1. Ngapi ava lizuvhu vamwe apa ava uyunga nava wopeke mokuzuvhisa? (Tara hena efano.)

 NGOVANTU vaJehova, ose kuzuvhisira ko wopeke morwa twa hara Guhyetu Jehova ntani morwa tuna hara kuvavatera yipo va mu dive. Sinzi sovazuvhisi kuhafera sirugana sokuzuvhisa. Ano vamwe kuvadigopera kugwana ruhafo mosirugana sokuzuvhisa. Morwasinke? Morwa vamwe kuvhura va kare nomuga ntani kuvhura va lizuvhe asi awo kapisi varongi wovawa. Vamwe kulizuvha udona kuza momambo govantu va hana kuvazigida. Vamwe kutjira asi tava va handukire. Vamwe kwa va ronga va nyokere po kuhandukisa wopeke. Nampili ngomu va hara Jehova unene, kuvadigopera kuzuvhisa mbudi zongwa kovantu ava va dira kudiva. Nye awo va dimburura omu sirugana esi sa kara nomulyo ntani awo kulihameka mo nkenye apa mokuzuvhisa. Jehova kuvahafera unene.

2. Morwasinke no dilira kudompa mutjima nsene kukudigopera kugwana ruhafo mokuzuvhisa?

² Poyiruwo yimwe ayo kukudigopera kugwana ruhafo mosirugana sokuzuvhisa morwa malizuvho ogo ndi? Nsene yimo, ya ha kudompesa. Nsene ove kulizuvha woma, ayo kulikida asi wa linunupika ntani ayo kulikida asi kapi ono hara kuuyunga unene novantu. Ntani ayo kulikida asi kapi ono hara kulipatana novantu. Kwato ogu ana hara kuhandukisa wopeke, unene po nsene age kuna kuhetekera ko kuruganena uwa wopeke. Guhyetu Jehova ga diva nawa-nawa maudigu aga o ligwanekere nago ntani ana hara kukupa evatero eli ono hepa. (Jes. 41:13) Mosirongwa esi, natu ka zogera ko nonkedi ntano omu natu nyokera po kukara nomalizuvho gangoso ntani omu natu vhura kugwana ruhafo mokuzuvhisa.

 PULISIRA NONKANGO DAKARUNGA DI KU NKONDOPEKE

3. Yisinke ya vaterere muporofete Jeremiya yipo a zuvhisire ko wopeke?

³ Mosiruwo sanare, mbudi zokutunda kwaKarunga kwa nkondopekere vakareli vendi apa va kere noyitumbukira youdigu eyi va hepere kusikisa mo. Tu tareni sihonena somuporofete Jeremiya. Age kwa kere nosinka apa Jehova ga mu pere situmbukira sokuzuvhisa. Age kwa tente asi: “Ame nokuvhura si kuuyunga, simpe ni munona unene.” (Jer. 1:6) Yisinke ya mu vaterere a kare nouradi wokuzuvhisa? Age kwa gwene nonkondo moNonkango daKarunga. Age kwa uyungire asi: “Makura mbudi zoge tazi fana ngwendi mundiro guna kutwera mwange. Ame kukambadara ni zi mine.” (Jer. 20:8, 9) Nampili ngomu Jeremiya ga kere momukunda goudigu, mbudi ezi va mu pere yipo a ka zi zuvhise kwa mu pere nonkondo edi ga hepere yipo a sikise mo sirugana sendi.

4. Yisinke ayi horoka apa atu resa Nonkango daKarunga nokuteda ko? (Vakorosi 1:9, 10)

⁴ Vakriste kugwana nonkondo edi vana hepa mononkango daJehova, edi atu gwana moBibeli. Apa mupositoli Paurusa ga tjangerere mbungakriste zomoKorosi, age kwa uyungire asi kulironga yoyinzi kuhamena mpango zaJehova, nga yi vatera vapuli vakwawo va “twikire kuyima mwankenye yirugana yoyiwa.” Ano monkedi ozo, ngava genda kumwe naKarunga. (Resa Vakorosi 1:9, 10.) Yirugana oyo yoyiwa, kwa kwatera mo kuzuvhisa mbudi zongwa. Yipo nye, apa atu resa Nonkango daKarunga nokuteda ko, ayo kunkondopeka epuro lyetu mwaJehova. Ntani ose kuyakwata egano eyi ya karera nomulyo tu zuvhise kuhamena Uhompa waJehova.

