1. Kupi lyatunda evhuliko lyetu lyokuuyunga?

 JEHOVA kwa tu pa evhuliko lyokuuyunga. Konyima zapa tupu va sitire muntu gokuhova Adamu, age ga vhulire kuuyunga noGuhwe vemeguru. Age hena ga vhulire kutota po nonkango donompe. Adamu kwa ruganesere evhuliko olyo yipo a sikise mo sitambo sendi sokuruka yikorama nayinye. (Gen. 2:19) Ntani age kwa hefe sili unene apa ga uyungire sikando sendi sokuhova nomuntu mukwawo, mukadendi gomuwa Eva.—Gen. 2:22, 23.

2. Ngapi omu mbuyungiso va zi ruganesa momudona mosiruwo sanare ntani mosiruwo sanaina?

² Konyima tupu zosiruwo, uhwi wombuyungiso kwa ya u ruganesere momudona. Satana Muzonaguli kwa kumbagerere Eva, ano yipempa oyo kwa ya twaredesere konzo ntani kediro kusikiliramo. (Gen. 3:1-4) Adamu kwa ruganesere mbuyungiso zendi momudona apa ga rundilire Eva naJehova, komapuko gamwene. (Gen. 3:12) Kaini kwa kumbagerere Jehova konyima zapa ga dipagere mumbyendi Abeli. (Gen. 4:9) Konyima, mugara gomoruvharo rwaKaini gedina Rameki, kwa tjenge mutango ogu gwa likidire asi vantu womosiruwo sendi kwa kere nonyanya unene. (Gen. 4:23, 24) Nkareso musinke vana kara nazo vantu neina? Ose kumona omu vampitisili womaupolitika ava ruganesa mbuyungiso zondona. Sinzi sonomuvi daneina kwa ruganesa mo mbuyungiso zondona. Vanasure kuzuvha mbuyungiso zondona kosure, ano vakurona kuzuvha mbuyungiso zondona koyirugana yawo. Mokumona asi mbuyungiso zondona zina lihana neina, ayo kulikida asi uzuni una donapa unene.

3. Siponga musinke twa hepa kudimburura, ntani yisinke natu kazogera mosirongwa esi?

 ³ Nsene kapi tuna kutakamesa, kuvhura tu yike mbuyungiso zondona ezi nose natu tameka kuruganesa. NgoVakriste, ose tuna hara kuhafesa Jehova, yipo nye ose kapi tuna hara kuruganesa mbuyungiso zondona. Tuna hara kuruganesa uhwi wombuyungiso monkedi zongwa yipo tu hamberere Karunga gwetu. Mosirongwa esi, tatu kazogera omu natu yirugana oyo (1) mokuzuvhisa, (2) komapongo ntani (3) mononzogera detu dankenye ezuva. Nye pomuhowo, tuzeni tu kazogereni eyi mbuyungiso zetu za karera nomulyo kwaJehova.

4. Kuliza naMarakiya 3:16, morwasinke mbuyungiso zetu za karera nomulyo kwaJehova?

⁴ Resa Marakiya 3:16. Kuvhura o gazadare ko konda zeyi Jehova a tjangere “mobuke” zendi madina govantu ava va mu tjira ntani nava ava mu fumadeke ndi? Mbuyungiso zetu, kulikida eyi ya kara monomutjima detu. Jesus kwa uyungire asi: “Eyi ya zura momutjima, kana yiyo aka pwagesa yooyo.” (Mat. 12:34) Eyi atu tokora kuuyunga kulikida omu twa hara Jehova. Ntani Jehova kuna hara ava va mu hara ngava ka hafere eparu narunye mouzuni woupe.

5. (a) Ngapi omu ukarelikarunga wetu wa likwatakana neyi atu uyunga? (b) Ngomu vana yi likida pefano, yisinke twa hepa kutakamesa kuhamena mbuyungiso zetu?

⁵ Monkedi omu atu uyunga, kuvhura kulikida nsene asi Jehova nga tambura ukareli wetu ndi hawe. (Jak. 1:26) Vamwe ava va dira kuhara Karunga kuuyunga nehandu ntani nelinenepeko. (2 Tim. 3:1-5) Ose kapi tuna hara ku va honena. Ose tuna hara kuhafesa Jehova mombuyungiso zetu. Ngoso Jehova kuvhura a tu hafere nsene tu ruganesa mbuyungiso zongwa komapongo ntani mokuzuvhisa, nye tu ruganese mbuyungiso zondona apa atu zogere novanekoro vetu nsene kwato ogu ana kutumona ndi kwato ogu ana ku tu zuvha ndi?—1 Pet. 3:7.

