MVHURA za ka pita, sinzi sovanavazinyetu wovagara kwava horowere va kare vakwafimbunga novakuronambunga mombunga zaJehova. Nsene ove gumwe gwawo, tuna si huguvara asi ove kuhafera situmbukira soge sosipe.

Nampili ngoso, kuvhura simpe o kare nosinka. Jason, mukuronambunga gomudinkantu kwa tanta asi: “Apa va tulire nge mukuronambunga, ame kwa kere nosinka sosinene.” Mosesa naJeremiya nawo kwa kere nowoma apa Jehova ga va pere yitumbukira. (Ex. 4:10; Jer. 1:6) Nsene yimo o lizuvhu ngoso, yisinke no rugana yipo o ture po ezokomeho? Tarurura sihonena saTimoteusa.​—Yirug. 16:1-3.

Timoteusa nampo kwa kere koyiha yonomvhura 20 apa mupositoli Paurusa ga mu horowere va ze kumwe mosirugana soutumwa. Age nampo kwa kere nowoma mosirugana sendi sosipe. (1 Tim. 4:11, 12; 2 Tim. 1:1, 2, 7) Nye konyima zonomvhura murongo, Paurusa kwa tjangerere mbungakriste zomoFilipi asi: “Ame nina huguvara mwaHompa Jesus asi ngani vhura kumutumina usimbu Timoteusa . . . Yige gelike thi ga konda nge sininga.”​—Fil. 2:19, 20.

Yisinke ya ninkisire Timoteusa a kare mukuronambunga gomuwa? Tarurura yitwa ntazimwe eyi no lirongera ko kosihonena sendi.

1. Age nga pakere vantu mbili. Paurusa kwa tanterere vapuli vakwawo womoFilipi asi: “Timoteusa, yige nga ya mu pakera mbili nawa-nawa.” (Fil. 2:20) Yosili, Timoteusa nga pakere vantu mbili. Age hena kwa here vantu va kare nelikwatakano lyewa naJehova ntani age kwa litulire mo unene mokuvavatera.

Nyokera po kukara ngwendi musingi ogu ga kara tupu nosinka sokukasika nosiruwo oku adi sikamene nombesa mevango lyokukara nosinka sokurondeka vantu. William ogu ga kara mukuronambunga ure wonomvhura 20, kukorangeda vakuronambunga vakwawo novakwafimbunga “va hare vapuli vakwawo. Ntani hena va va vatere noyihepwa yawo mevango lyokukwama tupu nongendeseso.”

2. Age kwa tulire muhowo sirugana sokuzuvhisa. Paurusa kwa tumbwire elisigo eli lya kere pokatji kaTimoteusa novantu wopeke, pokutanta asi: “Navenye kuna kupapara uwa wavene kapisi waJesus Kristusa.” (Fil. 2:21) Paurusa kwa tjangerere Vafilipi mbilive apa ga kere moRoma, age ga yi dimbwilire asi vapuli vakwawo womoRoma kwa here yininke yopanyama. Awo kapi va litulire mo mweyi yopampepo. Nye Timoteusa kapisi yimo ga kere ngoso. Apa da monekere nompito mokuhanesa mbudi zongwa, age kwa kere nonkareso ngwendi zaJesaya ogu ga tente asi: “Nyame ogu, tuma nge!”​—Jes. 6:8.

Ngapi no kara nehetakano koyihepwa yoge yopanyama neyi yopampepo? Pomuhowo, demenena kweyi yomulyo po. Paurusa kwa korangedere Vakriste ‘va horowore yoyiwa po.’ (Fil. 1:10) Yipo nye,tura sirugana saJehova muhowo. Sauvali, rerupika eparu lyoge. Nyokera po eyi  ayi mana siruwo nonokondo doge. Paurusa kwa pamperekedere Timoteusa asi: “Tjwayuka madowo gosiudinkantu, ove o kondjere po uhungami nepuro neharo nombili.”​—2 Tim. 2:22.

