1-3. (a) Udigu musinke ava ligwanekere nawo vadinkantu ntani kosinke natu yi fanekesa? (Tara efano.) (b) Ngapi nava vhura kukohonona po udigu owo?

TU TANTE asi ono hara kuza morugendo kodoropa zongandi yipo o ka kare posilika somulyo. Mokukasika ko, ntudi wa hepa kugendera mombesa. Apa no ka sika pokurondera, to piyagana morwa kuna kara po vantu wovanzi nonombesa. Nye ayo tayi kuhafesa morwa ono diva oku ono tamba. Ove kapi no ronda mbesa ezi ono diva asi tazi kutwara kevango lyepuko.

² Eparu kwa fana ngwendi rugendo, ano vadinkantu kuna kara ngwendi vantu ava vana kara pokurondera. Poyiruwo yimwe kuvhura mu piyagane morwa matokoro manzi mwa hepa kutura po. Nye nsene mu litulira po yitambo kapi ngayi mu digopera kutura po matokoro. Yitambo musinke nomu tura po?

³ Sirongwa esi tasi ka limburura epuro olyo nokukakorangeda vadinkantu va ruganese eparu lyawo mokuhafesa Jehova. Eyi kutanta asi va hepa kukwama mapukururo gaJehova kuhamena erongo lyawo ndi yirugana eyi ngava rugana ndi  nsene ngava kwara nokukara novana. Ntani va hepa kulitulira po yitambo yopampepo. Nsene va litura mo unene mokukarera Jehova, age nga va vatera yi va tompoke meparu.​—Resa Yisewe 16:3.

4. Yisinke natu ka konakona mosirongwa esi?

⁴ Morwasinke natu litulilira po yitambo yopampepo? Tu tareni nokonda ntatu. Nokonda mbali dokuhova edi natu ka zogera kulikida asi ayo kunkondopeka elikwatakano lyetu naJehova. Ano konda zautatu kulikida mauwa aga atu gwana pokulitulira po yitambo yopampepo poudinkantu.

5. Konda musinke zomulyo zeyi no litulilira po yitambo yopampepo?

⁵ Konda zomulyo po zeyi no litulilira po yitambo yopampepo kuna kara mokupandura Jehova kweyi ga ku hara ntani kweyi ga ku pa. Mutjangi gEpisarome kwa tente asi: “Ee, yireru omu ya wapa yokupandura HOMPA, . . . Yirugana yoge yononkondo ove HOMPA, kuhafesa nge; yeeyi eyi wa rugana, yiyo nina kudimba ni yi hafere.” (Epis. 92:1, 4) Ngomudinkantu, gazadara ko nayinye eyi ga ku pa Jehova. Age kwa ku pa eparu, Bibeli ntani wa ya mu diva nokuyahama kombunga zendi, ove hena wa kara nehuguvaro lyokukaparuka narunye. Nsene o litulira po yitambo yopampepo ove ngo likida rupandu koyininke nayinye ga ku pa Jehova ntani ngo kara kaume kendi.

6. (a) Ngapi yitambo yopampepo nayi kundama elikwatakano lyoge naJehova? (b) Yitambo musinke no vhura kulitulira po ngesi?

⁶ Konda zauvali kuna kara asi ove ngo hafesa Jehova ntani ayo ngayi nkondopeka elikwatakano lyoge kumwe nendi. Mupositoli Paurusa kwa tente asi: “Karunga kapisi muhahungami, asi a divare yirugana yeni, neharo lyokufumadeka edina lyendi.” (Heb. 6:10) Nampili ove simpe mudinkantu kuvhura o litulire po yitambo. Pasihonena, Christine kwa litulilire po sitambo sokuresa masimwititi govanavazinyetu wovalimburukwi apa ga kere nonomvhura murongo. Ano Toby apa ga kere nonomvhura 12, age kwa litulilire po sitambo sokuresa Bibeli nazinye komeho va ka mu kuhwe. Maxim kwa mu kuhwire nonomvhura 11 ano mumbyendi Noemi nonomvhura murongo. Konyima vantu namumbyendi owo kwa litulilire po sitambo sokuka rugana koBeteli. Awo kwa ramekere foroma zokoBeteli kekuma lyembo lyawo yipo va li diworokese sitambo sawo. Nove kuvhura o gazadare ko yitambo yimwe eyi no litulira po nokurugana unene yipo o yi sikise mo.​—Resa Vafilipi 1:10, 11.

