1. Yisinke ayi tu retere ruhafo rorunene?

 JEHOVA kuna tu harere tu hafe. Ose twa yi diva eyi, morwa ruhafo kuna kara simwe soyiyimwa yompepo zokupongoka. (Gar. 5:22) Mokumona asi kugava kureta ruhafo kupitakana kutambura, ose kulizuvha ruhafo rorunene apa a tu lihameke mo mosirugana sokuzuvhisa ntani nokuvatera vanavazinyetu mononkedi dokulisiga-siga.—Yirug. 20:35.

2-3. (a) Ngomu vana yi likida moVagarata 6:4, yininke musinke yivali nayi tu vatera yipo tu twikire kukara noruhafo mosirugana saJehova? (b) Yisinke natu kazogera mosirongwa esi?

² Ngomu va yi tumbura moVagarata 6:4, mupositoli Paurusa kwa tumbwire yininke yivali eyi nayi tu vatera yipo tu twikire kukara noruhafo. (Resa.) Sokuhova, twa hepa kuruganena Jehova paapa twa hulira. Ose ngatu hafa nsene tu mu ruganena paapa twa hulira. (Mat. 22:36-38) Sauvali, kapisi tu lihetakanese nava wopeke. Yikare asi yisinke eyi tuna kusikisa mo kurugana morwa ukanguki wetu ndi edeuro eli twa gwana ndi udivi ou twa kara nawo, twa hepa kukara norupandu kwaJehova. Yininke nayinye eyi twa gwana kwa tunda kwendi. Koruha rumwe, nsene vakwetu kuna kulihameka mo unene mosirugana sokuzuvhisa kutupitakana, twa hepa kuhafa kweyi vana kuruganesa udivi wawo mokuyererepekesa ko Jehova, nye kapisi mokulitara vene asi awo mulyo kupitakana wopeke ndi mokulihafesa vene. Yipo nye, mevango lyokurumbasana nawo, ngano tu lirongere ko kwawo.

³ Mosirongwa esi, tatu ka tara eyi nayi tu vatera nsene asi ose kuguva morwa kapi tuna kurugana nawa mosirugana setu. Natu ka tara hena omu natu ruganesa nkenye udivi ou twa kara nawo ntani neyi natu lirongera ko koyihonena yava wopeke.

4. Maukaro musinke gamwe aga tu ninkisa tu guve? Gava sihonena.

⁴ Vamwe vetu kapi tuna kurugana unene paapa twa hulira mosirugana saJehova morwa kuna kukurupa ndi morwa kuvera. Eyi kutuguvisa sili. Owo yiwo ukaro ga ligwanekera nawo Carol. Age nga zuvhisire oku kwa kere nohepero zovazuvhisi. Posiruwo oso, age nga rugana malirongo goBibeli gokusika po-35 ntani ga vatera vamwe mo va ture po ezokomeho lyokuligava kwaJehova ntani nokugwana ekuho. Carol nga litura mo unene moyirugana yokuzuvhisa. Ano konyima yipo ga ya tamekere kuvera unene ntani yiruwo yoyinzi nga kara pembo. Carol kwa tanta asi: “Ame na yi diva asi mokumona asi ame kuvera-vera, ame kapi ani vhuru kurugana ngwendi yeeyi ava rugana wopeke. Nye ame kulizuvha asi ame kapisi ni Mukriste gomuwa ngwendi vakwetu. Ame kapi ani vhuru kurugana nayinye eyi na hara kurugana, ano eyi kuguvisa nge sili unene.” Carol ana hara kuruganena Jehova paapa ga hulira. Ano eyi, kuvhura ku yi mu pandadekera. Tuna si huguvara asi Karunga gwetu gonkenda kumuhafesa kweyi Carol a rugana paapa ga hulira mokumukarera.

5. (a) Yisinke twa hepa kudiworoka nsene tuna guwu morwa ukaro wetu kapi una kutupulisira tu rugane eyi twa hara kurugana? (b) Ngomu vana kuyilikida pefano, ngapi omu munazinyetu gomugara nga rugana paapa ga hulira mosirugana saJehova?

