1. Morwasinke Paurusa ga tanterere Vakriste woVahebeli va likorangede “unene”?

MUPOSITOLI Paurusa kwa tjangerere Vakriste woVahebeli asi: ‘Atu likoraike-koraikeni mokulihara-hara nomokurugana yirugana yoyiwa. Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva lyaHOMPA tali hedere pepi.’ (Heb. 10:24, 25) Monomvhura tupu ntano, Vakriste woVajuda ava va tungire moJerusarema vamwene asi “ezuva lyaHompa lyenene” kwa kere pepi. Awo va yi dimbwilire asi va hepere kutjwayuka mo mositata ngomu tupu gava tanterere Jesus. (Yirug. 2:19, 20; Ruk. 21:20-22) Vakwayita woVaroma kwaya zonagwire po sitata saJerusarema momvhura 70.

2. Morwasinke yina karere hepero kukorangeda vanavazinyetu?

² Naina, tuna kara nonokonda dononzi deyi natu pulira asi ‘ezuva lyedigu’ lyaJehova pepi lina kara. (Jow. 2:11) Muporofete Sefaniya kwa tente asi: “Ezuva lyaHOMPA lyenene pepi lina kara, pepi-pepi kuna kugenderera kuwiza.” (Sef. 1:14) Uporofete  owo kwa tamba hena komazuva getu. Mokumona asi ezuva lyaJehova pepi, twa hepa ‘kulikoraika-koraika mokulihara-hara nomokurugana yirugana yoyiwa.’ (Heb. 10:24) Eyi kutanta asi twa hepa kulikida elituromo movanavazinyetu yipo tu va korangede.

3. Yisinke ga uyungire ko Paurusa kuhamena ekorangedo? (Tara efano pepenuno 20.)

³ Bibeli kutanta asi: “Esivano ngali ku hakana erago, nye nonkango donongwa tadi ku hafesa.” (Yis. 12:25) Nonkango odo kulikida asi natuvenye twa hepa ekorangedo poyiruwo noyiruwo. Paurusa kwa yi likidire asi ava ava pitisire nawo va hepa ekorangedo. Age kwa tjangerere Vakriste womoRoma asi: “Yeeyi ame kuna mu diworoka unene, na hara kumumona, ngani ya mu pe ko uhwi umwe wopampepo, mu ya kore. Eyi na gazara po yeeyi asi, natuvenye ngatu ya gwanene simwe ekwafo: one li ya mu kwafe epuro lyange, ano ame name li ya kwafe nge lyeni.” (Rom. 1:11, 12) Yosili, Paurusa ogu nga korangeda vakwawo nage ga hepere ekorangedo.​—Resa Varoma 15:30-32.

4, 5. Wolye natu korangeda ntani morwasinke?

⁴ Vanavazinyetu ava ava lizambere mosirugana saJehova, va hepa epandadeko. Vamwe kuna kara vazuvhisi wokukarerera. Sinzi sawo kwa tura po marunduruko yipo va rugane uzuvhisi wokukarerera. Vamwe hena ava va tura po malizambero kuna kara vatumwa, Vabeteli, vatareli wonombunga novakadi vawo ntani nava ava rugana konomberewa detoroko. Yipo nye, nawo va hepa kuvakorangeda. Pwa kara hena vamwe ava va hara kulihameka mosirugana sosiruwo nasinye, nye ukaro wawo kapi au va pulisire. Vantu vangoso nawo va hepa ekorangedo.

⁵ Kuvhura tu korangede hena vanavazinyetu ava va tokora kukara vadike morwa kukwama mpangera ezi asi nonkwara da hepa kukara “dosikriste.” (1 Kol. 7:39) Mokulifana, vagolikadi ava ava rugana unene va hepa nawo epandadeko lyokutunda kovagara vawo. (Yis. 31:28, 31) Vakriste ava vana kulididimikira mahepeko ndi mauvera, va hepa nawo ekorangedo. (2 Tes. 1:3-5) Jehova naJesus kuhengagwida vanavazinyetu navenye owo wovalimburukwi.​—Resa 2 Vatesaronika 2:16, 17.

6. Situmbukira musinke va kara naso vakuronambunga ngomu va yi tumbura mwaJesaya 32:1, 2?

⁶ Resa Jesaya 32:1, 2. Jesus Kristusa kuruganesa vagwavekwa ‘novapangeli’ womononzwi dapeke mokutukorangeda nokutupa mavyukiso. Vakuronambunga kapi ava tu ‘pangere’ eyi natu rugana, nye awo ‘kurugana kumwe nose’ yipo tu gwanene mo uwa.​—2 Kol. 1:24.

