SIRONGWA SELIRONGO 17
Jehova ga ku hara!
‘HOMPA kwa hara vantu vendi.’—EPIS. 149:4.
RUSUMO 108 Eharo lyaKarunga lyanarunye
ETWAROMO *
Guhyetu gemeguru ‘kwa hara’ nkenye gumwe gwetu (Tara paragarafu 1)
1. Yisinke a tara Jehova movantu vendi?
JEHOVA KARUNGA ‘kwa hara vantu vendi.’ (Epis. 149:4) Ano eyi kutuhafesa sili unene! Jehova kumona yikara yetu yoyiwa ntani age kumona yininke yoyiwa eyi natu vhura kusikisamo ntani age kutuvatera yipo tu kare vakaume vendi. Nsene tu twikira kumulimburukwa, age nga kara kaume gwetu dogoro narunye!—Joh. 6:44.
2. Morwasinke vamwe ayi va digoperere kuyipura asi Jehova ga va hara?
2 Vamwe kuvhura va uyunge asi ‘nayidiva asi Jehova ga hara vantu vendi navenye nye ngapi nani yi diva asi yousili Jehova ga hara nge pamundinda?’ Morwasinke gumwe na lipulira epuro lyangoso? Oksana * ogu ngava tekura momudona pounona kwa tanta asi: “Ame kwa hefe unene apa na gwene ekuho ntani napa na tamekere uzuvhisi wokukarerera. Nye konyima zonomvhura 15, ame kwa tamekere kugazara yininke yoyidona eyi ya horokerere nge pounona. Yipo na tamekere kugazara asi ame kwato mulyo kwaJehova ntani kapi ga hara nge.” Munazinyetukadi gomuzuvhisi gokukarerera Yua, ogu va tekwire momudona pounona kwa tanta asi: “Ame kwa ligeve kwaJehova morwa kwa here ni mu hafese. Nye ame kwa litanterere nyamwange asi age kapi nga hara nge.”
3. Yisinke natu ka lironga mosirongwa esi?
3 Ngwendi vanavazinyetukadi wovalimburukwi ava tuna tumbura, kuvhura o hare Jehova nomutjima nagunye, nye kuvhura o kare nomasinganyeko asi kapi ga ku hara. Morwasinke no yi pulira asi Jehova kukupakera mbili? Ntani yisinke na yi kuvatera nsene ove kugazara asi Jehova kapi ga ku hara? Tu zeni tu ka limburure mapuro aga.
AYO SIPONGA KUGAZARA ASI JEHOVA KAPI GA TU HARA
4. Morwasinke ya karera siponga kugazara asi Jehova kapi ga tu hara?
4 Eharo kwa kara nononkondo dokututumangeda tu rugane yuma. Nsene tu yi pura asi Jehova ga tu hara, ose ngatu twikira kumukarera nampili momaudigu. Nye nsene tu gazara asi Jehova kapi a tu pakere mbili, ose kapi ngatu kara nononkondo. (Yis. 24:10) Ntani nsene tu tameka kugazara asi Karunga kapi ga tu hara, kapi ngayi tu tompoka kufunda po marwaneso gaSatana.—Efe. 6:16.
5. Yisinke ya horokera vanavazinyetu vamwe ava ngava gazara asi Karunga kapi ga va hara?
5 Vanavazinyetu vamwe wovalimburukwi ava va tamekere kugazara asi Jehova kapi ava pakere mbili ntani kapi ga va hara, epuro lyawo kwa sesupire. Mukuronambunga gedina James kwa tanta asi: “Nampili ngomu ngani rugana koBeteli nokuhafera sirugana sokuzuvhisa mombungakriste zemeraka lyapeke, ame simpe kwa kere nomasinganyeko nsene asi Jehova ga haferere eyi ngani mu ruganene. Ano sikando simwe ame kwa lipulire nsene asi Jehova kupurakena makanderero gange.” Munazinyetu gomukadi Eva ogu a rugana koBeteli kwa tanta asi: “Ame na yi dimburura asi ayo siponga kugazara asi Jehova kapi ga ku hara morwa ayo kukundama elikwatakano lyetu naJehova. Ntani ngayi ku ninkisa o dire kuhara kurugana yininke yopampepo ntani kapi ngo karera Jehova noruhafo.” Mukuronambunga gedina Michael ogu a rugana uzuvhisi wokukarerera kwa tanta asi: “Nsene kapi ono kuyipura asi Karunga kukupakera mbili, ove ngo zaaza nompepo.”