6. Yitundwamo musinke yoyiwa ya ya kere morwa nkareso zongwa zaKimberly?

⁶ Nsene tu ruganesa nawa mbuyungiso zetu, ayo ngayi likida asi ose vakareli vaJehova. Ayo ngayi vatera wopeke va dimburure elisigo eli lya kara ‘pokatji kogu a kerere Karunga nogu a dili kumukarera.’ (Mara. 3:18)  Eyi yiyo ya horokerere munazinyetu gomukadi gedina Kimberly. * Age kwa mu tulire kumwe nomurongwa mukwawo gomukadona yipo va rugane kumwe sirugana sokosure. Konyima zokurugana kumwe, murongwa mukwawo kwa dimbwilire asi Kimberly kwa lisigire novarongwa vakwawo. Age kapi nga uyunga vantu momudona, nye age nga uyunga monkedi zongwa novakwawo ntani kapi nga ruganesa mbuyungiso zondona. Nkareso zaKimberly kwa tetukisire murongwa mukwawo ntani kwa mu tumangedere a tameke kulironga Bibeli. Gazadareni ko tupu omu ayi hafesa Jehova apa atu uyunga monkedi ezi azi ninkisa vantu va hare kulironga usili!

7. Ngapi omu ono hara ku ruganesa mbuyungiso zoge?

⁷ Natuvenye tuna hara kuuyunga monkedi ezi azi gava efumadeko kwaJehova ntani monkedi ezi nazi tu hedesera unene pepi novanavazinyetu. Tuzeni tu ka tare nonkedi dimwe omu natu twikira kukara ‘nosihonena sosiwa mombuyungiso.’

8. Sihonena musinke ga tu tulira po Jesus monkedi omu nga ruganesa mbuyungiso zendi mosirugana sokuzuvhisa?

⁸ Uyunga nombili ntani nefumadeko nsene vana kuhandukisa. Apa Jesus ga kere mosirugana sendi sokuzuvhisa, vantu ngava mu rundire asi age mugara gonkorwe nomakurulya, age ku ruganena kumwe nomuzonaguli, kapi a sikisamo veta zEsabata ntani kwa mu rundilire asi age kuswaura Karunga. (Mat. 11:19; 26:65; Ruk. 11:15; Joh. 9:16) Nye Jesus kapi ga va limbwilire nononkango dehandu. Ngwendi Jesus, kapisi tu limburure wopeke momudona nampili kuna kutuuyunga momudona. (1 Pet. 2:21-23) Nye ayo kapisi ureru kukara nombili apa wopeke ava tuuyunga momudona. (Jak. 3:2) Yisinke nayi tu vatera?

9. Yisinke nayi tu vatera tu pangere mbuyungiso zetu nsene mokuzuvhisa tuna kara?

⁹ Nsene gumwe a kuuyungira nonkango donondona mokuzuvhisa, hetekera ko kudira kuhanduka. Munazinyetu gomugara gedina Sam kwa tanta asi: “Ame kuhetekera ko kugazara omu muntu ogu twa kuzuvhisira na vhura kugwanena mo mauwa pokulironga usili kuhamena Karunga ntani ame kudiworoka asi age kuvhura kulitjindja.” Poyiruwo yimwe, muntu ogu twa kuzuvhisira kuvhura kuhanduka morwa kuna ka mu gwana posiruwo sepuko. Nsene kuna kuuyunga nomuntu ogu ana handuka, kuvhura tu rugane eyi a rugana munazinyetu gomukadi Lucia. Ose kuvhura tu kanderere noku pura Jehova a tu vatere tu kare tuna litura ntani nokudira kuuyunga nkenye nonkango donondona.

10. Kuliza na-1 Timoteusa 4:13, sitambo musinke natu litulira po?

¹⁰ Kara murongi gomuwa. Timoteusa kwa kere muzuvhisi gomuwa, nye simpe ga hepere kutwikira kutura po malitjindjo monkedi zendi zokuronga.  (Resa 1 Timoteusa 4:13.) Ngapi omu natu kara varongi wovawa mosirugana sokuzuvhisa? Twa hepa kuliwapaikira nawa. Ose twa kara no yiruganeso yoyinzi eyi nayi tu vatera yipo tu kare varongi wovawa. Ove kuvhura o gwane magano aga naga kuvatera mosimbapira Litura mo mokuresa nokuronga ntani magano aga ga kara moruha “Litura mo mokuzuvhisa” moMbapira zekepongo, Eparu lyetu noyirugana yokuzuvhisa. Ove kuna ku ruganesa nawa yiruganeso eyi ndi? Apa atu liwapayikire nawa, ayo kutuvatera tu dire kukara nowoma ntani kutuvatera tu uyunge nouradi.