7, 8. Kugusa ko kukorangeda, yisinke hena nava rugana vakuronambunga?

⁷ Vakuronambunga kuvhura va lirongere ko kosihonena saPaurusa. Age kwa tjangerere Vakriste womoTesaronika ava va hepekere asi: “Pokumuhara one yipo twa mu tokomenene, kapisi pokumuretera Mbudi zoNgwa zaKarunga pwelike, hawe, nampili pokumufira. yimo twa mu here nye ngoso.”​—1 Tes. 2:8.

⁸ Kapi ya gwanena po tupu kukorangeda wopeke. Paurusa kwa tanterere vakuronambunga womoEfeso asi: “Ame na mu likida mwanayinye asi mokurugana ngesi omu kwafe vankundi, oku tatu diworokeni hena nonkango daHompa Jesus edi ga tente asi,  ‘Kugava kwa kara nerago, kwa pitakana kutambura.’” (Yirug. 20:35) Paurusa kapi tupu nga korangeda vapuli vakwawo nye hena nga ‘gava nayinye yendi nanyamwendi.’ (2 Kol. 12:15) Mokulifana, vakuronambunga nawo va hepa hena kukwafa vapuli vakwawo.​—1 Kol. 14:3.

9. Ngapi vakuronambunga nava gava epukururo monkedi zongwa?

⁹ Kukorangeda wopeke kwa kwatera mo hena kugava mapukururo. Vakuronambunga kuvhura va lirongere ko kwaJesus omu nava gava mapukururo monkedi zongwa. Jesus kwa tulire po sihonena sosiwa monkedi omu ga pukwilire nombungakriste domoAsia konyima zevhumbuko lyendi. Komeho a gave mapukururo, age kwa pandadekere mbungakriste zaEfeso naPeregamu ntani Tiyatira. (Ehor. 2:1-5, 12, 13, 18, 19) Age kwa tanterere mbungakriste zaSaredesa asi: “Navenye ava na hara, kuvatugumukira, tani va rungurura. Kara nye muradi, o litezurure.” (Ehor. 3:19) Vakuronambunga kuhetekera ko kuhonena Jesus apa ava gava mapukururo.

10. Yisinke twa hepa kurugana natuvenye?

¹⁰ Natuvenye kuvhura kukorangeda wopeke. Paurusa kwa tanterere Vakriste va uyunge “nonkango donongwa dokuwapeka” kovakwawo. (Efe. 4:29) Natuvenye twa hepa kugazadara ko eyi natu rugana mokuvatera vakwetetu. Paurusa kwa tanterere Vakriste woVahebeli asi: ‘Yipo nye, zerureni mawoko aga gana mi, mu koreke nongoro edi da roroka. Wapekereni nompadi deni nonzira dokuvyuka, edi da remana neisi di tumpauka mo, nye siwa po di veruke.’ (Heb. 12:12, 13) Natuvenye kukwatera mo vadinkantu kuvhura kukorangeda wopeke.

11. Yisinke ya vaterere Marthe apa ga guvire sikando simwe?

¹¹ Marthe, * munazinyetu gomukadi ogu ga  guvire sikando simwe, kwa tjenge asi: “Ezuva limwe kwa kanderere ni gwane ko ekorangedo makura tani ligwana namunazinyetu gomukadi gomukurupe ogu ga hengagwidire nge nokulikida nge eharo, yininke eyi na hepere posiruwo sina. Age hena kwa tanterere nge asi nage kwa pitire moukaro wokulifana, eyi ya vaterere nge ni dimburure asi kapisi nyamelike na pitire moukaro wina.” Munazinyetu gwina gomukurupe nampo kapi ga yi dimbwilire omu nonkango dendi da kundamene Marthe.

12, 13. Ngapi natu tura pasirugana epukururo lyomoVafilipi 2:1-4?

¹² Paurusa kwa tjangerere mbungakriste zomoFilipi asi: “Ukaro weni mwaKristusa nye wa pama ndi? Eharo lyendi kumuhengagwida ndi? Mwa kara momalikwatakano noMpepo ndi? Nye mwa kara tupu nonkedi nonkenda kovakweneni ndi? Nsene ngoso, sikisilireni mo ehafo lyange pokukara mutjima gumwe nemeharo limwe negazaro limwe nositambo simwe. Walye omu rugana yuma mokulitara pwaamweni ndi mokupapara efumano lyomawoko-woko. Nye omu linunupike, tomu tara vakweneni asi va mu pita mekuto. Walye omu lipakere mbili nyamweni nyonelike, nye omu pakere hena novakweneni mbili.”​—Fil. 2:1-4.

