Ngano eharo lyokulizambera li kutumangede o tange Jehova!
“Morwa elizambero lyovantu, tangeni Jehova.” —VAP. 5:2, NW.
1, 2. (a) Yisinke va uyungire oElifasa naBilidade kuhamena yirugana yetu kwaJehova? (b) Ngapi ga lizuvhire Jehova kuhamena eyi va uyungire?
‘PWELI tupu muntu gumwe, nampili munandunge gomunene, ogu a vhuru kuruganesa Karunga ndi? Kurugana koge youhunga ku vatera Karunga, ndi uwa woge yiwo wa mu kwafa?’ (Joba 22:1-3) Wa gazadara ko nove komapuro gangoso ndi? Apa Elifasa gomoTemani ga pulire Joba mapuro ogo, age ga gazarere asi elimbururo, hawe. Bilidade gomoSuwa kwa uyungire asi kwato muntu ga hungama kosipara saKarunga.—Resa Joba 25:4.
2 Elifasa naBilidade kwa here Joba a lizuvhe asi yirugana yendi yomawoko-woko ntani Jehova kututara ngwendi yimbumburu tupu ndi maginyo. (Joba 4:19; 25:6) Kuvhura tu gazare asi Elifasa naBilidade kwa kere nonkareso zokulinunupika. (Job 22:29) Morwa nsene o sikama kondungu zondundu ndi o tara pevhu ove mondira ono kara, to mono omu yininke ya nunupa pevhu. Ngoso Jehova yimo a tara yirugana yetu yokukwatesa ko Uhompa asi yomawoko-woko ndi? Jehova kwa handukilire Elifasa naBilidade naSofara mokuuyunga yimpempa, nye age kwa haferere Joba nokumutumbura asi “mukereli gwange.” (Joba 42:7, 8) Eyi kulikida asi Karunga kuvhura “kuruganesa” muntu.
“OVE ASI NYOVE O KWAFA KARUNGA?”
3. Yisinke ga uyungire ko Elihu kuhamena elituromo lyetu lyokukarera Jehova, ntani yisinke ga tembe?
3 Jehova kapi ga vyukisire Elihu apa ga pulire epuro eli asi: “Ove asi nyove o kwafa Karunga mokukara ove o muhungami ndi? Karunga neisi a hepa ko koge. (Joba 35:7) Ngoso Elihu kwa tembe asi elituromo lyetu lyokukarera Jehova kwato mulyo ndi? Hawe. Age kwa tente asi Jehova neisi ga hepa ko kwetu. Age kuvhura kurugana nkenye eyi pwagelike. Ose nokuvhura si kunkondopeka Jehova ndi tu mu ngawopeke. Ntani hena, nkenye yikara eyi twa kara nayo ndi nonkondo nayinye kwa tunda kwaKarunga ntani age kunomena omu atu yi ruganesa.
4. Ngapi Jehova a lizuvhu apa atu vatere wopeke?
4 Apa atu ruganene uwa vakareli vaJehova, age kuyitara asi yige tuna kuyiruganena. MoYisewe 19:17 kutanta asi: “Ano nsene o gava konohepere kuna fana ngwendi kwaHOMPA ono kuheheda, nye HOMPA nga ku tengwida kuwoko.” Metjangwa eli Jehova ngoso kwa tamba asi age kukoneka nkenye yininke yoyiwa eyi atu ruganene wopeke ndi? Kuvhura tu uyunge asi Musiti gwanayinye ga kara nomakongo kovantu ava ava ruganene vakwawo uwa ntani age kuvafuta yininke yoyiwa ndi? Nhi, MunwaKarunga nage ga ya yi nkondopekere oyo.—Resa Rukasa 14:13, 14.
