Yisinke ngau ya gusa po Uhompa waKarunga?
“Uzuni ngau zonauka po kumwe nomadowo gawo nagenye, nye ogu a sikisa mo mpango zaKarunga, nga kara dogoro narunye.”—1 JOH. 2:17.
MARUSUMO: 134, 24
1, 2. (a) Ngapi uzuni ou wa lifana nomukorotji ogu va tomena nomfa? (Tara efano.) (b) Ngapi omu vantu novaengeli ngava lizuvha apa uzuni ou ngava u zonagura po?
VANOMENI wodorongo kuna kusindikira mugara gomukorokotji unene. Ngomu vana kugenda nendi awo tava zigire asi “nakufa.” Morwasinke vana kuuyungire nonkango odo? Mugara ogo kapi ana kuvera. Nye awo kuna kumusindikira va ka mu dipage. Mukorokotji ogo kwa mu tomena nomfa. *
2 Mokulifana uzuni ou kuna kara ngwendi mugara gwina va tomena konomfa. Uzuni ou woudona nare va u pangura ano ezonauka lyawo pepi lina kara. Bibeli kuuyunga asi: “Uzuni ngau zonauka po.” (1 Joh. 2:17) Yosili uzuni ou ngau zonauka po. Nye pwa kara malisigo pokatji kehagero lyouzuni ou ntani koukaro womunadorongo gwina. Apa nava ka mu dipaga munadorongo gwina, vamwe kuvhura va patanese etokoro olyo ndi kuvhura va gazare asi mpanguro nazi rundurura etokoro lyazo. Nye Mupangeli gwanayinye ga tokoro nare pauhunga kuhamena uzuni ou. (Deut. 32:4) Kwato ogu nga vhura kupatanesa etokoro olyo ndi vantu va kare nomasinganyeko kuhamena etokoro lyendi. Apa uzuni ngava u pangura, vantu novaengeli ngava kwatesa ko mpanguro ozo. Morwa ngapa wiza marunduruko gomawa.
3. Yininke musinke yine natu ka konakona eyi ngau ya gusa po Uhompa waKarunga?
3 Yisinke ya kwatera mo ‘mouzuni’ ou ngau ‘zonauka’? Sinzi seyi ava tara vantu asi yininke yokukarerera po ngayi zonauka po. Ozo ngoso mbudi zondona ndi? Hawe. Azo kuna kara ruha romulyo ‘rombudi zongwa zoUhompa.’ (Mat. 24:14) Tu demeneneni kweyi ngau ya gusa po Uhompa waKarunga. Tatu ka konakona yininke yine: vantu wovadona, nombunga donondona, yirugana yoyidona ntani maukaro gomadona. Tatu ka tara hena (1) omu yininke oyo ayi tu kundama, (2) eyi nga rugana ko Jehova ntani (3) omu nga yi pinganesera po neyi yoyiwa.
VANTU WOVADONA
4. Mononkedi musinke vantu wovadona ava tu kundama?
4 Ngapi omu vantu wovadona ava tu kundama naina? Konyima apa Paurusa ga uyungire asi pomazuva getu “ngapa kara yiruwo yoyidigu,” age kwa tente hena asi “vadinikarunga novakumbageli, udona wawo ngau vhuka.” (2 Tim. 3:1-5, 13) Ove kuna kumona omu una kusika mo uporofete owo ndi? Sinzi setu twa ligwanekera nomaudigu aga ava retesa po vantu wovadona ngwendi kutuhepeka nokutunyenga nokutuhomokera. Vamwe kutuhepeka kuvyukilira nye vamwe vakumbageli kuhoreka eyi ava rugana kupitira momagano gawo. Nampili kapisi nyose vana kurugana oyo yininke, simpe kutukundama. Ayo kutuguvisa nokuturetera utjirwe monkedi omu vantu wovadona ava hepeke vanona novakurupe nava wokudira nonkondo. Vantu wovadona kulikida nkareso ngwendi nompepo donondona ndi yikorama. (Jak. 3:15) Nampili ngomu dina vhuka nombudi donondona, moNonkango daJehova kwa kara mo mbudi zongwa.
