1-2. Sifanekeso musinke nasi tu vatera tu kwate egano nonkango edi da kara mwa-1 Peturusa 2:21?

GAZARA asi ove kuna kugenda novakweni momburundu mevango lyosiponga. Ano mukweni gumwe kuna kumupitisira namuvenye komeho morwa ga diva kugenda momburundu. Ngomu ana kugenda, nompadi dendi kuna kulivarara pevhu. Ano konyima to ya dimburura asi ogu ana kumupitisira kapi ono kumumona hena. Nye eyi kapi yina kukutjilisa morwa nove novakweni kuna kukwama monompadi dendi!

² NgoVakriste wousili ose kuna kuparuka mouzuni woudona. Ano eyi kwa fana ngwendi kuna kugenda momburundu zosiponga. Nye nampili ngoso, ose kupandura Jehova kweyi ga tu pa Munwendi Jesus Kristusa yipo tu mu honene. (1 Pet. 2:21) Bibeli zimwe kwa tanta asi, apa Peturusa ga uyungire nonkango odo age kwa hetakanesere Jesus komupitisili. Ngwendi muntu ogu vana tumbura mosifanekeso ana kupitisira vakwawo, Jesus nage kwa tu sigira sihonena esi natu kwama. Tu zeni tuka zogere mapuro aga gatatu: Yisinke ayi tanta kukwama sihonena saJesus? Morwasinke natu yi ruganena? Ntani ngapi natu yi rugana?

3. Yisinke a yi tanta kukwama nompadi da gumwe?

³ Yisinke a yi tanta kukwama nompadi da gumwe? MoBibeli nkango kugenda ntani nompadi pamwe kutamba keparu lyomuntu. (Yis 3:23; Epis. 119:59) Kukwama nompadi da gumwe kutanta asi kukwama sihonena sendi.

4. Yisinke ayi tanta kukwama sihonena saJesus?

⁴ Apa atu honene Jesus, ayo kwa fana ngwendi kuna kukwama  monompadi dendi. Sihonena musinke ga tu sigira Jesus esi natu kwama? Metjangwa lyetu omu sina demenene siparatjangwa, mupositoli Peturusa kwa uyungire kuhamena sihonena sosiwa esi ga tulisire po Jesus mokulididimikira maudigu. Nye nampili ngoso, pwa kara hena nonkedi dononzi omu natu honena Jesus. (1 Pet. 2:18-25) Yosili, nayinye eyi nga rugana Jesus neyi nga uyunga meparu lyendi, kuna kara sihonena sosiwa kwetu esi natu kwama.

5. Kuvhura vantu wokudira kusikilira mo yi va tompoke kukwama sihonena saJesus ndi? Faturura.

⁵ Ngovantu wokudira kusikilira mo, kuvhura sili yi tu tompoke kukwama sihonena saJesus ndi? Nhi, kuvhura. Peturusa kwa tente asi twa hepa kurugana moomu nga rugana [Jesus] kutanta asi kukwama “sihonena” sendi nye kapi ga tente asi twa hepa kumukwama nawa-nawa. Nsene tu kwama sihonena saJesus nokurugana paapa twa hulira ngovantu wokudira kusikilira mo, ose ngatu tura pasirugana nonkango edi ga uyungire mupositoli Johanesa asi: ‘Kareni moomu ga kere Jesus Kristusa.’—1 Joh. 2:6.

6-7. Morwasinke twa kuuyungira asi nsene tu kwama sihonena saJesus, ngayi tu hedesera unene pepi naJehova?

⁶ Kukwama sihonena saJesus ngayi tu hedesera unene pepi naJehova. Morwasinke tuna kuuyungira ngoso? Sokuhova, Jesus kwa tulisire po sihonena sosiwa pokuparuka monkedi ezi azi hafesa Karunga. (Joh. 8:29) Nsene tu honena Jesus, ose ngatu hafesa Jehova. Ntani twa yi diva asi Guhyetu gemeguru nga hedera pepi nava ava kondjo mokutulisa po ukaume nendi.—Jak. 4:8.

⁷ Sauvali, Jesus kwa honene oGuhwe nawa-nawa. Eyi yiyo nye Jesus ga uyungilire asi: “Ogu ga mona nge, ga mona hena Tate.” (Joh. 14:9) Ose kuvhura kuhonena yikara yaJesus ntani monkedi omu nga tekura wopeke. Pasihonena,  age kwa likidire nkenda komunayingondwe nokomukadi ogu ga verere uvera wounene ntani age nga likida nkenda kwava va fisire vahali vawo. Apa atu honene Jesus, ose ngoso kuna kuhonena hena Jehova. (Mar. 1:40, 41; 5:25-34; Joh. 11:33-35) Moomu tuna kuhonena yikara yaJehova yoyiwa, yimo hena ngatu nkondopeka ukaume wetu nendi.

