1-2. Morwasinke Jesus ga karerere nosinka?

JESUS kwa kere nosinka mezuva lyendi lyokuhulilira pevhu, morwa ga yi divire asi tava ka mu digapa. Nye esi kapisi yiso sinka selike ga kere naso. Age kwa here unene Oguhwe ntani kwa here kuvahafesa. Age ga yi divire asi nsene a lididimikira maudigu aga ga mu karerere komeho, nga pongora edina lyoGuhwe. Jesus kwa here hena vantu, ntani ga yidivire asi mokuninka asi vantu va ka gwane mwenyo gwanarunye, ga hepere kulimburukwa dogoro konomfa dendi.

² Nampili ngomu Jesus ga kere nosinka sosinene, age kwa kere nombili. Age kwa tanterere vapositoli vendi asi: “Mbili zange nina kumupa.” (Joh. 14:27) Age kwa kere ‘nombili zaKarunga’ ezi azi tundu pokukara nelikwatakano lyewa naJehova. Mbili ozo kwa mu vaterere a dire kukara nosinka sosinene.—Fil. 4:6, 7.

3. Yisinke natu ka konakona mosirongwa esi?

³ Kwato gumwe gwetu ogu nga vhura kuligwanekera nomaudigu aga ga ligwanekerere nago Jesus. Nye nampili ngoso, nose ngatu ligwanekera nomaudigu. (Mat. 16:24, 25; Joh. 15:20) Ntani nose poyiruwo yimwe ngatu kara nosinka ngwendi Jesus. Yisinke natu rugana yipo tu dire kukara nosinka unene ntani yipo tu dire kuzumbanesa mbili? Tu zeni tu ka konakone yininke yitatu eyi ga rugene Jesus apa ga kere pevhu ntani nomu natu mu honena nsene kuna kuligwanekera nomaudigu.

4. Kuliza no-1 Vatesaronika 5:17, yihonena musinke yina kulikida asi Jesus kwa kanderere unene mezuva lyendi lyokuhulilira pevhu?

⁴ Resa 1 Vatesaronika 5:17. Jesus kwa kanderere unene mezuva lyendi lyokuhulilira pevhu. Apa Jesus ga tulisire po Murarero, age kwa kanderere komeho zokupitisa mboroto novinyu. (1 Kol. 11:23-25) Komeho va tunde monzugo ezi va ruganenene Murarero, Jesus kwa kanderere novarongwa vendi. (Joh. 17:1-26) Apa va ka sikire koNdundu zoMauzwe, age kwa kanderere yikando yoyinzi. (Mat. 26:36-39, 42, 44) Ntani komeho a fe, age kwa kanderere. (Ruk. 23:46) Mezuva lyendi lyokuhulilira, Jesus kwa kanderere koGuhwe kwa nainye eyi ya mu horokerere.

5. Morwasinke vapositoli va dililire kukara nouradi?

⁵ Apa Jesus ga kandererere koGuhwe nokuvahuguvara, ayo kwa mu vaterere a lididimikire maudigu. Nye vapositoli kapi ya va tompokere kutwikira kukanderera kwaJehova mesiku lina. Eyi kwa va ninkisire va dire kukara nouradi apa va ya ligwanekerere neheteko. (Mat. 26:40, 41, 43, 45, 56) Nsene tu kwama sihonena saJesus ‘nokukanderera’ nkenye apa, ayo ngayi tu vatera tu twikire kulimburukwa Jehova nampili kuna kuligwanekera nomaudigu. Yisinke natu tumbura mekanderero?

6. Ngapi omu epuro ngali tu vatera tu kare nombili?

⁶ Kuvhura tu kanderere kwaJehova, yipo a ‘tu gwederere ko kepuro lyetu.’  (Ruk. 17:5; Joh. 14:1) Twa hepa epuro morwa Satana nga heteka navenye ava ava kwama Jesus. (Ruk. 22:31) Ngapi omu epuro ngali tu vatera tu kare nombili nampili kuna kuligwanekera nomaudigu nkenye apa? Epuro ngali tu vatera tu dire kukara nosinka unene, morwa twa diva asi ezuva limwe Jehova nga rugana ko yuma. Ose ngatu kara nombili morwa twa huguvara asi Jehova ga diva yoyinzi kutupitakana.—1 Pet. 5:6, 7.

7. Yisinke ono lirongere ko kwaRobert?

⁷ Ekanderero kutuvatera tu kare nombili, yikare asi maudigu musinke tuna kuligwanekera nago. Koneka sihonena somukuronambunga gedina Robert gonomvhura dokupitakana po-80. Age kwa tanta asi: “Etjangwa lyomoVafilipi 4:6, 7, kwa vatera nge nilididimikire maudigu gomanzi meparu lyange. Ame kwa kere noudigu woyimaliwa. Ntani sikando simwe ame kwa zumbanesere situmbukira sange soukuronambunga.” Yisinke ya vaterere Robert a twikire kukara nombili? Age kwa tanta hena asi: “Ame kukanderera apa ani kara nosinka soyuma, ntani na yi pura asi apa ani kanderere unene ame kugwana mbili.”

