1. Ngapi omu vantu vaJehova womosiruwo sovapositoli va kere monkedi zongwa pwa hana epiyagano?

 APA Jehova a gava sirugana kovantu vendi, age kundindira ko kwawo va si rugane monkedi zongwa zokudira epiyagano. (1 Kol. 14:33) Pasihonena, azo kuna kara mpango zaKarunga asi mbudi zongwa va zi zuvhise uzuni mudima. (Mat. 24:14) Jehova kwa pa Jesus situmbukira sokupitisira sirugana oso. Ano Jesus kudivilisa asi sirugana oso kuna kusirugana monkedi zokudira epiyagano. Apa va tulisire po nombungakriste komavango gokulisiga-siga mosiruwo sovapositoli, vakuronambunga kwa va tulisire po yipo va gave mavyukiso ntani nokupitisira. (Yirug. 14:23) Mbunga zovakuronambunga omu mwa hamenene vapositoli ava va kere moJerusarema, nga zi tura po matokoro aga da hepere kulimburukwa nombungakriste nadinye. (Yirug. 15:2; 16:4) Mokumona asi vanavazinyetu kwa limburukwire komavyukiso ogo, “nombungakriste kwa twikilire kupama mepuro ntani sivaro sado kwa ligwederere nkenye ezuva.”​—Yirug. 16:5.

2. Kutundilira mo-1919, ngapi omu Jehova ga pitisira vantu vendi ntani noku va pa mavyukiso gokutundilira moBibeli?

² Jehova kuna ku twikira kuwapaika vantu vendi neina monkedi zongwa pwa hana epiyagano. Kutundilira mo-1919, Jesus kwa ruganesa kambunga kovagara wovagwavekwa yipo va wapaike sirugana sokuzuvhisa ntani nokugava mavyukiso gokutundilira moBibeli, noku ga gava kovarongwa vaJesus posiruwo souhunga. a  (Ruk. 12:42) Ayo ku yi monenena asi Jehova kuna kutungika sirugana sokambunga oko.​—Jes. 60:22; 65:13, 14.

3-4. (a) Gava sihonena esi sina kulikida uwa wokukara vana tu wapaike monkedi zongwa zahana epiyagano. (b) Yisinke natu ka zogera mosirongwa esi?

³ Ngano kapi va tu wapaika monkedi zongwa za hana epiyagano, ose ngano kapi atu rugana sirugana esi ga tupa Jesus tu rugane. (Mat. 28:19, 20) Pasihonena, ngano asi vanavazinyetu wovagara ava ava pitisire kapi va tura po mawapaiko gokuzuvhisira nomukunda nadinye edi da tumbukira mbungakriste zetu, ngano nkenye ogu kuzuvhisira oku ana hara. Ose ngano kuliruguruka kuzuvhisira monomukunda dimwe, ano edi nomukunda dimwe ngano kapi atu di zuvhisire. Kuvhura o gazadare ko nonkedi dimwe omu atu gwanene mo uwa kweyi va tu wapaika monkedi zongwa zokudira epiyagano.

⁴ Ngwendi moomu Jesus ga wapaikire varongwa vendi monkedi zongwa zokudira epiyagano apa ga kere pevhu, age simpe kuna kutwikira kuyirugana neina. Mosirongwa esi, natu ka konakona sihonena saJesus esi ga tu tulira po ntani nomu mbunga zaJehova azi kwama sihonena sendi. Natu ka lironga hena omu natu yi likida asi twa huguvara unene mombunga zaJehova.

MBUNGA ZETU KUKWAMA SIHONENA SAJESUS

5. Nkedi musinke zimwe omu atu kwama sihonena saJesus? (Johanesa 8:28)

⁵ Jesus kwa lirongerere ko koGuhwe vemeguru eyi na rugana ntani neyi na uyunga. Mbunga zaJehova kukwama sihonena saJesus yipo zi tuvatere tudive youhunga ntani neyi yepuko ntani nokutupa mavyukiso meparu lyetu. (Resa Johanesa 8:28; 2 Tim. 3:16, 17) Ose nkenye apa kugwana madiworokeso gokuresa Bibeli ntani nokutura pasirugana eyi tuna kuresa mo. Ngapi omu atu gwanene mo mauwa apa atu kwama evyukiso eli?

