1, 2. (a) Morwasinke vantu womosiruwo saPaurusa va karerere nosinka kuhamena upika ntani umanguruki? (b) Yilye ga tumbwire Paurusa oku nava gwana vantu umanguruki wene-wene?

VAROMA ngava limono asi awo kurugana youhunga, va diva veta ntani asi awo kwa mangurukire. Nye unankondo noungawo wawo kwa yi gwene morwa va kere novapika ava ngava va ruganene. Mositata saRoma kwa kere mo vapika wovanzi. Eyi yiyo nye vantu wokulikarera noVakriste va ya karerere nosinka sosinene kuhamena upika ntani umanguruki.

² Paurusa kwa tjenge monombilive dendi kuhamena umanguruki. Nye nampili ngoso, sitambo seyi nga zuvhisire kapi sa hamenene koumanguruki ou ngava kondjere vantu wovanzi. Paurusa noVakriste vakwawo kapi va huguvarere movapangeli mokuvamangurura. Nye awo ngava zuvhisire wopeke mbudi zongwa zoUhompa waKarunga ntani mulyo gonzambo zaJesus Kristusa zosizoweseso. Paurusa kwa tumbwire  oku vapuli vakwawo nava gwana umanguruki wene-wene. Age kwa tjenge mombilive zendi zauvali koVakolinte asi: “‘Hompa’ kutanta asi Mpepo, ano apa pa kara Mpepo zaHompa, yipo pwa kara emanguruko.”​—2 Kol. 3:17.

3, 4. (a) Yisinke ga uyungire Paurusa monovelise edi da kara komeho zo-2 Vakolinte 3:17? (b) Yisinke natu rugana mokugwana umanguruki wokutunda kwaJehova?

³ Mombilive zaPaurusa ezi ga tjengerere Vakolinte, age kwa uyungire kuhamena Mosesa ogu ga kere nouyerere waKarunga apa ga ka tundire koNdundu zaSinayi oku ga ka uyungire naJehova kupitira momuengeli. Apa va mwene Mosesa, vantu tava tjira makura age ta kudumike sipara sendi nosikehe. (Ex. 34:29, 30, 33; 2 Kol. 3:7, 13) Paurusa kwa fatwilire asi: “Nsene va litezwilira kwaHompa, sikudumikiso tava si kudumuna ko.” (2 Kol. 3:16) Yisinke ga tembe Paurusa?

⁴ Mosirongwa sa ka pita ka tu lirongere asi, Jehova yige gelike ga kara noumanguruki wene-wene. Yipo nye, ‘apa pa kara mpepo zendi,’ yipo pwa kara emanguruko. Nsene tuna hara kugwana umanguruki twa hepa ‘kulitezwilira kwaHompa,’ kutanta asi kukara nelikwatakano lyewa naJehova. Apa Vaisraeli va kere momburundu, awo kwa divarere eyi ga va ruganenene Jehova. Awo kwa kukutikire nomutjima dawo ano eyi yava ninkisire va ruganese umanguruki wawo mokukwama yavene.​—Heb. 3:8-10.

5. (a) Umanguruki musinke atu gwana kwaJehova? (b) Ngapi twa yi diva asi kuvhura tu kare noumanguruki waJehova nampili tu kare modorongo ndi moupika? (c) Mapuro musinke natu ka konakona?

⁵ Umanguruki ou au tundu kwaJehova kwa pitakana ou ava kondjere vantu wovanzi. Awo kapi tupu au mangurura vantu komaudigu nye hena kononzo nokonomfa ntani komaukarelikarunga goyimpempa. (Rom. 6:23; 8:2) Owo kuna kara umanguruki wouwa po. Muntu kuvhura simpe a gwanene mo uwa nampili kwa mu tura modorongo ndi kwa mu tura a kare mupika. (Gen. 39:20-23) Munazinyetu Harold King nage kwa kere noruhafo nampili ngomu va mu tulire modorongo siruwo sosire morwa epuro lyendi. Kuvhura o tarere sihorokwa sendi kelikwamo lyetu lyoTivi lyoBroadcast. (Tara konhi MAPURAGERO NTANI YILIMONENA > KULIDIDIMIKIRA MAUDIGU.) Ngesi tu konakoneni mapuro aga gavali. Ngapi natu yi likida asi ose kuhafera umanguruki wetu? Ntani ngapi omu natu ruganesa umanguruki wetu monkedi zongwa?

