Ame kwa hampuruka nge mo-1955 ntani ose kwa tu retere vamati vatatu, ame nyame gomunona po. Ame kwa kulira pepi nefuta lyokombindakano zaFinland, mukunda ogu vana kutumbura ngesi asi sitata saVantaa.

Oyina kwa va kuhwire nga gumwe goNombangi daJehova, nomvhura dongandi komeho va rete nge. Nye nampili ngoso, otate ngava rwanesa usili ntani kapi ngava pulisire oyina va lironge nose Bibeli ndi va ze nose komapongo. Apa otate ngava dili kukara po pembo, oyina ngava tu rongo Bibeli.

Kutundilira unona wange, ame kwa limburukwire Jehova. Pasihonena, apa na kere nonomvhura ntambali, mitili gwetu kwa handukire apa na nyokere kulya yikuki eyi va rugana nohonde ava tumbura asi verilättyjä. Age kwa geme nompanda dange newoko limwe yipo a zahameke nge, ano kewoko ekwawo ta li ruganesa a sininike kulisa nge sikuki noforoko. Ya tompokere nge kuganda foroko mokuwoko kwendi.

Otate kwa dogorokere apa na kere nonomvhura 12. Konyima zoyo, yipo na tamekere kuza komapongo. Vanavazinyetu womombungakriste kwa likidire elituromo mwange ntani ayo kwa vaterere nge ni hedere Jehova pepi. Ame kwa tamekere kuresa Bibeli nkenye ezuva nokulironga yimbapiratjangwa yetu nelituromo. Mokumona asi ame kwa rugene yininke eyi, ayo kwa vaterere  nge ni gwane ekuho nonomvhura 14, mo-8 Siwogedi 1969.

Konyima zokumana sure, yipo na tamekere uzuvhisi wokukarerera. Moyivike tupu yongandi, ame kwa dirukilire oku kwa kere hepero zovazuvhisi moPielavesi, pepi nopokatji kosirongo saFinland.

Ame kwa ka li gwene naSirkka moPielavesi, ogu gaya kere mukadange. Ame kwa mu here morwa age kwa kere muntu gokulinunupika ntani ga here unene Jehova. Age kapi nga kondjere efumano ndi emona. Natuvenye kwa here kuruganena Jehova mwa nkenye sirugana esi va tu pere. Ose kwa likwere mo-23 Nsinano, 1974. Mevango lyokuza kohoneymoon, ose kwa zire oku kwa hepere evatero lyenene lyovazuvhisi.

Ketamekero lyononkwara detu, Jehova kwa tu likidire asi age nga pakera mbili yihepwa yetu nsene tu tura Uhompa muhowo. (Mat. 6:33) Pasihonena, ose kapi twa kere netuwa apa twa kere moKarttula. Pomuhowo ose nga tu zi morugendo nombasikora. Nye nampili ngoso, pokufu kwa kere ko utenda wounene morwa materengenze. Mokuninka asi tu zuvhisire momukunda gomunene, twa hepere etuwa. Nye kapi twa kere noyimaliwa yokuliranda.

Twa hana kuyindindira, mukurwange gomugara kwa ya tu dingwire. Age kwa tu pere etuwa lyendi. Etuwa nalyo kwa li futilire insurance. Ose kwa hepere tupu kuranda maholi. Konyima zoyo, twa kere netuwa eli twa hepere.

Jehova kwa tu likidire asi age nga pakera mbili yihepwa yetu yopanyama. Sirugana setu kwa kere sokutura Uhompa muhowo.