8. Kuliza naJohanesa 8:29, yisinke ya vaterere hena Jesus a kare nombili?

⁸ Resa Johanesa 8:29. Nampili ngomu Jesus va mu hepekere, age kwa kere nombili morwa ga yi divire asi kuna kuhafesa oGuhwe. Age kwa twikilire kulimburukwa oGuhwe nampili ngomu ya kere udigu. Age kwa here oGuhwe ntani kukarera  Jehova kwa kere sininke somulyo meparu lyendi. Komeho a wize pevhu, age nga rugana kumwe noGuhwe “ngonkurungu.” (Yis. 8:30) Ano apa ga ya kere pevhu, age kwa rongere vantu noupampi kuhamena Jehova. (Mat. 6:9; Joh. 5:17) Sirugana oso kwa hafesere unene Jesus.—Joh. 4:34-36.

9. Morwasinke atu karere nombili apa atu litura mo moyirugana yokuzuvhisa?

⁹ Kuvhura tu honene Jesus pokulimburukwa Jehova ntani pokukara “nomupampi moyirugana yaHompa.” (1 Kol. 15:58) Nsene tu litura mo unene moyirugana yokuzuvhisa, ayo ngayi tu vatera tu dire kudemenena unene komaudigu getu. (Yirug. 18:5) Pasihonena, vantu ava atu ligwanekere nawo moyirugana yokuzuvhisa kuligwanekera nomaudigu gomanzi kupitakana getu. Nye apa ava ya lirongo kuhara Jehova nokutura pasirugana eyi vana kulironga, eparu lyawo kulitjindja ntani awo kuyakara noruhafo. Apa atu mono marunduruko ogo meparu lyawo, ayo kutupa ehuguvaro asi Jehova nga tu pakera mbili. Ano ehuguvaro olyo kutuvatera tu kare nombili momutjima. Munazinyetukadi ogu ga kere nouvera wokuguva-guva ntani ogu nga lizuvhu asi kwato mulyo, kwa limonena usili wononkango odo. Age kwa tanta asi: “Apa ani litura mo mokuzuvhisa, ame kuhafa ntani kapi ani kara nosinka, morwa apa ani kara mokuzuvhisa ame kulizuvha asi kuna kara pepi naJehova.”

10. Yisinke ono lirongere ko kwaBrenda?

¹⁰ Koneka sihonena samunazinyetukadi Brenda. Nage namunwendi gomukadona kwa kara nouvera wounene. Age sigurwani ntani kugendera posipundi sourema. Poyiruwo yimwe age kuzuvhisa tunda embo zende embo, nye unene po age kuzuvhisa pokutjanga nombilive. Age kwa tanta asi: “Apa na yi tambwire asi kapi ngani vhura kuveruka mouzuni ou, ayo kwa vatera nge ni demenene kosirugana sokuzuvhisa. Sirugana sokuzuvhisa, kuvatera nge ni dire kudemenena komaudigu gange. Nye aso kuvatera nge ni demenene mokuvatera vantu ava ani gwana mokuzuvhisa. Ntani sirugana esi kuvatera nge ni gazadare unene kehuguvaro lyokomeho.”

11-13. (a) Ngapi vapositoli navamwe ngava vatere Jesus? (b) Ngapi omu ya mu kundamene?

¹¹ Vapositoli wovalimburukwi ngava vatere Jesus mosirugana sendi sokuzuvhisa. Awo kwa kere ngwendi sisewe simwe esi sa tanta asi: “Vakweni vamwe kuvahuguvara unene, kupitakana vamumbya woge wovagara.” (Yis. 18:24) Vakaume vangoso kwa kere nomulyo unene kwaJesus. Apa nga zuvhisa, kwato nampili mumbyendi gumwe ogu ga mu pulire. (Joh. 7:3-5) Sikando simwe, ekoro lyendi kwa gazarere asi, Jesus ana piyagana. (Mar. 3:21) Nye mokulisiga, komeho Jesus a ka fe, age kwa tanterere vapositoli vendi wovalimburukwi asi: “One nyone mwa kara kumwe name nkenye apa momaheteko gange.”—Ruk. 22:28.

¹² Nampili ngomu vapositoli ngava guvisa Jesus, age kapi nga demenene komapuko gawo, nye age kwa demenenene kepuro eli va kere nalyo. (Mat. 26:40; Mar. 10:13, 14; Joh. 6:66-69) Komeho va ka mu dipage age kwa va tanterere asi: “Ame kumutumbura asi vakwetu, yeeyi na mu horwera nayinye eyi na zuvha mwaTate.” (Joh. 15:15) Eyi kulikida asi Jesus ngava  mu korangeda vakaume vendi. Apa ngava mu vatere mosirugana sokuzuvhisa, ayo kwa mu hafesere.—Ruk. 10:17, 21.

