SIRONGWA SELIRONGO 17
Pulisira Jehova a ku vatere yipo o nyokere po nompepo donondona
“Kapisi vantu atu rwanesa, nani nye . . . nonompepo donondona dekeguru-guru.”—EFE. 6:12.
RUSUMO 55 Mwa ha va tjira!
ETWAROMO *
1. Kuliza noVaefeso 6:10-13, Ngapi Jehova a tu likida asi ga tu hara? Faturura.
NKEDI zimwe omu Jehova ayi likida asi ga tu hara kuna kara pokutuvatera tu rwanese po nonkore detu. Satana ntani nompepo donondona kuna kara nonkore detu dononene. Jehova kuturondora kuhamena nonkore odo ntani kututantera eyi natu rugana yipo tu di funde po. (Resa Vaefeso 6:10-13.) Nsene tu huguvara mwaJehova nokumupulisira a tu vatere, ngayi tu tompoka mokurwanesa muzonaguli. Nose kuvhura tu kare nehuguvaro ngwendi mupositoli Paurusa ogu ga tente asi: “Nsenesi Karunga kwa hama kwetu ose, yilye gokuvhura kutulipepekera?”—Rom. 8:31.
2. Yisinke natu ka konakona mosirongwa esi?
2 NgoVakriste wousili, kapi tuna hara kulitura mo unene mokulironga kuhamena Satana nonompepo dendi donondona. Nye ose tuna hara kulironga kuhamena Jehova nokumukarera. (Epis. 25:5) Nampili ngoso, twa hepa kudiva eyi a ruganesa Satana mokupukisa vantu. Morwasinke? Yipo a dire kutupukisa. (2 Kol. 2:11) Mosirongwa esi, tatu ka konakona nkedi ezi a ruganesa unene Satana yipo a pukise vantu. Tatu ka konakona hena omu natu nyokera po Satana nonompepo dendi donondona.
NGAPI OMU NOMPEPO DONONDONA ADI PUKISA VANTU?
3-4. (a) Yisinke umpure? (b) Ngapi omu umpure una lihana?
3 Umpure kuna kara nkedi zimwe zonene ezi a ruganesa Satana nonompepo dendi donondona mokupukisa vantu. Vantu ava ava rugana umpure kutanta asi awo va diva yininke ntani kuvhura kurugana yuma eyi nava dira kurugana vantu wopeke. Pasihonena, vamwe kutanta asi awo va diva eyi ngayi horoka komeho. Ano vamwe kuninkisa vantu va gazare asi awo kuuyunga novantu ava va fa. Vamwe kurugana yourodi ndi younganga nokuhara kukoresa ndi kuroga wopeke. *
4 Ngapi omu umpure una lihana? Kuliza nekonakono eli va rugene moyirongo 18 yomoAmerika zokombindakano ntani neyi yomoCaribbean, kwa likida asi vantu wokusika po-33 % kwa pura mounganga nomoumpure ntani nourodi ntani hena sinzi sovantu moyirongo oyo kwa pura asi vantu kuvhura kuuyunga novafe. Ekonakono olyo kwa li rugene hena moyirongo yokusika po-18 moAfrika. Harufa zovantu navenye womoyirongo oyo kwa pura mourodi. Nye yi kare asi kupi twa tunga, twa hepa kulikunga koyirugana youmpure morwa Satana kuna kukondja a pukise “uzuni naunye.”—Ehor. 12:9.
5. Ngapi Jehova a tara umpure?
5 Jehova, Karunga ‘gomunasili.’ (Deut. 32:4) Ngapi omu Jehova a tara umpure? Age kwa u nyenga. Age kwa tanterere Vaisraeli asi: “Nokuswakererera si vana veni momundiro gokoyizambero yeni ndi asi mu sigilire vantu veni va hame koyininke eyi yoyirogesa neyi yomaunganga neyi yomazanekedo ndi yomaupure. Walye omu va tarerere va pure kovadimu. HOMPA Karunga gweni kwa nyenga vantu navenye ava ava rugana yininke yoyidona ngesi. Eyi yangesi yiyonye nga tjidira mo HOMPA Karunga gweni vantu vena mosirongo oso komeho zeni.” (Deut. 18:10-12) Vakriste kapi ava kwama Veta ezi Jehova ga geve koVaisraeli. Nye nampili ngoso, Jehova simpe ga nyenga umpure morwa kapi ga runduruka.—Mara. 3:6.
6. (a) Ngapi omu Satana a ruganesa umpure mokupukisa vantu? (b) Kuliza naMuudisi 9:5, yisinke ayi horokere vafe?
