1-2. (a) Yilye ga kere Eunike, ntani udigu musinke ga ligwanekerere nawo ngomu ga rongere munendi kuhamena Jehova naJesus? (b) Kumburura ko kefano lyopontunda.

 NAMPILI ngomu Bibeli za dira kutumbura ekuho lyaTimoteusa, ose kuvhura tu gazadare ko koruhafo oru va kere naro ozina Eunike ezuva olyo. (Yis. 23:25) Gazadara ko omu ozina vaTimoteusa va lizuvhire, apa va mwene Timoteusa kuna sikama momema. Awo kuna kumenya-menya, ano ozinakuru vaTimoteusa kuna sikama pepi kumwe nawo ntani kuna va kwata. Eunike kuna kuhesera nakauke-nakauke ngomu Timoteusa vana ku mu divida momema. Ano ngomu vana kumuzaura mo momema, age kuna kumenya-menya ntani ozina kuna kulira morwa vana hafa unene. Nampili ngomu ya kere udigu kwaEunike, age kwa rongere munendi a hare Jehova naJesus Kristusa. Maudigu musinke ga ligwanekerere nago Eunike ngomu ga hetekerere ko kuronga munendi?

² Vakurona vaTimoteusa kwa kere momaukerelikarunga gokulisiga. Oguhwe kwa kere Vagereka, ano ozina nozinakuru kwa kere Vajuda. (Yirug. 16:1) Timoteusa nampo kwa kere munona apa ozina Eunike nozinakuru Roise va kere Vakriste. Nye oguhwe kapi va kere Vakriste. Ukarelikarunga musinke ngano ga hepere kuhorowora Timoteusa? Mokumona asi age mukondi ga kere, age ngano ga hepere kutura po matokoro ga mwene. Age ngano ga horowere ukarelikarunga woguhwe ndi? Age ngano ga kweme mpo zoVajuda ezi va mu rongere apa ga kere munona ndi? Ndi ngano ga horowere kukara murongwa gwaJesus Kristusa?

3. Kuliza noYisewe 1:8, 9, ngapi omu Jehova a tara yirugana eyi ava rugana vazinya yipo va vatere vana vawo va kare vakaume vendi?

³ Vazinya woVakriste nawo neina kwa hara mapata gawo. Unene  po awo vana hara kuvatera vana vawo va tulise po ukaume wounene naJehova. Ntani Karunga gwetu kutara elituromo lyawo asi mulyo unene. (Resa Yisewe 1:8, 9.) Jehova kwa vatera vazinya wovanzi varonge vana vawo yipo va mu hare ntani nokumukarera.

4. Maudigu musinke ava ligwanekere nago vazinya neina?

⁴ Poyiruwo yimwe, vazinya kuvhura va kare nosinka kovana vawo nsene asi ngava horowora kukarera Jehova ngwendi Timoteusa. Vakurona va diva makondjeso aga vana kuligwanekera nago vana vawo mouzuni ou waSatana. (1 Pet. 5:8) Mokugwederera ko, sinzi sovazinya ku va karera udigu kurera vana vawo pwa hana vagara vawo ndi ku va karera udigu kurera vana vawo nomugara ogu a dili kukarera Jehova. Pasihonena, munazinyetu gomukadi Christine * kwa uyunga asi: “Mugara gwange kwa kere nturagumbo gomuwa ntani kwa here epata lyetu, nye age kapi nga pulisire nge ni rere vana vetu yipo va ya kare Nombangi daJehova. Ame ngani lili yiruwo yoyinzi ure wonomvhura dononzi, ntani ngani gazadara nkenye apa nsene asi vana vange ngava karera Jehova.”

5. Yisinke natu kazogera mosirongwa esi?

⁵ Nsene asi ove zinya goMukriste, ove kuvhura o vatere vana woge va hare Jehova nokumukarera, ngwendi moomu tupu ga yi rugene Eunike. Mosirongwa esi, natu kazogera omu no honena sihonena sendi pokuronga vana woge mweyi o uyunga ntani mweyi o rugana. Ntani natu ka tara omu na kuvatera Jehova.