6. Nkedi musinke zimwe zomulyo atu gwanene mo uwa apa atu lirongo Bibeli?

⁶ Ose kugwanena mo uwa wounzi apa atu lirongo Bibeli pokuruganesa yimbapiratjangwa yetu. Pasihonena, ose kuhetakanesa eyi azi rongo Bibeli kumwe nomavyukiso aga aga tundu kombunga zaJehova. Apa atu dimburura asi mavyukiso aga atu gwana kutunda moMatjangwa, ayo kutuninkisa tu huguvare unene mombunga zaJehova.​—Rom. 12:2.

7. Mbudi musinke ga zuvhisire Jesus ntani ngapi mbunga zaJehova azi kwama sihonena sendi?

⁷ Jesus kwa ‘zuvhisire mbudi zongwa zoUhompa waKarunga.’ (Ruk. 4:43, 44) Ntani Jesus kwa pangerere varongwa vendi va zuvhise kuhamena Uhompa. (Ruk. 9:1, 2; 10:8, 9) Neina navenye ava va hamena kombunga zaJehova kuzuvhisa mbudi zoUhompa, vakare asi kupi vatunga ndi yitumbukira yokusika kupi va kara nayo mombunga zaJehova.

8. Mfumwa musinke twa kara nazo?

⁸ Azo mfumwa kwetu kweyi twa kara nositumbukira sokutantera ko wopeke kuhamena Uhompa waKarunga. Kapisi nkenye gumwe ga kara nomfumwa ozo. Pasihonena, apa Jesus ga kere pevhu, age kapi ga pulisilire nompepo donondona di uyunge kumuhamena. (Ruk. 4:41) Neina, komeho muntu a tameke kuzuvhisa noNombangi daJehova, ga hepa kuparuka monkedi ezi azi hafesa Jehova. Ose kulikida rupandu rorunene komfumwa ezi twa kara nazo zokuzuvhisira vantu kuhamena Uhompa waKarunga kenye oku tuna kara ntani nkenye siruwo yina ku tu tompoka. Ose tuna hara kukara ngwendi Jesus pokurugana paapa twa hulira yipo tu zuvhisire wopeke ntani noku va ronga usili.​—Mat. 13:3, 23; 1 Kol. 3:6.

9. Ngapi omu mbunga zaJehova a zi divisa edina lyaKarunga?

⁹ Jesus kwa divisire edina lyaKarunga. Jesus kwa kanderere koGuhwe vemeguru pokuuyunga asi: “Na va divisa edina lyoge.” (Joh. 17:26)  Mokukwama sihonena saJesus, mbunga zaJehova kurugana paapa za hulira yipo zi vatere wopeke vadive edina lyaKarunga. Nkedi zimwe omu mbunga zaJehova za yi rugana eyi kuna kara kupitira moBibeli zoNew World Translation. MoBibeli ezi zetoroko lyepe, kwa tengwidira mo edina lyaKarunga pomavango apa va ligusa meraka eli va zi tjenge. Ano Bibeli ezi kwa zi toroka nazinye ndi ruha rwazo momaraka gokupitakana 270. Mokambapira Mauzera gomoNonkango daKarunga mosiparatjangwa sokuhova nesi sauvali, no lironga mo yoyinzi kuhamena konda zeyi edina lyaKarunga va li gusira moBibeli ntani nomu va li tengwidira mo. Mosiparatjangwa sauvali kulikida maumbangi asi edina lyaKarunga kwa moneka yikando yokusika po-237 moMatjangwa goRugereka.

10. Yisinke ono lirongere ko kweyi ga uyunga mukadi ogu ga tunga moMyanmar?

¹⁰ Ngwendi Jesus tuna hara kuvatera vantu wovanzi yipo va dive edina lyaKarunga. Apa mukadi gonomvhura 67 ogu ga tunga moMyanmar ga lirongere asi Karunga ga kara nedina, age kwa tamekere kulira nokuuyunga asi: “Esi kuna kara sikando sange sokuhova meparu lyange kuzuvha asi edina lyaKarunga yilyo Jehova. . . . Ove kwa ronga nge sininke somulyo unene esi na dira kulironga rumwe.” Ngomu tuna kuyimona mosihorokwa esi, apa vantu ava lirongo kuhamena edina lyaKarunga, ayo kutjindja eparu lyawo.