7, 8. (a) Konda musinke zautatu zeyi no litulilira po yitambo yopampepo? (b) Morwasinke mudinkantu gumwe ga dilire kuza kelirongo lyokuzeruka?

⁷ Konda musinke zautatu zeyi no litulilira po yitambo yopampepo? Ngomudinkantu, yinzi wa hepa kutokora ngwendi yirugana eyi ngo rugana, erongo ntani nayimwe hena. Kutura po matokoro kwa kara ngwendi muntu ogu ana sikama apa da ligaunukira nonzira. Nsene ono diva oku ono vyuka, ureru kuhorowora nzira ezi no genda. Mokulifana, nsene o litulira po yitambo ngayi kurerupira kutura po matokoro gomawa. Yisewe 21:5 kutanta asi: “O faneke nawa yuma yoge ngo gwane mo yoyinzi.” Ayo ngayi kutompoka nsene o litulira po yitambo. Eyi yiyo ga rugene Damaris apa ga sikire pontambo ezi ga hepere kutura po etokoro lyomulyo ngomudinkantu.

⁸ Damaris kwa pitire nawa apa ga mene sure. Age ngano ga zire kerongo lyokuzeruka aka lirongere uhahende ntani ngano epangero  lya mu futilire po. Nye age ta tokora kukarugana mombanga. Morwasinke? Age kwa tanta asi: “Apa na kere mudinkantu ame kwa litulilire po sitambo sokurugana uzuvhisi wokukarerera. Eyi kutanta asi na hepere kurugana novili dononsesu. Sirugana souhahende ngano sa ninkisire nge ni tambure yimaliwa yoyinzi nye eyi ngano kapi ya pere nge siruwo sokurugana uzuvhisi wokukarerera.” Damaris kwa rugana uzuvhisi wokukarerera ure wonomvhura 20, ntani kapi a livere kweyi ga tura po sitambo oso. Age kwa tanta asi: “Koyirugana, ame kuligwana novahahende. Awo kurugana yirugana eyi ngano na ka lirongerere. Sinzi sawo kapi ava hafere sirugana sawo. Nye ame kwa hafera kurugana uzuvhisi wokukarerera nomvhura dononzi.”

9. Morwasinke natu pandadekera vadinkantu?

⁹ Vadinkantu wovanzi mouzuni mudima kutura po matokoro gomawa, yipo nye va hepa kuvapandadeka. Awo kulitura mo unene mokukarera Jehova nokulitulira po yitambo yopampepo. Vadinkantu ava kuhafera eparu nokukwama mavyukiso gaJehova mwanayinye, kukwatera mo erongo, yirugana ntani kukara nepata. Saromo kwa tjenge asi: “Huguvara HOMPA nomutjima goge nagunye. Wa ha hama konondunge danyamoge. O diworoke HOMPA mwanayinye eyi ono kurugana, makura age ta ku likida nzira zouhunga.” (Yis. 3:5, 6) Vadinkantu, Jehova kwa mu hara unene, one mulyo kwendi ntani age nga mu popera nokumupitisira ntani nga mu tungika.

10. (a) Morwasinke natu litulira mo unene mokuzuvhisa? (b) Ngapi nayi ku tompoka kufaturura nawa eyi wa pura?

¹⁰ Mudinkantu ogu ga tokomena kuhafesa Jehova, kulitura mo unene mokuzuvhisa. Jesus kwa tente asi: ‘Mbudi zongwa yizo ngava hova tanko kuudisa.’ (Mar. 13:10) Mokumona asi mbudi ozo mulyo unene, twa hepa kulitura mo yipo tu zi divise. Kuvhura o liture mo unene mokuzuvhisa ndi? Kuvhura o rugane uzuvhisi wokukarerera ndi? Nye ngapi nsene kapi o hafere nawa-nawa kuzuvhisa? Ngapi nayi kutompoka kufaturura nawa eyi wa pura? Nonkedi edi mbali ngadi kuvatera. Liwapaikira nawa ntani twikira kutantera ko wopeke kuhamena epuliro lyoge. Nsene o yi rugana oyo ngo hafera kuzuvhisa.

