1. Apa Adamu naEva va rwanesere, ekorangedo musinke ga pere Jehova vantu vendi?

JEHOVA age Karunga ogu a gava ekorangedo. Age kwa tameka kuyirugana oyo apa vantu va ya kere vananzo. Kutunda tupu apa Adamu naEva va rwanesere, Karunga kwa pere vantu vendi ehuguvaro. Uporofete wa kara mwaGenesis 3:15 kwa pere vantu ehuguvaro asi Satana Muzonaguli ogu ava tumbura hena asi “ezoka lyanare” ngava mu zonagura po nokuhagekesa po yirugana yendi yoyidona.​—Ehor. 12:9; 1 Joh. 3:8.

2. Ngapi omu Jehova ga korangedere Nowa?

² Nowa mukareli gwaJehova kwa parukire mouzuni woudona. Posiruwo sina epata lyendi lyelike ngali karere Jehova. Vantu ava ngava paruka posiruwo sendi kwa kere  wonyanya ntani ngava hondere, eyi nampo ya mu guvisire sili. (Gen. 6:4, 5, 11; Juda 6) Nye Jehova kwa mu tanterere mbudi ezi za mu korangedere a twikire kukara ‘momalikwatakano nendi.’ (Gen. 6:9) Jehova kwa tantere Nowa asi ta ka hagekesa po uzuni wina woudona ntani ga mu tanterere hena eyi ga hepere kurugana mokukaparuka nepata lyendi. (Gen. 6:13-18) Yosili, Jehova kwa korangedere Nowa.

3. Ekorangedo musinke va mu pere Josuwa? (Tara efano pepenuno 15.)

³ Konyima zosiruwo, Josuwa kwa mu pere sirugana sosidigu mokutwara vantu vaKarunga koSirongo sEtumbwidiro. Age ga hepere kufunda nomuhoko edi da tungire mosirongo sina. Eyi kwa ninkisire Josuwa a kare nosinka. Jehova yipo ga tumine Mosesa a ka korangede Josuwa asi: “Tantera nye Josuwa, o mu koreke oku tomu korangeda, yeeyi age yige nga pitisira mbunga, age yige nga ka va pingisa sirongo esi ono kumona.” (Deut. 3:28) Makura Jehova mwene yipo ga korangedere Josuwa asi: “Amesi na ku tantere asi: Kora, o kwate mutjima. Nokukupwaga si ndi asi o tukuke, yeeyi Hompa Karunga goge pweli poge nkenye oku ngo za.” (Jos. 1:1, 9) Eli kwa kere ekorangedo lyewa sili.

4, 5. (a) Ekorangedo musinke ga geve Jehova kovantu vendi? (b) Ngapi omu Jehova ga korangedere Munwendi?

⁴ Jehova nga korangeda hena vantu vendi ngombunga. Age kwa korangedere Vajuda ava va kere mounkwate moBabironi pokuvatantera asi: “Wa ha tjira – ame noge na kara! Ame nyame Karunga goge – patupu yokukutjilisa! Ngani ku nkondopeka tani ku kwafa; ngani ku popera tani ku parura.” (Jes. 41:10) Age kwa ya yi rugene hena oyo koVakriste womosiruwo sanare ntani kovakareli vendi womosiruwo sanaina.​—Resa 2 Vakolinte 1:3, 4.

⁵ Jehova kwa korangedere hena Munwendi. Apa va mu kuhwire Jesus, age kwa zuvhire ezwi lina kutunda meguru asi: “Ogu yige Munwange ogu na hara, ga za nge komutjima.” (Mat. 3:17) Nonkango odo kwa pere Jesus nonkondo a twikire kuzuvhisa siruwo nasinye esi ga kere pevhu.

6. Ngapi sifanekeso saJesus sonoranda nasi tu korangeda?

⁶ Jesus nga honene Oguhwe pokukorangeda wopeke. Sifanekeso sendi sonoranda kuhamena uhura wouzuni kutukorangeda. Hekurwa kwa tanterere vakareli vendi wovalimburukwi asi: “Yina wapa, nani o mukareli gomuwa, kukuhuguvara tupu nani. Ngomu wa limburukwa mweyi yoyisesu, yiyo nye nani ku tumbira mweyi yoyinzi. Wiza o ya yigare kumwe name!” (Mat. 25:21, 23) Nonkango odo kutukorangeda tu twikire kukarera Jehova noulimburukwi.

7. Ngapi omu Jesus ga korangedere vapositoli vendi unene po Peturusa?

⁷ Poyiruwo yimwe vapositoli vaJesus ngava litatana asi yilye munene po mokatji kawo. Nye Jesus ngava korangeda va linunupike nokukara ngwendi vakareli tupu, nye kapisi va kare ngwendi vahekuru. (Ruk. 22:24-26) Peturusa nga guvisa Jesus poyiruwo yimwe. (Mat. 16:21-23;  26:31-35, 75) Nye Jesus kapi ga mu nyokere asi a dire kukara murongwa ngwendi, age nga mu korangeda ntani ga mu pere sirugana sokukorangeda vapuli vakwawo.​—Joh. 21:16.

