Nove kukwatesa ko uhunga waJehova ndi?
‘Ame ngani tanga edina [lyaJehova, NW] . . . Karunga goMunasili age kurugana eyi ya vyuka, ya hungama.’—DEUT. 32:3, 4.
MARUSUMO: 110, 2
1, 2. (a) Yisinke ya horokerere Nabota novana vendi? (b) Yikara musinke yivali natu ka konakona mosirongwa esi?
GAZARA asi mugara kuna mu rundire asi kwa swaura Karunga nahompa. Tava mu gwana usima morwa undipo woyimpempa wovagara wovadona. Vantu ava va hara youhunga tayi va tukukisa ngomu vana kutara omu mugara ogo vana kumudigapa novana vendi. Eli kapisi esimwititi tupu. Nye ayo kwa horokerere Nabota mukareli gomulimburukwi gwaJehova ogu ga parukire apa hompa Ahaba ga pangerere moIsraeli.—1 Vah. 21:11-13; 2 Vah. 9:26.
2 Mosirongwa esi tatu ka konakona sihorokwa saNabota ntani somukuronambunga gomulimburukwi goposiruwo sovapositoli ogu ga tulire epuko. Yihonena eyi yomoBibeli nayi ka likida omu ya kara nomulyo kulinunupika ntani nokukara neharo lyokugusira po wopeke nsene tuna hara kuhonena Jehova ogu a rugana eyi ya hungama.
SIHOROKWA SOSIDONA UNENE
3, 4. Muntu musinke ga kere Nabota, ntani morwasinke ga nyokerere kurandesa sikunino sendi kwahompa Ahaba?
3 Nabota nga limburukwa Jehova apa Vaisraeli wovanzi ngava kwama sihonena sosidona sahompa Ahaba namukadendi gomudona Jesebeli. Vaisraeli ngava kerere Bara ntani kapi va fumadekere Jehova nonompango dendi. Nye Nabota kwa tere elikwatakano lyendi naJehova asi mulyo unene kupitakana eparu lyendi.
4 Resa 1 Vahompa 21:1-3. Nabota kwa nyokere apa Ahaba ga here kuranda sikunino sendi soyindjembere ndi asi va lisinte. Morwasinke? Age kwa limbwilire nefumadeko asi: “HOMPA a silike nge kweyi yokuninka asi ni ku pe sikunino soyindjembere, esi na pinga komama.” Nabota kwa nyokere morwa ayo kwa lilimbire noveta zaJehova ezi ga pere Vaisraeli asi nokurandesa si upingwa wekoro. (Lev. 25:23; Num. 36:7) Nabota kwa limburukwire Jehova.
5. Yisinke ga rugene Jesebeli mokudipaga Nabota?
5 Apa Nabota ga nyokere kurandesa sikunino sendi, Ahaba namukadendi tava rugana yininke yoyidona. Mokuninka asi va guse sikunino oso, Jesebeli kwa wapaikire nondipo doyimpempa mokurundira Nabota, ano oyo kwa mu twaredesere va ka mu dipage novana vendi. Yisinke ga rugene ko Jehova kosihorokwa sina sosidona?
KARUNGA KUPANGURA PAUHUNGA
6, 7. Ngapi omu Jehova ga yi likidire asi age kwa hara kurugana eyi ya hungama, ntani morwasinke ya karerere ehengagwido kekoro novakaume vaNabota?
6 Jehova yipo ga tumine poopo Eliya a ka uyungise Ahaba. Eliya kwa tanterere Ahaba asi age mudipagi ntani muwidi. Mosihorokwa esi, etokoro musinke ga tulire po Jehova? Age kwa tokwere asi Ahaba namukadendi novana vendi nawo ngava va dipaga.—1 Vah. 21:17-25.
7 Nampili ngomu ekoro novakaume vaNabota ya va guvisire eyi ga rugene Ahaba, nye va gwene ehengagwido pokudiva asi Jehova ga divire eyi ya horokere ntani ga rugene ko yuma. Nampili ngoso, nkareso zawo zelinunupiko nepuro lyawo mwaJehova kwa yi hetekere kweyi ya ya kweme ko.