8. Faturura omu sihonena saJesus asi tu vatere tu ‘funde’ uzuni.

⁸ Kukwama sihonena saJesus kutuvatera mokudira kutupukisa yininke yomouzuni ou. Masiku gokuhulilira komeho Jesus a fe, age kwa uyungire asi: “Ame na funda uzuni.” (Joh. 16:33) Pokuuyunga nonkango edi, Jesus kwa tembe asi age kapi ga pulisilire yininke yomouzuni neyi ngava rugana vantu yi mu donganese. Mokumona asi Jesus kwa wizire pevhu mokuyayererepeka edina lyoGuhwe, age kwa demenene kositambo oso nokudira kupulisira nkenye eyi yi mu donganese. Ano ngapi kuhamena ose naina? Mouzuni ou kwa kara mo yininke yoyinzi eyi nayi tu donganesa yipo tu hageke kukarera Jehova. Nye nsene tu honena Jesus pokudemenena kurugana mpango zaKarunga, ose ngatu “funda” uzuni.—1 Joh. 5:5.

9. Yisinke natu rugana nsene tuna hara ku ka gwana mwenyo gwanarunye?

⁹ Kukwama sihonena saJesus kutwaredesa komwenyo gwanarunye. Apa mugara gongawo ga pulire eyi na rugana yipo nga ka gwane mwenyo gwanarunye, Jesus kwa mu limbwilire asi: “Wiza, o ya kwame nge.” (Mat. 19:16-21) Ano koVajuda vamwe ava va dilire kuyipura asi Jesus kuna kara Kristusa, age kwa va tanterere asi: “Nonzwi dange . . . kukwama nge. Ame tani di pe mwenyo gwanarunye.” (Joh. 10:24-29) Nikodemusa ogu ga kere gumwe gomasimbi gosigongi kwa here kudiva ko yoyinzi kuhamena erongo lyaJesus, nye Jesus kwa tente asi, ava ava “mu pura” ngava gwana “mwenyo gwanarunye.” (Joh. 3:16) Apa atu paruka kuliza neyi nga rongo Jesus kupitira mononkango nomosihonena sendi, ayo kulikida asi ose twa kara nepuro mwendi. Nsene tu yi rugana, ose ngatu ka gwana mwenyo gwanarunye.—Mat. 7:14.

10. Yisinke natu rugana yipo tu “dive” nawa Jesus? (Joh. 17:3)

¹⁰ Mokuninka asi tu honene Jesus, twa hepa kumudiva. (Resa Johanesa 17:3.) ‘Kudiva’ Jesus kuna kara sininke esi twa hepa kurugana nkenye apa. Twa hepa kutwikira kulironga kumuhamena yipo tu dive yikara yendi nomu nga gazara ntani neyi ga here kurugana. Yi kare asi nomvhura dokusika kupi twa kara mousili, twa hepa kutwikira kulironga kudiva Jehova naMunwendi.

11. Yisinke va simwitira mo mobuke zaMateusa, Marukusa, Rukasa ntani Johanesa?

¹¹ Jehova kwa tura Mavangeli ga ne moBibeli aga ga simwitira kuhamena eparu nosirugana saJesus, yipo ga tu vatere tu dive Munwendi. Mavangeli ogo kututantera eyi nga uyunga  Jesus neyi nga rugana ntani nomu nga lizuvhu. Mavangeli aga kutuvatera tu honene Jesus. (Heb. 12:3) MoMavangeli ogo kwa kara mo sihonena saJesus esi ga tu sigira. Nsene tu ga lironga, ose ngatu diva nawa Jesus. Ano ngoyitundwamo, ose ngatu mu honena.

12. Yisinke natu rugana yipo tu gwanene mo mauwa moMavangeli?

¹² Mokuninka asi tu gwanene mo uwa moMavangeli, twa hepa kurugana yoyinzi kupitakana tupu kugaresa. Twa hepa kulitulira po siruwo soku ga lironga nawa noku teda ko. (Hetakanesa Josuwa 1:8.) Tu zeni tu ka zogere ko yitwa yivali eyi nayi tu vatera tu tede ko koMavangeli nokutura pasirugana eyi atu resa mo.

