1-2. (a) Ngapi omu Satana ga pukisa vantu? (b) Yisinke natu ka konakona mosirongwa esi?

SATANA ‘guhya yimpempa’ kwa kumbagera vantu kutunda tupu posiruwo soAdamu naEva. (Joh. 8:44) Yimpempa yendi yimwe kwa kwatera mo erongo lyoyimpempa kuhamena nomfa neyi ayi horoka konyima zonomfa. Yininke eyi va pura vantu neina, kwa likwatakana nomarongo gaSatana goyimpempa. Eyi kuninkisa vanavazinyetu va popere “epuro” lyawo nsene gumwe ana dogoroka mekoro lyawo.—Juda 3.

² Nsene kuna kukukondjesa o rugane yininke eyi ya lilimba noMatjangwa, yisinke nayi ku vatera o kwaterere kweyi azi rongo Bibeli kuhamena nomfa? (Efe. 6:11) Ngapi omu natu hengagwida vapuli vakwetu nsene kuna kuvakondjesa va lihameke monompo edi adi dili kuhafesa Karunga? Sirongwa esi tasi ka zogera omu Jehova atu vatere. Pomuhowo, tu zeni tu ka konakone eyi azi uyunga ko Bibeli kuhamena nomfa.

3. Yisinke ya horokere konyima zapa Satana ga tente yimpempa yokuhova?

³ Karunga kapi ga harerere vantu va fe. Nye mokuninka asi vantu va paruke narunye, Adamu naEva va hepere kulimburukwa kompangera ezi asi: “Ntudi yokositji esi asi gava ediwo lyeyi yoyiwa neyi yoyidona no. Siyimwa saso nokanunu si asi o si lye. Nsene ngo yi hetekera, ngo fa lyoolyo ezuva.” (Gen. 2:16, 17) Kupitira mezoka, Satana kwa retesere po udigu pokutantera Eva asi: “Ndangako asi ngomu fe one.” Eva ga pulire nonkango odo, makura ta li kosiyimwa oso.  Konyima ta pe ko mugara gwendi, makura nage ta li. (Gen. 3:4, 6) Eyi kwa retesa po nonzo nonomfa kovantu navenye.—Rom. 5:12.

4-5. Ngapi omu Satana ga twikira kupukisa vantu?

⁴ Adamu naEva kwa fire ngamoou ga yi tente Karunga. Nye eyi kapi ya ninkisire Satana a hageke kutanta yimpempa. Konyima age kwa ya tamekere kuhanesa yimpempa yimwe hena. Yimpempa yimwe oyo kuna kara asi, kosili sininke simwe esi asi paruka nokuza meguru konyima zapa muntu a fu. Yimpempa yangoso kwa pukisa vantu wovanzi kukwatera mo womomazuva getu.—1 Tim. 4:1.

⁵ Morwasinke vantu wovanzi ava pulire yimpempa oyo? Satana ga diva omu ava lizuvhu vantu kuhamena nomfa. Yipo nye, age kuruganesa utjirwe ou va kara nawo mokuvapukisa. Natuvenye kapi twa hara kufa morwa kwa tu sita tu paruke narunye. (Muud. 3:11,NW) Nomfa kuna kara nkore zetu.—1 Kol. 15:26.

6-7. (a) Satana ya mu tompoka kuhoreka usili kuhamena vafe ndi? Faturura. (b) Ngapi eyi azi rongo Bibeli kuhamena vafe ayi tu vatere?

⁶ Nampili ngomu Satana ga hanesa yimpempa kuhamena nomfa, nye age kapi ya mu tompoka kuhoreka usili kuhamena nomfa. Ngesi sinzi setu twa diva usili kuhamena ukaro wovafe nehuguvaro eli twa kara nalyo kovafe. Ose hena kuronga vakwetu usili kuhamena ukaro wovafe. (Muud. 9:5, 10; Yirug. 24:15) Usili ou kutuhengagwida ntani kutuvatera tu dire kutjira vafe ndi tu kare nomasinganyeko. Pasihonena, ose ngesi kapi atu tjira vafe ndi tu kare nosinka kuhamena eyi yina kuvahorokera. Twa yi diva asi awo kapi vana kuparuka hena ntani kapi tava vhuru kutukoresa morwa awo ngwendi kuna rara monompofu dononene. (Joh. 11:11-14) Twa diva hena asi vafe kapi va diva eyi yina kuhoroka konauzuni, yipo nye nampili ngomu va fa nare, apa ngava ka va vhumbura, awo kapi ngava kayi dimburura asi pwa pita siruwo sosire.

