1-2. Yisinke sizoweseso ntani morwasinke twa si hepera?

APA ADAMU ga zonene, age kwa zumbanesere mpito zokuparuka narunye kukwatera mo vana vendi. Adamu kapi ga kere nokonda zokuligusa-gusamo morwa mwene ga tokwere kurugana nzo. Vana vendi kapi va rugene udona ntani kapisi yiwo va ninkisire Adamu a zone. (Rom. 5:12, 14) Nye yisinke ga rugene ko Jehova yipo vana vaAdamu ngava ka paruke narunye? Konyima tupu zapa Adamu ga zonene, Jehova kwa tulire po mawapaiko yipo a zowore ruvharo rwaAdamu kononzo nokonomfa. (Gen. 3:15) Jehova kwa tumine Munwendi posiruwo esi ga tura po mwene yipo a tunde meguru “a ya gave mwenyo gwendi, gu kare sizoweseso sovanzi.”—Mar. 10:45; Joh. 6:51.

² Yisinke sizoweseso? Kuliza noMatjangwa goRugereka goSikriste, sizoweseso kuna kara mfuto ezi ga futire Jesus kweyi ga zumbanesere Adamu. (1 Kol. 15:22) Morwasinke twa hepera sizoweseso? Morwa veta ezi ga tulire po Jehova kwa likidire asi momwenyo mwa hepere kupita mwenyo. (Ex. 21:23, 24) Adamu ga zumbanesere eparu lyendi lyokusikilira mo. Yipo nye, Jesus kwa geve eparu lyendi lyokusikilira mo. (Rom. 5:17) Monkedi zangesi, Jesus kwa ya kara “Guhya Gwanarunye” kwanavenye ava ava tura epuro mwendi.—Jes. 9:6; Rom. 3:23, 24.

3. Kuliza naJohanesa 14:31 ntani 15:13, morwasinke Jesus ga karerere neharo lyokugava mwenyo gwendi?

³ Jesus ga kere neharo lyokugava mwenyo gwendi morwa ga here unene oGuhwe vemeguru ntani nose. (Resa  Johanesa 14:31; 15:13.) Eharo kwa mu tumangedere a kare noulimburukwi meparu lyendi nalinye ntani nokusikisa mo mpango zoGuhwe. Eyi ga rugene ngayi ninkisa sitambo saJehova kovantu nekevhu si ka sike mo. Mosirongwa esi tatu ka lironga nokonda deyi Karunga ga pulisilire Jesus a hepe unene komeho a ka fe. Ntani tatu ka zogera nakauke sihonena somupositoli Johanesa ogu ga here unene sizoweseso. Ano konyima, tatu ka zogera omu natu likida rupandu kosizoweseso ntani nomu natu twikira kukara norupandu kweyi ga tu ruganena Jehova naJesus.

4. Faturura eyi ga pitire Jesus komeho a ka fe.

⁴ Gazaradara ko kweyi ya horokerere Jesus mezuva lyendi lyokuhulilira pevhu komeho va ka mu dipage. Nampili ngomu ga kere nononkondo dokuzigida vaengeli va ya mu popere, nye kapi ga yi rugene, age kwa pulisilire vakwayita woVaroma va mu kwate nokumutoona. (Mat. 26:52-54; Joh. 18:3; 19:1) Awo kwa mu sopwere ngora ezi za mu remekere unene. Konyima, awo kwa mu ninkire a koke sitji, age opo ana remana. Jesus kwa simbire sitji oso a si tware kevango oku va ka mu dipagerere, nye konyima vakwayita woVaroma yipo va pulire ko gumwe a mu vatere. (Mat. 27:32) Apa Jesus ga ka sikire pevango eli va mu dipagerere, vakwayita kwa mu pamparere nombohwa komawoko nokonompadi. Mukumo gorutu rwaJesus kwa ninkisire mawoko nonompadi dendi yi kore unene. Vakaume vendi nozina kwa lilire nye vapangeli woVajuda kwa swawire Jesus. (Ruk. 23:32-38; Joh. 19:25) Jesus kwa mu hepekere unene ure wonovili dongandi. Komeho tupu a fe, age kwa kanderere kwaJehova sikando sokuhulilira. Makura ta nyongeke mutwe gwendi, ta fu. (Mar. 15:37; Ruk. 23:46; Joh. 10:17, 18; 19:30) Yosili, age kwa fire monkedi zondona zokukoresa.

