Morwasinke Jesus ga temwininine nonkango daNdafita edi da kara mEpisarome 22:1 komeho tupu a fe?

Komeho tupu Jesus a ka fe, age kwa uyungire nonkango edi va tjanga mwaMateusa 27:46 asi: “Karunga gwange, Karunga gwange, yisinke yokusigilira nge?” Pokuuyunga nonkango odo, Jesus kwa sikisire mo eyi ga tjenge Ndafita mEpisarome 22:1. (Mar. 15:34) Ayo epuko kugazara asi Jesus kwa temwinine nonkango odo morwa kapi ga kere nehuguvaro ndi ga zumbanesere epuro lyendi posiruwo oso. Jesus ga kwete nawa-nawa egano konda zeyi ga heperere kufa ntani age kwa here kuyisikisa mo. (Mat. 16:21; 20:28) Jesus ga yi divire hena asi apa ngava mu dipaga, Jehova kapi nga mu popera. (Joba 1:10) Yipo nye, Jehova kwa pere Jesus mpito a likide asi age nga twikira kulimburukwa dogoro konomfa.—Mar. 14:35, 36.

Morwasinke nye Jesus ga uyungilire nonkango demEpisarome eli? Nampili ngomu tuna dili kudiva nawa-nawa nokonda, tu tareni ko nokonda dimwe nampo. *

Pokuuyunga nonkango edi, Jesus kwa yi pamekere asi Jehova kapi nga rugana ko yuma konomfa dendi. Jesus ga hepere kugava sizoweseso pwa hana evatero lyaJehova. Age ga hepere kufa yipo “a fire vantu navenye.”—Heb. 2:9.

Pokutemwinina nonkango dimwe demepisarome olyo, Jesus kwa here vantu va gazadare ko kepisarome nalinye olyo. Vajuda kwa  kere nonkareso zokukwata momutwe mapisarome. Apa ngava zuvhu velise zongandi zemepisarome, ayo ngayi va ninkisa hena va diworoke nonkango nadinye demepisarome olyo. Nsene asi eyi yiyo ga here kurugana Jesus, age nampo ga vhulire kuvatera varongwa vendi woVajuda va diworoke mauporofete gomanzi gemepisarome aga ga uyunga yihorokwa yokuhamena nomfa dendi. (Epis. 22:7, 8, 15, 16, 18, 24) Ntani hena, novelise dokouhura wepisarome olyo kwa uyunga kuhamena upangeli waJehova ou au pangere uzuni naunye.—Epis. 22:27-31.

Pokutemwinina nonkango daNdafita, Jesus kwa yi likidire asi age kapi ga kere nounzoni. Komeho a ya fe, sigongi somasimbi goVajuda kapi va pangwire Jesus kuliza noveta ntani awo kwa mu gwene unzoni asi age kwa swaura Karunga. (Mat. 26:65, 66) Mpanguro ozo kwa zi rugene masiku ntani kapi va kweme noveta edi va tulire po kuhamena omu nava pangura. (Mat. 26:59; Mar. 14:56-59) Apa Jesus ga uyungire nonkango edi asi Karunga gwange, Karunga gwange, yisinke yokusigilira nge? Age nampo kwa here vantu va dimburure asi kwato eyi ga rugana eyi na yi mu ninkisa va mu tengeke monkedi zangoso.

Jesus kwa diworokesere hena vantu asi nampili ngomu Ndafita ga tjenge nonkango odo, age kwa hepere, nye kapi yina kutanta asi Jehova kapi ga mu haferere. Epuro eli ga pulire Ndafita kapi lya likidire asi age kapi ga kere nepuro. Konyima zokupura epuro lina, age kwa likidire asi ga huguvarere Jehova asi nga popera vantu vendi, ano Jehova ga twikilire kumutungika. (Epis. 22:23, 24, 27) Mokulifana, nampili ngomu Jesus “MunwaNdafita,” ga hepere kositji esi va mu pamparere, nye kapi yina kutanta asi Jehova kapi ga haferere Jesus.—Mat. 21:9.

Jesus kwa likidire ruguwo rwendi kweyi Jehova ga hagekere kumupopera yipo a likide nawa-nawa ulimburukwi wendi. Aso kapi sa kere sitambo saJehova sokupulisira Munwendi a hepe nokufa. Ayo kwa ya horokere tupu konyima zapa Adamu naEva va mu rwanesere. Jesus kwato eyi ga zonene, nye ga hepere kuhepa nokufa yipo a limburure ehomono lyaSatana ntani yipo a gave sizoweseso mokutengwidira po eyi va zumbanesere vantu. (Mar. 8:31; 1 Pet. 2:21-24) Eyi kwa ya sikire mo tupu apa Jehova ga hagekere kupopera Jesus pokaruwogona.

Jesus kwa here kuvatera varongwa vendi va demenene ko konda zeyi Jehova ga mu pulisilire a fe monkedi ozo. * Jesus ga yi divire asi monkedi omu nga fa ngomukorokotji nga yi pundukisa vantu wovanzi. (1 Kol. 1:23) Ngano varongwa vendi va kwete egano konda zene-zene zeyi ga fililire, awo ngano va kwete egano mulyo gonomfa dendi. (Gar. 3:13, 14) Awo ngano va vhulire ku mu tara asi Muzowoli nye kapisi mukorokotji.

Yi kare asi konda musinke zeyi ga temwininine Jesus nonkango odo, age ga yi dimbwilire asi eyi yina kumuhorokera kwa kere mpango zaJehova. Konyima tupu zokutemwinina episarome, Jesus kwa tente asi: “Yina siki mo!” (Joh. 19:30; Ruk. 22:37) Apa Jehova ga hagekere kupopera Jesus pokaruwogona tupu, ayo kwa pulisilire Jesus a sikise mo nayinye eyi va mu tumine aya rugane pevhu. Ayo hena kwa mu pulisilire a sikise mo nayinye eyi va tjanga kumuhamena “moVeta zaMosesa nomomatjangwa govaporofete nomoMapisarome.”—Ruk. 24:44.