6. Ngomu tupu va yi likida mwa-2 Timoteusa 3:14, 15, yisinke ya vaterere Timoteusa yipo a ya kare Mukriste?

⁶ Apa Timoteusa ga kere mumatigona, ozina kwa rugene paapa va hulira mokumuronga “matjangwa gokupongoka,” ngwendi moomu tupu va ga kwete egano Vajuda. Yimo, ozina kapi va kere nediwo lyenzi morwa kapi va divire yoyinzi kuhamena Jesus Kristusa. Nye nampili ngoso, eyi ga lirongere Timoteusa moMatjangwa kwa mu vaterere a dive eyi ga hepere kurugana yipo a wapere kukara Mukriste. Nye age ngoso ga vhulire kukara Mukriste ndi? Ngomudinkantu gomugara, age ga kere noumanguruki wokutokora nsene asi nga kara Mukriste. Timoteusa kwa pulire mausili aga ga lirongere kuhamena Jesus morwa elituromo lyozina. (Resa 2 Timoteusa 3:14, 15.) Eunike kwa hefe sili unene morwa ga rongere munendi kuhamena Jehova, nampili ngomu ya mu karerere udigu. Eunike kwa parukire kuliza nedina lyendi eli lya tunda konkango ezi azi tanta asi “kufunda.” Ntani age kwa fundire po maudigu yipo a vatere munendi Timoteusa a hare Jehova nokumukarera.

7. Ngapi omu Eunike ga vaterere munendi a ture po ezokomeho konyima zapa ga gwene ekuho?

⁷ Apa Timoteusa ga gwene ekuho, age kwa sikisire mo sitambo sendi meparu. Nye ozina Eunike kwa kere simpe nosinka kwa munawo konyima zapa ga gwene ekuho. Yisinke nga rugana munawo eparu lyendi mudima? Age nga likwatakana novakaume ava ngava mu ninkisa a kare nonkareso zondona ndi? Age nga tokora kuza kosure zomoAtena noku ka tambura marongo govapagani ndi? Age kuvhura nga hepeke siruwo sendi, nonkondo dendi ntani udinkantu wendi pokurugana unene yipo a ngawope ndi? Eunike kapi ga vhulire kutokwera po Timoteusa, nye age kwa mu vaterere yipo a ture po matokoro gomawa. Ngapi omu ga yi rugene? Age ga vhulire kurugana paapa ga hulira yipo a ronge munendi a hare Jehova unene ntani yipo a kare norupandu kwaJehova naJesus kweyi va va ruganena. Vakurona ava va kwara vahapuli kapisi yiwo velike ava ligwanekere nomaudigu mokuvatera vana vawo va hare Jehova. Nampili yikare asi vakurona navenye kwa kara mousili, ayo kuvhura yi va karere udigu kuvatera vana vawo  yipo va karere Jehova. Yisinke nava lirongera ko vakurona kosihonena saEunike?

8. Ngapi omu zinya na vatera mugara gwendi ogu ga kara mousili nsene kuna kuronga vana vawo kuhamena Jehova?

⁸ Lironga Bibeli kumwe novana woge. Vanavazinyetu wovakadi, nsene asi vagara veni kwa kara mousili, Jehova kuna mu harere mu vatere vagara veni pokuronga vana veni kumuhamena. Nkedi zimwe omu nomu yi rugana eyi kuna kara pokukwatesa ko ewapaiko lyoUkareli wEpata. Zogereni yininke yoyiwa kuhamena Ukareli wEpata ntani gazadareni ko kuhamena yininke eyi nomuvhura kurugana yipo mu ninke Ukareli wEpata u wape ntani noku uhafera. Nampo kuvhura mu vatere vagara veni pokuwapaika elirongo lyoBibeli lyewa ndi nkenye eyi nomuvhura ku ya rugana poUkareli wEpata. Mokugwederera ko, nsene asi vana veni vamwe wovakondi kuvhura va gwanene mo uwa melirongo lyavene mobuke “Hafera Eparu Narunye!” kuvhura o ruganene kumwe namugara goge yipo mu vatere vana veni va kare nelirongo olyo lyoBibeli.

