. Kuhara Jehova novapuli vakwetu ngayi tu vatera tu dire kuvauyunga momudona. Mutjangi gepisarome kwa uyungire asi: ‘Ogu a limburukwa kwaKarunga kapi a rundire vakwawo neraka lyendi, kapi a rugana mukwawo yoyidona, age hena kapi  a hanesa nomuga kovamaparambo vendi.’—Epis. 15:2, 3; Jak. 3:5.

15. Uwa musinke Josefa ga gwanenene mo morwa kukara nelikwatakano naJehova?

¹⁵ Kuvhura tu lirongere ko hena yimwe kelikwatakano lyaJosefa naJehova. Nomvhura nadinye 13 edi ga hepere, Josefa ga likidire asi ga kwete egano omu Jehova a tara yininke. (Gen. 45:5-8) Age kapi ga pere Jehova usima koruhepo rwendi. Nampili ngomu ga dilire kudivara eyi ga pitire, age kapi ga kere nonyengo momutjima. Unene po, kapi ga pulisilire mapuko noyirugana yoyidona yovantu yi mu guse ko kwaJehova. Ulimburukwi waJosefa wa mu pere mpito a mone omu Jehova ga ya gendesere pauhunga ukaro wendi nokumutungika kumwe nepata lyendi.

16. Morwasinke natu hedera Jehova pepi nampili kuna kututekura momudona mombungakriste?

¹⁶ Nose twa hepa kuhafera nokukunga elikwatakano lyetu naJehova. Twa ha pulisira mapuko govanavazinyetu gatu guse ko kwaKarunga ogu twa hara ntani atu karere. (Rom. 8:38, 39) Nsene kuna kututekura momudona vapuli vakwetetu, ngano tu kare ngwendi Josefa nokuhedera Jehova pepi nokukondja tu kwate egano omu a tara yininke. Nsene tuna rugana ko yuma paapa twa hulira mokukohonona po udigu kuliza nonompango doBibeli, twa hepa kugava udigu owo momawoko gaJehova, nokukara nehuguvaro asi age ngayi kohonona po posiruwo samwene ntani kuliza nomu ga yi harera.

17. Ngapi natu yi likida asi twa huguvara “mupanguli gouzuni”?

¹⁷ Ngomu tuna kuparuka mouzuni ou ose ngava tu tekura momudona. Poyiruwo yimwe, gwapeke ndi nyamwetu kuvhura ngava tu tekure momudona mombungkriste. Kapisi ngayi ku pundukise. (Epis. 119:165) Nye ngovakareli vaKarunga wovalimburukwi, tu mu huguvare nokukanderera kwendi. Ntani twa hepa kuyitambura asi kapi twa diva mauzera nagenye aga gana hamene mo. Morwa kudira kusikilira mo kuvhura tu kare nomagano gepuko. Ngwendi moomu tuna lirongo kosihonena saJosefa, tu nyokere po kuuyunga nonkango donondona morwa nonkango odo kuninkisa udigu u ligwederere. Ntani hena mevango lyokukohonona po udigu pwanyamwetu, ngano tu tokomeneni kukara noulimburukwi kwaJehova nokusiga udigu owo momawoko gendi. Mokuyirugana ngoso, Jehova nga tu hafera nokututungika ngwendi moomu ga yi rugene kwaJosefa. Yipo nye, tu kareni nehuguvaro asi Jehova “mupanguli gouzuni,” kurugana eyi ya hungama morwa “nonzira dendi nadinye nongwa ado kwa hungama.”—Gen. 18:25; Deut. 32:4.

18. Yisinke ngatu ka zogera mosirongwa sokukwama ko?

¹⁸ Mosirongwa sokukwama ko, ngatu ka zogera yihonena yovantu ava va tekwire momudona mosiruwo sanare. Moyihorokwa oyo ngatu ka mona omu elinunupiko nokuligusira po ngayi tu vatera tu honene omu Jehova a tara yininke.