Mugano kwa gu faturura asi: “Nonkango edi a uyunga muntu mokulikida asi usili ana kuuyunga ntani etumbwidiro eli a tura po pokuruganesa Karunga ngombangi zendi.” Ago kuvhura kukara patjangwa ndi kuguuyunga.

Vamwe kugazara asi ayo epuko kugana morwa Jesus kwa uyungire asi: “Walye omu gana [mugano] . . . Nsene ono tanta asi ‘nhi’ yi sikisa mo, ano nsene asi ‘hawe’ yi sikisa mo, komuzonaguli kwelike ayi tundu yokudira kusikisa mo mugano.” (Mat. 5:33-37) Yimo, Jesus ga yi divire asi Veta zaMosesa kwa pulisilire Vaisraeli mokugana ntani vakareli vamwe vaKarunga nawo ngava gana poyiruwo yimwe. (Gen. 14:22, 23; Ex. 22:10, 11) Age hena ga yi divire asi Jehova nage nga gana. (Heb. 6:13-17) Yipo nye, Jesus kapi ga tembe asi nokuvhura si tu gane. Nye age kwa rondwere vantu va dire kugana moyininke ya hana mulyo. Karunga kundindira ko kwetu tu sikise mo eyi atu uyunga.

Yisinke nye no rugana nsene va kupura o gane? Pomuhowo, divilisa nsene asi kuvhura ngo sikise mo eyi ono kugana. Nsene kapi ono divilisa nawa-nawa, wa ha gana. Nonkango daKarunga kuturondora asi: “Hasa kudira kutumwidira, kapisi kumwe neyi yokutumbwidira nye o dire kuyisikisa mo.” (Muud. 5:5) Makura resa Matjangwa aga ga zogera kuhamena mugano ogu ono hara kutura po ntani tokora kuliza nezwi lyoge lyokomutjima eli wa deura. Matjangwa musinke gamwe ga zogera kuhamena nomugano?

Nomugano dimwe kwaliza nompango zaKarunga. Pasihonena, Nombangi daJehova kugana apa ava kwara. Mugara nomukadi kugana komeho zaKarunga ntani nokonombangi nadinye pokulitumbwidira asi: “Ngava li hara, ngava li hafera, ngava li fumadeka ntani siruwo nasinye esi ngava paruka kumwe pevhu.” (Valikwali vamwe kapi ava tumbura nawa nonkango edi domugano, nye Karunga simpe kuyitara asi awo kuna kugana kosipara sendi.) Ano konyima zokugana, awo kukara valikwali ava vana likwara paveta ntani va hepa kuparuka kumwe eparu lyawo nalinye. (Gen. 2:24; 1 Kol. 7:39) Ewapaiko eli lyomugano gononkwara, kwaliza nompango zaKarunga.

Nomugano dimwe kapi da liza nompango zaKarunga. Mukriste gousili kapi ta vhuru kugana yipo a ka popere sirongo sawo moyita ndi a hageke kukarera Karunga. Nsene a yi rugana oyo, ayo ngayi lirwanesa noyipango yaKarunga. Vakriste kapi ‘va hamena kouzuni.’ Yipo nye, kapi tatu vhuru kulihameka momadiro kulizuvha gouzuni ou ntani moyita.—Joh. 15:19; Jes. 2:4; Jak. 1:27.

Nomugano dimwe wa hepa kuruganesa ezwi lyoge lyokomutjima. Poyiruwo yimwe,  komeho tu gane twa hepa kugazadara ko kepukururo lyaJesus eli asi: “Omu futire hompa gwaRoma eyi ya mu hamena, ano Karunga nage yeeyi ya mu hamena.”—Ruk. 20:25.

Pasihonena, tu tante asi Mukriste ana hara kugwana mbapira zepulisiro yipo a ka kare mosirongo sa peke ndi yipo a gwane pasporta, makura ta ya dimburura asi komeho a zi gwane ntudi ga hepa kugana mugano goulimburukwi. Nsene asi mugano gomosirongo oso kuna kara gokutumbwidira a rugane yuma eyi ya lilimba noveta zaKarunga, kuliza nezwi lyendi lyokomutjima eli ga deura, ngano kapisi a gane. Nye nampili ngoso, epangero kuvhura li mu pulisire a rundurure nonkango nakauke yipo yi lize nezwi lyendi lyokomutjima.

Kutulisa po mugano ogu vana rundurura kuvhura kuliza nompango ezi za kara moVaroma 13:1, ezi azi tanta asi: “Nkenye muntu a limburukwe kepangero eli ali mu pangere.” Yipo nye, Mukriste kuvhura a tokore asi ayo kapisi epuko kugana yipo a rugane eyi ga hepa ko Karunga koVakriste.

Ayo ya kara nomulyo koMukriste a ruganese ezwi lyokomutjima nsene va mu pura a gane pokuruganesa yuma yongandi ndi pokuruganesa eligumaguro lyorutu, ngwendi kuzerura ewoko ndi kungumauka komutwe. Varoma womosiruwo sanare ntani vantu worudi ava tumbura asi vaScythians ngava ganesa korufuro mokuhundira nonkondo dokwakarunga gwawo goyita ngosilikidiso asi muntu kuvhura va mu huguvare. Vagereka ngava zerura ewoko meguru apa ngava gana. Pokuyirugana awo va dimbwilire asi pweli munankondo ogu ana kupurakena nokumona eyi vana kuuyunga neyi vana kurugana ntani nogu va hepa kulimburukwa po vantu.

Yimo, mukareli gwaJehova kapi ta vhuru kugana kwankenye sininke esi sa likwatakana noukareli woyipempa. Nye ngapi nsene va kupura mompanguro o kambeke ewoko lyoge poBibeli ntani nokugana yipo o gave umbangi wousili? Moukaro wangoso, kuvhura o tokore kuyirugana, morwa Matjangwa kwa zogera kuhamena vakareli vamwe vaJehova ava va gene pokuruganesa eligumaguro lyorutu. (Gen. 24:2, 3, 9; 47:29-31) Yipo nye, ayo ya kara nomulyo o diworoke asi nsene o gana mugano gwangoso, ove kwa kugana kwaKarunga asi to uyunga usili. Wa hepa kuliwapaikira kuuyunga usili kwankenye epuro eli nava kupura.

Morwa elikwatakano lyetu naJehova mulyo unene, twa hepa kukanderera nokugazadara ko kuhamena mugano ogu tuna hara kutulisa po ntani noku divilisa asi mugano ogo kapi guna kulirwanesa nezwi lyetu lyokomutjima ndi nonompango doBibeli. Nsene ono tokora kugana, wa hepa kuyisikisa mo.—1 Pet. 2:12.