⁷ Usili wokuhamena vafe awo ureru kuukwata egano. Eyi ya lisiga noyimpempa eyi a uyunga Satana kuhamena vafe. Yimpempa yaSatana kapi tupu ayi pukisa vantu, nye ayo hena kuswaukisa Musiti gwetu. Mokutuvatera tu kwate egano udona ou ya retesa po yimpempa yaSatana, tu zeni tu ka konakone mapuro aga: Ngapi  yimpempa yaSatana ayi swaukisa Jehova? Ngapi omu ayi ninkisa vantu va dire kumona mulyo gonzambo zaJesus zosizoweseso? Ntani ngapi omu ayi gwederere koruguwo rovantu?

8. Kuliza naJeremiya 19:5, Ngapi omu yimpempa yaSatana ayi swaukisa Jehova?

⁸ Yimpempa yaSatana kuhamena vafe kuswaukisa Jehova. Yimpempa oyo kwa kwatera mo egano eli asi vafe kuvahwika momundiro gwanarunye. Erongo lyangoso kuswaukisa Jehova. Monkedi musinke? Alyo kuninkisa vantu va gazare asi Karunga geharo ga kara hena noyikara yoyidona ngwendi yaSatana. (1 Joh. 4:8) Ngapi ono kulizuvha kuhamena egano olyo? Nye unene po, ngapi ono kugazara omu a lizuvhu Jehova kuhamena egano olyo? Bibeli kutanta asi age kwa nyenga udona naunye.—Resa Jeremiya 19:5.

9. Ngapi omu yimpempa yaSatana ayi ninkisa vantu va tare nzambo zaJesus, ezi va faturura mwaJohanesa 3:16 ntani 15:13?

⁹ Yimpempa yaSatana kuhamena vafe kuninkisa vantu va dire kumona mulyo gonzambo zaJesus zosizoweseso. (Mat. 20:28) Satana kutanta yipempa asi, kosili sininke simwe esi asi paruka konyima zapa atu fu, nsene asi yimo ngoso ayo kulikida asi natuvenye twa kara nomwenyo gwanarunye. Ngano kapi ya kere hepero kwaJesus a ya tu fire yipo tu ka gwane mwenyo gwanarunye. Diworoka hena asi, nzambo zaJesus zosizoweseso kuna kara nkedi zonene omu Jehova ga likida eharo lyendi kovantu. (Resa Johanesa 3:16; 15:13.) Gazara omu Jehova naMunwendi ava lizuvhu kuhamena marongo aga aga ninkisa vantu va dire kumona mulyo gonzambo zaJesus zosizoweseso.

10. Ngapi omu yimpempa yaSatana ya gwederera koruguwo rovantu?

¹⁰ Yimpempa yaSatana kugwederera koruguwo rovantu. Vakurona ava vana fisa munwawo, kuvhura va va tantere asi Karunga yige ana zigida munwawo a ka kare muengeli meguru. Yimpempa eyi kapi ayi hengagwida vantu nye kugwederera tupu koruguwo rwawo. Ngereka zaKatolika ngazi ruganesa erongo lyomundiro gwanarunye mokulipopera koyirugana yawo yoyidona. Pasihonena, buke ezi za zogera kuhamena vapanguli womoSpanish Inquisition kwa tanta asi: “Vapanguli ngava hwike vantu ava ngava rwanesa marongo gongereka zaKatolika nositambo sokuvavatera va vhure kulitezurura yipo ngava dire kukavahwika momundiro gwanarunye.” Moyirongo yoyinzi, vantu kukarera vafe nositambo sokuvafumadeka, ndi yipo va gwane matungiko. Vamwe kuyirugana eyi morwa kutjira kuvatengeka. Yosili mapuliro ogo goyimpempa kapi aga reta ehangagwido. Nye ago kuninkisa vantu va kare nosinka ntani noutjirwe.

11. Ngapi omu vanekoro novakaume nava tu ninkisa tu rugane yininke eyi ya lilimba nonompango domoBibeli?

¹¹ Eharo lyetu lyokuhara Jehova noNonkango dendi ngayi tu vatera tu limburukwe Jehova nampili vanekoro novakaume vetu kuna kutusininika tu lihameke monompo dokuhamena kovafe, edi da lilimba noMatjangwa. Awo kuvhura va tu swaure pokutanta asi ose kapi tuna kufumadeka vafe. Ndi kuvhura va uyunge asi nkareso zetu kuvhura ngazi ninkise muntu ogu ana dogoroka a rugane yininke yoyidona kwagumwe gekoro. Ngapi omu natu popera  usili womoBibeli momaukaro gangoso? Tu tareni omu natu ruganesa nompango domoBibeli edi dina kukwama ko.