9. Kupi ko na gwana evatero zinya ogu ga kwara muhapuli?

⁹ Vazinya vamwe kupitisira elirongo lyoBibeli kumwe novana vawo morwa awo vadike ndi morwa vagara vawo kapisi Nombangi. Nsene asi ove kuna kara moukaro wangoso, kapisi hepero o kare nosinka sosinene. Jehova nga ku vatera. Ruganesa yiruganeso yoyiwa eyi ga gava Jehova kupitira mombunga zendi yipo o lironge novana woge. Kuvhura o pure ko vakurona vamwe, ava va diva kuruganesa nawa yiruganeso eyi poUkareli wEpata. * (Yis. 11:14) Jehova kuvhura hena kukuvatera yipo o uyunge kumwe novana woge. Mupura a ku vatere yipo o dive eyi yina kara monondunge dawo ntani monomutjima dawo. (Yis. 20:5) Epuro lyoureru ngwendi lyeli asi: ‘Udigu musinke wounene o ligwanekere nawo kosure?’ kuvhura kutwaredesa konzogera zongwa ezi nazi kuvatera o dive yoyinzi kuhamena munoge.

10. Yisinke hena no rugana yipo o vatere vana woge va lironge kuhamena Jehova?

¹⁰ Papara nonkedi omu novhura kuronga vana woge kuhamena Jehova. Zogereni kuhamena Jehova ntani noyininke yoyinzi eyi ga mu ruganena. (Deut. 6:6, 7; Jes. 63:7) Eyi mulyo unene kuyirugana nsene asi ove kapi o lirongo nkenye apa novana woge pembo. Christine ogu ka tu tumbura kwa tanta asi: “Ame kwa kere nosiruwo sosisesu sokuzogera novana vange kuhamena Jehova, yipo nye ame ngani ruganesa nawa nkenye karuwo aka ngani gwana yipo ni zogere nawo kuhamena Jehova. Ose pamwe ngatu zi tu ka gende po ndi pamwe ngatu zi nowato kefuta yipo tu ka zogere kuhamena unsitwe ntani noyininke yoyinzi eyi nayi va vatera yipo va kare vakaume vaJehova. Ano apa vana vange va kulire, ame ngani va korangeda va rese Bibeli pwa vene.” Mokugwederera ko, uyunga yininke yoyiwa kuhamena mbunga zaJehova ntani kuhamena vanavazinyetu. Wa ha uyunga yininke yoyidona kuhamena vakuronambunga. Eyi o uyunga kuvahamena, kuvhura ngayi likide nsene asi vana woge kuvhura ngava uyunge nawo apa ngava hepa evatero lyawo.

11. Kuliza naJakopo 3:18, morwasinke ya karera nomulyo kutulisa po mbili membo?

¹¹ Tulisa po mbili membo. Yi likida nkenye apa kwa mugara goge nokovana woge asi wa va hara. Uyunga kuhamena mugara goge monkedi zombili nefumadeko ntani deura vana woge nawo va rugane yokulifana. Nsene o yi rugana oyo, ayo ngayi rerupira vana woge va lironge kuhamena Jehova. (Resa Jakopo 3:18.) Tuzeni tu ka tare sihonena saJozsef ogu a rugana uzuvhisi wosiruwo nasinye moRomania. Ngomu ga kulire, oguhwe kwa va ninkisire yiva digopere  kukarera Jehova, nage nozina kukwatera mo namukurwendi gomukadi novambyavendi vavali wovagara. Jozsef kwa tanta asi: “Oyina kwa hetekerere ko kutulisa po mbili membo. Moomu otate va kere nonyanya zonene, yimo hena oyina va twikilire kulikida mbili unene. Apa oyina va dimbwilire asi ngayi tu karere udigu kufumadeka nokulimburukwa otate, awo ngava resa kumwe nose etjangwa lyomoVaefeso 6:1-3. Awo ngava zogere kumwe nose yikara yoyiwa yotate ntani ngava tu vatere tu kwate egano konda zeyi natu va tarera asi awo mulyo unene. Ano eyi kwa vaterere epata lyetu li kare nombili.”