11, 12. (a) Ngapi no liwapaikira yipo o ka zuvhise nawa? (b) Yisinke ga rugene mudinkantu gumwe kosure?

¹¹ Kuvhura o papare elimbururo kepuro ava pura unene vakweni wokosure. Pasihonena epuro eli asi: “Wa pura mwaKarunga ndi?” KoIntaneta zetu jw.org * kwa kara ko yirongwa eyi nayi vatera vadinkantu va gwane elimbururo kepuro olyo. Ako kwa kara ko sirongwa sepuro “Morwasinke na pulira mwaKarunga?” Aso nga si kuvatera o gwane elimbururo kepuro olyo. Mosirongwa oso kwa kara mo hena matjangwa gatatu, Vahebeli 3:4, Varoma 1:20 ntani Episarome 139:14 aga naga kuvatera o fatwilire vakweni konda zeyi wa pulira mwaKarunga. Kwa kara yirongwa yimwe hena eyi nayi kuvatera o liwapaikire nawa mapuro gapeke.​—Resa 1 Peturusa 3:15.

¹² Ruganesa nkenye mpito mokulikida ko vakweni wokosure Intaneta zetu jw.org. Oyo yiyo ga rugene Luca. Ezuva limwe kosure awo kwa zogerere kuhamena maukarelikarunga. Luca ta dimburura asi buke ezi va ruganesere kwa kara mo magano  gepuko kuhamena Nombangi daJehova. Nampili ngomu ga kere nowoma, ta pura epulisiro komurongi yipo a faturure eyi magano ogo ga karera epuko. Makura ta mu pulisilire, ano Luca ta ruganesa mpito ozo mokulikida vakwawo Intaneta zetu. Murongi ta tantere varongwa vendi va ka tarere vidiyo Funda vahepeki wa hana kurwana. Luca kwa hefe sili unene morwa ga geve umbangi.

13. Morwasinke natu dilira kudompa nampili tu ligwanekere nomaudigu?

¹³ Nampili ngomu ngo ligwanekera nomaudigu, kapisi yi ku dompese. (2 Tim. 4:2) Demenena koyitambo yoge. Apa Katharina ga kere nonomvhura 17, age kwa litulilire po sitambo sokuzuvhisira varugani vakwawo navenye. Murugani mukwawo nga mu tukagura, nye oyo kapi ya mu dompesere. Nkareso zendi kwa tetukisire Hans ogu ngava rugana nendi. Age kwa ya tamekere kuresa yimbapiratjangwa yetu nokulironga Bibeli ano konyima tava mu kuhu. Katharina kapi ga yi divire oyo morwa age kwa dirukire. Konyima zonomvhura 13, kwa mu hafesere apa Hans gaya va dingwire mombungakriste zawo nokuya gava siuyungwa. Ayo kwa mu hafesere unene kweyi ga demenene kositambo sendi sokuzuvhisira varugani vakwawo navenye.

14, 15. (a) Yisinke no rugana nsene kuna kuligwanekera nomakondjeso? (b) Ngapi no nyokera po makondjeso?

¹⁴ Magano aga tuna zogere gana kuvatere o ruganese eparu lyoge mokukarera Jehova. Eyi kutanta asi wa hepa kulitulira po yitambo yopampepo. Nye vadinkantu vamwe kwa hara tupu kuhafera eparu pokurugana yavene. Komeho oko ove ngo hepa kulikida vakweni asi ayo mulyo koge mokusikisa mo yitambo eyi wa tura po. Kapisi o pulisire makondjeso govakweni ga ku donganese mokuyisikisa mo. Nsene kuna kara pokurondera nombesa ngwendi moomu tuna yi tumbura ketameko, ove kapi tupu no ronda mwankenye mbesa morwa vantu ava vana rondo mo kuna kuhafera.