11. Ngapi omu vanavazinyetu vamwe ya va tompoka kukara varongi wovawa?

¹¹ Ose kuvhura hena kukara varongi wovawa pokulirongera ko kwava womombungakriste. Sam ogu tuna tumbura muhowo, kulipura mwene asi yisinke eyi ayi ninkisa vanavazinyetu vamwe va kare varongi wovawa. Age kunomena monkedi omu ava zuvhisa ntani kuhetekera ko kuvahonena. Munazinyetu gomukadi Talia kupurakena koyiuyungwa yanavenye eyi ava gava vanavazinyetu wovagara. Pokuyirugana ngoso, age kwa lironga omu na zogera yirongwa eyi ava pura unene vantu mokuzuvhisa.

12. Yininke musinke ayi digopere vamwe kurugana?

¹² Natuvenye kuvhura kulihameka mo mepongo pokulihameka mo mokudimba nonsumo ntani pokugava malimbururo gomawa. (Epis. 22:22) Vamwe kuvadigopera kudimba ndi kugava elimbururo mepongo. Nove yimo o lizuvhu ngoso ndi? Nsene yimo, ove noka gwanena mo uwa pokuka diva eyi ya vaterere vamwe va nyokere po kukara nowoma kugava malimbururo ntani nokudimba mepongo.

13. Yisinke nampo nayi vhura kukuvatera yipo o dimbe nomutjima nagunye komapongo?

¹³ Dimba nomutjima nagunye. Konda zomulyo unene zeyi atu dimbire nonsumo doUhompa momapongo, kuna kara mokuhamberera Jehova. Munazinyetu gomukadi gedina Sara, kulimona mwene asi kapi ga diva kudimba nawa. Nye nampili ngoso, age kwa hara kuhamberera Jehova kupitira mononsumo. Yipo nye, apa a liwapaikire komapongo, age kuliwapaikira hena nonsumo edi nava kadimba. Age kuliyomberesa nonsumo ntani noku hetekera ko kudimburura omu nonkango domorusumo dina lizi nosirongwa esi nava ka lironga kepongo. Age kwa tanta asi: “Eyi kuvatera nge ni demenene kweyi dina kutanta nonkango domorusumo nye kapisi nsene asi ame kudimba nawa ndi hawe.”

14. Nsene wa kara nowoma, yisinke nayi kuvatera yipo o gave malimbururo komapongo?

¹⁴ Gava malimbururo nkenye apa. Nye kutanta usili, eyi kuvhura kukara udigu kwa vamwe. Talia ogu tuna tumbura kwa tanta asi: “Ame kukara nowoma wounene nampili ngomu wopeke ava dili ku yi dimburura, morwa ezwi lyange kuzuvhika nawa. Yipo nye, ayo kukarera nge udigu kugava malimbururo.” Nye oyo  kapi ayi kondere Talia mokugava malimbururo. Ngomu a liwapaikire komapongo, age kudiworoka asi elimbururo lyokuhova nkenye apa lyahepa kukara lyesupi ntani lyokuvyukilira positwa. Age kwa tanta asi: “Eyi kutanta asi ayo ya pulisira kugava elimbururo lyesupi lyoureru ntani lyokuvyukilira positwa, morwa olyo kuna kara elimbururo eli a ndindire ko kwetu munazinyetu ogu a pitisire elirongo.”

15. Yisinke twa hepa kudiworoka kuhamena malimbururo getu?

¹⁵ Nampili Vakriste ava va dira kukara nowoma, poyiruwo yimwe nawo kuvhura va dire kuhara kugava malimbururo. Morwasinke? Munazinyetu gomukadi gedina Juliet kwa uyunga asi: “Poyiruwo yimwe kapi ani hara kugava malimbururo morwa ame kukara nowoma asi malimbururo gange ureru ntani kapisi mawa nawa-nawa.” Nye diworoka asi Jehova kuna tu harere tu gave malimbururo kuliza nevhuliko lyetu. * Age kuyihafera apa atu litura mo unene mokugava malimbururo komapongo, nampili ngomu atu lizuvhu woma poyiruwo yimwe.