13. Ngapi omu nomona sihorokwa saJesus momagano goge?

¹³ Sokuhova, mona sihorokwa semEvangeli eli ono kuresa momagano goge. Ngomu ono kugazadara sihorokwa oso, mona nokuzuvha sihorokwa momagano goge. Kurugana mapaparo moyimbapiratjangwa eyi za tu pa mbunga zaJehova, nga yi kuvatera o gazadare ko. Kona-kona nawa sihorokwa esi ono kuresa, eyi kutanta asi wa hepa kudiva eyi ya horokere komeho zosihorokwa esi ono kuresa ntani neyi ya horokere konyima zaso. Papara mauzera gomanzi kuhamena vantu womosihorokwa oso ntani nomavango aga vana kuzogera mo. Hetakanesa sihorokwa esi ono kulironga kuliza nomu va si simwitira Mevangeli lyapeke. Poyiruwo yimwe, mutjangi gEvangeli limwe kuvhura kutjanga mauzera gokutetukisa aga va dira kutumbura moMavangeli gapeke.

14-15. Yisinke natu rugana yipo tu ture pasirugana yihorokwa eyi atu resa moMavangeli?

¹⁴ Sauvali, tura pasirugana yihorokwa eyi atu resa moMavangeli. (Joh. 13:17) Ngapi no yi rugana? Konyima zokulironga sihorokwa semEvangeli, lipura nyamoge asi: ‘Yisinke nina lirongere mo mosihorokwa esi eyi nani tura pasirugana meparu lyange? Ngapi nani ruganesa sihorokwa esi mokuvatera gumwe?’ Hetekera ko kugazara gumwe ogu wa diva, makura horowora siruwo sokuwapera esi nomutantera sihorokwa oso ntani yirugana monkedi zongwa  pokumutantera eyi kolirongerere ko kosihorokwa oso.

¹⁵ Tu konakoneni sihonena esi nasi tu vatera omu natu tura pasirugana yitwa oyo yivali. Tatu ka konakona sihorokwa somufisa yendi ogu Jesus ga nomenene montembeli.

16. Faturura sihorokwa esi sa kara mwaMarukusa 12:41.

¹⁶ Mona sihorokwa momagano goge. (Resa Marukusa 12:41.) Gazadara ko eyi ya horokere. Azo kwa kere Nisani 11 momvhura 33 mazuva tupu gongandi ga hupire ko yipo Jesus va mu dipage. Jesus kwa ruganesere siruwo sendi sosinzi mokuronga vantu montembeli. Ano vampitisili womaukareli karunga kwa twikilire kumurwanesa. Vamwe kwa mu pulire asi nononkondo musinke a rugana yirugana yendi. Ano vamwe kwa mu pulire mapuro goudigu nokugazara asi kapi na vhura kugalimburura. (Mar. 11:27-33; 12:13-34) Apa ngesi Jesus kuna kara kevango nalyo peke lyomontembeli. Age kuna kara mevango eli ava tumbura asi evango lyovakadi ntani age kuna kumona yikesa yoyimaliva. Age kuna hingire a tare vantu omu vana kutura mo yimaliva. Ano age kuna kumona omu nongawo dononzi dina kutura mo yimaliva yoyinzi. Nampo age kuna kuzuvha hena ezogerero lyoyimaliwa yomuwaya waya ngomu vana ku yi tura moyikesa.

17. Yisinke ga rugene mufisayendi ogu va tumbura mwaMarukusa 12:42?

¹⁷ Resa Marukusa 12:42. Konyima zosiruwo, Jesus ta mono mukadi gumwe. Age kwa kere “mufisayendi gomuhepwe.” (Ruk. 21:2) Eparu lyendi kwa kere lyoudigu ntani kapi ga kere noyimaliwa yokugwanena po yipo a rande yo ku lireresa mwene. Nye nampili ngoso, age kwa tulire tumaliva gona twendi tuvali mwa simwe soyikesa, ano muhagaro gwayo nampo nokuguzuvhasi nawa ngomu ga yi tulire mo. Jesus ga divire asi yimaliwa yokuhura kupi ga tulire mo mufisayendi. Age kwa tulire mo tumalivagona tuvali. Tu senda otu twa kere nomulyo gomusesu mosiruwo sina. Ayo hena kapi ya gwanekere mokuranda mpili enzunge limwe lyeeli, yidira eyi ya kere nombiliha po zonene konondya.