8. Yisinke ga rugene Ahaba apa ga zuvhire etokoro lyaJehova, ntani yisinke ya kweme ko?
8 Apa Ahaba ga zuvhire etokoro lyaJehova “makura ta taura yikoverero yendi, makura ta dwara yikoverero yononsako, oku ta dilire. Oyo yikoverero yononsako nga rara nayo. Ano nsene ta gendi, kugenda kuliwora.” Ahaba ga linunupikire. Yisinke ya kweme ko? Jehova kwa tumine simpe Eliya a ka tantere Ahaba mbudi hena zimwe. Sikando esi, Eliya kwa ka tanterere Ahaba asi morwa ana linunupike, Jehova kapi nga mu retera udona pomazuva gendi. (1 Vah. 21:27-29) Jehova ‘ogu a konakona mutjima’ kwa likidire nkenda kwaAhaba.—Yis. 17:3.
ULINUNUPIKI KUPOPERA
9. Ngapi omu sikara selinunupiko ngano sa vhulire kupopera vanekoro novakaume vaNabota?
9 Ngapi etokoro olyo lya kundamene ava va divire udona ou ga rugene Ahaba? Etokoro olyo nampo lya hetekere epuro lyovanekoro novakaume vaNabota. Nsene asi yimo ngoso, pokukara nosikara sokulinunupika ngano ya va poperere nokuvatumangeda va twikire kukarera Jehova nokutura epuro mwendi asi age kurugana eyi ya hungama. (Resa Deuteronomium 32:3, 4.) Komeho, Jehova nga ka ruganena eyi ya hungama Nabota novana vendi nekoro lyendi pokukavavhumbura. (Joba 14:14, 15; Joh. 5:28, 29) Ntani hena muntu gokulinunupika ga diva asi “Karunga nga pangura nayinye eyi atu rugana, nsene yoyiwa ndi yoyidona, rambangako neyi atu rugana mehoramo.” (Muud. 12:14) Apa Jehova a pangura, koyili yimwe eyi a tara eyi twa dira kudiva. Yipo nye, kulinunupika ngayi tu vatera tu dire kuzumbanesa epuro mwaJehova.
10, 11. (a) Maukaro musinke naga vhura kuheteka epuro lyetu? (b) Mononkedi musinke elinunupiko ngali tu vatera?
10 Yisinke no rugana nsene vakuronambunga vana tura po etokoro eli ono kudira kukwata egano ndi eli ono kudira kukwatesa ko? Pasihonena, yisinke no rugana nsene asi ove ndi ogu wa hara a zumbanesa situmbukira mosirugana saJehova? Ngapi nsene mulikwali goge, munoge, ndi kaume koge va mu gusa mombunga nye ove kapi ono kwatesa ko etokoro olyo? Yisinke no rugana nsene ono yi pura asi vakuronambunga kuna rugana epuko pokulikida nkenda kogu ana zono? Yihorokwa yangoso kuvhura kuheteka epuro lyetu mwaJehova ntani monkedi omu a gendesa mbunga zendi. Ngapi omu elinunupiko nali kuvatera nsene o ligwanekera noyihorokwa yangoso? Tara nonkedi mbali.
Yisinke ngo rugana nsene vakuronambunga va divisa etokoro eli ono dili kukwatesa ko? (Tara paragarafu 10, 11)
11 Nkedi zokuhova, kulinunupika ngaku tu ninkisa tu dimburure asi kapi tuna diva 1 Sam. 16:7) Mokudiva usilli owo, ngayi tu vatera tu linunupike nokudimburura apa da hagera nonkondo detu ntani tu rundurure magazaro getu omu atu tara yininke. Nkedi zauvali, kulinunupika ngaku tu vatera tu limburukwe nokundindira Jehova a kohonone po udigu owo una horoka. Bibeli kuuyunga asi: “Nsene o limburukwa kwaKarunga, nayinye tayi ku gendi monaruwa, . . . nye mudinikarunga, nokumugenda si nawa. Ukaro wawo kwa fana ngwendi mundundumba.” (Muud. 8:12, 13) Nsene tu kara ngorooro wokulinunupika ngatu gwanena mo mauwa ntani nava wopeke.—Resa 1 Peturusa 5:5.