6. Yisinke natu rugana nsene tuna tameke kugazara asi Jehova kapi ga tu hara?
6 Yihonena oyo kulikida omu elikwatakano lyetu naJehova na li kara mosiponga nsene tu gazara asi Jehova kapi ga tu hara. Nye yisinke natu rugana nsene tuna tameke kugazara asi Jehova kapi ga tu hara? Twa hepa kunyokera po usimbu magazaro ogo! Pura Jehova a ku vatere yipo ‘mbili zaKarunga zi kunge mutjima nomagazaro goge.’ (Epis. 139:23; Fil. 4:6, 7) Ntani diworoka asi kapisi nyovelike wa kara nomagazaro ogo. Vanavazinyetu vamwe nawo kuna kukondja nomagazaro gangoso. Nampili vakareli vaJehova womosiruwo sanare nawo ngava kondjo nomagazaro ogo. Tu tareni eyi natu lirongera ko kosihonena somupositoli Paurusa.
YISINKE NATU LIRONGERA KO KOSIHONENA SAPAURUSA?
7. Maudigu musinke ga kere nago Paurusa?
7 Ove pamwe kulizuvha asi ono kara noyitumbukira yoyinzi ntani kapi yina kukupa siruwo sokuyisikisa mo nayinye ndi? Nsene yimo, ove noyikwata egano omu ga lizuvhire Paurusa. Age kwa kapi ga kere nosinka sovanavazinyetu womombungakriste zimwe tupu, nye ‘womonombungakriste nadinye.’ (2 Kol. 11:23-28) Poyiruwo yimwe ove kuguva morwa kuvera vera ndi? Paurusa kwa hepere kouvera ‘wonsonga zomorutu,’ awo kuna kara uvera wokutwikida ou wa mu pere sinka ntani age kwa here u mu tunde. (2 Kol. 12:7-10) Ove pamwe kuguva morwa upirankondo woge ndi? Paurusa nage yimo nga lizuvhu poyiruwo yimwe. Nampili ngomu nga kondjo kurugana yoyiwa, upirankondo wendi ngau mu ninkisa a uyunge asi “oru ruhepo rwange ame muntu ame rureru oru!”—Rom. 7:21-24.
8. Yisinke ya vaterere Paurusa a lididimikire maudigu gendi?
8 Nampili ngomu Paurusa ga kere nomaudigu, age kwa twikilire kukarera Jehova. Yisinke ya mu vaterere? Nampili ngomu ga divire upirankondo wendi, age kwa kere nepuro lyenene mosizoweseso. Age hena ga divire etumbwidiro lya Jesus eli asi “nkenye ogu a pura [Jesus] a kare nomwenyo gwanarunye.” (Joh. 3:16; Rom. 6:23) Yosili, Paurusa kuna kara gumwe ogu ga tulire epuro mosizoweseso. Age ga yi pulire nawa-nawa asi Jehova ga liwapaikira kugusira po ava vana kulitezurura nampili kwa tura nonzo dononene.—Epis. 86:5.
9. Yisinke natu lirongera ko kononkango daPaurusa edi da kara moVagarata 2:20?
9 Paurusa ga yi pulire hena asi Karunga ga mu hara unene morwa ga tumine Munwendi yipo a ya mu fire. (Resa Vagarata 2:20.) Koneka nonkango dokuhulilira movelise ozo. Paurusa kwa tente asi: “MunwaKarunga . . . ga hara nge, yiyo ga gavera nge mwenyo gwendi.” Paurusa ga yi tambwire asi nage Karunga ga mu hara kapisi vapuli vakwawo velike. Paurusa kwa diworokesere Varoma asi: “Apa twa kere tu vananzo, Kristusa yipo ga tu fililire.” (Rom. 5:8) Kwato eyi nga yi kondera Karunga a hageke kutuhara!
10. Yisinke natu lirongera ko ketjangwa lyoVaroma 8:38, 39?
10 Resa Varoma 8:38, 39. Paurusa ga divire omu eharo lyaKarunga lya kara nononkondo. Age kwa tjenge asi kwato eyi ‘yokutugusa mo meharo lyaKarunga.’ Paurusa ga divire omu Jehova ga lididimikilire ukaro woVaisraeli. Ga divire hena omu Jehova ga mu likidire nkenda. Yipo nye, monkango zimwe Paurusa kwa uyungire asi, ‘mokumona asi Jehova kwa tuma Munwendi a ya fire nge, ayo kulikida asi age ga hara nge.—Rom. 8:32.