5. Mapuro musinke natu ka zogera?
5 Jehova kwa tumine muporofete Jesaya a tware mbudi zendi kuhamena omu a lizuvhu apa vantu ava rugana mokusikisa mo sitambo sendi. (Jes. 6:8-10) Jesaya kwa tambwire ezigido olyo. Naina simpe mayovi govantu kuna kulikida nkareso ezi asi: “Nyame ogu, tuma nge!” Awo kutambura kulihameka moyirugana yaJehova. Nye gumwe kuvhura a lipure asi: ‘Eyi ani rugana sili mulyo mo ndi? Pwa hana ame, ngoso Jehova kapi ta vhura kusikisa mo sirugana sendi?’ Mokugwana malimbururo, tu tareni eyi ya horokere momazuva gaDebora naBaraka.
KARUNGA KWA VA PERE URADI
6. Elisigo musinke lya kere po pokatji koVaisraeli ntani vakwayita vaJabini?
6 Vaisraeli kwa va ‘hepekere unene’ hompa Jabini goVakanani nomvhura 20. Vaisraeli ava va tungire monomukunda va kere nowoma wokugenda. Jabini kwa kere noturukara toyivera 900, nomagonga noyilikandwiso, nye Vaisraeli kapi va kere noyirwiso yononkondo.—Vap. 4:1-3, 13; 5:6-8. *
7, 8. (a) Mapukururo musinke Jehova ga pere Baraka? (b) Ngapi omu Vaisraeli va fundire vakwayita vaJabini? (Tara efano pepenuno 28.)
7 Nampili ngoso Jehova kwa geve mapukururo kwaBaraka kupitira mwaDebora muporofete gomukadi asi: “Zende novagara kondundu zaTaboro. Gusa vagara 10 000 momazimo gaNafitali naSeburoni. Ame ngani siga Sisera, mugendesi govakwayita vaJabini a ka ku rwise komukuro gwaKisoni. Age nga kara noturukara twendi toyita Vap. 4:4-7.
mombunga zovakwayita. Nye nampili ngoso, ame ngani kupa efundo.”—8 Mbudi kwa lihanene. Makura valizambeli tava pongo kondundu zaTaboro. Ano Baraka kapi ga likata-katere kurugana eyi ga mu tantere Jehova. (Resa Vapanguli 4:14-16) Awo kuna kurwa, hararasi tupu makura mvhura zonene tazi tameke kuroka oku va rwililire ta ku kara etata. Baraka tadi rapatesa Sisera novakwayita vendi dogoro koHarosete sinano sokusika po nokilometa 24. Havaza mokuduka, Sisera ta zumbu karukara kendi a dukire koSananimu nampo pepi naKedesi. Age kwa dukire a ka vande motenta zaJayeli mukadaHebeli goMukeni, makura Jayeli ta mu tambura. Sisera kwa rorokere unene makura ta ponyoka, Jayeli makura ta mu dipaga. (Vap. 4:17-21) Vaisraeli yipo va fundire nonkore dawo. *
NKARESO ZOKULISIGA KUHAMENA YIRUGANA YOKULIZAMBERA
9. Magano musinke atu gwana moVapanguli 5:20, 21 kuhamena yita yoVaisraeli naSisera?
9 Pokukwata egano yihorokwa eyi va tumbura megaununo 4 mobuke zoVapaguli twa hepa kuresa egaununo 5. Pasihonena, Vapanguli 5:20, 21 kutanta asi: “Nombungururu dekeguru kwa rwire, mokutavakana kwado eguru. Ruhanzo moKisoni rwa va kombere po.” Eyi kutanta asi vaengeli yiwo va rwililire po Vaisraeli ndi mamanya ga rokere keguru? Bibeli kapi za yi faturura. Nye kuvhura tu uyunge asi Jehova yige ga poperere vantu vendi pokurokesa mvhura zonene yipo tukarukara 900 tu dire kugenda. MoVapanguli 4:14, 15, kwa likida mo asi Jehova yige va pere efumano kefundo eli va gwene Vaisraeli. Kwato gumwe goVaisraeli vena 10 000 ga vhulire kulikangangera asi yige ga fundire yita yina.
10, 11. Yisinke ya kere “Merosi,” ntani morwasinke va si fingililire?