5. Sinka musinke sosinene ga kere naso Jesus kupitakana monkedi omu va mu dipagere?

⁵ Jesus kapi ga kere nosinka unene monkedi omu va mu dipagere. Age kwa kere nosinka unene morwa konda zeyi va mu dipagerere. Age kwa mu rundilire asi kuswaura Karunga. (Mat. 26:64-66) Ayo kwa guvisire Jesus unene, makura yipo ga here asi ngano oGuhwe va dire kumupulisira a pite moukaro owo. (Mat. 26:38, 39, 42) Morwasinke Jehova ga pulisilire Munwendi a hepe nokumudipaga? Tu zeni tu ka zogere ko nokonda ntatu.

6. Morwasinke Jesus va mu pamparerere kositji?

⁶ Konda zokuhova kuna kara asi Jesus va hepere kumudipaga yipo a zowore Vajuda kefingiliro. (Gar. 3:10, 13) Awo kwa kere mefingiliro morwa kwa tumbwidilire pomuhowo asi ngava limburukwa veta zaKarunga nye kapi va yi sikisire mo. Ngoyitundwamo, awo va hepere kufa morwa nawo kwa kere vana vaAdamu nye simpe kwa kere mefingiliro. (Rom. 5:12) Veta zaKarunga ezi ga geve koVaisraeli kwa tente asi muntu ogu ana tura nzo zokumudipagesa, va hepere kumudipaga. Konyima zoyo, simpu sendi va hepere kusikulika kositji. * (Deut. 21:22, 23; 27:26) Yipo nye, apa Jesus va mu pamparere kositji, age kwa geve mpito komuhoko goVajuda gu gwanene mo uwa monzambo zendi nampili ngomu va mu nyokere.

7. Konda musinke zauvali zeyi Karunga ga pulisilire Munwendi a hepe?

⁷ Tu tareni konda zauvali zeyi Karunga ga pulisilire Munwendi a hepe. Age kwa dewire Jesus a liwapaikire situmbukira esi sa mu ndindilire komeho sokuyakara Mupristeli goMunene.  Jesus ga yi dimbwilire asi ayo kapisi ureru kulimburukwa Karunga momaheteko gomanene. Age kwa mu hepekere unene makura yipo ga hundilire evatero pokukanderera “nonkugo zonene nomahodi.” Mokumona asi Jesus kwa guvire unene, age kukwata egano eyi tuna hepa ntani ‘kuvhura kutukwafa’ apa atu “kara momaheteko.” Tatu pandura Jehova kweyi ga tu pa Mupristeli goMunene gonkenda ogu a ‘pakere mbili maupirankondo getu.’—Heb. 2:17, 18; 4:14-16; 5:7-10.

8. Konda musinke zautatu zeyi Jehova ga pulisilire Jesus va mu hepeke unene?

⁸ Konda zautatu kuna kara asi Jehova kwa pulisilire Jesus a hepe unene yipo a limburure epuro eli lyomulyo asi: “Vantu kuvhura va twikire kulimburukwa Jehova nsene kuna kuvaheteka unene ndi? Satana kuuyunga asi hawe. Age kutanta asi vantu kukarera tupu Jehova morwa yipo ava pe yuma. Ntani ga yi pura asi awo kapi va hara Jehova ngwendi moomu tupu ga yi rugene Adamu. (Joba 1:9-11; 2:4, 5) Jehova kwa pulisilire Munwendi Jesus va mu heteke unene morwa ga yi divire asi Munwendi nga twikira kumulimburukwa. Jesus kwa twikilire kulimburukwa oGuhwe nokulikida Satana asi munayimpempa.

