YINKA kwa fana ngwendi mudigo. (Yis. 12:25) Wa ligwanekera rumwe noyinka meparu lyoge ndi? Wa lizuvha rumwe asi kapi hena ono kuvhura kulididimikira yinka ndi? Nsene yimo, kapisi nyovelike o lizuvhu ngoso. Sinzi setu kwa ligwanekera noyinka morwa nokonda dokulisiga-siga. Pasihonena, vamwe kupakera mbili gekoro ogu a vera-vera, vamwe kwa fisa vahali vawo, ano vamwe kwa ligwanekera noruhepo morwa yimpagwa ndi kwa ligwanekera nomaukaro aga gava kundama panyama nopamalizuvho ntani panandunge. Nye yisinke nayi tu vatera yipo tu lididimikire yinka? *

Kuvhura tu lirongere ko yoyinzi kosihonena sahompa Ndafita kuhamena omu natu lididimikira yinka. Age kwa ligwanekerere nomaukaro goudigu meparu, ano poyiruwo yimwe eparu lyendi kwa kere mosiponga. (1 Sam. 17:34, 35; 18:10, 11) Yisinke ya vaterere Ndafita yipo a lididimikire yinka? Ngapi omu natu honena sihonena sendi?

Ndafita kwa ligwanekerere nomaudigu gokulisiga-siga posikando simwe. Gazadara ko eyi ya mu horokerere apa ga dukire hompa Sauru ogu ga here kumudipaga. Apa Ndafita novantu vendi va ka tengwire koyita, awo kwa ya gwene nonkore dawo dina vaka yininke yawo, kwa hwikire sitata sawo ntani kwa twere mapata gawo mounkwate. Ngapi omu ga lizuvhire Ndafita? “Ndafita novantu vendi tava tende mo va lire, liliee dogoro tava rorokere mo kulira.” Ndafita kwa kere hena nosinka sosinene morwa vantu vendi kwa “mu likwetjere asi va mu dipage nomamanya.” (1 Sam. 30:1-6) Apa ngesi Ndafita kwa ligwanekerere nomaudigu gatatu posikando simwe: Epata lyendi kwa kere mosiponga, ntani ga kere nowoma asi vantu vendi kuvhura va mu dipage ntani hompa Sauru kwa twikilire kumutjida. Gazadara ko tupu kosinka esi ga kere naso Ndafita!

Yisinke eyi ga rugene Ndafita? Poopo ngoso, “Karunga ta mu koreke.” Ngapi omu ya horokere eyi? Ndafita nga kanderere nkenye apa kwaJehova yipo a mu vatere ntani nga gazadara ko omu Jehova ga mu vatera. (1 Sam. 17:37; Epis. 18:2, 6) Ndafita gayi divire asi ga hepere kupura Jehova, makura yipo ga pulire Jehova eyi ga hepere kurugana. Konyima zapa Ndafita ga gwene evyukiso lyokutunda kwaJehova, age kwa rugene ko yuma usimbu-simbu. Ngoyitundwamo, Ndafita novantu vendi kwa va tungikire Jehova ntani kwa poperere mapata gawo ntani kwa yowerere yininke yawo nayinye eyi va zumbanesere. (1 Sam. 30:7-9, 18, 19) Mwa dimburura yininke yitatu eyi ga rugene Ndafita ndi? Age kwa kanderere kwaJehova yipo a mu vatere, kwa gazadarere ko omu Jehova ga mu vaterere ntani ga rugene ko yuma kevyukiso eli ga mu pere Jehova. Ngapi omu natu honena Ndafita? Tuzeni tu ka tare nonkedi ntatu.

1. Kanderera. Ose kuvhura kukanderera kwaJehova nkenye apa atu kara noyinka, yipo a tu vatere ntani yipo a tu pe ko unongo. Ose ngatu lizuvha ko hansa nsene tu mu tantera nkenye eyi yina kuturetera sinka. Ndi kuvhura tu kanderere ekanderero lyesupi momutjima, nsene ukaro wetu ngau tupulisira posiruwo oso. Nkenye apa atu pura evatero kwaJehova, ose kuyilikida asi twa mu huguvara unene ngwendi moomu ga yi rugene Ndafita ogu ga uyungire asi: “HOMPA yige emanya lyange nohotepopero zange neparu lyange; Karunga gwange,  emanya lyange omu ani vanda.” (Epis. 18:2) Makanderero kuvatera ndi? Munazinyetu gomukadi gedina Kahlia ogu a rugana uzuvhisi wokukarerera kwa uyunga asi: “Konyima zokukanderera, ame kulizuvha mbili. Kukanderera kuvatera nge ni kare nomagazaro ngwendi gaJehova ntani nokumuhuguvara unene.” Ekanderero kuna kara ewapaiko lyokutunda kwaJehova, eli ali tu vatere tu lididimikire yinka yetu.

2. Gazadara ko omu ga ku vatera Jehova. Nsene o gazadara ko omu Jehova ga ku vatera, kuvhura o gazadare ko maudigu gamwe aga wa lididimikilire morwa evatero lyaJehova ndi? Apa atu gazadara ko omu Jehova ga tu vatera ntani nomu ga vatera vakareli vendi womosiruwo sanare, ose kukara nombili ntani kuhuguvara unene mwendi. (Epis. 18:17-19) Mukuronambunga gedina Joshua kwa uyunga asi: “Ame kwa tjanga makanderero gange aga ga limburura Jehova. Eyi kudiworokesa nge yiruwo eyi na hundilire Jehova yuma yongandi ano age kwa limbwilire nge kuliza neyi na hepere.” Yosili, apa atu gazadara ko omu ga tu vatera Jehova, ose kugwana nonkondo edi twa hepa yipo tu twikire kulididimikira yinka yetu.

3. Rugana ko yuma. Komeho tu tokore eyi natu rugana moukaro wongandi, ose kuvhura tu papare evyukiso moNonkango daKarunga. (Epis. 19:7, 11) Apa vamwe ava rugana epaparo kuhamena etjangwa lyongandi, awo kukwata nawa egano omu velise ozo nazi va vatera meparu lyawo. Mukuronambunga gedina Jarrod kwa faturura asi: “Kurugana epaparo kuvatera nge ni lironge yoyinzi kuhamena velise zongandi ntani nokukwata egano eyi ana ku tantera nge Jehova movelise ozo. Eyi kuvatera nge ni pure eyi nina kulironga nokurugana kuliza nevyukiso lyendi.” Apa atu papara mavyukiso moMatjangwa nokugatura pasirugana, ayo ngayi tu vatera tu gwane mbili noruhafo apa atu kara noyinka.

Ndafita ga yi divire asi ga hepere evatero lyaJehova yipo yi mu tompoke kulididimikira yinka. Age kwa kere norupandu rorunene kevatero lyaJehova, ano eyi kwa mu tumangedere a uyunge asi: “Kumwe naKarunga gwange ame kuvatuka ekuma. Age Karunga ogu a nkondopeke nge.” (Epis. 18:29, 32) Ose kuvhura tu lizuvhe ngwendi asi maudigu getu udigu unene kugalididimikira. Nye nevatero lyaJehova, ose kuvhura kulididimikira nkenye maudigu gomanene. Yosili, apa atu kanderere kwaJehova yipo a tu vatere nokugazadara ko kwanayinye eyi ga tu ruganena ntani nokurugana ko yuma, ose ngatu kara nehuguvaro asi age nga tu pa nonkondo nounongo ou twa hepa yipo yi tu tompoke kulididimikira yinka yetu!