10 Apa Vaisraeli va fundire moyita, Debora naBaraka kwa dimbire rusumo va hamberere Jehova asi: “Fingilireni Merosi, yimo ana kutanta muengeli gwaHOMPA. Efingiliro, efingiliro kwava va kara mo. Kapi va wiza va ya kwafe HOMPA, va wize ngovakwayita va ya mu rwire.”—Vap. 5:23.
11 Merosi kwa gwene efingiliro lyenene ntani kapi tatu diva asi yisinke ya kere Merosi. Nampo kwa kere sitata omu vantu vamo va nyokere kulizambera mokuvatera Baraka moyita. Nsene nye asi apa ga dukire Sisera yimo ga ka pitire, yisinke nye va dilire kumukwata? Ngoso kapi va yi zuvhire apa va geve mbudi zokulizambera mokurwa yita ndi? Vantu mayovi murongo kwa zire mokukarwa yita. Nye vantu womoMerosi kwa tere omu Sisera ga dukire a pite momukunda gwawo nye awo kwato eyi va rugene ko mokukwatesa ko Jehova yipo a va tungike. Nkareso zawo za lisigire nezi zaJayeli mukadi gouradi.—Vap. 5:24-27.
12. Elisigo musinke lya kere monkareso zovantu va tumbura moVapanguli 5:9, 10, ntani ngapi omu ayi tu kundama?
12 MoVapanguli 5:9, 10, tatu mono malisigo pokatji konkareso zava va zire naBaraka moyita ntani nava va dilire kuza nendi. Debora naBaraka kwa tangaukire Vaisraeli ava va yi rugene ‘meharo lyavene.’ Awo kwa lisigire nava va ‘rondere koyindongili yoyizera,’ ava va nyokere kuza va ka rwe. Awo kwa
va singonona asi kwa hingilire ‘poyifara’ va hafere eparu mevango ‘lyokuza’ va ka rwe. Awo kapi va here kuza va ka ronde nonondundu daTaboro nokukagenda momuramba gwaKisoni gwetata. Navenye owo va here kuhafera tupu eparu kwa va tanterere asi “omu yi tante” ndi gazadareni ko. Awo va hepere kugazara ko kompito ezi va zumbanesere zokudira kuhara kukwatesa ko sirugana saJehova. Ya lifana nanaina, navenye ava vana kudira kuhara kukarera Karunga nomutjima nagunye nawo va hepa kugazadara ko.13. Ngapi omu nkareso zorudi rwaRubena naDana naAseli za lisigire nezi zaSeburoni naNafitali?
13 Ava va lizamberere, va limonene omu Jehova ga yi likidire asi age Mupangeli gwanayinye. Awo va vhulire kutantera ko wopeke kuhamena eyi va limonene apa va uyungire asi: “Kuna kusanseka efundo lyaHOMPA.” (Vap. 5:11) Nampili ngoso rudi rwaRubena naDana naAseli ava va uyunga moVapangeli 5:15-17 kwa demenene koungawo wawo ngwendi nonzwi noyikepa nomazenga gawo mevango lyokukwatesa ko sirugana saJehova. Nye rudi rwaSeburoni naNafitali “kwa lizumbilire nomwenyo dawo pomarwaneno” mokukwatesa ko Debora naBaraka. (Vap. 5:18) Kuvhura tu lirongere ko sirongwa somulyo konkareso ezi va likidire vantu ava kosirugana saJehova.
“TANGENI JEHOVA”
14. Ngapi omu atu kwatesa ko upangeli waJehova naina?
14 Naina kapi ava tu zigida tu ze tu ka rwe yita, nye ose kwa tu pa situmbukira sokuzuvhisa noupampi. Ngesi pana kara hepero zonene zovalizambeli mombunga zaJehova. Mamiliyona govanavazinyetu kuna kulizambera mokulihameka mosirugana sosiruwo nasinye ngwendi, vazuvhisi wokukarerera, Vabeteli, wokudika Yinyanga nava Heb. 6:10.