¹³ Kugusa ko vapositoli, Jesus ga kere hena novakaume ava ngava mu vatere mosirugana sokuzuvhisa ntani mononkedi dimwe hena. Vamwe ngava mu tambura momambo gawo nokumuzumbura ko nondya. (Ruk. 10:38-42; Joh. 12:1, 2) Ano vamwe ngava gendi nage ntani ngava mu kwafa nemona lyawo. (Ruk. 8:3) Jesus kwa kere novakaume wovawa, morwa age kwa kere kaume gomuwa. Age ngava ruganene yirugana yoyiwa, ntani kapi nga ndindire ko yoyinzi kwawo. Nampili ngomu Jesus ga kere muntu gokusikilira mo, age kwa tambwire evatero lyokutunda kovakaume vendi wokudira kusikilira mo. Eyi kwa mu vaterere a kare nombili.

14-15. Ngapi natu tulisa po vakaume wovawa ntani ngapi omu nava tu vatera?

¹⁴ Vakaume wovawa ngava tu vatera tu twikire kukarera Jehova. Nsene tuna hara kutulisa po vakaume wovawa ntudi twa hepa kukara kaume gomuwa. (Mat. 7:12) Pasihonena, Bibeli kutukorangeda tu ruganese siruwo nononkondo detu yipo tu vatere wopeke, unene po “vanaruhepo.” (Efe. 4:28) Gazadara ko vamwe womombungakriste ava no vhura kuvatera. Pasihonena, kuvhura o vatere mukurupe ndi muveli pokukamurandera yuma eyi ana hepa. Ntani kuvhura o vatere epata eli lina kuhepa pokuvatwarera ko nondya. Nsene wa diva kuruganesa intaneta zetu jw.org^® ndi JW Library^® app, kuvhura o vatere vamwe womombungakriste yipo va dive nawo omu nava zi ruganesa. Nsene tu litura  mo mokuvatera wopeke, ose ngatu hafa.—Yirug. 20:35.

¹⁵ Vakaume vetu ngava tu vatera nsene tuna kara nomaudigu ntani ngava tu vatera tu kare nombili. Ngwendi moomu Elihu ga purakenene komaudigu gaJoba, vakaume vetu kutupurakena apa atu va tantere maudigu getu. (Joba 32:4) Kapisi tu ndindire vakaume vetu va tu tulire po matokoro, nye nampili ngoso, twa hepa kupurakena nsene tava tu pe mapukururo gokutunda moBibeli. (Yis. 15:22) Ngwendi moomu tupu Ndafita ga tambwire nelinunupiko mapukururo govakaume vendi, nose twa hepa kutambura nelinunupiko mapukururo govakaume vetu. (2 Sam. 17:27-29) Yosili vakaume vangoso, kuna kara uhwi wokutunda kwaJehova.—Jak. 1:17.

16. Kuliza noVafilipi 4:6, 7, nkedi musinke tupu zimwe a tu gwana mbili zaKarunga? Faturura.

¹⁶ Resa Vafilipi 4:6, 7. Morwasinke Jehova a uyungire asi nga tu pa mbili zendi kupitira “mwaJesus Kristusa”? Morwa ose kugwana tupu mbili ozo nsene tu kwata egano situmbukira esi ga kara naso Jesus nokutura epuro mwendi. Pasihonena, kupitira monzambo zaJesus zosizoweseso, ose kuvhura kugwana edongweneno po lyononzo detu. (1 Joh. 2:12) Nonkango odo kutuhengagwida sili. Jesus ngaHompa goUhompa waKarunga, age nga ka gusa po maudigu nagenye aga a retesa po Satana nouzuni wendi. (Jes. 65:17; 1 Joh. 3:8; Ehor. 21:3, 4) Ee, ehuguvaro musi kouwa! Nampili ngomu Jesus ga tu pa sirugana soudigu, age kuna kutwikira simpe kutukwatesa ko. (Mat. 28:19, 20) Yosili, eyi kutupa uradi. Nsene tu gwana ehengagwido nokukara nehuguvaro ntani nouradi ayo ngayi tu vatera tu kare nombili.

17. (a) Ngapi omu Vakriste nava kara nombili? (b) Ngomu va yi tumbwidira mwaJohanesa 16:33, yisinke ngatu rugana?

¹⁷ Ngapi omu no kara nombili nsene kuna kuligwanekera nomaudigu? Ayo kuvhura kukutompoka nsene o honena Jesus. Sokuhova, wa hepa kutwikira kukanderera. Sauvali, limburukwa Jehova nokutwikira kuzuvhisa nampili yi kare udigu. Sautatu, pura evatero kovakaume nsene kuna kuligwanekera nomaudigu. Nsene tu yi rugana, mbili zaKarunga ngazi kunga magazaro getu nonomutjima detu. Ano ngwendi Jesus, nose ngatu funda po nkenye udigu.—Resa Johanesa 16:33.