Winston tu simwitira ko omu wa gwana usili.

Ame kwa kulira kofarama zomoQueensland moAustralia mepata eli ngali dili kuza kongereka. Ose kwa tungire ure novantu. Apa na kere nonomvhura 12, ame kwa here kudiva Karunga. Yipo na kanderere kwendi nokumutantera asi nina hara kumudiva. Konyima yipo na dirukilire kodoropa zaAdelaide ezi za karera kombindakano zaAustralia oku na ka gwene yirugana. Apa na kere nonomvhura 21, ame kwa zire kositata saSydney kepwizumuko oku na ka ligwene naPam. Age kwa tanterere nge kuhamena British-Israel, ngereka ezi azi uyunga asi vaBritania kwa tundilira momazimo murongo goVaisraeli. Ngereka ozo kwa tente asi mazimo ogo, kuna kara mazimo murongo goUhompa wokomuzogo aga ga zire mounkwate koyiha yomvhura zo-800 komeho zokuwiza Jesus pevhu. Apa na tengwire koAdelaide, tani ya tantere ko murugani mukwetu ogu nga lirongo Bibeli Nonombangi daJehova, kuhamena eyi na ka zuvhire. Konyima zokuzogera nendi novili dongandi kuhamena eyi da pura Nombangi daJehova, tani dimburura asi Karunga ana limburura ekanderero lyange eli na kanderere apa nakere munona. Ame kwa tamekere kudiva usili kuhamena Musiti noUhompa wendi! Ame kwa gwene ‘mbamba zomulyo unene.’—Mat. 13:45, 46.

Pam, nove kwa tamekere kupapara mbamba ozo apa wa kere munona, ngapi omu wa zi gwene?

Ame kwa kulira modoropa zaCoffs Harbour, moNew South Wales ntani epata lyetu nga li zi kongereka. Omama novakondi vange ngava zi kongereka zaBritish-Israel. Name namukurwange gomukadi namumbyange gomugara ntani  yipwa yange, kwa tu rongere asi Karunga kwa hara vaBritania. Nye kapi na yi pulire ntani erongo lyawo kapi lya vaterere nge ni dive Karunga. Apa na kere nonomvhura 14 ame ngani zi konongereka dokulisiga-siga ngwendi Anglican, Baptist, ntani Seventh-day Adventist. Nye nado kapi da vaterere nge ni dive Karunga.

Konyima, epata lyetu kwa dirukilire kositata saSydney, oku na ka ligwene naWinston ogu ga zire kepwizumuko. Ngomu ana yi tumbura, nzogera zetu za mutwaredesere aka tameke kulironga noNombangi daJehova. Konyima zosiruwo, age nga tumine nge nombilive omu mwa kere matjangwa gomanzi! Pomuhowo kapi ya hafesere nge ntani na kere nosinka. Nye konyima tani ya dimburura asi eyi ga tjenge kwa kere usili.

Momvhura 1962 tani dirukire kositata saAdelaide yipo nika kare pepi naWinston. Age kwa tulire po mawapayiko yipo nika tunge naThomas namukadendi Janice, Nombangi edi da kere vatumwa moPapua New Guinea. Posiruwo oso ame kwa kere nonomvhura 18 ntani awo kwa vaterere nge unene yipo ni dive Jehova. Makura tani tameke kulironga Bibeli, ano konyima tani ya dimburura asi nina gwana usili. Konyima zapa twa likwere naWinston, ta tu ya tameke kukarera Jehova kumwe ano eyi kwa tu vaterere tu hafere unene mbamba zomulyo po ezi twa gwene.

Winston tu tantera ko eyi ya horokere apa wa tamekere kukarera Jehova.

Konyima zapa twa likwere naPam, Jehova kwatu zegwilire “nzira zongwa zoyirugana yoyinene.” (1 Kol. 16:9) Munazinyetu Jack Porter ogu ga kere mutareli gonombunga namukadendi Roslyn, kwa tu korangedere nsene kuvhura tu rugane uzuvhisi wokukarerera. (Name naJack ngesi kurugana kumwe moKomitiye zoBeteli zaAustralasia.) Ose kwa haferere kurugana uzuvhisi wokukarerera ure wonomvhura ntano. Apa na kere nonomvhura 29, ose kwa tu pere situmbukira mokukara mutareli gonombunga dopoyirudi yaSouth Pacific eyi ya kere mepitisiro lyoBeteli zaFiji. Yirudi oyo kwa kere American Samoa, Samoa, Kiribati, Nauru, Niue, Tokelau, Tonga, Tuvalu, ntani Vanuatu.

Mosiruwo sina vantu wopoyirudi oyo kapi va here Nombangi daJehova, yipo nye, ose ngatu vangarara. (Mat. 10:16) Vantu womonombungakriste kwa kere vasesu, ano vamwe kapi ngava vhuru kutupa mararo. Ose ngatu papara mararo kovantu womomukunda ntani awo ngava tu tekura sili nawa.