¹³ Natuvenye kuvhura tu likide elituromo movanavazinyetu ‘pokuvahengagwida neharo’ nokutunga po ‘elikwatakano’ nawo ntani nokuvalikida “nkenda.”

14. Monkedi musinke natu gava ekorangedo?

¹⁴ Ayo kutuhafesa apa atu zuvhu asi ava twa vatera kuna kutwikira kukarera Jehova. Mupositoli Johanesa kwa tjenge asi: “Kutupu hena ehafo eli lya pitakana pweli lyokuzuvha asi vana vange tava kwama usili.” (3 Joh. 4) Vazuvhisi wokukarerera nawo kuvahafesa apa ava zuvhu asi vantu ava va vatera kuna kutwikira kukarera Jehova ndi nampo asi awo kuna kurugana uzuvhisi wokukarerera. Nsene tu diworokesa muzuvhisi gokukarerera ogu ana dompo mutjima kuhamena omu ga vatera wopeke ngayi mu korangeda.

15. Monkedi musinke hena natu korangeda ava ava rugana mosirugana sosiruwo nasinye?

¹⁵ Sinzi sovatareli wonombunga kwa uyunga ko omu ya va hafesa pokugwana nombilive dokutunda konombungakriste edi ava dingura. Mokulifana, nsene tu pandura vakuronambunga novatumwa novazuvhisi wokukarerera ntani Vabeteli koyirugana yawo, ngayi va korangeda.

16. Yisinke natu rugana mokukorangeda wopeke?

¹⁶ Ayo epuko kugazara asi kapi tatu vhuru kukorangeda wopeke morwa kulizuvha asi kapi tuna diva eyi natu uyunga. Kapi twa hepa kurugana yoyinzi mokugava ekorangedo, poyiruwo yimwe kuvhura tu morore tupu nokumenyuna. Ano nsene tu dimburura asi ogu tuna kumorora kapi ana yi hafere, kuvhura yi kare asi ana kara noudigu. Yipo nye, ose kuvhura tu mu hengagwide nsene tu mu purakena nawa.​—Jak. 1:19.

17. Ngapi mudinkantu gumwe va mu vaterere?

¹⁷ Henri munazinyetu gomudinkantu kwa guvire unene apa vamwe vekoro lyendi kukwatera mo oguhwe ava va kere vakuronambunga va hegekere kukarera Jehova. Mutareli gonombunga ga yi dimbwilire asi Henri ana guwu, makura tava pwaga kumwe va ka zogere po. Age kwa purakenene Henri  ngomu ga mu tanterere udigu wendi. Henri ga ya dimbwilire asi mokuvatera vekoro lyendi va tengure kwaJehova ntudi ga hepa kulididimika. Episarome 46 naSefaniya 3:17 ntani Marukusa 10:29, 30 kwa mu hengagwidire unene.

18. (a) Yisinke ga tjenge Hompa Saromo kuhamena ekorangedo? (b) Egano musinke ga geve Paurusa?

¹⁸ Sihonena saMarthe naHenri kuturonga asi natuvenye kuvhura tu korangede vanavazinyetu nokuvahengagwida. Hompa Saromo kwa tjenge asi: “Ee, ehafo musinke lyokugwana nonkango dina zire mo poruveze rwado. Yipara youzerere kukuhafesa, ano mbudi zongwa kukupepereresa.” (Yis. 15:23, 30) Kuresa Ruhungu neyi ya kara koIntaneta zetu kuvhura kuvatera ogu ana guwu. Paurusa kwa geve egano asi kudimba nonsumo doUhompa nayo kukorangeda. Age kwa tjenge asi: “Omu lironga-ronge oku tomu lipukurura-pukurura nounongo naunye. Omu dimbe mapisarome nononsumo depando noyidimba yokupongoka. Dimbireni Karunga nonomutjima dompandu.”​—Koros. 3:16; Yirug. 16:25.

19. Morwasinke yina karere nomulyo tu likorangede-korangede?

¹⁹ Ngomu ezuva lyaJehova lina kuhedera pepi, mulyo unene tu likorangede-korangede. (Heb. 10:25) Ngatu hafa nsene tu kwama epukururo lyaPaurusa eli ga tanterere Vakriste vakwawo asi, “yipo nye nomu tundira kulikorangeda-korangeda oku tomu likwafa-kwafa, moomu tupu muna kurugana pwanaina.”​—1 Tes. 5:11.