TWIKIRA KUHUGUVARA MOMBUNGA ZAJEHOVA

11. Ngapi omu vakuronambunga nava yi likida asi va huguvara mombunga zaJehova? (Tara hena efano.)

¹¹ Nkedi musinke zimwe omu vakuronambunga ava yi likida asi va huguvara mbunga zaJehova? Nsene kuna kugwana mavyukiso, vakuronambunga va hepa ku ga resa nawa ntani nokurugana paapa va hulira yipo va ga ture pasirugana. Pasihonena, awo kapi ava gwana tupu mavyukiso omu nava rugana maruha gekepongo ndi omu nava kanderera mombungakriste, nye hena omu nava vhura kupakera mbili nonzwi daKristusa. Apa vakuronambunga ava tura pasirugana mavyukiso nagenye gokutunda kombunga zaJehova, vanavazinyetu kulizuvha asi Jehova ga va hara ntani ku va pakera mbili.

12. (a) Morwasinke natu ruganena kumwe nava ava tu pitisire? (Vahebeli 13:7, 17) (b) Morwasinke natu demenena koyikara yoyiwa yava ava tu pitisire?

¹² Apa atu gwana mavyukiso gokutunda kovakuronambunga, twa hepa ku ga kwama nomutjima nagunye. Nsene tu yi rugana oyo, ayo ngayi vatera ava ava pitisire yipo va sikise mo sirugana sawo. Bibeli kutukorangeda tu limburukwe nokutambura mavyukiso gava ava tu pitisire. (Resa Vahebeli 13:7, 17.) Poyiruwo yimwe kuvhura yi tu digopere. Morwasinke? Morwa vagara ava kapi va sikilira mo. Nye nampili ngoso, nsene tu demenena koyikara yawo yoyidona mevango lyoku demenena koyikara yawo yoyiwa, ose ngoso kuna kukwatesa ko nonkore detu. Monkedi musinke? Ose kapi ngatu huguvara mbunga zaJehova, ano eyi yiyo dina hara nonkore detu tu rugane. Yisinke natu vhura kurugana yipo tu dimburure ntani nokunyokera po yipempa yokutundilira kononkore detu?

WA HA NINKISA WOPEKE VA KU NINKISE O ZUMBANESE EHUGUVARO LYOGE MOMBUNGA ZAJEHOVA

13. Ngapi omu nonkore daJehova da hetekera ko kuninkisa mbunga zaJehova zi moneke asi azo mbunga zondona?

¹³ Varwanesi usili kuhetekera ko kuninkisa yininke yoyiwa yomombunga zaJehova yi moneke ngwendi yidona. Pasihonena, ose twa lironga moBibeli asi Jehova kundindira ko kovakareli vendi va kare vana kuhuka parutu, panandunge ntani noku mu karera monkedi ezi azi mu hafesa. Age ku ndindira ko kwa nkenye muntu ogu ana kudira kulitezurura ga kara nonkareso zokunyata, va mu guse mo mombungakriste. (1 Kol. 5:11-13; 6:9, 10) Ose kulimburukwa kompangera ozo. Nye varwanesi kuruganesa mpango ozo  poku tu rundira asi kapi twa hara vantu, ose kuvapangura ntani asi kapi atu pulisire nkenye ogu ga lisiga nose.

14. Yilye ogu a retesa po nombudi doyipempa kuhamena mbunga zaJehova?

¹⁴ Dimburura ntudiliro zomarwaneso. Satana yige a hanesa yipempa kuhamena mbunga zaJehova. Age “guhya yimpempa.” (Joh. 8:44; Gen. 3:1-5) Yipo nye, twa hepa ku yi ndindira asi Satana nga ruganesa vantu va hanese yipempa kuhamena mbunga zaJehova. Ano eyi yiyo ya horokerere Jesus noVakriste wokuhova.