Ngomu twa kere koSikora zoVazuvhisi wokukarerera mo-1978, Raimo Kuokkanen, a gumwe govarongi vetu kwa tu pulire tu ture mo ehundiro lyokuza koSikora zaGiliyata. Ose kwa tamekere kulironga eraka lyoRuingilisa nositambo asi nose ngatu wapere kuza kosikora ozo. Nye nampili ngoso, mo-1980 komeho tu ture mo ehundiro, ose kwa tu zigidire tu ka rugane koBeteli zomoFinland. Posiruwo sina, vaBeteli kapi ngava tura mo ehundiro lyokuza koSikora zaGiliyata. Nye ose kwa here kukaruganena oku ga tu harerere  Jehova, nye kapisi oku twa here. Ose kwa tambwire ezigido olyo. Nampili ngoso, ose kwa twikilire kulironga Ruingilisa yipo ngatu vhure kutura mo ehundiro lyokuza koSikora zaGiliyata nsene nga zi moneka mpito.

Konyima zonomvhura dongandi, Mbungagendesi kwa pulisilire vaBeteli asi nawo kuvhura kutura mo ehundiro lyokuza koGiliyata. Yipo twa tulire mo ehundiro usimbu-simbu, nye kapi ya tente asi kapi twa haferere yirugana yomoBeteli. Nye ose kwa tulire mo ehundiro olyo morwa kwa here tu ka vatere oku kwa hepere evatero lyenene. Kwa tu tambwire koSikora zaGiliyata ntani kwa kere moSikora zaGiliyata zau-79 mwaSitarara mo-1985. Ose kwa tu tumine koColombia.

Situmbukira setu sokuhova moColombia kwa kere sokurugana koBeteli. Ame kwa rugene paapa na hulira mosirugana sange, nye konyima zomvhura zimwe, ame kwa lizuvhire asi na hepa ko sirugana sapeke. Aso kwa kere sikando sange sokuhova ntani sokuhulilira mokupura ko sirugana sapeke. Konyima zoyo, ose kwa tu tumine tu ka kare vatumwa mositata saNeiva, momukunda gwaHuila.

Ame ngani hafere kuzuvhisa nkenye apa. Mokumona asi ame kwa kere muzuvhisi gokukarerera gomudike moFinland, poyiruwo yimwe ngani zuvhisa kutundilira ngurangura zonene dogoro ngurova. Mokumona asi ose kwa kere valikwali wovape, name naSirkka ngatu zuvhisa ezuva nalinye nkenye ezuva. Apa ngatu zuvhisire konomukunda dokoure, poyiruwo yimwe ngatu rara metuwa lyetu. Eyi kwa tu pere siruwo sosinzi ntani ayo kwa tu vaterere tu tameke kuzuvhisa nosiruwo.

Ngovatumwa, ose kwa rugene unene mosirugana sokuzuvhisa ngwendi moomu ngatu rugana unene nare. Mombungakriste zetu kwa kere mo vazuvhisi wovanzi ntani vanavazinyetu womoColombia kwa kere nefumadeko, neharo ntani norupandu.

Sitata saNeiva omu ngatu zuvhisire, kwa likere pepi nonodoropa omu mwa dilire kukara Nombangi. Ame kwa kere nosinka kuhamena omu mbudi zongwa ngazi ka sika komavango ogo. Nye nampili ngoso, mokumona asi komavango ogo kwa kere ko yita, ayo kwa kere siponga kovantu ava va dilire kutunga konodoropa odo. Yipo na kanderere asi gumwe gomonodoropa odo a kare Mbangi. Ame kwa gazarere asi muntu ogo ga hepere kutunga moNeiva yipo a lironge usili. Yipo nye, ame kwa kanderere hena asi muntu ogo nga kare nelikwatakano lyenene naJehova konyima zokugwana ekuho ntani nokutengura kodoropa zawo a ka zuvhisire ko. Jehova ga kere nonkedi zimwe zapeke kupitakana omu nayi gazarere.

Konyima tupu zosiruwo yipo na tamekere kulironga nomudinkantu gumwe gomugara Fernando González. Age kwa tungire modoropa zimwe omu mwa dilire kukara Nombangi. Fernando kugenda sinano sokupitakana ponokilomita 50 a ze koyirugana koNeiva. Age nga liwapaikire nawa nkenye apa ngani lirongo nendi ntani age kwa tamekere kuza komapongo nagenye. Kutundilira mosivike sendi sokuhova esi ga tamekere kulironga Bibeli, Fernando nga zigida ko wopeke womodoropa zawo yipo a ya va ronge eyi ga lirongere moBibeli.