wokulizambera koyigongi. Vakuronambunga vamwe kurugana unene mokulihameka moKomitiye zeyi youhaku ntani mokuwapaika yigongi yoyinene. Kara nepuro asi Jehova kuhafera elituromo lyoge lyokumukarera ntani kapi nga divara eyi omu ruganene.—Komeho zokutura po etokoro gazadara ko omu nali kundama epata lyoge ntani mbungakriste zeni (Tara paragarafu 15)
15. Yisinke twa hepa kulipura yipo tu dive nsene kapi twa zumbanesa upampi wetu kosirugana saJehova?
15 Nkenye gumwe gwetu a lipure asi: ‘Ame kusigira wopeke va rugane yirugana nayinye ndi? Ame kwa hara kukondjera emona unene kupitakana kukarera Jehova ndi? Ngwendi Baraka naDebora naJayeli ntani valizambeli vena 10 000, ame na kara nepuro nouradi mokuruganesa nkenye eyi na kara nayo mokukarera Jehova ndi? Nsene nina hara kudirukira kodoropa ndi kosirongo sapeke ni ka papare yirugana, na gazadara ko unene omu ngayi vhura kukundama epata lyange ntani mbungakriste zetu ndi?’ *
16. Nampili ngomu Jehova yige Musiti gwanayinye, yisinke natu vhura kumupa?
16 Jehova kutupa mfumwa pokutupulisira tu kwatese ko upangeli wendi. Kutundilira posiruwo saAdamu naEva, Muzonaguli kwa harera vantu va hamene kwendi nokurwanesa Jehova. Epuro noulimburukwi woge ou au kutumangeda o kare neharo lyokulizambera kuhafesa Jehova. (Yis. 23:15, 16) Jehova kuruganesa ulimburukwi wetu mokulimburura Satana ogu a mu pe usima. (Yis. 27:11) Yipo nye, ulimburukwi wetu kuna kara sininke esi natu vhura kupa Jehova esi asi mu retere ruhafo.
17. Yisinke Vapanguli 5:31 azi tu tantere ko kuhamena eyi ngayi ka horoka komeho?
17 Ntaantani tupu pevhu ngapa kare vantu ava va horowora upangeli waJehova kupitakana nkenye eyi. Ose kuna kundindira nononkondo apa ngasi sika mo siruwo oso. Ose kulizuvha ngwendi Debora naBaraka ava va dimbire asi: “Ano HOMPA, nonkore doge nadinye ngano yimo di fana ngoso, nye ava va ku hara, ngano tava paima ngwendi ezuva.” (Vap. 5:31) Oyo ngayi ka horoka apa Jehova nga ka hagekesa po upangeli waSatana. Apa ngayi tameka yita yaHarumagedoni, Jehova kapi nga hepa vantu va lizambere yipo va rwe. Nye posiruwo oso ose ngatu ‘sikama tu mone omu HOMPA nga funda.’ (2 Hist. 20:17) Nye posiruwo esi, tuna kara nonompito dononzi mokukwatesa ko upangeli waJehova nouradi noupampi.
18. Ngapi wopeke nava gwanena mo uwa monkareso zoge zokulizambera?
18 Debora naBaraka kwa dimbire rusumo rwefundo nokuhamberera Jehova nye kapisi yisitwa. Awo kwa tente asi: “Morwa elizambero lyovantu, tangeni Jehova.” (Vap. 5:1, 2, NW) Mokulifana nanaina, ngano nkareso zoge zelizambero zi tumangede wopeke va ‘tange Jehova.’
^ para. 6 Turukara oto kwa tu rugene nomamumbere goutwe.Nampili ekuva vana zuguma ko kutanduka. Ntani kwato muntu ogu ga vhulire kuhenya ko morwa taga mu keke.
^ para. 8 Komauzera gomanzi kuhamena sihorokwa esi tara sirongwa “‘Wa wiza ngwendi zinyaIsraeli’” sokuhafesa, tara Ruhungu 1 Siwogedi 2015 epe. 12-15.
^ para. 15 Tara sirongwa “Sinka kuhamena yimaliwa” moRuhungu 1 Pembankuru 2015 moRuingilisa.