3. Age kwa litulire mo unene mosirugana saKarunga: Paurusa kwa diworokesere Vafilipi asi: “Nye kudidimika [kwaTimoteusa] mwa ku diva mokurugana kumwe name yoMbudi zoNgwa moomu ga likara muna naguhwe.” (Fil. 2:22) Timoteusa kapi ga kere udwa. Age nga rugana unene kumwe naPaurusa, ano eyi kwa nkondopekere ukaume wawo.

Mombunga zaJehova kwa kara mo yirugana yoyinzi. Ayo yirugana yoyiwa ntani kuvhura kukuvatera o hedere pepi novapuli vakweni. Yipo nye, kara “nomupampi moyirugana yaHompa.”​—1 Kol. 15:58.

4. Age kwa tulire pasirugana eyi ga lirongere. Paurusa kwa tjangerere Timoteusa asi: “Ove wa kara muhoneni gerongo lyange noyikara yange nositambo sange nepuro lyange nedidimiko lyange neharo lyange nomu ani lididimike.” (2 Tim. 3:10) Age kwa mu pere yitumbukira yoyinene morwa ga tulire pasirugana eyi ga lirongere.​—1 Kol. 4:17.

Kweli ogu o honene ga kara nosihonena sosiwa ndi? Nsene kwato, hetekera ko kupapara ko gumwe. Tom, ogu ga kara mukuronambunga nomvhura dononzi kwa tanta asi: “Mukuronambunga gumwe ogu ga kara noudivi nga deura nge. Ame ngani mu pura magano gendi nokugatura pasirugana. Eyi kwa vatera nge ni dire kukara nowoma.”

5. Age kwa liyomberesere mwene. Paurusa kwa korangedere Timoteusa asi: “O liyomberese moukaro wapaKarunga.” (1 Tim. 4:7) Muduki kuvhura a kare nomudeuli gwendi, nye simpe ga hepa kuliyomberesa pwanyamwendi. Paurusa kwa tumangedere Timoteusa asi: “Kovekeda ngorooro kuresa matjangwa nkenye apa, oku to korangeda nokuronga. . . . O liyomberese moyininke eyi nayinye, ove o kare mwayo, kukura koge va ku mone navenye.”​—1 Tim. 4:13-15.

Nove wa hepa kugwederera ko kediwo lyoge. Wa ha kara tupu nediwo lyanare, nye diva hena mauzera gomape aga gana kuhoroka mombunga zaJehova. Ntani nyokera po kulihuguvara nyamoge, pasihonena pokugazara asi kuvhura o kohonone po maudigu wa hana kurugana ko mapaparo. Mokuhonena Timoteusa, ‘litakamesa nyamoge nerongo lyoge.’​—1 Tim. 4:16.

6. Age kwa pulisilire mpepo zaJehova zi mu gendese. Apa Paurusa ga gazadarere ko kosirugana saTimoteusa sokuzuvhisa, age kwa mu tanterere asi: “Yininke yoyiwa eyi ya ku tumbukira, yi pungwisa koMpepo zoKupongoka ezi za kara mwetu.” (2 Tim. 1:14) Timoteusa ga hepere mpepo zaJehova yipo sirugana sendi sokuzuvhisa si mu tompoke.

Donald, ogu ga kara mukuronambunga nomvhura dononzi kwa tanta asi: “Vakuronambunga novakwafimbunga va hepa kuhafera elikwatakano lyawo naJehova. Mokurugana ngoso, ayo ngayi va ‘nkondopeka’. Nsene va hundira mpepo zokupongoka nokutunga po yiyimwa yazo, ngava vhura kuvatera vapuli vakwawo.”​—Epis. 84:7; 1 Pet. 4:11.

Ayo kuhafesa mokumona vakuronambunga novakwafimbunga wovape, ngwendi nyove, kuna kutura po ezokomeho mosirugana saJehova. Jason, ogu tuna tumbura ketameko kwa tanta asi: “Kutunda apa na kara mukuronambunga, na lironga yoyinzi ntani kapi nina kara hena nowoma. Ame ngesi kuhafera situmbukira sange ntani kusitara asi mulyo.”

Ngo twikira kutura po ezokomeho ndi? Lirongera ko kwaTimoteusa makura ngo vhura kuvatera vanavazinyetu.