mauzera nagenye. Nampili tu gazare asi ose twa diva mauzera nagenye, Jehova gelike a mono momutjima gomuntu. (UYILIPAKI MOMBUNGAKRISTE
12. Sihorokwa musinke natu ka zogera ntani morwasinke?
12 Vakriste womoAntiyokiya moSiliya kwa pitire moukaro ou wa va hetekere nsene asi awo va kara nosikara selinunupiko ntani neharo lyokugusira po vakwawo. Tu zeni tu ka konakone sihorokwa oso yipo si ka tu vatere tu ka likonakone nsene twa kara nonkareso zokugusira po vakwetu ntani nasi ka tu vatera tu kwate egano eyi Jehova a ruganesere vantu wokudira kusikilira mo ga hana kuteza po nompango dendi.
13, 14. Yitumbukira musinke ga kere nayo mupositoli Peturusa, ntani ngapi ga likidire uradi?
13 Mupositoli Peturusa kuna kara mukuronambunga ogu ga divikwire mombungakriste. Age kwa kere kaume kaJesus ntani kwa mu pere yitumbukira yomulyo. (Mat. 16:19) Pasihonena momvhura 36, Peturusa kwa mu pere situmbukira sokukaudisira mbudi zongwa Koroneliusa nembo lyendi. Aso kwa kere sihorokwa sokulikarera, morwa Koroneliusa kapi ga kere Mujuda ntani kapi va mu rugene yovamba. Apa Koroneliusa nava vemembo lyendi va gwene mpepo zokupongoka, Peturusa yipo ga uyungire asi: “Vantu ava nawo vana gwana Mpepo zoKupongoka ngwendi nyose. Pweli hena gokuvhura kunyokesa mema asi va ha va ku hwa ndi?”—Yirug. 10:47.
14 Momvhura 49, vapositoli novakuronambunga moJerusarema kwa pongere kumwe va tokore nsene asi Vakriste wokonomuhoko dapeke va hepere kuvarugana yovamba. Mepongo olyo Peturusa kwa uyungire nouradi nokuvadiworokesa asi nomvhura da ka pita wokonomuhoko dapeke ava va dira kurugana yovamba kwa gwene mpepo zokupongoka. Eyi ga li monenene Peturusa ya vaterere mbungagendesi posiruwo sovapositoli mokutura po etokoro. (Yirug. 15:6-11, 13, 14, 28, 29) Kuvhura tu tante asi Vakriste woVajuda nava wokonomuhoko dapeke va haferere eyi ga fatwilire Peturusa. Ayo nampo ya va rerupilire mokuhuguvara mugara gwina ga kura pampepo.—Heb. 13:7.
15. Epuko musinke ga rugene Peturusa apa ga kere moAntiyokiya moSiliya? (Tara efano pepenuno 23.)
15 Konyima tupu zepongo lina momvhura 49, Peturusa yipo ga ka dingwire Antiyokiya moSiliya. Apa ga ka kere modoropa zina age nga kara kumwe novanavazina wokonomuhoko dapeke. Yosili awo va lirongerere ko kediwo eli ga kere nalyo. Nye ya va tetukisire nokuvaguvisa apa Peturusa ga hagekere kulya kumwe nawo. Vajuda vamwe womombungakriste nawo kwa honenene Peturusa mokurugana yokulifana, kukwatera mo Baranabasa. Yisinke ya ninkisire mukuronambunga gwina a rugane epuko lyangoso eli ngano lya gawinine mbungakriste? Sininke musinke somulyo
natu lirongera ko kepuko lyaPeturusa nsene mukuronambunga a uyunga ndi a rugana eyi nayi tu koresa komutjima?16. Ngapi omu Peturusa va mu pukwilire ntani mapuro musinke ya retesere po?