¹⁵ Pwa kara nonkedi dimwe omu no vhura  kunyokera makondjeso. Pasihonena, nyokera po maukaro aga naga kuninkisa o gwire usimbu mezedo. (Yis. 22:3) Gazadara ko koyitundwamo yokurugana yininke yoyidona. (Gar. 6:7) Tambura mapukururo gokutunda kovakurona woge ntani kwava va kura pampepo mombungakriste zeni.​—Resa 1 Peturusa 5:5, 6.

16. Gava sihonena esi sa likida mulyo gokulinunupika.

¹⁶ Christoph kwa tambwire mapukururo morwa ga linunupikire. Apa tupu ga gwene ekuho makura ta tameke kuza oku ava hufenene. Vadinkantu vakwawo kwa mu pulire a lihameke mosipana sawo. Age ta tokora kuyitantera mukuronambunga, ogu ga mu korangedere a gazadare ko koyitundwamo komeho a tokore. Ntani ga mu tanterere hena asi ayo kuvhura ngayi mu ninkise a kare nonkareso zokurumbasana. Nye Christoph ta tokora simpe kulihameka mo. Mwaza siruwo taya dimburura asi udano owo nyanya ntani siponga. Ta ya zogere hena novakuronambunga vapeke ava va mu pere magano gomoBibeli. Age kwa tanta asi: “Jehova kwa tumina nge vantu ava va pere nge mapukururo ntani na ga tambwire nampili ngomu ya kere udigu.” Nsene o linunupika, ngayi ku rerupira kutambura mapukururo.

17, 18. (a) Yisinke ana harere Jehova vadinkantu? (b) Morwasinke vamwe ava ya liverere moukondi ntani ngapi natu yi nyokera po oyo? Gava sihonena.

¹⁷ Bibeli kwa tanta asi: “Vadinkantu, lipandeni moudinkantu weni. Hafeni siruwo esi muna kara simpe vadinkantu.” (Muud. 11:9) Nonkango edi kulikida asi Jehova ana hara vadinkantu va hafe. Sirongwa esi sina mu vatere mu dive omu nomu gwana ruhafo. Nkedi zimwe kuna kara pokudemenena koyitambo yeni yopampepo nokukwama mavyukiso gaJehova mwanayinye. Nsene mu yi rugana oyo, Jehova nga mu vatera nokumupopera ntani nga mu tungika. Gazadareni ko komapukururo aga a mu pe Jehova kupitira moBibeli ntani kwameni epukururo eli asi: “Diworoka musiti goge momazuva goge goudinkantu.”​—Muud. 12:1.

¹⁸ Nkenye muntu kukura makura ta ya kara mukondi. Sinzi sovakondi kulivera kweyi va tulire po yitambo yepuko poudinkantu ano vamwe kweyi va dilire kukara noyitambo. Nye vadinkantu ava ava demenene koyitambo yawo yopampepo, ngava ka hafa moukondi apa ngava ka dimburura yitambo eyi va li tulira po. Eyi yiyo ya horokerere Mirjana. Apa ga kere mudinkantu age kwa divire kudana maudano gokulisiga-siga. Yipo va mu pulire a lihameke momarumbasano gomanene nye age ta nyoka makura ta tokora kulihameka mosirugana sosiruwo nasinye. Mirjana kumwe namugara gwendi awo ngesi kuna kara mosirugana oso ure wonomvhura 30. Age kwa tanta asi: “Mfumwa noungawo yopokaruwogona tupu ntani ayo kwato mulyo. Nye kukarera Jehova nokuvatera vantu va mu dive kuna kara yitambo yomulyo po.”

19. Mauwa musinke tuna zogere ava gwana vadinkantu pokulitulira po yitambo yopampepo?

¹⁹ Twa hepa kupandadeka vadinkantu kweyi ava lididimikire maudigu nokutokora kukarera Jehova. Awo kulitulira po yitambo yopampepo nokulitura mo unene mokuzuvhisa. Ntani hena awo kudemenena koyitambo yawo. Vadinkantu va hepa kudiworoka asi yirugana yawo yoyiwa kapisi yomawoko-woko. Vanavazinyetu kwa hara vadinkantu ava ntani vana hara kuvavatera. Yipo nye, ngano ‘va hundire HOMPA a tungike nompangera dawo, ntani ngava ragopa mokudisikisa mo.’