5. (a) Mpito musinke simpe vana kara nazo vantu wovadona? (b) Yisinke ngayi ka horokera vantu wovadona ava vana kunyoka kutura po marunduruko?
5 Yisinke nga rugana ko Jehova? Age kuna kupa vantu wovadona mpito va ture po marunduruko ngesi. (Jes. 55:7) Vantu kapi simpe va gwana mpanguro zawo zokuhulilira. Uzuni ou yiwo tupu va pangwira nare. Nye ngapi kuhamena owo ava nyoka kutura po marunduruko, nokutwikira kukwatesako uzuni ou dogoro poudigu wounene? Jehova ga tumbwidira mokukazonagura po narunye vantu wovadona. (Resa Episarome 37:10.) Vantu wovadona kuvhura va gazare asi kapi ngava va pangura. Wovanzi va lironga kuhoreka eyi ava rugana, ntani mouzuni ou awo kumoneka ngwendi asi kuhenduka yitundwamo yoyidona. (Joba 21:7, 9) Nye Bibeli kutuntantera asi: “Age kumona nkenye ntambo zomuntu. Kutupu ko mundema ogu gwa sovaganena asi gu horeke munanzo kwaKarunga.” (Joba 34:21, 22) Kwato eyi ya horama kwaJehova. Kwato hena eyi yokumukumbagera ndi a dire kumona nkenye eyi. Konyima zoyita yaHarumagedoni, ngatu ka hetekera ko kupapara vadinikarunga, nye kapi ngatu kava mona. Awo ngava dongonoka po narunye.—Epis. 37:12-15.
6. Wolye ngava ka pinganena po vantu wovadona, ntani morwasinke zina karere mbudi zongwa?
6 Wolye ngava ka pinganena po vantu wovadona? Jehova kwa tumbwidira asi: “Valinunupiki yiwo ngava hingira sirongo, awo ngava hafera mpora zonene.” Megaununo hena lyoolyo tatu resa asi: “Muhungami nga gusa sirongo nga tunge mo narunye-narunye.” (Epis. 37:11, 29) Wolye “valinunupiki” ntani ‘vahungami’? Valinunupiki kuna kara ava ava tambura marongo nomavyukiso gaJehova, ano vahungami ava va hara kurugana yoyiwa kosipara saJehova. Mouzuni ou vantu wovadona vanzi kupitakana wovahungami. Nye mouzuni woupe, valinunupiki novahungami yiwo velike ngava ka tunga mo. Awo ngava ka ninka evhu li ka kare paradisa.
NOMBUNGA DONONDONA
7. Ngapi omu nombunga donondona adi tu kundama?
7 Ngapi omu nombunga donondona adi tu kundama? Sinzi soyirugana yoyidona eyi yina kuhoroka mouzuni ou, nombunga donondona yido adi yi retesa po. Pasihonena, nombunga domaukarelikarunga kupukisa mamiliyona govantu kuhamena Karunga, Bibeli, meho zovantu ntani noyirongwa yimwe hena. Mapangero kuretesa po yita, nyanya, kuhepeka wokudira nonkondo, ufuki ntani elitondororo. Ntani vanangesefa kunyateka nokuzonagura unsitwe nonkarapamwe yipo va lingawopeke vene posiruwo oso mamiliyona govantu kuna kuhepa. Nombunga donondona yido adi retesa po udona ou una kuhoroka mouzuni ou.
8. Kuliza noBibeli, yisinke ngayi horokera nombunga edi adi moneka ngwendi kwa pama?
8 Yisinke nga rugana ko Jehova? Udigu wounene ngau tameka apa mapangero ngaga homokera maukarelikarunga aga ga fanekesa hondedi ezi ava tumbura asi Babironi zonene. (Ehor. 17:1, 2, 16; 18:1-4) Nombunga odo domaukarelikarunga ngava di zonagura po narunye. Ngapi kuhamena nombunga dimwe donondona? Bibeli kwa ruganesa nondundu noyirudi mokufanekesa nombunga edi adi moneka ngwendi kwa pama. (Resa Ehororo 6:14.) Nonkango daKarunga kwa pumba asi mapangero nonombunga edi adi ga kwatesa ko ngava yi zonagura po. Pehagero lyoudigu wounene mapangero gouzuni ou ngava ga zonagura po nanavenye ava ava nyoka kukwatesa ko Uhompa waKarunga. (Jer. 25:31-33) Kwato mbunga zondona ngazi kara po hena.
