Apa na ya kere mudinkantu, tani ya tameke kuzumbanesa elikwatakano lyange naJehova nakauke-nakauke. Vanasure vakwetu kwa kere noumanguruki wokurugana nkenye eyi vana hara, ano eyi kwa ninkisire nge name ni hare kukara noumanguruki owo. Noveta dovakondi vange nonompango doSikriste ntani kukarera Jehova, kwa karerere nge udigu unene. Nampili ngomu na yi pulire asi Jehova yipo ga kara, nye kapi na ya kere hena pepi nage.

Nye nampili ngoso, kapi na hagekere kuzuvhisa, nye kapi ngani lihameke mo unene. Ame kapi ngani liwapaikire eyi nani ka uyunga mokuzuvhisa makura nga yi digopere nge kutameka nzogera. Ngoyitundwamo, kapi na kere nomatengwiroko ndi varongwa woBibeli ntani kapi ngani hafere kuzuvhisa, ano eyi kwa ninkisire nge ni dire kuhara kuzuvhisa. Ame ngani lipura asi ‘ngapi omu muntu na twikira kuzuvhisa nkenye sivike ndi kwedi?’

Apa na ya kere nonomvhura 17, na here kukara noumanguruki, yipo na rongerere yipako yange nidirukire koAustralia. Vakondi vange kwa guvire unene apa na dirukire. Awo kwa kere nosinka,  nye kwa gazarere asi nani ka twikira kukarera Jehova.

Apa na ka kere moAustralia, tani ka tengura unene monyima pampepo nokutamekere kufaura komapongo. Ame kwa tulisire po ukaume nava ngava zi komapongo nye konyima tava zi koyimbaha va ka nwe nokudana. Apa ani gazara omu ngani paruka, na ya yi dimburura asi ame kwa hamenene kuvali, mouzuni ntani nomousili, nye ame ngani lizuvhu asi kwato oku na hamenene.

Konyima zonomvhura mbali, na ya ligwene namunazinyetukadi ogu ga vaterere nge ga hana kuyidivira yipo ni gazadare kokuhamena eparu lyange. Ame kwa tungire kumwe novanavazinyetukadi wovadike vatano. Ose kwa zigidire mutareli gonombunga kumwe namukadendi Tamara, va ya kare membo lyetu sivike simwe. Apa mutareli gonombunga ga kere noyirugana yomombungakriste, mukadendi Tamara kwa kere nose nokuzoragana nose. Ame kwa yi haferere. Age kwa kere muntu gokukwata egano yininke ntani ureru kumumangurukira. Ayo kwa tetukisire nge mokumona asi age kwa kere muntu gopampepo nye simpe nga hafere kuzoragana novakwawo.

Tamara kwa kere muntu goupampi. Age kwa here usili ntani nokuzuvhisa ano nkareso zendi kwa kundamene nge. Age nga hafere kuruganena Jehova paapa ga hulira nye ame kapi na kere noruhafo morwa kapi ngani litura mo. Nkareso zendi zongwa ntani noruhafo rwendi kwa kundamene unene eparu lyange. Sihonena sendi kwa ninkisire nge ni gazare etjangwa eli lyomulyo asi Jehova kwa hara asi navenye va mu karere “nehafo” ntani “nononsumo dehafo!”—Epis. 100:2.

Ame kwa here kukara noruhafo oru ga kere naro Tamara. Nye mokurugwana, na hepere kutura po marunduruko gomanene. Ayo kwa gusire siruwo, nye na tamekere kutura po marunduruko kanunu-kanunu. Na ya tamekere kuliwapaikira mokuzuvhisa ntani poyiruwo yimwe ngani rugana uzuvhisi wokuvatera. Eyi kwa vaterere nge ni dire kukara nowoma wounene, nye yipo ni kare nouradi. Ame na ya tamekere kuhafera kuzuvhisa morwa  ngani ruganesa unene nkenye apa Bibeli mokuzuvhisa. Mwaza siruwo, ngani rugana uzuvhisi wokuvatera nkenye kwedi.

Ame kwa ya tamekere kuhorowora vakaume womapupi nagenye ava ngava litura mo nokuhafera kukarera Jehova. Yihonena yawo yoyiwa nga yi vatere nge ni gazaradare ko omu ani ruganesa eparu lyange ntani ya vaterere nge ni rese Bibeli zange nkenye ezuva. Ame kwa ya tamekere kuhafera kuzuvhisa, ano mwaza siruwo tani ya kara muzuvhisi gokukarerera. Na ya lizuvhire asi yininke kwa kugenda nawa ntani na ya kere noruhafo mombungakriste.

