1. Yisinke vana hara kurugana vakareli vaKarunga navenye ntani morwasinke? (Tara efano lyopontunda.)

JESUS KRISTUSA kwa pangerere vasikuli vendi va ze ‘konomuhoko nadinye, va ka di ninke di kare varongwa vendi.’ (Mat. 28:19) Vakareli vaKarunga navenye vana hara ‘ku sikisa mo’ sirugana esi va va pa. (2 Tim. 4:5) Sirugana esi mulyo unene ntani sina kara mongenderera kupitakana yirugana nayinye. Nye ayo kapisi ureru kugwana siruwo yipo tu liture mo unene mokuzuvhisa.

2. Maudigu musinke atu ligwanekere nago ngomu tuna kusikisa mo sirugana setu?

² Yininke yomulyo yinzi ayi mana siruwo nononkondo detu. Nampo ose kurugana unene yipo tu gwane yimaliwa yokureresa mapata getu. Ndi nampo twa kara nomaudigu gamwe ngwendi mauvera, kuguva-guva ntani noukurupe. Ngapi omu natu sikisa mo sirugana setu sokuzuvhisa nampili ngomu atu ligwanekere nomaudigu?

3. Yisinke natu lirongera ko kononkango daJesus da kara mwaMateusa 13:23?

³ Kapisi yi tu dompese nsene ukaro wetu kapi una kutupulisira tu lihameke unene mosirugana saJehova. Jesus ga yi divire asi natuvenye kapi tatu vhuru kurugana novili dokulifana mokuzuvhisa. (Resa Mateusa 13:23.) Jehova kumuhafesa nayinye eyi atu rugana mosirugana sendi nsene kuna kuyirugana papa twa hulira. (Heb. 6:10-12) Nye ngapi nsene kuna kulizuvha asi, ukaro wetu kuvhura kutupulisira tu ruganene Jehova unene? Mosirongwa esi natu ka konakona omu natu tura sirugana sokuzuvhisa muhowo meparu lyetu nomu natu rerupika eparu lyetu ntani nokuwapukurura  nkedi zetu zokuzuvhisa nokuronga. Tu konakoneni pomuhowo eyi ayi tanta kusikisa mo sirugana setu.

4. Yisinke ayi tanta kusikisa mo sirugana setu?

⁴ Kusikisa mo sirugana setu kutanta asi twa hepa kulitura mo unene mosirugana setu sokuzuvhisa nokuronga. Nye eyi kapi ya kwatera mo kusikisa mo novili dongandi. Yomulyo po unene kwaJehova kuna kara konda zeyi atu zuvhisire. Mokumona asi ose twa hara Jehova novakwetetu, eyi kututumangeda tu liture mo unene mosirugana sokuzuvhisa nomutjima nagunye. * (Mar. 12:30, 31; Koros. 3:23) Kukarera Karunga nomutjima nagunye kutanta asi kuruganesa nonkondo detu nadinye yipo tu sikise mo sirugana sendi. Nsene tu tara sirugana sokuzuvhisa asi mulyo, ngayi tu tumangeda tu zuvhisire vantu wovanzi mbudi zongwa.

5-6. Ngapi muntu ogu ga dira kukara nosiruwo na vhura kutura sirugana sokuzuvhisa muhowo? Yifanekesa.

⁵ Gazadara ko kuhamena mudinkantu gomugara ogu ga hara kusika sikitara. Age kwa hara kusika sikitara sendi nkenye apa a gwana mpito. Konyima zosiruwo ta ya gwana yirugana yokusika sikitara mosikondovike morestauranda. Nye silinga ezi ava mu futu kapi a zi gwanene po mokufutira yihepwa yendi. Makura ta ya gwana yirugana yokurugana koTeller mositora kutundilira mandaha dogoro utano. Nampili ngomu a rugana siruwo sosinzi mositora, age simpe kwa hara unene kusika sikitara sendi ntani ana hara kuwapukurura udivi wendi yipo nga ruganese siruwo sendi sosinzi mokusika sikitara. Nampili ngomu a rugana mositora, age simpe kuruganesa nkenye mpito a gwana yipo a sike sikitara sendi.