Yomulyo po kwaKarunga kuna kara eyi tuna kurugana ngesi ntani nokomeho nye kapisi mapuko aga twa rugene nare (Tara paragarafu 11) *
11. Morwasinke Paurusa ga yi pulilire asi Karunga ga mu hara, nampili ngomu ga tulire nonzo edi va tumbura mwa-1 Timoteusa 1:12-15?
11 Resa 1 Timoteusa 1:12-15. Poyiruwo yimwe, Paurusa nga lizuvhu udona kweyi ga rugene nare komeho a ya kare Mukriste. Age kwa litumbwire mwene asi munanzo “gomunene po.” Komeho Paurusa aya lironge usili, age nga hepeke unene Vakriste moyitata yokulisiga-siga noku va tura monodorongo ntani nokukwatesa ko mpanguro nsene zina tokora kudipaga Vakriste owo. (Yirug. 26:10, 11) Gazara tupu omu ga lizuvhire nampo Paurusa apa nga ligwanekere noVakriste vamwe ava va fisire vakondi vawo morwa mokonda zendi. Paurusa kwa liverere kononzo dendi da nare nye ga yi divire asi kapi nga vhura kutjindja eyi ga rugana. Age ga yi pulire asi Kristusa ga mu fira ntani kwa tjenge hena asi: “Morwaufenkenda waKarunga nyame tupu ogu, moomu na kara.” (1 Kol. 15:3, 10) Yisinke natu lirongera ko? Yi pura asi Kristusa kwa kufira ntani ga ku pa mpito o tulise po ukaume wounene naJehova. (Yirug. 3:19) Yomulyo po kwaKarunga kuna kara eyi tuna kurugana ngesi ntani nokomeho nye kapisi mapuko aga twa rugene nare yi kare asi ose opo gumwe goMbangi ndi hawe.—Jes. 1:18.
12. Ngapi nonkango edi da kara mwa-1 Johanesa 3:19, 20, na di tu vatera nsene kulizuvha asi ose kwato mulyo?
12 Nsene o gazadara ko omu Jesus ga ku fira mokugusa po nonzo doge, nampo kuvhura o uyunge asi, ‘kapi nina hepa uhwi ou morwa ame kwato mulyo.’ Morwasinke nampo no lizuvhira ngoso? Mokumona asi kapi twa sikiliramo, mutjima gwetu kuvhura kutukumbagera nokutuninkisa tu lizuvhe asi ose kwato mulyo ndi kwato ogu ga tu hara. (Resa 1 Johanesa 3:19, 20.) Nsene tuna tameke kugazara ngoso, ya kara nomulyo tu diworoke asi “Karunga ga pitakana nomutjima detu.” Nampili tu lizuvhe asi Jehova kapi ga tu hara ntani kapi ngatu gusira po, nye age nga twikira kutuhara nokutugusira po. Ayo mulyo tu yi pure asi Jehova ga tu hara. Mokuyirugana oyo, ntudi twa hepa kuresa Bibeli nkenye ezuva nokukanderera nkenye apa ntani nokulitulira po siruwo sokuzogera kumwe nava ava mu karere. Morwasinke ya karera nomulyo tu rugane yininke eyi?
NGAPI ERESO LYOBIBELI NOKUKANDERERA NTANI NOVAKAUME WOVALIMBURUKWI A YI VATERE?
13. Ngapi omu kuresa Bibeli nkenye ezuva nayi tu vatera? (Tara kakende “ Ngapi omu Bibeli za va vatera?”)
13 Resa Bibeli nkenye ezuva ntani ayo nga yi kuvatera o lironge yikara yoyiwa yaJehova. Ove ngo dimburura omu ga ku hara. Nsene o teda ko nkenye ezuva kweyi ya kara moBibeli, ayo nga yi ku vatera o gazare nawa ‘nokukupukurura’o nyokere po magazaro nomadowo gomadona. (2 Tim. 3:16) Mukuronambunga gedina Kevin ogu nga litara mwene asi age kwato mulyo kwa tanta asi: “Pokuresa Episarome 103 nokuteda ko, kwa vatera nge ni tjindje omu ani gazara nokukwata egano omu Jehova a tara nge.” Eva ogu katu tumbura muhowo kwa tanta hena asi: “Apa a li toko ezuva, ame kuteda kuhamena yininke eyi ya kara nomulyo kwaJehova. Ame kulizuvha mbili momutjima ntani epuro lyange kupama.”