6. Ngapi omu Vaisraeli va yi likidire asi kapi va haferere umanguruki ou gava pere Jehova?

⁶ Apa ava tu pe uhwi ose narunye kupandura ogu ana u tu pe. Nye Vaisraeli kapi va haferere umanguruki ou gava pere Jehova apa ga va gusire moEgipite omu va kere vapika. Konyima zomakwedi gongandi, awo va tamekere kudiworoka yikunwa nonondya edi ngava li moEgipite. Eyi ya va ninkisire va sivanene Jehova nokuhara kutengura koEgipite. Awo kwa tere ‘nomfi norupotera nakatjama nehidi ndi nonyanga nonohaki’ yininke eyi ngava hafere moEgipite asi mulyo unene kupitakana umanguruki ou gava pere Jehova wokumukarera. Eyi yiyo nye Jehova ga va  handukilire. (Num. 11:5, 6, 10; 14:3, 4) Ngano nose tu lirongere ko.

7. Ngapi omu Paurusa ga sikisire mo etjangwa lya kara mo-2 Vakolinte 6:1, ntani ngapi natu mu honena?

⁷ Paurusa kwa tumangedere Vakriste navenye va dire kuruganesa momudona umanguruki ou ga va pa Jehova kupitira mwaMunwendi, Jesus Kristusa. (Resa 2 Vakolinte 6:1.) Paurusa kapi ga sikilire mo ntani age kwa kere mupika gononzo nonomfa, ano eyi kwa mu koresere sili. Nye nampili ngoso, age kwa tente asi: “Ame tani pandwire Karunga mwaJesus Kristusa.” Morwasinke? Age kwa fatwililire Vakriste vakwawo asi: “Yeeyi Veta zoMpepo ezi azi tura mwenyo ava va kara mwaJesus Kristusa, yizo za mangurura nge koveta zononzo nezi zonomfa.” (Rom. 7:24, 25; 8:2) Ngwendi Paurusa, twa hepa kupandura Jehova kweyi ga tu mangurura ko kononzo nokonomfa. Kupitira mosizoweseso, ose kuvhura tu karere Karunga nezwi lyewa lyokomutjima.​—Epis. 40:8.

8, 9. (a) Yisinke ga rondwere Peturusa kuhamena omu natu ruganesa umanguruki wetu? (b) Maudigu musinke atu ligwanekere nago naina?

⁸ Twa hepa kutakamesa yipo tu dire kuruganesa umanguruki wetu momudona. Peturusa kwa geve erondoro asi twa ha ruganesa umanguruki wetu ngompito zokurugana yoyidona. (Resa 1 Peturusa 2:16.) Erondoro olyo kutudiworokesa eyi ya horokerere Vaisraeli momburundu. Alyo mulyo unene kwetu naina. Mouzuni ou kuna kara mo yininke yoyinzi yokutukoka ngwendi yidwara nomaliwapaiko, yikulya noyikunwa, yilihafeso ntani nayimwe hena. Vanangesefa kuruganesa vantu wokumoneka nawa mokukoka vantu va rande yininke ya hana hepero. Ayo kuvhura yi tu ninkise tu ruganese momudona umanguruki wetu.