6 Jehova kuturondora kuhamena umpure morwa ga diva asi Satana kuruganesa umpure yipo a pukise vantu. Satana kuruganesa umpure mokukumbagera vantu, pasihonena age kutanta asi vafe kuna kutwikira kukaparuka kwapeke. (Resa Muudisi 9:5.) Satana kuruganesa hena umpure mokutjilisa vantu ntani nokuvagusa ko kwaJehova. Age kuna hara vantu ava ava rugana umpure va dire kuhuguvara mwaJehova nye va huguvare monompepo donondona.
OMU NATU NYOKERA PO KUTUPUKISA NOMPEPO DONONDONA
7. Yisinke a tu rongo Jehova?
7 Ngwendi moomu tuna yi tumbura pomuhowo, Jehova kuturonga eyi twa hepa kudiva yipo Satana nonompepo dendi donondona va dire kutupukisa. Koneka yimwe eyi natu vhura kurugana yipo tu vhure kurwanesa Satana nonompepo dendi donondona.
8. (a) Nkedi musinke zonene nazi tu vatera tu nyokere po yimpempa yaSatana? (b) Ngapi omu Episarome 146:4 azi tura poruzera yimpempa yaSatana kuhamena vafe?
8 Resa nokuteda ko koNonkango daKarunga. Ezi kuna kara nkedi zonene omu natu nyokera po yimpempa yaSatana. Nonkango daKarunga kwa fana ngwendi rufuro oru aru tura poruzera yimpempa yaSatana. (Efe. 6:17) Pasihonena, Nonkango daKarunga kutura poruzera erongo eli asi vantu kuvhura kuuyunga novafe. (Resa Episarome 146:4) Ntani ado kututantera asi Jehova yige gelike ga kara nevhuliko lyokupumba yokomeho. (Jes. 45:21; 46:10) Nsene tu resa nokuteda ko koNonkango daKarunga, ayo ngayi tu vatera tu nyokere po nokunyenga yimpempa eyi a retesa po Satana.
9. Yirugana musinke ya likwatakana noumpure eyi natu nyokera po?
9 Nyokera po kurugana nkenye eyi ya likwatakana noumpure. NgoVakriste wousili kapi atu li hameke mwankenye rupe roumpure. Pasihonena, kapi atu hetekere ko kuuyunga novafe. Ngwendi moomu ka tu yi zogerere mosirongwa pita, ose hena kunyokera po eyi ava rugana vantu ponomfa eyi ayi kwatesa ko epuliro eli asi vafe kutwikira kuparuka konyima zonomfa. Ntani kapi atu zi koyimbanda ndi nakopeke yipo tu hare kudiva eyi ngayi horoka komeho. (Jes. 8:19) Twa yi diva asi nonkedi nadinye odo siponga morwa ado kwa likwatakana naSatana nonompepo dendi donondona.
Honena Vakriste womosiruwo sovapositoli pokuzonagura po nkenye eyi ya likwatakana noumpure ntani pokunyokera po yilihafeso eli ya li kwatakana noumpure (Tara paragarafu 10-12)
10-11. (a) Yisinke va rugene vantu vamwe mosiruwo sovapositoli konyima zapa va lirongere usili? (b) Kuliza no1 Vakolinte 10:21, morwasinke natu kwamena sihonena soVakriste wokuhova ntani ngapi natu yi rugana?
10 Zonagura po nkenye eyi ya likwatakana noumpure. Vantu vamwe ava va tungire moEfeso mosiruwo sovapostoli ngava rugana youmpure. Awo kwa rugene ko yuma konyima zapa va lirongere usili. Bibeli kutanta asi: “Wovanzi hena ava ngava ruganesa youmpure, tava pongaike nobuke dawo, makura tava di hwike komeho zovantu navenye.” (Yirug. 19:19) Eyi va rugene kwa likidire asi awo kwa tokomenene kunyokera po nompepo donondona. Nobuke dawo doumpure kwa kosere yimaliwa yoyinzi. Nye awo kwa hwikire nobuke dawo mevango lyokudirandesa ndi va di gave kwava wopeke. Sinka sawo kwa here kuhafesa Jehova nampili ngomu nobuke dina da kere ndiro unene.
11 Ngapi natu va honena? Ya wapa kuzonagura po nkenye yininke eyi twa kara nayo eyi ya likwatakana noumpure. Ayo kwa kwatera mo yiranda ndi magadi aga ava likwita vantu ntani nayimwe eyi ava rugana mokulipopera konompepo donondona.—Resa 1 Vakolinte 10:21.