 Fernando kwa gwene ekuho mwaMurongagona mo-1990 konyima zomakwedi ntazimwe apa ga tamekere kulironga. Kutunda opo makura yipo ga kere muzuvhisi gokukarerera. Mokumona asi moAlgeciras mwa kere Mbangi zimwe, makura Beteli yipo za tumine ko vazuvhisi wosiruwo nasinye. MwaMurongankuru mo-1992 yipo va tulisire po mbungakriste modoropa ozo.

Ngoso Fernando nga zuvhisire tupu modoropa zawo ndi? Hawe! Konyima zokukwara, nage namukadendi kwa dirukilire modoropa zaSan Vicente del Caguán omu mwa dilire kukara Nombangi. Awo kwa ka vaterere mokukatulisa po mbungakriste. Mo-2002, Fernando kwa mu tulire a kare mutareli gonombungakriste ntani nage namukadendi kwa twikilire mosirugana esi dogoro ngesi.

Kosihorokwa esi na lirongera ko eyi ya karera mulyo kukanderera yuma yongandi eyi ya hamena koyitumbukira yetu yomombunga. Jehova kurugana eyi natu dira kuvhura kurugana. Nye yomulyo po yeeyi asi mwene Jehova a zangura.​—Mat. 9:38.

Mo-1990 yipo va tu tulire mosirugana sokudingura nombungakriste. Edinguro lyetu lyokuhova kwa kere mositata esi ava tumbura asi Bogotá. Ose kwa kere nowoma asi kapi ngatu sikisa mo nawa sirugana setu. Name namukadange ose vantuuntu tupu ava va dilire kudiva yininke yoyinzi. Ose kapi twa yikire kutunga modoropa omu ngava viyauka unene. Nye nampili ngoso, Jehova kwa sikisire mo etumbwidiro lyendi eli lya kara moVafilipi 2:13, ali tanta asi: “Karunga yige a mu pe eharo nononkondo dokusikisa mo nayinye eyi ga hara.”

Ano konyima kwa tu tumine tu ka dingure moMedellín, sitata esi kani tumbura ketameko. Vantu vamo va yika kumona yirwanangana moyitaura ntani kapi ngayi va tukukisa. Pasihonena, sikando simwe apa na lirongere Bibeli nagumwe, ame kwa zuvhire muhagaro gouta ponze zembo eli na dingwire. Hambara ni wombomane pevhu, nye murongwa gwange goBibeli kwa twikilire kuresa paragarafu age ana litura. Apa ga mene kuresa, age kwa zire ponze. Konyima zosiruwo, age kwa ka simbire vanona vavali nokuuyunga asi, “Mbili, kani zi ni ka simbe vana vange.”

Pwa kere hena yiruwo yimwe apa twa kere mosiponga. Sikando simwe, ngomu twa rugene tunda embo zende embo, mukadange kwa dukilire nge age ana samuka. Age kwa uyungire asi kweli ogu ana muroya. Ame kwa tukukire. Nye nampili ngoso, konyima ose kwa ya dimbwilire asi mugara ogo kapisi Sirkka ga royere nye kwa royere mugara ogu ga pitire pepi nendi.

Ngomu sa pitire siruwo, ose kapi twa tjilire ukorokotji. Ayo kwa tu korangedere pokumona uradi ou va likidire vanavazinyetu womodoropa ozo ava va li gwanekerere nomaukaro ngwendi aga ntani nagamwe goudigu unene. Ose kwa yi dimbwilire asi nsene asi Jehova ga va vaterere nose nga tu vatera. Ose ngatu tambura nkenye apa mapukuroro govakuronambunga womomukunda ogo ntani kwa rugene ko yuma yipo tu li popere nokusiga nayinye momawoko gaJehova.