12. Kuliza na-2 Timoteusa 1:5, ngapi omu sihonena saEunike sa kundamene Timoteusa?

¹² Resa 2 Timoteusa 1:5. Eunike kwa tulilire po Timoteusa sihonena sosiwa. Age nampo kwa mu rongere asi apa a tu kara nepuro lyousili, ose kuyilikida moyirugana yetu. (Jak. 2:26) Timoteusa ga mwene omu eharo lyozina lyokuhara Jehova lya va tumangedere va likide epuro olyo. Timoteusa ga mwene asi kukarera Jehova kwa reterere ozina ruhafo. Ngapi omu sihonena saEunike sa kundamene Timoteusa? Paurusa kwa uyungire asi Timoteusa kwa kere nepuro lyokupama ngwendi lyozina. Mokumona asi Timoteusa kwa kere nepuro lyokupama, eyi kulikida asi epuro lyendi kapi tupu lya wizire po pwa lyene. Timoteusa ga mwene sihonena sozina ntani age kwa tokwere ku si kwama. Mokulifana naneina, sinzi sovazinya kwa vatera mapata gawo yipo va karere Jehova, va “hana kuuyunga.” (1 Pet. 3:1, 2) Nove kuvhura o rugane yokulifana. Monkedi musinke?

13. Morwasinke zinya na tulira muhowo elikwatakano lyendi naJehova?

¹³ Tura muhowo elikwatakano lyoge naJehova. (Deut. 6:5, 6) Ngwendi vazinya wovanzi, nove kutura po malizambero gomanzi. Ove kulizambera siruwo soge, yimaliwa yoge, pamwe kapi o rara ntani noyininke hena yimwe eyi o rugana yipo o pakere mbili yihepwa yovana woge. Nye kapisi o lihameke mo unene moyininke oyo yipo yi kuninkise o dire kukara nosiruwo sokunkondopeka elikwatakano lyoge naJehova. Litulira po nkenye apa siruwo sokukanderera, sokurugana elirongo lyanyamoge lyoBibeli ntani siruwo sokukara momapongo. Pokuyirugana ngoso, ove ngo nkondopeka elikwatakano lyoge naJehova ntani ngo tulira po sihonena sosiwa vemepata lyoge ntani navamwe hena.

14-15. Yisinke ono lirongere ko kosihonena saLeanne naMaria ntani naJoão?

¹⁴ Tutareni yihonena yoyisesu yovadinkantu ava va lironga kuhara Jehova ntani nokuhuguvara mwendi, pokulirongera ko koyihonena yovazinyavawo. Muna Christine gomukadona gedina Leanne kwa tanta asi: “Ose kapi nga tu manguruka kulironga Bibeli apa otate ngava kara pembo. Nye oyina nkenye apa kapi ngava faura komapongo. Nampili ngomu twa dilire kudiva yoyinzi kuhamena Bibeli, yininke eyi ngava rugana oyina kwa tu vaterere tu kare nepuro lyokupama. Komeho tu tameke kuza komapongo, ose twa yidivire nawa-nawa asi Nombangi daJehova kuronga usili.”

¹⁵ Maria ogu ga kere noguhwe ava ngava tengeke epata lyawo apa ngava zi komapongo, kwa tanta asi: “Oyina kuna kara gumwe govakadi wouradi ava na diva. Apa na kere munona, poyiruwo yimwe ngani nyoka kurugana yininke morwa ame kwa kere nowoma kuhamena eyi nava uyunga wopeke. Nye apa namwene uradi wonane ntani nomu ngava tura Jehova muhowo meparu lyawo, kwa vaterere nge ni funde po utjirwe.” João ogu ga kara noguhwe ava ngava va nyokesa kuzogera yoBibeli pembo, kwa tanta asi: “Eyi ya korangedere nge unene yeyi asi onane kwa tokomenene kurugana nkenye eyi yipo va hafese otate, nye kapisi kupitakana eharo lyawo lyokuhara Jehova.”