⁶ Mokulifana, nampo kapi o gwana siruwo sokugwanena po yipo o lihameke mo unene mosirugana sokuzuvhisa. Nye esi yiso sirugana wa hara. Ntani ono hara  kuwapukurura udivi woge yipo o kare murongi gomuwa nokuguma nomutjima dovantu. Mokumona asi yininke yinzi ayi mana siruwo nononkondo detu, nampo kuvhura o lipure asi ngapi nayi tompoka nge yipo ni ture sirugana sokuzuvhisa muhowo?

7-8. Ngapi Jesus ga tere sirugana sokuzuvhisa ntani ngapi natu mu honena?

⁷ Jesus kwa tu tulira po sihonena sosiwa monkedi omu nga tara sirugana sokuzuvhisa. Sininke somulyo meparu lyendi kwa kere kuzuvhisa kuhamena Uhompa waKarunga. (Joh. 4:34, 35) Age nga gendi sinano sosire yipo a ka zuvhisire vantu wovanzi. Age nga ruganesa nkenye mpito mokuzuvhisira vantu momambo ndi nkenye oku nga va gwana. Sirugana sokuzuvhisa kwa kere sininke somulyo meparu lyaJesus.

⁸ Kuvhura tu honene Jesus pokupapara nompito yipo tu zuvhisire vantu mbudi zongwa nkenye oku natu va gwana. Ntani ose kutura po malizambero yipo tu lihameke mosirugana sokuzuvhisa. (Mar. 6:31-34; 1 Pet. 2:21) Vamwe kurugana uzuvhisi wosiruwo nasinye ndi wokukarerera ano vamwe uzuvhisi wokuvatera. Vamwe kwa lironga maraka gapeke ndi kudirukira oku kuna hepa vazuvhisi. Nye nampili ngoso vazuvhisi ava ava dili kurugana oyo, nawo kulitura mo unene paapa va hulira moyirugana yokuzuvhisa. Yikare asi ose kurugana unene ndi hawe, Jehova kapi atu pura tu rugane yoyinzi kupitakana nonkondo detu. Age ana hara natuvenye tu hafere sirugana setu ngomu tuna kudivisa “mbudi zongwa.”—1 Tim. 1:11; Deut. 30:11.

9. (a) Ngapi Paurusa ga tulire sirugana sokuzuvhisa muhowo nampili ngomu ga kere noyirugana nayopeke? (b) Kuliza noYirugana 28:16, 30, 31, ngapi Paurusa ga tere sirugana sokuzuvhisa?

⁹ Mupositoli Paurusa nage kwa tulire sirugana sokuzuvhisa muhowo meparu lyendi. Apa ga kere mosirugana soutumwa moKolinte, age kapi ga kere noyimaliwa yokugwanena po, yipo ga tokwere kurugana notenta. Nye Paurusa kapi ga demenenene kosirugana sendi sonotenta. Sirugana oso kwa mu vaterere yipo a twikire kuzuvhisa mbudi zongwa “mawoko-kowo” ga hana kundindira Vakriste vakwawo womoKolinte va mu vatere noyihepwa yendi. (2 Kol. 11:7) Nampili ngomu Paurusa nga rugana yirugana yapeke, age kwa tulire muhowo sirugana sokuzuvhisa ntani nga zuvhisa nkenye Esabata. Apa ukaro wendi wa rundurukire, age kwa lihamekere mo unene moyirugana yokuzuvhisa. Age nga “pamperekeda kuudisira Vajuda asi Jesus yige Kristusa.” (Yirug. 18:3-5; 2 Kol. 11:9) Konyima, Paurusa kwa mu silikire kupwaga membo lyendi moRoma ure wonomvhura mbali, nye age simpe nga twikire kuzuvhisira ava ngava mu dingura ntani nga tjanga nombilive. (Resa Yirugana 28:16, 30, 31.) Paurusa kapi ga pulisilire nkenye eyi yi donganese sirugana sendi. Age kwa tjenge asi: “Morwa Karunga kwa tu pa sirugana esi . . . , yiyo nye natu dilira kudomba nomutjima.” (2 Kol. 4:1) Ngwendi Paurusa, nose kuvhura tu ture yirugana yoUhompa muhowo meparu lyetu, nampili ngomu twa kara noyirugana nayopeke.