12. Nompo musinke dimwe va pura vantu kuhamena vafe, edi da lilimba noMatjangwa?

¹² Nyokera po ‘kuguma’ nompo nomapuliro aga ga lilimba noMatjangwa. (2 Kol. 6:17) Poyirudi yefuta lyaCaribbean sinzi sovantu kwa pura asi apa a fu muntu, age kulisintunuka sinkisauke esi asi hepeke ava ngava tekura muntu ogo momudona. Buke zimwe kwa tanta asi: “sinkisauke oso kuvhura kuhepeka vantu womomukunda nagunye.” Nsene muntu ana fu, sinzi sovantu womoAfrika kukudumika nontarero nokuhoreka mafano gendi. Awo kuyirugana eyi yipo ogu ana fu a dire kulimona mwene. Ngovakareli vaJehova, ose kapi atu pura moyipempa oyo ntani twa hepa kunyokera po nompo edi da likwatakana noyimpempa yaSatana!—1 Kol. 10:21, 22.

13. Kuliza naJakopo 1:5, Yisinke no rugana nsene kapi ono diva asi mpo zongandi za lilimba noMatjangwa ndi hawe?

¹³ Nsene kapi ono diva asi mpo zongandi za lilimba noMatjangwa ndi hawe, kanderera kwaJehova yipo a ku pe ko unongo. (Resa Jakopo 1:5.) Ntani rugana epaparo moyimbapiratjangwa yetu. Nsene kuvhura, zogera novakuronambunga womombungakriste zeni. Awo kapi ngava kutantera eyi wa hepa kurugana, nye ngava kulikida nompango domoBibeli ngwendi deedi tuna kuzogera. Nsene o yi rugana eyi, ove ngo deura “nondunge” doge edi ngadi kuvatera o dive “kuhangura uwa koudona.”—Heb. 5:14.

14. Ngapi natu nyokera po kupundukisa vantu?

¹⁴ Rugana nkenye eyi “mokufumadekesa ko Karunga. Walye omu kara yipukisiso.” (1 Kol. 10:31, 32) Nsene ono hara kulihameka mompo zongandi, gazadara ko omu nayi kundama wopeke, unene po vapuli vakwetu. Kapi tuna hara kupundukisa vantu. (Mar. 9:42) Ntani tuna hara kunyokera po kupundukisa vahapuli. Nsene tu kara neharo, ayo ngayi tu tumangeda tu uyunge nawo monkedi zefumadeko, ano eyi ngayi retera Jehova mfumwa. Kapi tuna hara kulitangwisa novantu ndi tu swaure eyi va pura. Diworoka asi, eharo nonkondo. Nsene tu tekura vantu monkedi zongwa zeharo, ayo kuvhura ngayi va ninkise va hageke kuturwanesa.

15-16. (a) Morwasinke natu tanterera ko wopeke kuhamena eyi twa pura? Gava sihonena. (b) Yisinke natu lirongera ko ketjangwa eli lya kara moVaroma 1:16?

 ¹⁵ Tantera ko wopeke asi ove gumwe goNombangi daJehova. (Jes. 43:10) Nsene o fatwilira vanekoro novamusinda woge komeho zosiruwo kuhamena eyi wa pura, ayo ngayi kurerupira kuvatantera konda zeyi no dilira kulihameka monompo edi da lilimba noBibeli nsene gumwe ana dogoroka. Francisco ogu ga tunga mosirongo saMozambique kwa tanta asi: “Apa twa lirongere usili namukadange Carolina, ose kwa tanterere vekoro lyetu asi kapi hena ngatu karera vafe. Apa mukurwa Carolina gomukadi ga dogorokere, ayo kwa hetekere epuro lyetu. Vantu womomukunda gwetu kukuhwa muntu nsene ana fu, ano konyima tava pura gumwe gekoro a rare mazuva gatatu pevango eli kava tjisilire mema aga kava kuhwisire simpu. Awo kugazara asi nsene va yi rugana ngoso, awo kuna kuhafesa ogu ana dogoroka. Ekoro lyaCarolina kwa mu pulire a ka rare mazuva gatatu pevango olyo.”

