Vamwe kulizuvha asi awo kuvhura va ture yimbapiratjangwa yetu konoIntanteta dapeke morwa yeeyi atu yi gava mawoko-woko. Nye kurugana ngoso kuteza po Noveta * doIntaneta zetu, ntani kwa reta maudigu gomanzi. Noveta odo kwa vyukilira kutumbura asi kwato ogu va pulisira a ture “mafano getu noyimbapiratjangwa nononsumo nonovidiyo ndi nkenye yirongwa yetu konoIntaneta dapeke.” Morwasinke va yi silikira?

Nayinye eyi ya kara koIntaneta zetu yopaveta. Varwanesi usili kuruganesa yimbapiratjangwa yetu konoIntaneta dawo mokupukisa Nombangi daJehova nava wopeke. NoIntaneta odo kuninkisa varesi va kare nomasinganyeko. (Epis. 26:4; Yis. 22:5) Vamwe kwa ruganesa mauzera gomoyimbapiratjangwa yetu ndi sidiviso so-jw.org momatjingiso gawo nomonoapp domonoserefoni dawo. Noveta doIntaneta zetu kukandana vantu va dire kuruganesa Intaneta zetu mepuko. (Yis. 27:12) Nsene tu sigilira wopeke ndi vanavazinyetu va ruganese sidiviso setu so jw.org mokurandesa yininke yawo, kapi ngayi tu tompoka nsene ngatu va twara kompanguro.

Ayo siponga kukwateka yimbapiratjangwa  yetu konoIntaneta dapeke. Jehova kwa pa tupu “mukareli gokulimburukwa gonondunge,” situmbukira sokugava nondya dopampepo. (Mat. 24:45) Mukareli ogo kuruganesa noIntaneta dopaveta —www.pr418.com, tv.pr418.com ntani wol.pr418.com mokugava nondya dopampepo. Ose kwa kara tupu nonoapp ntatu dopaveta dokuvhura kutura moserefoni, ado kuna kara—JW Language^®, JW Library^®, ntani JW Library Sign Language^®. Intaneta zetu ntani nonoapp detu kapi kwa kara matjingiso ndi magano govantu vapeke. Nsene tu za konoIntaneta dapeke kuvhura ngatu gwane ko nombudi doyimpempa.—Epis. 18:26; 19:8.

Ntani hena nsene tu tura yimbapiratjangwa yetu konoIntaneta dapeke oku vantu va hepa kukumburura ko, ngayi pa mpito varwanesi usili va uyunge momudona mbunga zaJehova. Eyi kwa ninkisa vanavazinyetu vamwe nawo va kumburure ko komaruha ogo gokoIntaneta, ano eyi kwa swaukisa Jehova. Ozo kapisi nkedi zongwa ‘mokupukurura nombili vakondjesi’ ndi varwanesi. (2 Tim. 2:23-25; 1 Tim. 6:3-5) Vantu kuna kuruganesa madina govanavazinyetu womoMbungagedesi mokupaturura noaccount doyipempa koIntaneta. Nye usili wou asi vanavazinyetu owo kapi va kara nonoacccount dangoso koIntaneta.

Kulikida vantu Intaneta zetu jw.org kutwara ‘mbudi zongwa’ komeho. (Mat. 24:14) Yiruganeso yokoIntaneta zetu eyi atu ruganesa mokuzuvhisa simpe kuna kutwikira kuyiwapukurura. Ose kuna hara navenye va gwanene mo uwa. Yipo nye, ngomu va yi likida moVeta zoIntaneta zetu, muntu kuvhura kumutumina eyi ono kwateke ndi omu tumine ruha rumwe oku na gwana yirongwa ko-jw.org. Pokulikida vantu Intaneta zetu zopaveta, awo ngava gwana mauzera gouhunga aga aga tundu “komukareli gokulimburukwa gonondunge.”