9. Morwasinke natu karera nehuguvaro asi pevhu lyepe kapi ngapa ka kara epiyagano?
9 Yisinke ngayi pinganena po nombunga donondona? Konyima zoyita yaHarumagedoni ngapa ka kara hena mbunga pevhu ndi? Bibeli kuuyunga asi: “Ose kuna kundindira, moomu ga yi tumbwidira Karunga, eguru lyepe nevhu lyepe, omu ngamu kara uhungami.” (2 Pet. 3:13) Eguru lyekurukuru kwa fanekesa mapangero gomadona ano evhu lyekurukuru vantu ava aga pangere. Apa ngava yi zonagura po, yisinke ngayi yi pinganesera po? Ntanto “eguru lyepe nevhu lyepe” kutanta asi ngapa ka kara epangero lyepe ntani nkarapamwe zompe zovantu ava ngali ka pangera epangero olyo. Jesus Kristusa kumwe nava ngava ka pangera nendi moUhompa, ngava ka likida yikara yoyiwa yaJehova Karunga, ogu ga dira kuhara epiyagano. (1 Kol. 14:33) Yipo nye ‘pevhu lyepe’ kapi ngapa ka kara mapiyagano. Ngapa ka kara vagendesi wovawa. (Epis. 45:16) Kristusa yige nga ka va pitisira kumwe nava ngaka pangera nawo 144 000. Gazara ko tupu omu ngayi ka kara apa nombunga nadinye donondona ngava ka di pinganena po nombunga zimwe za hana mapiyagano.
YIRUGANA YOYIDONA
10. Yirugana musinke yoyidona ono kumona oku wa tunga ntani ngapi omu ya kukundama nepata lyeni?
10 Ngapi omu yirugana yoyidona yina kutukundama naina? Ose kuna kuparuka mouzuni muna zura yirugana yoyidona. Ruhonda noyimpempa ntani madipago kuna kuvhuka. Unene po vakurona kuvadigopera kupopera vana vawo koyirugana oyo yoyidona. Nongesefa doyilihafeso kutovareka yirugana yoyidona nokuninkisa vantu va mone nompango daJehova donongwa asi nondona. (Jes. 5:20) Vakriste wousili kunyokera po yirugana oyo. Awo kukondja mokukwaterera koulimburukwi wawo mouzuni ou au rwanesa nompango daJehova.
11. Yisinke natu lirongera ko kweyi Jehova ga zonagwire Sodoma naGomora?
11 Yisinke nga rugana ko Jehova kuhamena yirugana yoyidona? Tarurura eyi ga rugene ko kuhamena koyirugana yoyidona eyi ya vhukire moSodoma naGomora. (Resa 2 Peturusa 2:6-8.) Roto mugara gomulimburukwi kwa mu koresere komutjima yirugana yoyidona eyi ngava rugana vantu. Apa Jehova ga zonagwire yitata oyo, kapi tupu ga yi ruganene mokuhagekesa po udona. Nye kwa ‘geve sihonena sokukorangedesa vadinikarunga ava ngava ka kara ko komeho oko.’ Ngwendi moomu tupu Jehova ga zonagwire po yirugana nayinye yoyidona posiruwo sina, yimo hena ngaya hanagura po yirugana yoyidona eyi yina kuhoroka apa nga ya pangura uzuni ou.
12. Yirugana musinke yimwe ono kundindira ngo ka rugana mouzuni woupe?
12 Yisinke ngayi pinganena po yirugana yoyidona? MoParadisa ngatu ka hafera yirugana yoyinzi yoyiwa. Gazadara ko yirugana yokuhafesa apa ngatu ka ninka evhu eli ngali ka kare paradisa ndi kukatunga mambo getu naga govahali vetu. Gazadara ko hena apa ngatu ka tambura mamiliyona govantu ava vafa nokukuvaronga kuhamena Jehova neyi ga ruganena vantu. (Jes. 65:21, 22; Yirug. 24:15) Ose ngatu ka rugana unene nokukara noruhafo ntani nokukayererepeka Jehova.