12. Mapuro musinke natu lipura kuhamena yilihafeso yetu?
12 Konakona nawa yilihafeso yoge. Lipura asi: “Ame kuresa nobuke ndi yirongwa yimwe yokointaneta eyi ya zogera kuhamena umpure ndi? Ntani ngapi kuhamena nomusika edi ani purakene nonomuvi edi ani tarere ndi maudano aga ani hafere? Yilihafeso yange kwa hamena mo umpure ndi? Amo kulikida mo novampires, nonozombies ndi nayimwe hena eyi ya likwatakana noumpure ndi? Ayo kukorangeda asi yininke oyo kapi ya kara siponga ndi?” Nye eyi kapi yina kutanta nye asi nomuvi nadinye edi adi likida yirugana ava dili kuvhura kurugana vantu kwa likwatakana noumpure. Nsene kuna kuhorowora yilihafeso, divilisa asi ove kuna kuhorowora yilihafeso eyi nayi ku vatera o li kare ure noyininke eyi ga nyenga Jehova. Tuna hara kukondja yipo tu kare “nezwi lyewa lyokomutjima” kwaKarunga.—Yirug. 24:16. *
13. Yisinke natu nyokera po kurugana?
13 Nyokera po kusimwitira kuhamena nompepo donondona. Ose tuna hara kuhonena Jesus. (1 Pet. 2:21) Komeho Jesus a wize pevhu, age kwa parukire meguru ntani ga divire yoyinzi kuhamena Satana nonompepo dendi donondona. Nye age kapi nga simwitire kuhamena eyi da rugene nompepo donondona. Jesus kwa here kudivisa kuhamena Jehova nye kapisi Satana. Kuvhura tu honene nose Jesus pokudira kusimwitira kuhamena nompepo donondona. Nye ose tuna hara kuyilikida kupitira mononkango detu asi “Magazaro [getu] kuna zura nonkango donongwa.”—Epis. 45:1.
Kapisi hepero tu tjire nompepo donondona. Jehova naJesus ntani vaengeli nonkondo unene kupitakana nompepo donondona (Tara paragarafu 14-15) *
14-15. (a) Morwasinke natu dilira kutjira nompepo donondona? (b) Yisinke ayi likida asi Jehova kupopera vantu vendi naina?
14 Wa ha tjira nompepo donondona. Mouzuni ou, yininke yoyidona kuvhura yi tu horokere. Yimpagwa nomauvera kuvhura yi tu gwane twa hana kuyindindira. Nye twa ha gazara asi nompepo donondona dina kuyiretesa po. Bibeli kutanta asi: “Ehudi kuhorokera nkenye ogu.” (Muud. 9:11) Jehova ga yi likida asi age nonkondo unene kupitakana nompepo donondona. Pasihonena, age kapi ga pulisilire Satana a dipage Joba. (Joba 2:6) Mosiruwo saMosesa, Jehova kwa yi likidire asi ga kara nononkondo kupitakana nompure edi da kere moEgipite. (Ex. 8:18; 9:11) Ntani Jehova kwa pere Jesus nonkondo dokuvhura kuzuguma Satana novaengeli vendi wovadona pevhu. Ano komeho, age nga ka zugumina Satana novaengeli vendi mosirongo sokonhi omu ngava dira hena kukapukisa vantu.—Ehor. 12:9; 20:2, 3.
15 Naina pwa kara maumbangi gomanzi aga aga likida asi Jehova kupopera vantu vendi. Gazadara ko kuhamena eyi: Naina ose kuna kuzuvhisa nokuronga vantu usili womoBibeli uzuni naunye. (Mat. 28:19, 20) Apa atu zuvhisa, ose kulikida asi Satana munayimpempa. Ngano asi Jehova kapi a tu popere, ngano Satana ga hagekesa po sirugana setu. Yipo nye, kapisi hepero tu tjire nompepo donondona morwa twa diva asi “HOMPA yige a takamesa uzuni mudima, age kugava nonkondo kwanavenye ava ava hama kwendi nomutjima nagunye.” (2 Hist. 16:9) Nsene tu twikira kulimburukwa Jehova, kwato eyi ngadi vhura kuturugana nompepo donondona.
MATUNGIKO KWAVA AVA TAMBURA EVATERO LYAJEHOVA
16-17. Gava sihonena sina kulikida asi twa hepa uradi yipo tu nyokere po nompepo donondona.