9. Sihonena musinke ga tu tulira po Johanesa?

⁹ Sizoweseso kwa vatera Vakriste wovanzi va nkondopeke epuro lyawo. Awo kutwikira kuzuvhisa nampili ngomu ava va rwanesa ntani awo kwa lididimikira maudigu meparu lyawo nalinye. Tu tareni sihonena somupositoli Johanesa. Age kwa zuvhisire kuhamena Kristusa nosizoweseso ure wonomvhura dokupitakana 60. Apa ga kere koyiha yonomvhura 100, epangero lyoVaroma kwa mu tere asi age muntu gosiponga, makura yipo va mu kwete nokumutura modorongo posirudi saPatimosa. Awo kwa mu tulire modorongo “morwakuudisa nonkango daKarunga nokugava undipo wokuhamena Jesus.” (Ehor. 1:9) Johanesa kwa kere nepuro nelididimiko, nose kuvhura tu lirongere ko kosihonena sendi.

10. Ngapi omu nobuke edi ga tjenge Johanesa adi likida asi ga kere norupandu kosizoweseso?

¹⁰ Monobuke edi ga tjenge Johanesa, age kwa tjenge mo kuhamena omu ga here Jesus ntani nomu ga kere norupandu kosizoweseso. Age kwa uyungire yikando yokupitakana 100 kuhamena sizoweseso ntani mauwa aga ngasi ka sikisa mo. Pasihonena, Johanesa kwa tjenge asi: “Nye nsene pana zono gumwe, ose twa kara nomupopeli pwaGuhyetu, age yige Jesus Kristusa, Muhungami.” (1 Joh. 2:1, 2) Monobuke edi ga tjenge Johanesa kwa uyunga mo hena mulyo gokugavera ‘undipo kuhamena Jesus.’ (Ehor. 19:10) Yosili, Johanesa ga kere norupandu kosizoweseso. Ngapi natu yi likida nose asi twa kara norupandu kosizoweseso?

11. Yisinke nayi tu vatera tu nyokere po maheteko?

¹¹ Nyokera po maheteko aga naga kuninkisa o ture nzo. Nsene twa kara norupandu kosizoweseso, ose kapi ngatu uyunga asi: ‘Kapisi hepero ni kondje yipo ni nyokere po kutura nzo nsene kuna kuheteka nge. Kuvhura ni rugane yoyidona, ano konyima ntani ngani hundira egusiropo.’ Nsene kuna kutuheteka, twa hepa kunyokera po kurugana udona noku uyunga asi ‘kwanainye eyi ga ruganena nge Jehova naJesus, ame nokurugana si udona.’ Ose kuvhura tu pure Jehova a tu pe ko nonkondo nokumulikwambera asi: “Walye o tu twara momaheteko.”—Mat. 6:13.

12. Ngapi natu tura pasirugana epukururo lya kara mwa-1 Johanesa 3:16-18?

 ¹² Hara vanavazinyetu. Apa atu likida eharo kovanavazinyetu, ose ngoso kuna kulikida asi twa kara norupandu kosizoweseso. Morwasinke tuna kuuyungira ngoso? Morwa Jesus kwa tu fira natuvenye kukwatera mo vanavazinyetu. Nsene asi kwa va fira, eyi kulikida asi age kuvatara asi mulyo. (Resa 1 Johanesa 3:16-18.) Ose kulikida vanavazinyetu eharo monkedi omu atu va tekura. (Efe. 4:29, 31–5:2) Pasihonena, ose kuvavatera nsene kuna kuvera ndi kuna kulididimikira maudigu kukwatera mo yimpagwa. Nye yisinke natu rugana nsene mupuli mukwetu ana uyunga yuma ndi ana rugana yuma eyi yina tu koresa?