16. Mbuyungiso musinke twa hepa kunyokera po?

¹⁶ Nyokera po kuruganesa “nonkango donondona.” (Efe. 4:31) Ngomu tupu tuna yi lirongo ketameko, Mukriste ga hepa kunyokera po kuruganesa mbuyungiso zondona. Nye pwa kara hena mbuyungiso zondona ezi twa hepa kunyokera po. Pasihonena, twa hepa kutakamesa yipo tu dire kuuyunga yininke yoyidona kuhamena vantu worudi rongandi, ndi womompo zongandi ndi wosirongo songandi. Ntani kapi tuna hara hena kukoresa wopeke pokuuyunga yuma eyi nayi va swaukisa. Munazinyetu gumwe gomugara kwa tanta asi: “Poyiruwo yimwe ame ngani uyunga yininke eyi ngani gazara asi yokuzoresa tupu ntani kwato kukoresa komutjima, nye usili wou asi yininke oyo kwa koresere wopeke komutjima. Mwa za nomvhura, mukadange kwa vaterere nge unene pokutantera nge kompengi asi yininke yimwe eyi ngani uyunga kapi ya kere yoyiwa ntani ayo ngayi mukoresa kukwatera mo nava wopeke.”

17. Kuliza noVaefeso 4:29, ngapi omu natu korangeda wopeke?

¹⁷ Uyunga monkedi ezi nazi korangeda wopeke. Pandadeka wopeke mevango lyokusivana ndi mevango lyokutanguna. (Resa Vaefeso 4:29.) Vaisraeli va kere nonokonda dononzi deyi va heperere kukara norupandu. Nye rorunzi awo ngava tanguna. Nkareso zokutanguna kuvhura kuninkisa wopeke nawo va tangune. Diworoka asi mbudi zondona ezi da uyungire nondadi murongo kwa ninkisire ‘Vaisraeli va tangwise Mosesa.’ (Numeri 13:31–14:4) Nye apa atu pandadeke wopeke, ayo kuvhura kuninkisa nkenye gumwe a kare noruhafo. Twa si huguvara asi epandadeko  eli ga gwene munwaJefuta gomukadona kovakaume vendi wovakadi kwa mu korangedere a twikire nosirugana sendi. (Vap. 11:40) Sara ogu ka tu tumbura kwa tanta asi: “Apa atu gava epandadeko, ayo kuninkisa wopeke va lizuvhe asi Jehova ga va hara ntani va lizuvhe asi vapuli vakwawo womombungakriste nawo va va hara.” Yipo nye, papara nonkedi omu novhura kupandadeka vapuli vakweni.

18. Kuliza nEpisarome 15:1, 2, morwasinke natu uyungira usili ntani yisinke ya hamena mo?

¹⁸ Uyunga usili. Ose kapi tatu vhuru kuhafesa Jehova nsene kapi tuna kuuyunga usili. Age kwa nyenga yipempa nayinye. (Yis. 6:16, 17) Nampili ngomu sinzi sovantu neina ava tara yipempa asi kapisi sininke sosidona nawa-nawa, ose twa hepa kuyinyokera po morwa Jehova kuyitara asi epuko. (Resa Episarome 15:1, 2.) Yimo, ose kunyokera po kutanta yimpempa, nye twa hepa kunyokera po hena kuhoreka mauzera gamwe nositambo sokuninkisa wopeke va tare yininke yongandi mepuko.

19. Yisinke hena twa hepa kunyokera po kurugana?

¹⁹ Nyokera po kugamba wopeke. (Yis. 25:23; 2 Tes. 3:11) Juliet ogu ka tu tumbura kwa uyunga kuhamena omu kugamba a ku mu kundama. Age kwa tanta asi: “Ayo kudompesa sili kupurakena muntu ogu ana kugamba ntani ayo kuninkisa nge ni dire kuhuguvara muntu ogu ana kugamba. Morwa kapi to diva, muntu ogo nampo kuvhura nga ka kugambe kwava wopeke.” Nsene o dimburura asi nzogera kuna kutwaredesa korugambo, tjindja nzogera yipo mu zogere yininke yoyiwa.—Koros. 4:6.

20. Yisinke ono tokomene kuruganesa mbuyungiso zoge?

²⁰ Mokumona asi ose kuparuka mouzuni omu mwa kara vantu wovanzi ava ava ruganesa mbuyungiso zondona, twa hepa kurugana unene yipo tu divilise asi mbuyungiso zetu kuna kuhafesa Jehova. Diworoka asi mbuyungiso kuna kara uhwi wokutunda kwaJehova, ntani age ga kara nosinka monkedi omu atu u ruganesa. Age nga tu tungika nsene tu hetekera ko kuuyunga monkedi ezi azi mu retere efumano apa atu kara mokuzuvhisa, apa atu kara komapongo ntani mononzogera detu dankenye ezuva. Apa Jehova nga ka zonagura po uzuni ou woudona, ayo ngayi ka tu karera ureru ku ka mu fumadeka mombuyungiso zetu. (Juda 15) Ano pwangesi, tokomena kuhafesa Jehova “mononkango” doge.—Epis. 19:14.