Winston, kumoneka asi ove kwa hara etoroko, kuvhura o tu tantere ko omu ya genda?

Posiruwo sina, vanavazinyetu woposirudi saTonga kwa kere noyitratate yoyisesu ntani nonombapira tupu dononsesu moRutonga. Awo ngava ruganesa buke zoRuingilisa The Truth That Leads to Eternal Life moyirugana yokuzuvhisa. Apa twa kere nosikora zovakuronambunga zoyivike yine, vanavazinyetu vatatu wovakuronambunga kwa tokwere kutoroka sifo oso moRutonga nampili ngomu ngava dili kuzuvha nawa Ruingilisa. Pam nga va vatere mokutopa-topa ntani apa za pwire, ose kwa zi tumine koBeteli zaUnited States va ka zi nduruke. Etoroko lyobuke ezi kwa gusire yivike ntantatu. Nampili ngomu etoroko lyobuke ezi moRutonga lya dilire kuwapa nawa, nye buke ozo kwa vaterere vantu wovanzi va dive usili womoBibeli. Name naPam kapisi tu vatoroki nye sihorokwa esi kwa tu ninkisire tu hare sirugana setoroko.

Pam, tu tantera ko asi ngapi omu eparu lyopoyirudi lya lisiga neli lyomoAustralia?

Alyo lya lisiga unene! Ose ngatu ligwanekere nomaudigu ngwendi nomwe, mauvera, upyu, nompuku ntani poyiruwo yimwe kapi ngatu kara nonondya dokugwanena po. Nampili ngoso kouhura wankenye ezuva, ayo ngayi tu hafesa apa ngatu tarurura kefuta ose kuna kara mondunda zetu zowayi ava tumbura moRusamoa asi fale. Masiku gamwe, kakwedi ngaka  tema unene, eyi ngayi tu ninkisa tu mone yitji yonococonut nefuta. Yiruwo yangoso kwatu vaterere tu tede ko nokupandura Jehova ntani ya tu vaterere tu demenene koyininke yoyiwa mevango lyokudemenena komaudigu getu.

Ose kwa here vanonagona. Awo ngava tu hafesa ntani awo ngava tetuka pokumona yirumbu. Sikando simwe apa twa ka dingwire sirudi saNiue, mumatigona gumwe kwa kwatagwire nohuki dokomawoko gaWinston nokutanta asi, “nongumba doge nongwa sili.” Ayo ya lilikidire asi age kapi ga mona rumwe mawoko gonohuki dononzi ngwendi gaWinston ntani kapi ga divire omu na di tumbura.

Ayo ngayi tu guvisa pokumona eparu lyoudigu eli ngava paruka sinzi sovantu. Sirongo sawo siwa sili nye kapi va kere nouhaku wouwa ndi va kare nomema gokunwa gokugwanena po. Nye vanavazinyetu kapi va kere nosinka. Awo kwa yikire kuparuka monkedi ozo ntani awo kwa hefe kweyi va kere nomapata gawo ntani nokukara nevango lyokupongera yipo va karere Jehova. Sihonena sawo kwa tu vaterere tu demenene koyininke yomulyo po nokurerupika eparu lyetu.

Pam, poyiruwo yimwe ngomu vheta mema nokutereka nondya pwa nyamweni, ngapi omu yamu tompokere?

Ame kuyipandwira otate. Awo kwa rongere nge yininke yoyinzi ngwendi kuhwameka mundiro nokuterekera po ntani nomu nani vhura kuparuka noyininke yoyisesu. Apa twa ka dingwire sirudi saKiribati, ose kwa ka kere monzugo zowayi zerapa lyonombu zorugorongwa. Mokuninka asi ni tereke, ame kwa tjokwere morugorongwa yipo ni hwameke mundiro. Ame ngani zugumangere mo yitemba yonococonut yipo gu twere nawa. Pokukavheta mema, ame ngani lizara momukweyo novakadi vakwetetu ketope. Ano mokuvheta mema, awo ngava ruganesa sitji sonometa mbali, ano kouhura waso kwa kere ko rugodi rorure oru va mangerere kosindoromani. Vakadi ngava li pe marufo pokuzuguma rugodi oro yipo sindoromani sika vhete mema konhi zetope. Ayo kwa monekere ngwendi ureru, dogoro paapa nayi hetekere. Ame kwa zuguminine mo sindoromani yikando yoyinzi nye kwato eyi ya tompokere. Vakadi ava va kere ketope kwa zorere nge, nye konyima gumwe kwa vaterere nge. Awo kwa kere vantu wombili ntani ngava tu vatere nkenye apa.

One kwa haferere sirugana seni poyirudi, kuvhura mu tu tantere ko yihorokwa yimwe eyi muna kudiworoka ndi?