5. Ngapi natu gwanena mo uwa pokuresa Bibeli ntani pokulironga?

⁵ Mokugwanena mo uwa moBibeli, twa hepa kunyokera po kugenderera kuresa nokulironga ndi kuteda ko. Nye twa hepa kuliwora. Nsene o resa etjangwa eli ono kudira kukwata egano, wa ha rundurukira kweli lyapeke. Nye kuvhura o ruganese Watch Tower Publications Index ndi Buke zepaparo zoNombangi daJehova, yipo o gwane mauzera kuhamena velise ozo. Nsene o liwora ngomu ono ku lironga, ove ngo yi pura nawa-nawa asi eyi za uyunga Bibeli usili. (1 Tes. 5:21) Ngomu ngo yi pura nawa-nawa, yimo hena ngo hafera kuzuvhisira ko wopeke eyi wa lironga.

LIWAPAIKIRA NAWA MOKUZUVHISA

6. Morwasinke natu liwapaikilira nawa mokuzuvhisa?

⁶ Nsene no liwapaikira nawa mokuzuvhisa, ove kapi ngo kara nosinka sosinene apa ngo zogera nava wopeke. Jesus kwa vaterere varongwa  vendi va liwapaikire, komeho zokuvatuma va ze mokuzuvhisa. (Ruk. 10:1-11) Mokumona asi va tulire pasirugana eyi ga va rongere Jesus, awo va rugene yininke yoyinzi yoyiwa, ano eyi ya va reterere ruhafo.​—Ruk. 10:17.

7. Ngapi omu natu liwapaikira mokuzuvhisa? (Tara hena efano.)

⁷ Ngapi natu liwapaikira mokuzuvhisa? Twa hepa kugazadara ko eyi tuna hara ku ka uyunga ntani nokuuyunga mononkango danyamwetu monkedi omu nayi vhura kuzuvhika nawa. Ntani ayo mulyo unene nsene tu gazadara ko nonkedi dimwe omu vantu ava tara mbudi zetu ntani nomu natu vhura ku va limburura. Yipo nye, apa natu uyunga novantu, kuvhura tu hetekere ko kulitura, kumenya-menya ntani nokutulisa po ukaume.

8. Monkedi musinke Vakriste va kara ngwendi yipako yerova eyi va tumbura mosifanekeso somupositoli Paurusa?

⁸ Mupositoli Paurusa kwa tanterere vapuli vakwawo asi: “Nampili ngomu twa kara ngwendi yipako yerova, ose kwa kara nougawo ou.” (2 Kol. 4:7) Ugawo musinke owo? Aso sirugana sokuparura nomwenyo dovantu pokuzuvhisa mbudi zoUhompa. (2 Kol. 4:1) Yisinke yipako yerova? Ayo kwa fanekesa vakareli vaKarunga, ava ava tantere ko wopeke mbudi zongwa. Mosiruwo saPaurusa, varandesi ngava ruganesa tundimbe yipo va tutise ko yininke yomulyo ngwendi nondya, vhinyu ntani yimaliwa. Mokulifana, Jehova kwa tu huguvarera mbudi zongwa. Nevatero lyaJehova, ose kuvhura tu gwane nonkondo edi tuna hepa yipo tu twikire kuzuvhisa.

KANDERERA YIPO O KARE NOURADI

9. Ngapi natu nyokera po kutjira vantu ndi kukara nowoma asi kapi tava tu purakene? (Tara hena efano.)

⁹ Poyiruwo yimwe, ose kuvhura tu tjire vantu ndi tu kare nowoma asi kapi nava tu purakena. Ngapi natu vhura kunyokera po udigu owo? Tu tareni ekanderero lyovapositoli apa va va pangerere asi kapisi va zuvhise. Mevango lyokukara nowoma, awo kwa pulire Jehova yipo a va vatere va ‘twikire kuzuvhisa nonkango dendi nouradi.’ Jehova kwa limbwilire poopo ekanderero lyawo. (Yirug. 4:18, 29, 31) Nsene ose kukara nosinka morwa kutjira vantu, nose twa hepa kukanderera yipo Jehova a tu vatere. Pura Jehova yipo a ku vatere o nkondopeke eharo lyoge lyokuhara vantu yipo o dire kukara nowoma wokuvatantera kuhamena mbudi zongwa.