⁹ Erondoro eli ga geve Peturusa kwa tamba hena komatokoro aga atu tura po kuhamena elirongo ntani yirugana. Pasihonena, naina vadinkantu wovanzi kuvakorangeda va ze kerongo lyokuzeruka. Awo kuvaninka va gazare asi erongo lyokuzeruka kuvapa mpito va ka gwane yirugana yokufuta nawa. Ntani hena kuvapa mauzera yipo va dive yimaliwa eyi ava tambura ava ava zi kerongo lyokuzeruka nava ava hagere tupu kosekondere. Wovanzi kugazara kuza kerongo olyo yipo ngava ka gwane yirugana yokufuta nawa. Nye yisinke va hepa kudiworoka vadinkantu owo novakurona vawo?

10. Yisinke twa hepa kudiworoka nsene kuna kutura po matokoro?

¹⁰ Vamwe kuvhura va lizuvhe asi mokumona asi matokoro kutukundama nyamwetu, awo va kara nemanguruko lyokutokora eyi vana hara nsene ezwi lyawo lyokomutjima kapi lina kuvapangura. Awo nampo kukwama nonkango edi ga uyungire Paurusa kuhamena nondya asi: “Emanguruko lyange nokuvhura si kulipangura ezwi lyomomutjima lyogu gwapeke.” (1 Kol. 10:29) Nampili ngomu twa kara noumanguruki wokutokora kuhamena erongo ndi yirugana eyi ngatu rugana, twa hepa kudiworoka asi umanguruki wetu kwa hamena mo kukwama noveta. Ntani twa hepa kudiworoka asi nkenye eyi atu tokora ngayi tu kundama. Eyi yiyo nye Paurusa ga tjenge asi: “‘Nayinye va yi pulisira  nge.’ Nye kapisi nayinye ayi kwafa. ‘Nayinye va yi pulisira nge.’ Nye kapisi nayinye yiwa.” (1 Kol. 10:23) Etjangwa olyo kutuvatera tu dive asi pwa kara yininke yomulyo eyi natu demenena kupitakana tupu eyi twa hara.

11. Morwasinke ga tu mangwilira Jehova kononzo nokonomfa?

¹¹ Peturusa kwa geve konda zeyi natu dilira kuruganesa umanguruki wetu monkedi zondona. Age kwa tente asi twa hepa kuuruganesa mokukara ‘vapika vaKarunga.’ Jehova kwa tu mangurura koupika wononzo nonomfa yipo tu mu karere eparu lyetu mudima.

12. Yisinke natu lirongera ko kwaNowa nepata lyendi?

¹² Nsene kapi tuna hara kuruganesa umanguruki wetu momudona ntani nokukara upika komadowo gouzuni, twa hepa kulitura mo unene mokukarera Jehova. (Gar. 5:16) Pasihonena, Nowa nepata lyendi nawo kwa parukire posiruwo esi rwa vhukire ruhonda nonyanya. Nye awo kapi ngava lihameke moyininke eyi ngava rugana vantu woposiruwo sawo. Yisinke ya va vaterere? Awo kwa litulire mo unene mosirugana esi gava pere Jehova sokutunga emuwato nokupongaika nondya davene nedi doyikorama ntani awo kwa rondwere vantu. Bibeli kwa tanta asi: ‘Nowa kwa rugene nayinye moomu ga mu pangerere Karunga.’ (Gen. 6:22) Yitundwamo? Nowa nepata lyendi va parukire apa rwa wizire Ruhanzo.​—Heb. 11:7.

13. Sirugana musinke ga tu pa Jehova?

¹³ Sirugana musinke ga tu pa Jehova? Ngovarongwa vaJesus, ose kwa tu pangera tu zuvhise. (Resa Rukasa 4:18, 19.) Satana ga zonagura nondunge dovantu wovanzi eyi yiyo nye ava kondjere ungawo nefumano ntani awo kukwatesa ko  maukarelikarunga goyimpempa. (2 Kol. 4:4) Twa hepa kukwama sihonena saJesus mokuvatera vantu va dive nokukarera Jehova, Karunga goumanguruki. (Mat. 28:19, 20) Nye ayo kapisi ureru morwa moyirongo yimwe, vantu nyanya ntani kapi va hara kupurakena kombudi zetu. Twa hepa kulipura asi: ‘Ngapi nani ruganesa umanguruki wange mokukwatesa ko sirugana soUhompa?’