⁵ Nsene poyiruwo yimwe ove kuguva morwa ukaro woge, lipura nyamoge asi: ‘Yisinke ana hepa ko kwange Jehova?’ Jehova kuna hara o rugane paapa wa hulira kuliza noukaro woge ou ono kara nawo ngesi. Gazadara ko kosihonena esi: Munazinyetu gomukadi gonomvhura 80 kulizuvha ruguwo morwa kapi ana kurugana unene mosirugana sokuzuvhisa ngwendi moomu ngayi rugana apa ga kere nonomvhura 40. Age kulizuvha asi nampili a rugane paapa ga hulira, ayo kapi ayi hafesa Jehova. Nye oyo usili ndi? Gazadara ko nsene asi munazinyetu ogu kwa rugene paapa ga hulira apa ga kere nonomvhura 40, ntani age simpe kuna kutwikira kurugana paapa ga hulira ngomu ana kara nonomvhura 80, eyi kulikida asi age simpe kutwikira kurugana paapa ga hulira. Nsene tu tameka kulizuvha asi kapi tuna kuruganena Jehova unene paapa twa hulira, twa hepa kulidiworokesa nyamwetu asi Jehova yige a tokora asi yokuhura kupi natu mu ruganena yipo tu mu hafese. Nsene tu rugana paapa twa hulira, Jehova ngayi mu hafesa unene nokuuyunga asi: “Yina wapa!”—Hetakanesa Mateusa 25:20-23.

6. Yisinke natu lirongera ko kosihonena saMaria?

⁶ Ose kuvhura tu hafe nsene tu demenena kweyi tuna kuvhura kurugana mevango lyokudemena kweyi natu dira kuvhura kusikisa mo. Tu tareni sihonena samunazinyetu gomukadi Maria, ogu ga kara nouvera ou au mu ninkisa a dire kulihameka mo unene mokuzuvhisa. Pomuhowo age kwa guvire unene ntani kwa lizuvhire asi age kwato mulyo. Makura yipo ga gazadarere ko kosihonena samunazinyetu gomombungakriste zawo ogu nga kara tupu mombete morwa uvera wendi. Maria yipo ga tokwere kumuvatera. Maria kwa tanta asi: “Ame kwa tulire po mawapaiko yipo ni zuvhise kumwe nendi kupitira koterefona ntani kutjanga nombilive. Apa ngatu rugana kumwe nendi, ame ngani lizuvhu nkenye apa ruhafo apa ngani tengura kembo, kweyi ngani mu vatere.” Nose kuvhura kugwederera koruhafo rwetu nsene tu demenena kweyi tuna kuvhura kusikisa mo, mevango lyokudemenena kweyi tuna kudira kusikisa mo. Nye ngapi nsene asi ose kutompora unene ndi kurugana nawa mononkedi dimwe mokukarera Jehova?

7. Epukururo musinke ga geve mupositoli Peturusa koVakriste?

⁷ Mombilive zendi zokuhova, mupositoli Peturusa kwa korangedere vapuli vakwawo yipo va ruganese uhwi wawo ndi nkenye ediwo eli va kara nalyo yipo va korangede vapuli vakwawo. Peturusa kwa tjenge asi: “Mokumona asi one vakareli vaKarunga wovawa, one kwa gwana uhwi kupitira monkenda zaKarunga zonene  ezi a zi lihorora mononkedi dokulisiga-siga, u ruganeseni mokulikwafa-kwafa.” (1 Pet. 4:10) Twa hepa kurugana paapa twa hulira yipo tu ruganese udivi wetu ntani kapisi tu kare nosinka asi wopeke kuvhura va tu fire mfudu ndi yi va guvise. Nsene tu dira kurugana paapa twa hulira morwa twa kara nosinka kuhamena omu wopeke ngava lizuvha, ose kapi ngatu ruganena Jehova paapa twa hulira.