14. Ngapi omu kukanderera a ku tu vatere?
14 Kanderera nkenye apa. (1 Tes. 5:17) Nsene ono hara kutulisa po ukaume wounene nagumwe, wa hepa kuzogera nage nkenye apa nokumutantera omu ono kulizuvha. Ayo ya lifana noukaume wetu naJehova. Nsene tu tantera Jehova malizuvho getu neyi tuna kugazara ntani nosinka esi tuna kara naso, ayo nga yi likida asi twa mu huguvara ntani twa yi diva asi ga tu hara. (Epis. 94:17-19; 1 Joh. 5:14, 15) Munazinyetu Yua ogu katu tumbura muhowo kwa tanta asi: “Apa ani kanderere, kapi tupu ani tantere Jehova kweyi yina horoka mezuva. Ame ku mu tantera eyi nina kugazara nomu nina kulizuvha. Ngoyitundwa mo, ame ngesi kutara Jehova nga guhya ogu ga hara vana vendi nye kapisi ngwendi muhona gomomberewa.”
^ para. 64 EFANO EPENUNO: Komeho Paurusa a lironge usili, age nga hepeke Vakriste nokutura sinzi sawo modorongo. Nye apa ga tambwire eyi ga mu ruganena Jesus, age kwa tulire po marunduruko noku korangeda vapuli vakwawo kukwatera mo ekoro lyava nga hepeke.
15. Ngapi Jehova a yi likida asi ga tu hara?
15 Kara kumwe novapuli vakweni; vapuli owo kuna kara uhwi wokutunda kwaJehova. (Jak. 1:17) Guhyetu gemeguru kutulikida eharo pokutupa vanavazinyetu womombungakriste ava ava tu likida eharo nkenye apa. (Yis. 17:17) Mombilive zaPaurusa ezi ga tjangerere mbungakriste zovaKorosi, age kwa tumbwire Vakriste vamwe asi “ngava kwafa nge unene.” (Koros. 4:10, 11) Nampili Jesus nage kwa pandwire kevatero eli ga gwene kovakaume vendi wopampepo nava wopanyama.—Ruk. 22:28, 43.
16. Ngapi vakaume wovalimburukwi nava tu vatera tu hedere pepi naJehova?
16 Ove kupapara nokutambura mavyukiso govakaume woge womombungakriste ndi? Apa atu tantere maudigu getu kaume ogu ga kura pampepo, kapi a yi tanta asi epuro lyetu kapi lya pama, nye ayo kutupopera. James ogu ka tu tumbura muhowo kwa tanta asi: “Kutulisa po ukaume nava va kara nelikwatakano lyewa naJehova kwa vatera nge unene. Apa ani kara nomagazaro gomadona, vakaume owo kupurakena nge nelididimiko ntani nokutantera nge asi awo kwa hara nge. Apa ava yi rugana oyo, ame ku yi dimburura asi Jehova ga hara nge ntani kupakera nge mbili.” Ayo ya kara nomulyo tu tulise po ukaume wounene novanavazinyetu!
KARA MEHARO LYAJEHOVA
17-18. Kwalye natu purakena ntani morwasinke?
17 Satana kuna hara tu hageke kukondja mokurugana uwa. Age kuna hara tu gazare asi Jehova kapi ga tu hara ntani ana hara tu pure asi kapi nga tu parura. Nye ngomu tuna yi lirongo, ayo kapisi usili.
18 Jehova ga ku hara. Ove mulyo kwendi. Nsene o mu limburukwa, ngo “kara meharo lyendi” narunye ngwendi moomu ga yi rugene Jesus. (Joh. 15:10) Yipo nye, wa ha pura yipempa yaSatana ndi o gazare asi Jehova kapi ga ku hara. Mevango lyoyo, purakena kwaJehova ogu a mono uwa mwa nkenye gumwe gwetu. Yi pura asi age ‘kwa hara vantu vendi’ kukwatera mo nove!
RUSUMO 141 Sitetu separu