Winston: Ayo kwa tu gusire siruwo mokuyika nompo dawo. Pasihonena, apa vanavazinyetu ngava tu zigida komambo gawo. Awo ngava tu pe nondya nadinye edi ngava tereke. Kapi twa yi divire asi twa hepa kuvasigira po. Ose ngatu di li po nadinye! Konyima apa twa ya yi dimbwilire, yipo twa tamekere kuvasigira po nawo. Nye nampili ngoso, vanavazinyetu owo ngava tu kwata egano. Ntani ngayi va hafesa nkenye apa ngatu va dingura konyima zomakwedi ntazimwe. Name naPam nyoselike tupu Nombangi va divire, kugusa ko ava va kere mombungakriste zawo.

Edinguro lyetu kwa geve umbangi kovantu womomukunda. Awo ngava gazara asi vanavazinyetu wopoyirudi oyo yiwo va totere po ukereli woNombangi. Nye apa va mwene Nombangi dokutunda koyirongo yopeke, ayo kwa va tetukisire.

Pam: Ame kudiworoka simpe eyi yatu horokerere posirudi saKiribati. Mbungakriste zimwe ezi za kere po kwa kere novanavazinyetu wovasesu. Munazinyetu Itinikai Matera ogu ga kere gelike mukuronambunga, nga kondjo yipo a tu vatere. Ezuva limwe age kwa tu reterere siyaha esi sa kere neuta limwe. Age kwa tente asi: “nyone na liretere.” Ayo ngayi tu digopere kugwana mauta posiruwo sina. Nampili ngomu lya kere enunu, eyi ga rugene munazinyetu ogo kwa tu hafesere sili.

 Pam, konyima zosiruwo ove kwa ya zumbanesere munoge apa wa hampurukire, yisinke ya ku vaterere o lididimikire udigu owo?

Ame kwa gwene ezimo mo-1973 apa twa kere poyirudi yaSouth Pacific. Makura tatu tengura koAustralia, nye konyima zomakwedi gane ose kwa zumbanesere mukeke gwetu. Ayo kwa guvisire unene Winston. Ayo kapi ya kere ureru kulididimikira udigu ou, dogoro papa twa gwene Ruhungu rwa-15 Kudumogona 2009 omu mwa kere epuro eli asi “Kolili ehuguvaro lyevhumbuko komukeke gokufira mezimo lyozina ndi?” Sirongwa oso kwa tente asi, yuma yangesi kwa kara momawoko gaJehova Karunga, ogu a rugana narunye yininke yokuhungama. Age nga ka verura kukora nakunye oku ali tu retere eparu lyomouzuni ou woudona ngomu ana kupitisira Munwendi ‘mokuyaharaganesa po yirugana yoMuzonaguli.’ (1 Joh. 3:8.) Sirongwa oso kwa tu vaterere tu kare norupandu ‘kombamba’ zomulyo ezi twa kara nazo ngovakareli vaJehova. Ose kugwana ehengagwido yikare asi udigu musinke tuna kuligwanekera nawo mouzuni ou.

Konyima zapa twa zumbanesere munwetu, ose kwa tamekere hena kurugana sirugana sosiruwo nasinye. Ose kwa rugene makwedi gongandi moBeteli zaAustralia, ano konyima tava tu tumu mosirugana sokudingura nombunga. Konyima zokukara mosirugana sokudingura nombunga moNew South Wales ntani moSydney nomvhura ne, ose kwa tu zigidire tu ya rugane moBeteli zaAustralia mo-1981. Ngesi yiko simpe tuna kara.

Winston, mokumona asi wa ka kere poyirudi yaSouth Pacific, ayo kukuvatera mosirugana soge nga gumwe gomoKomitiye zoBeteli zaAustralasia ndi?

Yimo, ayo kwa vatera nge sili unene. Pomuhowo, kwa pulire nge ni pakere mbili sirudi saAmerican Samoa naSamoa. Konyima, mberewa zomutayi zaNew Zealand kwa zi pakakanene kumwe nezi zaAustralia. Ano ngesi, Beteli zaAustralasia kupakera mbili Australia, sirudi saAmerican Samoa ntani Samoa, Yirudi yaCook, New Zealand, ntani yirudi yaNiue, Timor-Leste, Tokelau, ntani Tonga. Sinzi soyirudi eyi, yiko na ka kere. Mokumona asi na ka kere novanavazinyetu wopoyirudi oyo, ayo kuvatera nge ngomu nina kurugana momberewa zomutayi ezi azi va pakere mbili.

Nina hara kuhagesa pokutanta asi name namukadange Pam, twa limonena asi kapisi vakondi velike va hara kudiva Karunga. Vanona nawo kuna kupapara ‘mbamba zomulyo gomunene’ nampili vakurona vawo kapi vana kuzipapara. (2 Vah. 5:2, 3; 2 Hist. 34:1-3) Jehova, age Karunga geharo ogu ana hara vakondi navenye novanona va ka gwane mwenyo gwanarunye!

Apa name naPam twa here kudiva Karunga nomvhura 50 dina kapita kapi twa yi divire asi ngayi tu horokera eyi twa limonena. Ose twa gwana mbamba zomulyo po unene ntani tuna hara kuzikwata mawoko gavali dogoro narunye!