10. Ngapi omu Jehova a tu vatere yipo tu kare Nombangi dendi? (Jesaya 43:10-12)

¹⁰ Jehova kwa tu horowora yipo tu kare Nombangi  dendi, age kwa tu tumbwidira asi nga tu vatera yipo tu kare nouradi. (Resa Jesaya 43:10-12.) Tu zogereni ko nonkedi ne omu a vhuru kuyirugana. Zokuhova, Jesus kukara nose nkenye apa atu zuvhisa mbudi zongwa. (Mat. 28:18-20) Zauvali, Jehova kwa horowora vaengeli yipo va tu vatere. (Ehor. 14:6) Zautatu, Jehova kwa tu pa mpepo zendi zokupongoka yipo zi tu vatere tu diworoke yininke eyi twa lironga. (Joh. 14:25, 26) Zaune, Jehova kwa tu pa vanavazinyetu yipo va tu vatere. Nevatero lyaJehova ntani neli lyovanavazinyetu, ose twa kara nanayinye eyi twa hepa yipo tu kare nouradi nokutwikira kuzuvhisa.

TAMBURA NKENYE UKARO NTANI KARA NOMUTARO GOMUWA

11. Ngapi omu no vhura kugwana vantu wovanzi mokuzuvhisa? (Tara hena efano.)

¹¹ Ayo kukudompesa apa o gwana vantu wovasesu pembo ndi? Lipura nyamoge asi: ‘Kupi vana kara vantu womomukunda ogu atu zuvhisire?’ (Yirug. 16:13) Vana zi koyirugana ndi vana zi va ka randange? Nsene yimo, kuvhura o gwane vantu wovanzi pokuzuvhisira mositarata. Munazinyetu Joshua kwa tanta asi: “Ame kwa gwana nonkedi dokuzuvhisira komavango oku ava randesere noku ava kara vantu wovanzi.” Nage namukadendi Bridget kwa gwana vantu wovanzi pomambo pokuzuvhisa kongurova nomoSondaha pometaha.​—Efe. 5:15, 16.

12. Ngapi omu natu diva eyi va pura vantu ndi eyi ayi va retere sinka?

¹² Nsene vantu kapi vana kulikida elituromo mombudi zoge, hetekera ko kudemenena kweyi va pura ndi kweyi yina kuvaretera sinka. Joshua naBridget kuruganesa epuro eli lya kara pontunda zositratate nsene kuna kuzogera novantu. Pasihonena, apa ava ruganesa sitratate Yisinke Bibeli? awo kuuyunga asi: “Vantu vamwe kutara Bibeli asi kwa tunda kwaKarunga, ano vamwe kapisi yimo ava yi tara ngoso. Ove ngapi omu o gazara?” Ano eyi rorunzi kutwaredesa konzogera.

13. Morwasinke natu tarera sirugana setu asi sina tu tompoka nampili apa vantu ava dili kupurakena kombudi zetu? (Yisewe 27:11)

¹³ Nampili vantu va dire kupurakena apa atu va zuvhisire, nye ose simpe kusikisa mo sitambo setu. Morwasinke? Morwa ose twa sikisa mo eyi Jehova naMunendi vana tu harere tu rugane, ose twa gava umbangi. (Yirug. 10:42) Nampili tu dire kugwana ogu natu uyunga nage ndi va dire  kupurakena kombudi zetu, ose kuvhura kugwana ruhafo morwa twa yi diva asi ose kuna kuhafesa Guhyetu gemeguru.​—Resa Yisewe 27:11.