16 Resa Vagarata 2:11-14. Peturusa kwa tjilire vantu. (Yis. 29:25) Nampili ngomu ga kere noudivi kuhamena omu Jehova a tara yuma yangoso, Peturusa kwa tjilire eyi nava uyunga Vajuda ava va tundire koJerusarema ava va rugana yovamba. Mupositoli Paurusa ogu nage ga kere mepongo lina lyomoJerusarema momvhura 49, yipo ga vyukilire moyitarameho Peturusa moAntiyokiya nokuhorora uyilipaki wendi. (Yirug. 15:12; Gar. 2:13) Yisinke va vhulire kurugana Vakriste vena wokonomuhoko dapeke kepuko eli ga tulire Peturusa? Awo ngano va yi pulisilire yi va pundukise ndi? Peturusa ga zumbanesere situmbukira sendi morwa epuko eli ga tulire ndi?
KARA GOKUGUSIRA PO
17. Ngapi omu Peturusa ga gwanenene mo uwa konkenda zaJehova zokumugusira po?
17 Peturusa ga linunupikire nokutambura epukururo lyaPaurusa. Matjangwa ga yi likida asi Peturusa kapi ga zumbanesere nampili situmbukira sendi simwe. Ano konyima Karunga ga mu ruganesere a tjange nombilive mbali domoBibeli. Mombilive zendi zauvali, Peturusa kwa tumbwire Paurusa asi “mukwetu ogu twa hara.” (2 Pet. 3:15) Nampili ngomu epuko lyaPeturusa nampo lya reterere kukora Vakriste wokonomuhoko dapeke, Jesus, mutwe gombungakriste kwa twikilire kumuruganesa. (Efe. 1:22) Vanavazinyetu womombungakriste va kere nompito zokuhonena Jesus noGuhwe pokugusira po Peturusa. Tuna sihuguvara asi kwato ogu ga pulisilire epuko lyaPeturusa li mu pundukise.
18. Momaukaro musinke natu likida asi ose kuhonena Jehova pokurugana eyi ya hungama?
18 Ngwendi posiruwo sovapositoli, nanaina vakuronambunga kapi va sikilira mo yeeyi “natuvenye kupuka popanzi.” (Jak 3:2) Ayo ureru kuyidimburura oyo, nye yisinke ngatu rugana nsene munazinyetu ngatu zonena? Ose ngatu honena Jehova pokurugana eyi ya hungama ndi? Pasihonena, yisinke ngo rugana nsene mukuronambunga nga uyunga nonkango edi ngadi likida elitondororo? Kuvhura ngayi ku pundukise nsene mukuronambunga a uyunga yuma eyi nayi kuhandukisa ndi yi ku korese ndi? Mevango tupu lyokugenderera kugazara asi munazinyetugara kapi ta vhuru kukara hena mukuronambunga, ngo vhura kulididimika nokuyisigira Jesus, mutwe gombungakriste ndi? Mevango tupu lyokutara mapuko gendi, ngo vhura kudiworoka munazinyetu ogo nomvhura dononzi edi ga kara mosirugana sendi noulimburukwi? Ayo ngayi kuhafesa nsene munazinyetugara ogu ga kuzonena a twikira kukara mukurombunga ndi nampili a gwane yitumbukira yoyinzi ndi? Nsene o mu gusira po, ngo yi likida asi ove kuna kuhonena Jehova ogu a rugana eyi ya hungama.—Resa Mateusa 6:14, 15.
19. Yisinke tuna hara kutokomena kurugana?
19 Morwa twa hara yokuhungama, ose kuna kundindira ezuva apa Jehova nga ya gusa po yirugana nayinye yoyidona eyi ga retesa po Satana nouzuni wendi woudona. (Jes. 65:17) Siruwo esi tuna kundindira, tu kare nonkareso zokulinunupika pokuyitambura asi kapi twa diva mauzera nagenye ntani tu kare neharo lyokugusira po ava vana kutuzonena. Nsene ngatu yi rugana oyo, ose ngatu honena Jehova ogu a rugana eyi ya hungama.