14, 15. Ngapi vana kukwatesa ko vanavazinyetu sirugana sokuzuvhisa? (Tara efano pepenuno 8.)

¹⁴ Ayo kutuhafesa kweyi vanavazinyetu wovanzi ava litura mo unene mosirugana sosiruwo nasinye pomazuva aga gopouhura. (1 Kol. 9:19, 23) Vamwe kuzuvhisira monomukunda dawo, ano vamwe kuza komavango oku vana hepa vazuvhisi. Monomvhura ntano sivaro sovazuvhisi wokukarerera kwa pitakana po-1 100 000. Eyi kuna kara yitundwamo yoyiwa omu vanavazinyetu wovanzi vana kuruganesa nawa umanguruki wawo mokukarera Jehova.​—Epis. 110:3.

¹⁵ Yisinke ya va vatera va ruganese nawa umanguruki wawo? Tarurura sihonena saJohn naJudith ava va zuvhisira moyirongo yokulisiga-siga ure wonomvhura 30. Awo kwa tanta asi apa za tamekere Sikora zoVazuvhisi wokukarerera momvhura 1977, azo kwa korangedere vanavazinyetu mokukazuvhisira oku vana hepa vazuvhisi. John kwa tanta asi age nga papara yirugana yokulisiga yipo a gwane eyi nayi mu pa siruwo sokuzuvhisa. Konyima awo kwa zire va ka zuvhisire kosirongo nasopeke. Yisinke ya va vatere va yike mpo zamo nokulironga eraka lyomosirongo oso? Awo ngava kanderere kwaJehova nokuhuguvara mwendi. Ngapi vana kulizuvha kweyi va rugana? John kwa tanta asi: “Esi sirugana somulyo po. Ame na yi limonena asi Jehova kuna kara guhya geharo. Ngesi na kwata egano eyi ali tanta etjangwa lyaJakopo 4:8 asi: ‘Hedeni Karunga pepi, nage a mu hede pepi.’ Ngesi nina hafa.”

16. Ngapi omu vamwe va ruganesa nawa umanguruki wawo?

¹⁶ Vamwe kapi ayi va tompoka kulihameka unene mosirugana sosiruwo nasinye. Nampili ngoso, awo kukavatera mosirugana sokutunga mavango goUhompa uzuni mudima. Pasihonena, apa va tungire mberewa zetu zonene moWarwick moAmerika vanavazinyetu wokusika po-27 000 kwa ka kwatesere ko sirugana oso yivike yivali ano vamwe mvhura nazinye ndi kupita opo. Vamwe kwa hagekere yirugana yawo mokukavatera. Vanavazinyetu owo kwa ruganesa umanguruki wawo mokuyererepeka Jehova, Karunga goumanguruki.

17. Yisinke ngatu ka gwana komeho nsene tu ruganesa umanguruki wetu monaruwa?

¹⁷ Ose tuna hafa mokudiva Jehova ntani twa kara noumanguruki ou twa ya gwana morwa kuhama koukareli wousili. Ngano tu yi likide momatokoro getu asi twa hafera umanguruki owo. Mevango lyokuruganesa umanguruki owo momudona, tu tokomeneni kuuruganesa mokukarera Jehova. Nsene tu yi rugana oyo, ngatu ka hafera matungiko aga ga tu tumbwidira Jehova apa ngau ka sikilira mo uporofete ou asi: “Unsitwe ngava u zowora mo moupika wezonauko, ngau ze mezowoko lyouyerere wovana vaKarunga.”​—Rom. 8:21.