14. Morwasinke natu hafera apa muzuvhisi gumwe a gwana muntu momukunda ogu ana kulikida elituromo?

¹⁴ Ose kuhafa hena apa muzuvhisi gwapeke a gwana muntu ogu ana kulikida elituromo. Ruhungu kwa hetakanesere yirugana yetu kokupapara munona ogu ana zumbana. Vanzi ava li hameke mo mokumupapara tunda mukunda zende mukunda. Apa ava mu gwana, navenye ava ava lihameke mo kuhafa nye kapisi googu tupu ana mu gwana. Mokulifana, nkenye ogu gomombungakriste kuvatera mokutulisa po varongwa vaJesus. Twa hepa vantu navenye womombungakriste yipo va vatere pokuzuvhisira vantu navenye womomukunda, ano navenye kuhafa apa gumwe a wiza komapongo.

DEMENENA POKUHARA JEHOVA NTANI NAVA WOPEKE

15. Ngapi omu kutura pasirugana etjangwa lyaMateusa 22:37-39 na li tu vatera tu hafere sirugana sokuzuvhisa? (Tara hena efano lyopontunda.)

¹⁵ Ose kuvhura tu hare unene sirugana sokuzuvhisa nsene tu demenena pokuhara Jehova ntani nava wopeke. (Resa Mateusa 22:37-39.) Gazara tupu omu Jehova a hafa apa a tu mono kuna kulihameka mosirugana sendi ntani nomu vantu ava hafa apa ava tameke kulironga Bibeli. Diworoka hena asi vantu ava ava purakene kombudi zetu ntani nokutokora kukarera Jehova, ngava paruka narunye.​—Joh. 6:40; 1 Tim. 4:16.

16. Ngapi omu natu kara noruhafo mokuzuvhisa nsene kapi twa ku vhura kutunda mo membo? Gava yihonena.

¹⁶ Ayo kapi ayi kutompoka kutunda membo lyoge morwa nokonda dongandi ndi? Nsene yimo, demenena kweyi no vhura kurugana ko yipo o yi likide asi wa hara Jehova ntani wopeke. Posiruwo souvera woKorona, Samuel ntani Dania kapi va vhulire kutunda membo lyawo. Mosiruwo nasinye oso soudigu, awo ngava zuvhisire kupitira koterefona nokutjanga nombilive ntani kurugana malirongo goBibeli kupitira koZoom. Samuel nga zuvhisire ava nga gwana kosipangero apa nga zi a ka gwane nomutji dendi dokankera. Age kwa tente asi: “Apa atu ligwanekere nomaudigu, ose kuvhura kukara nosinka nokulizuvha eroroko ntani epuro lyetu kuvhura kuliheteka. Twa hepa kugwana ruhafo mosirugana saJehova.” Apa va pitire mwanayinye eyi, Dania kwa li gende ntani kwa kere mombete makwedi gatatu. Age ga hepere sipundi sourema yipo a kare mo makwedi ntazimwe. Age kwa tente asi: “Ame na hetekerere ko kurugana nayinye eyi na  vhulire kuliza noukaro wange. Ame na zuvhisilire nesa gomukadi ogu ga dingwire nge ntani na zuvhisilire vantu ava ngava reta yininke membo. Ame kwa zogerere hena koterefona nomukadi ogu nga rugana kokampani ezi nga zi randesa yininke yokosipangero.” Ukaro waSamuel naDania kwa va ninkisire va dire kurugana yoyinzi ngwendi moomu ngava yi rugana nare, awo kwa rugene eyi va vhulire ko, ano ngoyitundwamo, awo kwa hefe.

17. Ngapi no gwanena mo mauwa gomanzi momagano gomosirongwa esi?

¹⁷ Hetekera ko kutura pasirugana magano nagenye gatano tuna zogere mosirongwa esi. Nkenye egano kwa fana ngwendi yitjuniso eyi a tu ruganesa mokutereka nondya. Apa yitjuniso nayinye ava yi tura kumwe, nondya kutovara. Nsene tu tura pasirugana magano nagenye aga, ayo ngayi tu vatera yipo tu nyokere po kukara nomalizuvho gomadona nokugwana ruhafo rorunene mokuzuvhisa.