MAUKARO GOMADONA
13. Maukaro musinke wa retesa po urwanesi waSatana naAdamu ntani naEva?
13 Ngapi omu maukaro gomadona aga tu kundama? Vantu wovadona, nombunga donondona ntani yirugana yoyidona nayinye kuretesa po maukaro gomadona pevhu. Natuvenye ya tu kundama yita noruhepo nelitondororo nomauvera nonomfa. Yininke oyo kwa wiza po morwa vantu vatatu wovadona Satana naAdamu naEva ava va rwanesere Jehova. Kwato gumwe gwetu na vhura kuhenduka ngesi yitundwamo yourwanesi wawo.
14. Yisinke nga rugana ko Jehova kuhamena maukaro gomadona? Gava sihonena.
Episarome 46:8, 9.) Ngapi kuhamena mauvera? Nga gusa po mauvera. (Jes. 33:24) Ado nomfa ngapi? Jehova nga hanagura po nomfa dogoro narunye! (Jes. 25:8) Age nga hagekesa po ruhepo. (Epis. 72:12-16) Ntani nga ka gusa po maukaro nagenye gomadona aga aga ninkisa eparu lyetu lidigope. Age ngaka gusa po “mpepo” zondona zouzuni ou, morwa Satana nonompepo dendi donondona kapi ngava ka kara ko.—Efe. 2:2.
14 Yisinke nga rugana ko Jehova kuhamena maukaro gomadona? Tarurura kuhamena yita. Jehova kwa tumbwidira asi nga hagekesa po yita. (ResaGazadara ko uzuni wa hana yita, mauvera ndi nomfa. (Tara paragarafu 15)
15. Yininke musinke yimwe ngayi ka haga po konyima zoyita yaHarumagedoni?
15 Gazadara ko uzuni wa hana yita, mauvera ndi nomfa. Ntani hena kwato vakwayita, kwato yirwiso. Kwato yipangero, vandokotora, vanersa, mayendo nonokira. Ntani kapi ngaku ka kara ukorokotji yipo nye kapi ngatu ka hepa vasikiliti, vaporosi ndi makumba nononsapi. Maukaro nagenye gomadona aga aga tu retere sinka ngava ka ga gusa po.
16, 17. (a) Ngapi omu ngava ka lizuvha ava ngava ka paruka yita yaHarumagedoni? Gava sihonena. (b) Yisinke no rugana yipo ngo ka paruke apa ngava ka zonagura po uzuni ou?
16 Ngapi omu ngali ka kara eparu apa ngaga ka haga po maukaro gomadona? Ayo kapisi ureru kugazadara eparu lyokomeho, morwa twa yika kuparuka mouzuni ou womaukaro gomadona. Pasihonena, vantu ava va tunga pepi nonositasi domahina gokorutenda, va yika ezogerero lyomahina ntani ava va tunga pepi nomavango gokuzugumina yihando nawo va yika edumba lyedona. Nye apa Jehova nga gusa po maukaro nagenye gomadona ayo ngayi tu hafesa.
17 Yisinke ngayi ka pinganena po yinka eyi atu li gwanekere nayo? Episarome 37:11 kutanta asi: “Awo ngava hafera mpora zonene.” Odo kuna kara nonkango sili dekorangedo. Oyo yiyo Jehova ana ku harere. Yipo nye kondja paapa wa hulira mokukara pepi naJehova nombunga zendi momazuva aga gopouhura. Kwaterera kehuguvaro lyoge nokuteda ko ntani tantera ko wopeke kuhamena ehuguvaro olyo. (1 Tim. 4:15, 16; 1 Pet. 3:15) Mokuyirugana ngoso, ove ngo ka paruka apa ngava ka zonagura po uzuni ou woudona. Ntani hena ngo ka paruka narunye nanarunye.
^ para. 1 Paragarafu ezi kuna kusingonona eyi ngayi horoka monodorongo nomvhura danare monomukunda dimwe daAmerika.