8. Kuliza no-1 Vakolinte 4:6, 7, morwasinke natu nyokerera po kulikangangera mauhwi getu?

⁸ Twa hepa kuruganesa mauhwi getu paapa twa hulira, nye twa hepa kutakamesa asi kapisi tu linenepeke. (Resa 1 Vakolinte 4:6, 7.) Pasihonena, ove nampo wa diva nawa kutameka malirongo goBibeli pomambo. Wa hepa kuruganesa uhwi owo! Nye diworoka asi pwa kara elisigo pokatji kokuruganesa uhwi ntani nokuulikangangera. Tu tante asi nampo ka yi ku tompokere moyirugana yokuzuvhisa ntani ko tamekere elirongo lyoBibeli. Ove ngo hafa kutantera ko vakweni womokambunga keni koyirugana yokuzuvhisa. Apa ngo ka tameka kurugana kumwe nokambunga keni, ove no ka zuvha munazinyetu gumwe gomukadi kuna kusimwitira omu ka yi mu tompokere kuhanesa sifo. Age kwa mu tompokere kugava sifo, ano ove ya kutompokere kutameka elirongo lyoBibeli nagumwe. Yisinke norugana? Ove ono yi diva asi womokambunga keni kuvhura si ka va korangede sihorokwa esi ko limonenene. Nye nampo kuvhura o ndindire yipo ngo va tantere sihorokwa oso posiruwo sapeke, yipo munazinyetu ogo gomukadi a dire kulizuvha asi age kapisi muzuvhisi gomuwa. Oso kuna kara sininke sosiwa kurugana, nye nampili ngoso twikira kurugana malirongo goBibeli. Ruganesa uhwi woge ou wa kara nawo!

9. Ngapi omu natu ruganesa mauhwi getu aga twa kara nago?

⁹ Tu diworokeni asi nkenye ediwo eli twa kara nalyo, kuna kara uhwi wokutunda kwaKarunga. Twa hepa kuruganesa mauhwi ogo mokukorangedesa ko womombungakriste, nye kapisi nositambo sokugwanena mo uwa wanyamwetu. (Fil. 2:3) Apa atu ruganesa nonkondo detu ntani nevhuliko eli twa kara nalyo mokurugana mpango zaKarunga, ose ngatu kara noruhafo. Kapisi asi morwa kuna kurugana yoyinzi kupitakana wopeke, nye morwa ose kuna kuruganesa uhwi wetu mokuyererepekesa ko Jehova.

10. Morwasinke ya karera epuko kulihetakanesa nava wopeke?

¹⁰ Nsene kapi tuna kutakamesa, ose kuvhura kulihetakanesa nyamwetu kweyi a tu tompora neyi ava dili kutompora vakwetu. Pasihonena, nampo munazinyetu gomugara kugava yiuyungwa yoyiwa yanavenye. Olyo kuna kara evhuliko lyendi. Age kuvhura a gazare asi age kugava nawa yiuyungwa yoyiwa kupitakana munazinyetu ogu a dili kugava nawa yiuyungwa. Nye kuvhura yikare asi munazinyetu ogo ga diva kutambura nawa vagenda,  kudeura vana vendi ndi kulihameka mo unene moyirugana yokuzuvhisa. Ayo kutuhafesa sili kweyi twa kara novanavazinyetu ava ava ruganesa mauhwi gawo mokukarera Jehova ntani nokuvatera wopeke.

11. Morwasinke natu hetekerera ko kukwama sihonena saJesus?

¹¹ Nampili ngomu twa hepa kunyokera po nkareso zokulihetakanesa nyamwetu nava wopeke, ose kuvhura tu gwanene mo uwa pokulirongera ko koyihonena yovakareli vaJehova wovalimburukwi. Jesus kuna kara sihonena sosiwa po sogu natu vhura kulirongera ko. Nampili ngomu ga sikilire mo, ose kuvhura kulirongera ko koyikara yendi yoyiwa ntani monkedi ezi nga rugana yininke. (1 Pet. 2:21) Nsene tu rugana paapa twa hulira yipo tu kwame sihonena sendi, ose ngatu kara vakareli vaJehova wovawa ntani ngayi tu tompoka mokuzuvhisa.

12-13. Yisinke natu lirongera ko kwahompa Ndafita?

¹² Mononkango daKarunga, ose kuvhura kugwana mo yihonena yoyinzi yovakareli vaJehova wovalimburukwi nampili ngomu va dilire kusikilira mo. (Heb. 6:12) Gazadara ko kuhamena hompa Ndafita, ogu ga tumbwire Jehova asi mugara “ogu ga za nge komutjima” ndi ngwendi moomu za toroka Bibeli zimwe egano olyo asi “muntu ogu a hafesa nge po unene.” (Yirug. 13:22) Nye nampili ngoso, Ndafita kapi ga sikilire mo. Age kwa tulire mapuko gamwe gomanene. Nye nampili ngoso, age kuna kara sihonena sosiwa kwetu. Morwasinke? Morwa apa va mu pukwilire, age kapi ga hetekerere ko kulipopera mwene. Mevango lyokuyirugana oyo, age kwa tambwire epukururo eli va mu pere ntani kwa lizuvhire unzoni kweyi ga rugene. Ngoyitundwamo, Jehova kwa mu gusilire po.—Epis. 51:3, 4, 10-12.

