Wa yi diva ndi?
Morwasinke vagara vamwe wovanayirongo va hamenene movakwayita vaNdafita?
VAGARA vamwe wovanayirongo ava va hamenene movakwayita vaNdafita kuna kara Sereki gomoAmoni, Uliya goMuheti, ntani Itima gomoMowaba. a (1 Hist. 11:39, 41, 46) Movakwayita vaNdafita kwa hamenene mo hena ‘Vakereti ntani Vagata.’ (2 Sam. 15:18) Ayo kumoneka asi Vakereti kwa litundakanene noVafilisiti. (Hes. 25:16) Vagata kwa tundilire mositata soVafilisiti moGata.—Jos. 13:2, 3; 1 Sam. 6:17, 18.
Morwasinke Ndafita ga pulisilire vagara ava va kare vakwayita vendi? Age ga yi divire nawa nawa asi awo kwa mu limburukwire nye unene po kwa limburukwire Jehova. Pasihonena, Bibeli zimwe kwa uyunga kuhamena Vakereti asi: “Apa Ndafita nga pangere, awo kwa twikilire ku mu limburukwa nampili apa nga ligwanekere nomaukaro goudigu unene.” Ngapi omu va likidire ulimburukwi wawo? Apa “Vaisraeli” va zumbire Ndafita nokukwama ‘mulingilingi gedina Seba’ awo kwa twikilire kukara naNdafita ntani awo kwa mu vaterere mokuhagekesa po urwanesi ou ga tamekere Seba. (2 Sam. 20:1, 2, 7) Sikando simwe, munaNdafita Adoniya kwa here kukara hompa pevango lyaSaromo. Nye nampili ngoso, Vakereti kwa twikilire kulimburukwa Ndafita ntani kwa vaterere Saromo ogu ga horowere Jehova a kare hompa.—1 Vah. 1:24-27, 38, 39.
Munayirongo gumwe ogu ga limburukwire Ndafita kuna kara Itayi goMugata. Itayi ntani novakwayita vendi 600 kwa kwatesere ko hompa Ndafita apa munaNdafita gomugara Abisaromo ga ninkisire vantu va mu ninke a kare hompa pevango lyaNdafita. Ndafita kwa tanterere Itayi asi mokumona asi age kwa kere munayirongo kapi ta vhuru kumurwira po. Nye Itayi ta limburura asi: “Hompa, tani ku gana medina lyaHOMPA asi, ngani ku kwama-kwama nkenye oku ngo za, nampili kufa, kufa tupu.”—2 Sam. 15:6, 18-21.
Itayi kwa limburukwire Ndafita, ogu ga horowere Jehova a kare hompa
Nampili ngomu Vakereti ntani noVagata va kere vanayirongo, awo kwa dimbwilire asi Jehova kuna kara Karunga gosili ntani age kwa horowere Ndafita. Ndafita ga kere norupandu kweyi va mu vaterere vagara owo wovalimburukwi.
a Veta zaKarunga ezi za kara mwaDeuteronomium 23:3-6 kwa silikire Vaamoni noVamowaba mokudira kulipakerera novantu vaJehova. Nampili ngoso, ayo kwa monekere asi veta ezi kwa tembe kovantu navenye womomuhoko ntani kapi ga silikire vanayirongo va dire kukara kumwe novantu vaKarunga. Tara buke Insight on the Scriptures, Volume 1, epe. 95.