 Maukaro gamwe kapi ga kere siponga unene ngwendi moomu twa yi gazarere. Sikando simwe ame kwa zuvhire ngwendi vakadi vavali vana kuliswaura ponze zembo eli na dingwire. Ame kapi na here kutarera omu vana kuliswaura, nye mwenya embo kwa ninkire nge ni hwilire mowaranda zonzugo. Ano konyima yipo twa dimbwilire asi nani yidira yivali yiyo ya temwinine omu vamusinda va litangwisire.

Mo-1997, kwa tulire nge ni kare murongi goSikora zokudeura vakwafimbunga. b Ame nkenye apa ngani hafere kukara poSikora ezi, nye kapi na gazarere rumwe asi name kuvhura ngani kare nositumbukira sokuronga mosikora ezi.

Konyima zosiruwo kwa tulire nge ni kare mutareli gonomukunda. Apa lya hege po ewapaiko olyo, ame kwa kere hena mutareli gonombunga. Monomvhura nadinye edi dokupitakana po-30, ame kwa hafera sirugana sokudeura vakwafimbunga nokukara mutareli gonombungakriste. Yitumbukira eyi kwa retera nge mauwa gomanzi. Nye nampili ngoso, kapisi nayinye ya kere ureru. Tanko ni faturure.

Ame muntu gononkondo. Ano eyi kwa vaterere nge ni funde po maukaro goudigu. Nampili ngoso, poyiruwo yimwe ame kwa here kuhetekera ko kukohonona po maudigu gomombungakriste. Pamwe ame ngani tantere vamwe womombungakriste va likide eharo nougomoki kovakwawo. Nye ame kapi ngani likida yikara oyo.​—Rom. 7:21-23.

Maupirankondo gange kwa ninkisire nge poyiruwo yimwe ni guve. (Rom. 7:24) Sikando simwe ame kwa kanderere kwaJehova asi nina hara kusiga sirugana esi soutumwa nokutengura koFinland. Ngurova ozo, ame kwa zire kepongo. Ekorangedo eli na ka gwene kwa ninkisire nge ni twikire nositumbukira sange ntani nokufunda po maupirankondo gange. Nampili ngesi ame kutetuka omu Jehova ga limbwilire ekanderero lyange. Ntani hena ame kupandura monkedi omu ga vatera nge ni nyokere po maupirankondo gange.

Name naSirkka kupandura unene Jehova kweyi twa gwene situmbukira sokumuruganena hambara eparu lyetu nalinye mosirugana sosiruwo nasinye. Ame kupandura hena Jehova kweyi ga pange mukadi ogu ga kara neharo noulimburukwi monomvhura nadinye edi.

Ntaantani ni gwanese 70 ntani ntaantani ni sige situmbukira sange sokuronga nokutarera nombungakriste. Nye nampili ngoso, ayo kapi ayi dompesa nge. Morwasinke? Na yi pura nawa-nawa asi eyi ayi hafesa po Jehova unene kuna kara kumukarera nelinunupiko ntani nokumuhamberera kutundilira komutjima neharo ntani norupandu. (Mika 6:8; Mar. 12:32-34) Kuhamberera Jehova kapi ayi tanta asi twa hepa kukara noyitumbukira yomulyo.

Nsene ni diworoka yitumbukira eyi na hafera, ame kudiworoka asi kapi na yi gwene morwa asi ame mulyo kupitakana wopeke ndi asi morwa kwa kere noudivi wounene wokulikarera. Nye ame kwa gwene yitumbukira oyo konkenda zaJehova. Age kwa pere nge yitumbukira eyi nampili ngomu na kere nomaupirankondo gange. Nayi diva asi Jehova kwa vaterere nge ni sikise mo yitumbukira eyi. Monkedi ezi, maupirankondo gange kwa ninkisa Karunga a vatere nge unene.​—2 Kol. 12:9.