¹³ Ose kuvhura kulirongera ko kwaNdafita pokulipura nyamwetu mapuro aga asi: ‘Ngapi omu ani tara mapukururo aga ava penge? Ame kutambura mapuko gange ndi ame kuhetekera ko kulipopera nyamwange? Ame kupa usimbu usima wopeke ndi? Ame kuhetekera ko paapa na hulira yipo ni dire kurugana mapuko gokulifana ndi?’ Ove kuvhura kulipura mapuro gokulifana, ngomu ono kuresa yihonena yovagara novakadi wovalimburukwi ava va tumbura moBibeli. Awo kwa ligwanekerere nomaudigu aga ono kuligwanekera nago ngesi ndi? Yikara musinke yoyiwa va likidire? Mwankenye sihorokwa esi ono kuresa, lipura asi: ‘Ngapi omu nani honena ogu mukareli gwaJehova gomulimburukwi?’

14. Mauwa musinke natu gwanena mo pokulirongera ko koyihonena yovapuli vakwetu?

¹⁴ Ose kuvhura kugwanena mo uwa pokulirongera ko koyihonena yovanavazinyetu, yikare asi vanona ndi vakondi. Pasihonena, kuvhura o gazadare ko gumwe gomombungakriste zeni ogu ana kulididimikira udigu, makondjeso gokutunda  kovakaume, marwaneso gokutunda kovanekoro ndi nampo kuvera-vera. Ove kumona yikara yoyiwa momuntu ogo eyi ono hara kuhonena ndi? Pokuhonena sihonena sendi sosiwa, ayo kuvhura ngayi kuvatere yipo o lironge nonkedi omu no vhura kulididimikira maudigu goge. Ose kupandura kweyi vanavazinyetu ava tura po sihonena sosiwa soulimburukwi, ano eyi kuturetera ruhafo.—Heb. 13:7; Jak. 1:2, 3.

15. Epukururo musinke ga geve mupositoli Paurusa eli nali vhura kutuvatera tu twikire kuhafa mosirugana saJehova?

¹⁵ Mokuninka asi mombungakriste mu kare uumwe nombili, nkenye gumwe gwetu ga hepa kurugana paapa ga hulira. Tu tareni sihonena soVakriste womosiruwo sovapositoli. Awo kwa kere nomauhwi gokulisiga-siga ntani noyirugana yokulisiga-siga. (1 Kol. 12:4, 7-11) Nye eyi kapi ya va ninkisire va rumbasane ndi va lirwanese novakwawo. Nye Paurusa kwa tumangedere nkenye gumwe gwawo a rugane eyi ya kere hepero “yipo va tunge rutu rwaKristusa.” Paurusa kwa tjangerere Vaefeso asi: “Apa nkenye ruha aru rugana nawa sirugana saro, eyi kuvatera rutu ru kure yipo rutu narunye ru pame meharo.” (Efe. 4:1-3, 11, 12, 16) Ava va rugene eyi ga uyungire Paurusa, kwa retesere po mbili nouumwe. Ano eyi kuna kara yikara eyi atu mono neina monombungakriste detu.

16. Yisinke natu tokomena kurugana? (Vahebeli 6:10)

¹⁶ Tokomena kunyokera po kulihetakanesa nava wopeke. Mevango lyokuyirugana oyo, lirongera ko kwaJesus ntani kondja yipo o honene yikara yendi. Lirongera ko koyihonena yomoBibeli ntani koyihonena yovanavazinyetu womomazuva getu ava vana kulikida epuro. Ngomu ono kutwikira kurugana paapa wa hulira, kara nehuguvaro asi Jehova ‘muhungami kapi nga divara yirugana yoge.’ (Resa Vahebeli 6:10.) Twikira kukara noruhafo ngomu ono kukarera Jehova ntani diva asi age kuhafa apa a ku mono kuna kurugana paapa wa hulira mokumuhafesa.