8. Ngapi omu Hisikiya ga korangedere vakwayita novantu vendi?

⁸ Vakareli vaJehova vanare ngava korangeda vakwawo komeho Jesus a wize pevhu nokuyatulira po vantu sihonena sokukorangeda wopeke. Apa Vaasiliya va here kurwisa Vajuda, Hisikiya ta pongaike vakwayita novantu vendi ava korangede. Ano yitundwamo “mbunga makura tazi gwana uradi kononkango dahompa gwawo.”​—Resa 2 Histoli 32:6-8.

9. Yisinke natu lirongera ko kwaJoba kuhamena kugava ekorangedo?

⁹ Nampili ngomu Joba ga hepere ekorangedo, age kwa rongere vakwawo vatatu omu nava gava ekorangedo. Age kwa va tanterere asi: ‘Ngano asi pomavega geni nina kara, ngano tani mu koreke nonondunge ni uyunge ngorooro ni mu hengagwide.’ (Joba 16:1-5) Ano konyima, Jehova naElihu kwa ya korangedere Joba.​—Joba 33:24, 25; 36:1, 11; 42:7, 10.

10, 11. (a) Morwasinke munwaJefuta ga heperere ekorangedo? (b) Wolye hena natu korangeda naina?

¹⁰ MunwaJefuta gomukadona nage ga hepere ekorangedo. Komeho Jefuta a ka rwise Vaamoni age kwa tumbwidilire Jehova asi nsene nga ka funda, muntu ogu nga hova kupwaga ko a mu simbagwire nga mu gava kwendi a ka rugane koNkongoronzugo eparu lyendi mudima. Apa ga ka fundire, munwendi yige ga hovere kupwaga ko a mu hamberere. Ayo kwa guvisire sili Jefuta. Nye ga sikisire mo mugano gwendi pokutuma munwendi koSiro a ka rugane koNkongoronzugo eparu lyendi mudima.​—Vap. 11:30-35.

¹¹ Eyi kwa kere udigu kwaJefuta nye unene po kwamunwendi, nampili ngoso age ga sikisire mo mugano goguhwe. (Vap. 11:36, 37) Eyi kwa tente asi kapi nga kwara nokukara novana ntani ruvharo rwemekoro lyawo rwa ya hege. Age ga hepere ekorangedo. Bibeli kwa tanta asi: “Ezi yizo ntundiliro zompo molsraeli asi vakadi woVaisraeli kuza mazuva gane nkenye momumvho va ka lire muna gomukadona gwaJefuta Mugiliyata.” (Vap. 11:39, 40) Vakriste wovadike ava ava ruganesa udike wawo ‘mweyi yaHompa’ nawo va hepa ekorangedo nepandadeko.​—1 Kol. 7:32-35.

12, 13. Ngapi omu Peturusa ga ‘korekere vapuli vakwawo’?

¹² Komeho Jesus va ka mu dipage, age kwa tanterere mupositoli Peturusa asi: “Simoni, tara, Satana kuna hara unene a mu zere ngwendi moomu ava zere mahangu. Nye ame kuna ku kanderere asi epuro lyoge lya ha pwa mo. Ano apa ngo tengwira kwange, ngo koreke vakweni.”​—Ruk. 22:31, 32.

¹³ Peturusa kwa kere gumwe ogu nga pitisire mombungakriste. (Gar. 2:9) Age kwa korangedere vakwawo poPentekoste ntani poyiruwo eyi ya ya kweme ko. Konyima zokurugana nomvhura dononzi mokuzuvhisa, age kwa tjangerere vapuli  vakwawo asi: ‘Ezi mbilive zonsupi kuna zi tjanga ni mu korangede oku tani gava undipo asi nkenda ezi mwa kara nazo yizo nkenda zosili zaKarunga. Kareni muna koro mwazo.’ (1 Pet. 5:12) Mbilive ozo kwa korangedere Vakriste womosiruwo sanare, ntani nose kuna kutukorangeda. Ekorangedo eli mulyo ngomu tuna kundindira uzuni woupe “moomu ga yi tumbwidira Karunga.”​—2 Pet. 3:13.

14, 15. Ngapi omu nobuke daJohanesa adi tu korangeda?

¹⁴ Mupositoli Johanesa nage kwa kere mupitisili mombungakriste. Evangeli lyendi lyokuhamena sirugana saJesus sokuzuvhisa kwa korangeda Vakriste ntani alyo simpe kuna kutukorangeda naina. MEvangeli lyendi yimo mwelike va tjanga nonkango edi daJesus asi eharo kuna kara sidimbwiliso soVakriste wousili.​—Resa Johanesa 13:34, 35.