¹⁶ Yisinke ga tokwere kurugana Francisco namukadendi? Age kwa tanta asi: “Ose kwa nyokere kulihameka mompo ozo morwa twa hara Jehova ntani tuna hara kumuhafesa. Eyi kwa handukisire unene ekoro lyamukadange. Awo kwa tu tanterere asi ose kapi twa fumadeka vafe ntani awo kwa uyungire asi kapi ngava tu dingura hena ndi va tu vatere. Nye morwa twa va tanterere komeho zosiruwo eyi twa pura, vanekoro vamwe kwa kwatesere ko etokoro lyetu. Ntani ose kapi twa zogerere nawo posiruwo esi va handukire. Mwaza siruwo, apa vekoro lyaCarolina va litulire, ose kwa tulisire po mbili. Ano vamwe ngava tu wizire pembo nokuyahundira yimbapiratjangwa.” Kapisi tu lizuvhe nomuga kutantera ko wopeke eyi azi uyunga Bibeli kuhamena ukaro wovafe.—Resa Varoma 1:16.

17. Ngapi omu natu kwafa munazinyetu ogu ana fisa?

¹⁷ Nsene Mukriste mukwetu ana fisa, twa hepa kukondja yipo tu kare kaume ogu a  ‘kwafa moudigu.’ (Yis. 17:17) Ngapi omu natu kwafa munazinyetu ogu ana fisa nsene kuna kumusininika a lihameke monompo edi da lilimba noBibeli? Koneka nompango domoBibeli mbali edi nadi tu vatera tu hengagwide ogu ana fisa.

18. Yisinke ya ninkisire Jesus a lire ntani yisinke natu lirongera ko?

¹⁸ “Lilisa ko ava vana kulira.” (Rom. 12:15) Poyiruwo yimwe kutudigopera kudiva omu natu hengagwida ogu ana guwu. Nye nsene tu lilisa ko ava vana guwu, ayo ngayi va vatera unene. Apa Rasarusa ga dogorokere, Mariya naMalita ntani navamwe kwa lilire. Apa Jesus ga ya sikire konyima zomazuva gane nage kwa lilire nampili ngomu ga divire asi ta ka vhumbura Rasarusa. (Joh. 11:17, 33-35) Eyi kwa likidire omu Jehova ga lizuvhire kuhamena nomfa daRasarusa. Ntani apa va mwene Jesus kuna kulira, awo va yi dimbwilire asi Jesus ga va hara. Mokulifana, apa vanavazinyetu ava dimburura asi twa va hara ntani kuvapakera sinka awo kulizuvha asi kapisi velike vana kara nye va kara novakaume ava vava hara.

19. Ngapi natu tura pasirugana etjangwa lyomoMuudisi 3:7 nsene kuna kugava ehengagwido?

¹⁹ “Siruwo sokumwena nosiruwo sokuuyunga.” (Muud. 3:7) Nkedi zimwe omu natu hengagwida ogu ana fisa, kuna kara pokupurakena nawa. Twa hepa kupurakena munazinyetu ogu ana guwu nsene kuna kututantera yuma ntani kapisi tu handuke nsene kuna kuuyunga “nonkango dononkukutu.” (Joba 6:2, 3) Age nampo kuvhura a kare nosinka unene morwa vekoro lyendi wovahapuli kuna kumukondjesa. Yipo nye, kanderera kumwe nendi. Hundira ‘muzuvhi gomakanderero’ yipo a mu pe nonkondo nokudiva eyi na rugana. (Epis. 65:2) Kuvhura hena o rese kumwe nage Bibeli ndi sirongwa esi sa kara moyimbapiratjangwa yetu esi sa liza noukaro wendi, pasihonena, esimwititi lyagumwe.

20. Yisinke ngatu ka lironga mosirongwa sokukwama ko?

²⁰ Ose tuna hafa kweyi twa diva usili kuhamena vafe nomeho zongwa ezi zina kundindira ava vana kara monontoko. (Joh. 5:28, 29) Yipo nye, tu popereni usili ou womoBibeli nokutantera ko wopeke nkenye apa tuna kugwana mpito. Sirongwa sokukwama ko ngasi ka zogera kuhamena umpure, azo kuna kara nkedi zimwe ezi a ruganesa Satana mokupukisa vantu. Ngatu ka lironga eyi ya karera nomulyo tu nyokere po nompo noyilihafeso eyi ya likwatakana noumpure.