13. Morwasinke natu gulisira po vakwetu?

¹³ Ove kukudigopera kugusira po wopeke poyiruwo yimwe ndi? (Lev. 19:18) Nsene yimo, kwama epukururo eli asi: “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.” (Koros. 3:13) Apa atu gusire po vanavazinyetu, ose kuyilikida kwaJehova asi twa kara norupandu kosizoweseso. Ngapi natu twikira kukara norupandu kouhwi ou wokutunda kwaKarunga?

14. Nkedi musinke zimwe natu twikira kukara norupandu kosizoweseso?

¹⁴ Pandura Jehova morwa sizoweseso. Munazinyetukadi Joanna gonomvhura 83 ogu ga tunga moIndia kwa tanta asi: “Mulyo unene kupandura Jehova nkenye ezuva kosizoweseso.” Tantera Jehova nkenye ezuva momakanderero goge kuhamena yininke yoyidona eyi ono rugana ntani nokumupura a ku gusire po. Nye nampili ngoso, nsene kuna tura nzo zonene, wa hepa evatero lyovakuronambunga. Awo ngava ku purakena ntani nokukupa ko mapukururo gomoBibeli. Awo ngava kanderera kumwe nove nokupura Jehova a ku vatere o ‘veruke pampepo.’—Jak. 5:14-16.

15. Morwasinke natu litulilira po siruwo sokulironga kuhamena sizoweseso ntani nokuteda ko?

¹⁵ Teda ko kosizoweseso. Munazinyetukadi Rajamani gonomvhura 73 kwa tanta asi: “Ame nkenye apa kulira apa ani resa kuhamena omu Jesus va mu hepekere.” Nove kuvhura yi ku guvise nsene o gazadara ko omu va mu hepekere MunwaKarunga. Nye nsene o  teda ko kuhamena nzambo ezi ga geve Jesus, ngomu hara unene noGuhwe. Mokukuvatera o tede ko kosizoweseso, kuvhura o li tulire po siruwo yipo o lironge yoyinzi kuhamena sizoweseso.

16. Mauwa musinke ngatu gwanena mo nsene tu ronga wopeke kuhamena sizoweseso? (Tara efano lyopontunda)

¹⁶ Ronga wopeke kuhamena sizoweseso. Apa atu tantere ko wopeke kuhamena sizoweseso, ose kukara norupandu rorunene. Twa kara noyimbapiratjangwa ntani nonovidiyo edi natu ruganesa mokuronga wopeke konda zeyi Jesus ga ya tu fililire. Pasihonena, kuvhura tu ruganese sifo Mbudi zongwa zokutunda kwaKarunga! Sirongwa 4 kwa kara nosiparatjangwa asi: “Yilye Jesus Kristusa?” Ndi kuvhura tu ruganese buke Yisinke azi rongo Bibeli? Egaununo 5 kwa kara nosiparatjangwa asi: “Sizoweseso sigava somulyo sokutunda kwaKarunga.” Ano nkenye mvhura ose kutwikira kulikida rupandu kosizoweseso apa atu pongo pediworoko lyonomfa daJesus ntani pokuzigida wopeka va ya kare po. Azo mfumwa sili kweyi Jehova ga tu pa mpito zokuronga wopeke kuhamena Munwendi!

17. Morwasinke sizoweseso sa karera uhwi wounene po wokutunda kwaKarunga?

¹⁷ Yosili, ose twa kara nonokonda dononzi deyi natu karera norupandu kosizoweseso. Sizoweseso kutupa mpito tu kare nelikwatakano lyewa naJehova nampili ngomu twa dira kusikilira mo. Sizoweseso ngasi ‘haraganesa po yirugana yoMuzonaguli.’ (1 Joh. 3:8) Sitambo saKarunga kuhamena evhu ngasi ka sikamo morwa sizoweseso. Evhu nalinye ngali kara paradisa. Nkenye ogu ngo ka ligwanekera nendi nga hara Jehova nokumukarera. Yipo nye, nkenye ezuva tu papareni nonkedi omu natu likida rupandu kouhwi wounene wosizoweseso ou ga gava Karunga kovantu!