Yimbwa yange kwa yi tekwire nawa
NICK OGU ga tunga moOregon, moAmerika kwa tanta asi: “Ketameko lyomvhura zo-2014, ame kwa tamekere kugenda noyimbwa yange nkenye apa ni ze mokatji kositata esi na tungire. Nombangi daJehova nga di kara nkenye apa mokatji kositata noyitoroli. Awo ngava dwara nawa nokumenyuna nankenye ogu nga piti po.”
“Nombangi kwa kere vantu wovawa, kapisi kwange tupu nye nokoyimbwa yange. Ezuva limwe, Elaine, ogu ga sikeme pepi nositoroli kwa pere yimbwa yange yivali yikuki yokumburukuta. Ano konyima zoyo, nkenye apa ngatu siki pepi nositoroli, yimbwa yange kwa here kuza koNombangi yipo va ka yi pe yikuki.”
“Makwedi gomanzi kwa pitire po, ano yimbwa yange ngayi hafere yikuki ntani name ngani hafere kuzogera pausupi noNombangi daJehova. Nye kapi na here kuzogera nawo siruwo sosire. Ame kwa kere nonomvhura dokupitakana po-70 ntani kapi na divire nawa eyi da pura Nombangi daJehova. Mokumona asi ame kapi na haferere maukarelikarunga gomanzi, ame kwa gazarere asi ayo nayi wapa nsene ni lironga Bibeli pwanyamwange.”
“Sikando esi, ame kwa mwene Nombangi daJehova dapeke kuna sikama nositoroli kevango lyapeke lyomositata. Nawo si kwa kere vantu wovawa. Awo nkenye apa ngava limburura mapuro gange kutundilira moBibeli, ano eyi kwa ninkisire nge ni va huguvare unene.”
“Ezuva limwe Elaine kwa pulire nge asi, ‘Wa yi pura asi yikorama kuna kara uhwi wokutunda kwaKarunga ndi?’ Makura yipo na mu limbwilire asi, ‘Nhi na yi pura.’ Makura Elaine yipo ga reserere nge Jesaya 11:6-9. Kutunda opo, ame kwa here kulironga Bibeli, nye simpe kapi na here kugusa nkenye simbapiratjangwa koNombangi daJehova.”
“Momazuva aga ga kweme ko, ame ngani hafere kuzogera kumwe naElaine ntani namugara gwendi Brent. Awo kwa tanterere nge ni rese Buke zaMateusa dogoro Yirugana, yipo ni kwate egano eyi ya hamena mo mokukara Mukriste gousili. Makura yipo na yi rugene. Konyima tupu zosiruwo, ame kwa tamekere kulironga Bibeli naBrent ntani naElaine. Oyo kwa horokere mokatji komvhura zo-2016.”
“Ame ngani ndindire nononkondo yipo ni lironge Bibeli ntani nokuza koSinyanga soUhompa. Ame kwa lizuvhire ruhafo pokulironga eyi azi uyunga Bibeli. Ano konyima zonomvhura dongandi, ame kwa ya gwene ekuho noku ya kara gumwe goNombangi daJehova. Nampili ngomu nina kara nonomvhura 79 ngesi, ame nayidiva asi kuna kugenda monzira zouhunga. Jehova ga tungika nge pokuvatera nge ni hame kepata lyovakareli vendi wouzuni mudima.”
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