16. Ngapi omu sihonena sazinya nasi vhura kukundama wopeke?

 ¹⁶ Vazinya, diworokeni asi sihonena seni kukundama wopeke. Ngwendi ngapi? Tu tareni omu sihonena saEunike sa kundamene mupositoli Paurusa. Paurusa kwa tjenge asi Timoteusa kwa kere nepuro lyahana uyilipaki ngwendi lyeli ga kere nalyo Eunike. (2 Tim. 1:5) Siruwo musinke Paurusa ga dimbwilire epuro lyaEunike? Nampo kuna kara apa ga kere morugendo rwendi rokuhova routumwa, apa ga ka ligwene naRoise ntani naEunike moLisitira ntani age nampo kwa va vaterere yipo va kare Vakriste. (Yirug. 14:4-18) Gazara tupu, konyima zonomvhura 15 apa Paurusa ga tjangerere Timoteusa, Paurusa simpe kwa diworokere yirugana youlimburukwi yaEunike nosihonena sendi sosiwa. Yosili, sihonena saEunike kwa korangedere mupositoli Paurusa ntani nampo sa korangedere hena Vakriste ava va parukire posiruwo sina. Nsene asi ove zinya ogu ono kurera vanona nyovelike ndi namugara goge gomuhapuli, yidiva asi sihonena soge soulimburukwi kukorangeda ava wa kara nawo.

17. Yisinke norugana nsene asi munoge kapi ana kupurakena kweyi ono ku mu ronga?

¹⁷ Ngapi nsene asi munoge kapi ana kupurakena kweyi ono ku mu ronga? Diworoka asi kuronga munona kugusa siruwo. Ngomu tupu vana yilikida pefano, apa o kunu mbuto, ove nampo kuvhura o lipure nsene asi mbuto ozo nga zi kura noku reta yiyimwa. Nampili ngomu ngo dira kudiva nsene asi mbuto ozo nga zi reta yiyimwa ndi hawe, ove ngo twikira kuzitekera  yipo zi kure. (Mar. 4:26-29) Mokulifana, zinya nage kuvhura kulipura poyiruwo yimwe nsene asi erongo eli ana ku pa munendi kuna ku mu vatera sili yipo a hare Jehova. Ove kapi to vhuru kupangera matokoro aga ava tura po vana woge. Nye nsene o twikira kurugana paapa wa hulira mokuvadeura, ayo nga yi va vatera yipo va tulise po ukaume naKarunga.—Yis. 22:6.

18. Ngapi omu Jehova navhura kuvatera vana woge yipo va kare vakaume vendi?

¹⁸ Kutundilira mosiruwo sanare, Jehova kwa vatera vadinkantu wovanzi yipo va kare vakaume vendi. (Epis. 22:9, 10) Age hena kuvhura kuvatera vana woge yipo va kure pampepo, nsene asi yilyo etokoro lyawo. (1 Kol. 3:6, 7) Nampili ngomu vana woge ava dili kukarera Jehova nomutjima nagunye, age nga twikira ku va hara. (Epis. 11:4) Nsene va yilikida asi vana hara kuhafesa Jehova, age nga va vatera yipo va kare vakaume vendi. (Yirug. 13:48; 2 Hist. 16:9) Age kuvhura kukuvatera yipo o uyunge yininke youhunga posiruwo souhunga, apa vana woge ngava hepa evatero lyenene. (Yis. 15:23) Ndi nampo kuvhura a ruganese munazinyetu gomombungakriste yipo a tulise po ukaume kumwe nawo. Nampili konyima zapa vana woge ava ya kuru, Jehova kuvhura ava vatere va diworoke yininke eyi wa va rongere nare. (Joh. 14:26) Apa o twikire kudeura vana woge mononkango doge ntani nomosihonena soge, Jehova nga kutungika.

19. Morwasinke nokarera nehuguvaro asi Jehova kukuhafera?

¹⁹ Eharo lyaJehova koge kapi lyakorera momatokoro aga ava tura po vana woge. Age kwa ku hara morwa wa mu hara. Nsene asi ove mukurona gomudike, Jehova kwa tumbwidira asi nga kara Guhya kovana woge ntani nga kara mupopeli goge. (Epis. 68:5) Ove kapi to vhuru kupangera vana woge nsene asi kuvhura va karere Jehova ndi hawe. Nye nsene o twikira kuhuguvara mevatero lyaJehova ntani noku rugana paapa wa hulira, age nga kuvatera.