16 Twa hepa uradi mokunyokera po nompepo donondona, unene po nsene vanekoro ndi vakaume vetu kuna kuturwanesa. Nye Jehova kutungika ava ava likida uradi moukaro wangoso. Koneka sihonena samunazinyetukadi gomoGhana gedina Erica. Age kwa tamekere kulironga Bibeli apa ga kere nonomvhura 21. Mokumona asi oguhwe kwa kere mpure, age kwa mu hundilire a li hameke mompo zoumpure nokulya nyama ezi va zambere koyikarunga yawo youmpure. Apa Erica ga nyokere, vekoro lyendi kwa yi tere ngwendi kuna kuswaura yikarunga yawo. Ekoro lyendi kwa gazarere asi yikarunga yawo ngayi va tengeka nokuvaretera uvera.
17 Nampili ngomu va mu sininikire, age kapi ga yi kwatesere ko ntani eyi kwa mu ninkisire va mu tjide mo membo. Nombangi dimwe kwa mu tambwire membo lyawo. Jehova kwa tungikire Erica nepata lyepe lyovapuli vakwawo ava va ya kere ngwendi vamumbya novakuru vendi. (Mar. 10:29, 30) Nampili ngomu vakondi vendi va mu tjidire mo membo nokuhwika yipako yendi, age kwa twikilire kulimburukwa Jehova, makura konyima ta ya gwana ekuho, ano ngesi age muzuvhisi gokukarerera. Age kapi ga tjira nompepo donondona. Ntani age kwa tanta asi: “Ame kukanderera nkenye ezuva yipo ekoro lyange ngava dive Jehova nokulimonena matungiko aga atu gwana pokukarera Jehova.”
18. Matungiko musinke atu gwanenene mo kweyi twa huguvara mwaJehova?
18 Kapisi natuvenye ngatu ligwanekera neheteko ngwendi lyaErica. Nye twa hepa kunyokera po nompepo donondona nokuhuguvara mwaJehova. Nsene tu yi rugana, ose ngatu gwana matungiko gomanzi ntani yimpempa yaSatana kapi ngayi tu pukisa. Ntani kapi hena ngatu tjira nompepo donondona. Nye ose ngatu nkondopeka ukaume wetu naJehova. Jakopo kwa tjenge asi: “Ligaveni nye kwaKarunga, mu nyokere Muzonaguli, makura age ta mu suwurukwa. Hedeni Karunga pepi, nage a mu hede pepi.”—Jak. 4:7, 8.
RUSUMO 150 Huguvara mezoworo lyaKarunga
^ para. 5 Jehova kwa tu rondora kuhamena nompepo donondona nomu nadi vhura kutupukisa. Ngapi omu nompepo donondona adi pukisa vantu? Yisinke natu rugana yipo tu di nyokere po? Sirongwa esi tasi ka zogera omu Jehova a tu vatere tu nyokere po nompepo donondona.
^ para. 3 EFATURURO LYONKANGO: Umpure kwa tamba kepuliro ntani yirugana eyi ya likwatakana nonompepo donondona. Amo kwa hamena mo epuliro eli asi nsene muntu ana fu, mpepo kutwikira kuparuka ntani asi vafe kuuyunga novantu. Umpure kwa kwatera mo hena yirugana yourodi ntani ezanekedo. Mosirongwa esi umpure kuvhura kutamba koyirugana nayinye eyi ava dili kuvhura kurugana vantu. Kuvhura hena kutamba koyirugana younganga nezanekedo. Nye kapi za tamba komaudano ava rugana vantu usimbu nomawoko yipo va vhure kuhafesa wopeke.
^ para. 12 Vakuronambunga kapi va va pulisira va tulise po noveta kuhamena yilihafeso. Nkenye Mukriste ga hepa kutura po etokoro kuliza nezwi lyendi lyokomutjima eli ga deura. Nturagumbo gomuwa kudivilisa asi vemepata lyendi kuna kuhorowora yilihafeso eyi ya dira kulilimba nonompango domoBibeli.—Tara Sirongwa ko-jw.org® sosiparatjangwa: “Nombangi daJehova kusilika nomuvi nonobuke nomarusumo gamwe ndi?” Koruha KUTUHAMENA > MAPURO AGA AVA PURA VANTU KUHAMENA NOMBANGI DAJEHOVA.
^ para. 54 EFANO: Hompa gwetu gononkondo Jesus kuna kupitisira mbunga zovaengeli. Ano sipundi saJehova soUhompa kuna va kara keguru.