10-11. Ngapi natu sikisa mo sirugana setu nsene ose kuvera-vera?

¹⁰ Nsene uvera ndi ukurupe kapi au tu pulisire tu zuvhise tunda embo zende embo, simpe kuvhura tu zuvhise mononkedi  dimwe. Vakriste womosiruwo sanare ngava zuvhisire nkenye oku ngava gwana vantu. Awo ngava zuvhisire momambo nopoyitanda ntani nkenye “oku ngava zi” ndi oku ngava kara vantu. (Yirug. 17:17; 20:20) Nsene kapi atu vhuru kugenda, kuvhura tu hingire pevango limwe nokuzuvhisira vantu ava ava piti monzira. Ndi kuvhura tu zuvhise kupitira koterefona ndi kutjanga nombilive. Sinzi sovanavazinyetu ava ayi dili kutompoka kuzuvhisa tunda embo zende embo, awo kuhafera kuruganesa nonkedi odo.

¹¹ Nampili ove kuvera-vera, kuvhura o sikise mo sirugana soge. Tu tareni hena sihonena somupositoli Paurusa. Age kwa tente asi: “Ame kuvhura nayinye nononkondo dogu a pameke nge.” (Fil. 4:13) Sikando simwe Paurusa kwa verere apa ga kere mosirugana soutumwa, yipo nye ga hepere nonkondo odo. Age kwa tjangerere Vagarata asi: “Eyi na mu udisira Mbudi zoNgwa muhowo, yeeyi ngani vera-vera.” (Gar. 4:13) Mokulifana, nsene asi ove kuvera-vera, ove kugwana mpito yipo o vhure kuzuvhisira vandokotora novanesa ntani navamwe wokosipangero ava ava kupakere mbili. Sinzi sovantu ava kapi ava kara pomambo siruwo esi atu rugana tunda embo zende embo.

12. Yisinke ayi tanta kudemenena ndi kukara nomeho gana “kanguka”?

¹² Jesus kwa tente asi: “Ramba zorutu roge meho. Nsenesi meho goge ga kanguka [ndi ga demenena], makura rutu roge mudima taru kara mouzera.” (Mat. 6: 22) Yisinke ga tembe? Age kwa tembe asi twa hepa kurerupika eparu lyetu ndi tu demenene kositambo simwe nokunyokera po kutudonganesa yininke yapeke. Jesus kwa tu tulira po sihonena, age kwa tulire sirugana sokuzuvhisa muhowo meparu lyendi ntani kwa rongere varongwa vendi va ture Uhompa muhowo nokukarera Jehova.Twa hepa kuhonena Jesus pokuruganesa eparu lyetu ‘mokupapara Untungi waKarunga neyi ga hepa ko kwetu.’—Mat. 6:33.

13. Yisinke natu rugana yipo tu demenene kosirugana sokuzuvhisa?

¹³ Nkedi zimwe omu natu demenena kosirugana sokuzuvhisa kuna kara pokurerupika eparu lyetu yipo tu ruganese siruwo sosinzi mokuvatera wopeke va dive Jehova nokumuhara. * Pasihonena, kuvhura o sesupike novili doge dokoyirugana yipo o gwane siruwo sosinzi sokulihameka moyirugana yokuzuvhisa mokatji kosivike. Ntani kuvhura o sesupike yilihafeso eyi nayi vhura kumana siruwo soge.