¹⁵ Monombilive ntatu daJohanesa kwa kara mo yitwa yomulyo. Apa atu lizuvhu unzoni komapuko getu, ayo kutuhafesa pokudiva asi ‘honde zaJesus Kristusa kukuhura nonzo nadinye.’ (1 Joh. 1:7) Nye nsene asi ose kuna kutwikira kulizuvha unzoni ayo ngayi tu hengagwida pokudiva asi ‘Karunga ga pitakana nomutjima detu.’ (1 Joh. 3:20) Johanesa yige hena gelike ga tjenge asi: “Karunga yige eharo.” (1 Joh. 4:8, 16) Mbilive zendi zauvali nezi zautatu kwa pandadeka Vakriste ava ava twikire ‘kukwama usili.’​—2 Joh. 4; 3 Joh. 3, 4.

16, 17. Ekorangedo musinke ga geve Paurusa koVakriste womosiruwo sanare?

¹⁶ Mupositoli Paurusa yige ga korangedere  po unene vapuli vakwawo. Ayo kumoneka asi konyima zonomfa daJesus, sinzi sovapositoli kwa kere moJerusarema, omu ngazi gendesere mbungagendesi sirugana sokuzuvhisa. (Yirug. 8:14; 15:2) Vakriste womoJudeya ngava zuvhisa kuhamena Jesus kovantu ava va pulire mwaKarunga gumwe tupu. Ano Paurusa kwa mu gendesere mpepo zokupongoka a ka zuvhisire Vagereka noVaroma ava ngava karere yikarunga yoyinzi.​—Gar. 2:7-9; 1 Tim. 2:7.

¹⁷ Paurusa kwa zire kevango oku vana kutumbura naina asi Turkia ntani koGereka nokoItalia mokukatulisa po nombungakriste. Vakriste owo wovape kwava ‘hepekere,’ yipo nye, awo va hepere ekorangedo. (1 Tes. 2:14) Koyiha yomvhura 50, Paurusa kwa tjangerere mbungakriste zompe zomoTesaronika asi: “Nkenye apa ose kupandura Karunga mwarweni one namuvenye oku tatu mu diworoka hena nkenye apa momakanderero getu. Ose kapi atu tuda kudiworoka komeho zaKarunga Guhyetu yirugana yepuro lyeni nomupampi geharo.” (1 Tes. 1:2, 3) Age hena gava tumangedere asi: ‘Omu likorangede-korangede oku tomu likwafa-kwafa.’​—1 Tes. 5:11.

18. Ngapi omu mbungagendesi za korangedere Filipusa?

¹⁸ Mbungagendesi zomosiruwo sanare ngazi gava makorangedo koVakriste ntani kwava ngava pitisire mombungakriste. Azo kwa vaterere Filipusa apa ga zuvhisilire Vasamaliya kuhamena Kristusa. Peturusa naJohanesa, vamwe womombungagendesi kwava tumine mokukakanderera po Vakriste wovape yipo va gwane mpepo zokupongoka. (Yirug. 8:5, 14-17) Ayo ya hafesere Filipusa novarongwa vena wovape kweyi mbungagendesi za va kwatesere ko.

19. Ngapi omu va lizuvhire Vakriste apa va va reserere mbilive zokutunda kombungagendesi?

¹⁹ Konyima, mbungagendesi za hepere kutokora nsene asi vapagani ava va here kukara Vakriste kuvhura va va rugane yovamba kuliza noVeta zaMosesa. (Yirug. 15:1, 2) Kupitira mevatero lyompepo zokupongoka nokukonakona Matjangwa, azo kwa tokwere asi kapi ya kere hepero, makura tazi tjanga mbilive mokudivisa ko nombungakriste. Makura tava tumu ko vamwe womombungagendesi va tware mbilive ozo. Yitundwamo musinke ya kere? “Eyi za pwa kuziresa, makura mbungakriste tazi hafere ekorangedo eli za va pere.”​—Yirug. 15:27-32.

20. (a) Ngapi Mbungagendesi azi tu korangeda naina? (b) Epuro musinke ngava ka limburura mosirongwa sokukwama ko?

²⁰ Naina, Mbungagendesi kugava ekorangedo koVabeteli nava ava rugana uzuvhisi wosiruwo nasinye ntani kovakareli vaJehova navenye uzuni mudima. Ngwendi Vakriste womosiruwo sanare, nose kuhafera ekorangedo lyawo. Momvhura 2015, Mbungagendesi kwa pwagesere sifo Tengura kwaJehova, esi asi korangeda ava va tengura monyima. Nye ayo ngoso kutanta asi vaava tupu ava pitisire yiwo nava korangeda vakwawo ndi? Ngatu ka gwana elimbururo mosirongwa sokukwama ko.