Konyima zomvhura zimwe, tani ligwana naAlex. Age kwa kere muntu gombili ogu ga here Jehova ntani nokuzuvhisa. Age kwa kere mukwafimbunga ntani kwa rugene uzuvhisi wokukarerera nomvhura ntazimwe. Alex kwa ka vaterere hena nomvhura dongandi moMalawi oku kwa kere hepero zovazuvhisi. Apa ga ka kere ko, age nga kara kumwe novatumwa ava va mu tulilire po sihonena sosiwa. Awo ngava mu korangeda a twikire kutura Uhompa muhowo.

Mo-2003, name naAlex tatu likwara. Kutunda opo, ose kwa twikira kurugana sirugana sosiruwo nasinye. Ose twa lironga yininke yoyinzi ntani Jehova kwa tu tungika unene.

Mo-2009 kwa tu pulire tu ka kare vatumwa mosirongo saTimor-Leste, simwe soyirudi yomoIndonesia. Ayo kwa tu tetukisire nokutuhafesa nye hena twa kere nowoma. Konyima zomakwedi gatano, tatu ka sika moDili sitata sosinene soposirudi sina.

Apa twa dirukire, twa hepere kutura po marunduruko gomanene momparukiso zetu. Twa hepere kuyika mpo neraka nonondya ntani nomparukiso za mo. Mokuzuvhisa, ngatu mono vantu woruhepo nava va dira kuza kosure ntani nava ngava hepeke. Ose hena ngatu mono ava va  remana nava va kara noudigu wopomalizuwo morwa yita ntani nonyanya ezi va ligwanekera nazo. *

Sirugana sokuzuvhisa nga si gendi po nawa. Pasihonena, sikando simwe ame kwa gwene Maria, * mukadona gonomvhura 13. Age kwa guvire morwa ozina kwa dogorokere nomvhura dongandi da ka pita ntani kapi ngava mona mona nkenye apa. Maria kapi ga divire eyi na rugana meparu ngwendi sinzi sovanona. Tani diworoka sikando simwe age kwa lilire apa ga tanterere nge omu ga lizuvhire. Nye kapi na kwete egano eyi ga uyungire morwa kapi simpe na divire nawa eraka lyawo. Ame kwa kanderere kwaJehova yipo a vatere nge ni mu korangede, makura tani mu resere matjangwa gokukorangeda. Mwaza nomvhura, na limonena omu usili wa rundurura nkareso zaMaria nondwareso zendi ntani neparu lyendi. Age ga ya gwene ekuho, ano ngesi ga kara novarongwa vendi woBibeli. Ngesi Maria kwa hamena kepata lyenene lyoNombangi ntani kulizuvha asi koveli ava va mu hara.

Jehova kuna kutungika sirugana sokuzuvhisa moTimor-Leste. Nampili ngomu sinzi sovazuvhisi va va kuhwa monomvhura murongo da ka pita, nye sinzi sawo vazuvhisi wokukarerera novakwafimbunga ntani vakuronambunga. Vamwe kurugana komberewa zetoroko ntani nokuvatera kutoroka yimbapiratjangwa momaraka gomomukunda gwawo. Ayo kuhafesa nge apa ani va zuvhu kuna kudimba momapongo nokuvamona vana hafa ntani nomu vana kukura pampepo.

Eparu lyomoTimor-Leste kwa lisigire unene nomu ngatu paruka moAustralia, nye ame na haferere eparu eli. Poyiruwo yimwe ngatu lipaterekeda mombesa omu nga mu kara nomfi dokukukuta noyikwahidi yopositanda. Mazuva gamwe, ose ngatu rugana elirongo lyoBibeli monzugo zoupyu unene omu mwa kere evhu ntani noyinhunhwa eyi ngayi dukagana-dukagana. Nye nampili ngoso, ame ngani hafere eparu lyamo.

Apa ani diworoka yanare, ame kupandura kweyi vakondi vange va rugene paapa va hulira va ronge nge nonzira daJehova nokukwatesa nge ko nampili ngomu na dilire kulitura mo mokukarera Jehova apa na kere mudinkantu. Ame na limonena usili wononkango domoYisewe 22:6. Onane notate kuvahafesa apa ava mono nge naAlex kuna kutwikira kukarera Jehova. Kutundilira mo-2016, ose kwa kara mosirugana sokudingura nombungakriste domoAustralasia.

Ame kapi ani yi pura asi nare kapi ngani hafere sirugana sokuzuvhisa. Ame ngesi kwa hara kuzuvhisa. Ngesi na ya yi dimburura asi nampili o ligwanekere nomaudigu meparu, ruhafo rousili kurugwana tupu mokukarera Karunga nomutjima nagunye. Yosili, nomvhura nadinye 18 edi twa karera Jehova naAlex kwa retera nge ruhafo rorunene. Ame ngesi nina kwata egano usili wononkango edi ga tanterere Ndafita Jehova asi: “Navenye ava ava papara uvando moge, ngava hafa; awo ngava zigira nkenye apa noruhafo. . . . Ntani ava va hara edina lyoge, ngava hafa mwaroge.”—Epis. 5:11, NW.