15. Yisinke vampitisili womaukarelikarunga va rugene Jesus ntani novarongwa vendi?

¹⁵ Nampili ngomu MunaKarunga Jesus ga sikilire mo ntani nokurugana yitetu yoyinene, Satana kwa ruganesere vantu vamwe yipo va hanese yipempa kumuhamena. Pasihonena, vampitisili womaukarelikarunga kwa tanterere vantu asi nonkondo edi ga ruganesere Jesus a tjide mo nompepo donondona kwa di gwene ‘komupangeli gonompepo donondona.’ (Mar. 3:22) Apa Jesus ga kere mompanguro, vampitisili womaukarelikarunga kwa mu rundilire asi age muswauli ntani awo kwa korangedere mbunga zovantu yipo va mu dipage. (Mat. 27:20) Konyima varongwa vaJesus kwa zuvhisire mbudi zongwa, ano varwanesi “kwa zedagwilire vantu wokonomuhoko dapeke” va rwanese Vakriste owo. (Yirug. 14:2, 19) Ruhungu romo-1 Sindimba 1998, kwa faturura kuhamena etjangwa lyomoYirugana 14:2 asi: “Ava va kwatesere ko Satana kwa nyokere mbudi ezi va zuvhisire Vakriste ntani awo kwa uyungire yininke yoyidona kuvahamena, yipo vantu va dire ku va purakena ntani noku va nyenga.”

16. Yisinke twa hepa kudiworoka nsene tu zuvha nombudi doyipempa?

¹⁶ Satana simpe kuna kutwikira kuuyunga yipempa neina. Neina age simpe “kupukisa uzuni  naunye.” (Ehor. 12:9) Nsene o zuvha nombudi donondona kuhamena mbunga zaJehova ndi vanavazinyetu ava ava pitisire, diworoka omu nonkore daKarunga da tekwire Jesus ntani novarongwa vendi. Jesus kwa uyungire asi vantu ngava hepeka ava ava karere Jehova ntani ngava uyunga yipempa kuvahamena. Ano eyi yiyo yina kuhoroka neina. (Mat. 5:11, 12) Ose kapi ngatu pura nombudi doyipempa nsene tudiworoka asi yilye ogu ana ku di hanesa ntani nsene tu rugana ko yuma tu lipopere. Ngapi omu natu lipopera nyamwetu?

17. Ngapi omu natu nyokera po kutukoresa nombudi doyipempa? (2 Timoteusa 1:13) (Tara hena kakende “ Yisinke natu rugana nsene tu gwana ndi nsene tu zuvha nombudi doyipempa.”)

¹⁷ Nyokera po nombudi doyipempa. Mupositoli Paurusa kwa geve mavyukiso gokuvyukilira kuhamena eyi na tu rugana nsene tu zuvha nombudi doyipempa. Age kwa tanterere Timoteusa a ‘korangede nokurondora vantu’ va nyokere po ‘kupurakena komasanseko goyimpempa.’ (1 Tim. 1:3, 4; 4:7) Nampili ngomu munonagona a tora sininke pevhu noku si tura mokana kendi, nye mukondi ogu ga diva siponga esi sa kara mo kapi ta vhuru kuyirugana oyo. Ose kunyokera po nombudi doyipempa morwa twa diva oku adi tundu. Ose kukwaterera kononkango “donongwa” dousili.​—Resa 2 Timoteusa 1:13.

18. Ngapi omu natu yi likida asi twa huguvara mombunga zaJehova?

¹⁸ Nonkedi nonzi omu mbunga zaJehova azi honene Jesus, nye mosirongwa esi twa zogere ko nonkedi ntatu. Ngomu ono kulironga Bibeli, hetekera ko kudimburura nonkedi dimwe donozi omu mbunga zaJehova azi kwama sihonena saJesus. Vatera wopeke mombungakriste zeni yipo va huguvare unene mombunga zaJehova. Ntani twikira ku yi likida asi ove wa huguvara mombunga zaJehova poku mu karera noulimburukwi ntani nokukara pepi nombunga ezi ana kuruganesa yipo a sikise mo sitambo sendi. (Epis. 37:28) Tu twikireni kukara norupandu kompito ezi twa kara nazo zokukara mokatji kovantu vaJehova veharo ntani wovalimburukwi.