18. Kuliza naMarukusa 12:43, 44, yisinke ga uyungire Jesus kuhamena yigava yomufisayendi?

¹⁸ Resa Marukusa 12:43, 44. Eyi ga rugene mufisayendi kwa hafesere Jesus. Age kwa zigidire varongwa vendi nokuvatantera asi: “Mufisayendi ogu gomuhepwe yige ana gava po yoyinzi, kupita navenye.” Makura ta faturura asi: “Navenye ava vana gava [unene po nongawo] kuna yi gusa popanene, nye age kuna yi gusa pouhepwe wendi, a yi gave moomu ga yi wekera, eyi nkare yi mu parure moukaro wendi.” Apa mufisayendi ogo gomulimburukwi ga geve tumaliva twendi natunye otu twa hupire po, age kwa huguvarere mwaJehova asi ngamu pakera mbili.—Epis. 26:3.

19. Sirongwa musinke somulyo natu lirongera ko kononkango edi ga uyungire Jesus kuhamena mufisayendi?

¹⁹ Tura pasirugana eyi ono lirongere ko kosihorokwa esi. Lipura nyamoge asi, ‘Sirongwa musinke nina lirongera ko kononkango edi ga uyungire Jesus kuhamena mufisayendi?’ Gazadara ko kuhamena mufisayendi ogo. Age kwa here kugava yoyinzi kwaJehova. Nye nampili ngoso, age kwa rugene paapa ga hulira mokugava kwaJehova eyi ga vhulire ko. Ntani Jesus ga yi divire asi eyi ga geve kwa kere nomulyo unene kosipara soGuhwe. Sirongwa somulyo kwetu kuna kara asi: Jehova kuhafa apa atu mu ruganene paapa twa hulira kutundilira komutjima. (Mat. 22:37; Koros. 3:23) Jehova kuhafa apa atu mono kuna kukondja paapa twa hulira mokumukarera. Eyi kwa kwatera mo siruwo nononkondo edi atu gava mokuzuvhisa ntani komapongo yipo tu mu karere.

20. Ngapi no tura pasirugana sihorokwa somufisayendi? Gava sihonena.

²⁰ Ngapi no tura pasirugana sihorokwa somufisayendi?  Gazara ko vantu ava ono diva asi kuvhura va ka gwanene mo uwa nsene no ka va tantera asi Jehova kuhafera nayinye eyi vana kumuruganena nomutjima nagunye. Pasihonena, wa diva ko munazinyetukadi gomukurupe ogu ga dira kukara noukanguki wouwa ntani kulizuvha udona morwa kapi ana kara nononkondo dokuruganena Jehova unene ngwendi nare ndi? Ndi nampo wa diva ko munazinyetugara ogu ga kara nouvera wokutwikida, ou au mu koresa nokumuguvisa morwa kapi ayi mu tompoka kuwiza komapongo nagenye? Vatera vantu vangoso pokuyunga nawo nonkango “donongwa dokuwapeka.” (Efe. 4:29) Va tantera ko sirongwa sekorangedo esi tuna lirongere ko kosihorokwa somufisayendi gomuhepwe. Nonkango doge dekorangedo kuvhura ku va vatera va dimburure asi Jehova kumuhafesa apa atu mu ruganene nomutjima nagunye yi kare asi yokuhura kupi. (Yis. 15:23; 1 Tes. 5:11) Nsene o pandadeka wopeke kweyi vana kukondja mokuruganena Jehova yi kare asi yokuhura kupi, ove ngoso kuna kuhonena Jesus.

21. Yisinke ono tokomene kurugana?

²¹ Yosili, yihorokwa yomoMavangeli kwa karamo mauzera gomanzi gokuhamena eparu lyaJesus ano ayo kutuvatera tu mu honene! Kuvhura mu lironge hena yirongwa eyi ya kara moMavangeli moukareli weni wepata ndi melirongo lyanyamoge lyoBibeli. Tu diworokeni asi mokuninka asi tu gwanene mo uwa melirongo olyo, twa hepa kumona sihorokwa momagano getu ntani nokutura pasirugana eyi tuna lirongere ko. Mokuhonena Jesus, twa hepa kurugana eyi nga rugana nye twa hepa hena kupurakena kweyi nga uyunga. Mosirongwa sokukwama ko ngatu kazogera eyi natu lirongera ko kononkango edi ga uyungire Jesus komeho a fe.