14. Yisinke va rugene valikwali vamwe yipo va liture mo unene moyirugana yokuzuvhisa?

¹⁴ Eyi yiyo ga rugene mukuronambunga gedina Elias namukadendi. Age kwa tanta asi: “Kapi twa vhulire kurugana uzuvhisi wokukarerera, nye twa tokwere kurugana ko yuma yipo tu lihameke mo unene moyirugana yokuzuvhisa. Pasihonena, ose kapi ngatu randa yininke eyi twa dilire kuhepa, ose hena ngatu nyokere po yilihafeso eyi ngayi mana siruwo setu ntani twa pulire muhona gwetu a sesupike novili detu dokoyirugana. Eyi kwa tu pere mpito tu lihameke mokuzuvhisa kongurova ntani twa kere novarongwa woBibeli wovanzi ntani ngatu gwana siruwo sokuza mokuzuvhisa  mokatji kosivike. Eyi kwa tu reterere ruhafo.”

15-16. Kuliza na-1 Timoteusa 4:13, 15, ngapi natu tura po ezokomeho moyirugana yetu yokuzuvhisa? (Tara hena kakende “ Yitambo eyi nayi vatera nge ni sikise mo sirugana sange.”)

¹⁵ Nkedi zimwe omu natu sikisa mo sirugana setu kuna kara pokuwapukurura nkedi zetu zokuzuvhisa. Koyirugana yimwe, vantu vamwe kuvatuma vakalironge yipo va ka gwederere kediwo lyawo. Eyi ya lifana novazuvhisi woUhompa. Twa hepa kutwikira kulironga yipo tu kare varongi wovawa mokuzuvhisa.—Yis. 1:5; resa 1 Timoteusa 4:13, 15.

¹⁶ Ngapi natu tura po ezokomeho moyirugana yetu yokuzuvhisa? Pokupurakena komapukururo aga atu gwana mepongo lyomokatji kosivike. Erongo eli atu gwana mepongo olyo, kutuvatera tu kare vazuvhisi wovawa. Pasihonena, apa munasipundi a gava mapukururo kwava vana kugava yiuyungwa, kuvhura nose tu didilike magano apa twa hepa kuwapukurura moyirugana yokuzuvhisa. Kuvhura tu ka heteke magano ogo sikando sokukwama ko apa ngatu za moyirugana yokuzuvhisa. Kuvhura tu rugane nomupitisili gokambunga ketu komokuzuvhisa, ndi munazinyetu ogu ga kara noudivi ndi muzuvhisi gokukarerera ndi mutareli gonombunga yipo tu gwane ko udivi. Ngomu ngatu ya diva kuruganesa yiruganeso yetu, ose ngatu ya hafera unene kuzuvhisa nokuronga.

17. Yisinke ngo gwana nsene o sikisa mo sirugana soge?

¹⁷ Azo mfumwa sili kweyi Jehova ga tu pulisira tu kare “varugani kumwe” nendi. (1 Kol. 3:9) Nsene o “horowora yoyiwa po” nokudemenena kosirugana sokuzuvhisa, ove ngo karera Jehova ‘noruhafo.’ (Fil. 1:10; Epis. 100:2) Ngomuzuvhisi gombudi zongwa, kara nehuguvaro asi age nga ku pa nonkondo yipo o sikise mo sirugana soge yikare asi maudigu musinke ono kuligwanekera nago. (2 Kol. 4:1, 7; 6:4) Yikare asi ukaro woge kuna kukupulisira o lihameke unene moyirugana yokuzuvhisa ndi hawe, ose ngatu gwana ruhafo nsene tu litura mo nomutjima nagunye. (Gar. 6:4) Nsene o sikisa mo sirugana soge, ayo ngayi likida asi ove wa hara Jehova novakweni. “Nsene o yi rugana, ngo paruka kumwe nava vana kukupurakena.”—1 Tim. 4:16.