1. Yisinke paradisa zopasifanekeso ntani yisinke tuna tokomene kurugana?

 PWA kara paradisa zopasifanekeso pevhu omu mwa kara vantu ava vana kurugana yirugana yoyiwa. Amo kwa zura mo mamiliyona govantu ava vana kuhafera mbili. Vantu ava va kara moparadisa ezi awo vana tokomene kudira kutunda mo. Awo hena vana hara vantu wovanzi va li pakerere kumwe nawo moparadisa ezi zopasifanekeso. Paradisa musinke ozo? Azo kuna kara paradisa zopasifanekeso! a

2. Sininke musinke sokutetukisa kuhamena paradisa zopasifanekeso?

² Jehova kwa rugana evango lyewa lyopasifanekeso omu mwa kara vantu vendi ava va kara mombili ntani mouumwe nampili ngomu va tunga mouzuni ou waSatana woudona unene, omu mwa kara vantu ava va linyenga-nyenga. (Joh. 5:19; Ehor. 12:12) Karunga gwetu geharo kumona omu uzuni ou au koresa vantu, nye age kuninka vakareli vendi va kare mepopero yipo va twikire ku mu karera noruhafo. Nonkango dendi Bibeli kwa faturura paradisa zopasifanekeso asi azo kwa fana ngwendi “evango lyegameno” ntani “sikunino esi ava tekere nawa.” (Jes. 4:6; 58:11) Nevatero lyaJehova, vantu ava va kara moparadisa ezi zopasifanekeso kwa kara noruhafo ntani kulizuvha epopero posiruwo esi sosidigu somazuva gopouhura.​—Jes. 54:14; 2 Tim. 3:1.

3. Ngapi omu wa sikilire mo pomuhowo uporofete ou wakara mwaJesaya egaununo 65?

³ Kupitira momuporofete Jesaya, Jehova kwa fatwilire omu ngava fana vantu ava ngava kara moparadisa zopasifanekeso. Ove kuvhura o gwane efatururo olyo mwaJesaya egaununo 65 eli lya hovere kusikilira mo momvhura 537 komeho Jesus a  wize pevhu. Posiruwo sina, Vajuda ava va litezwilire kwa va mangwilire mounkwate waBabironi ntani awo kwa tengwire kosirongo sawo. Jehova kwa vaterere vantu vendi va tungurure sitata saJerusarema si kare hena evango lyewa ntani va wapukurure ntembeli, evango eli nga va mu karere moIsraeli.​—Jes. 51:11; Sak. 8:3.

4. Ngapi omu uporofete ou wakara mwaJesaya egaununo 65 una kusika mo momazuva getu?

⁴ Esikiliromo lyauvali lyouporofete waJesaya kwa tamekere mo-1919, apa vakareli vaJehova va va mangwilire moukarelikarunga woyimpempa. Ano kutunda opo, paradisa zopasifanekeso kwa tamekere kulihanena mwaza uzuni. Vazuvhisi woupampi kwa tulisire po nombungakriste dononzi ntani kwa tungire po yikara yoSikriste. Vagara novakadi ava va kere nonyanya ntani nokuhondera kwa tamekere kudwara “muntu gomupe ogu va sita kuliza nompango zaKarunga.” (Efe. 4:24) Nye nampili ngoso, sinzi somatungiko aga ga fatwilire Jesaya ngaga ka sikilira mo mouzuni woupe. Nye pana kara mauwa gomanzi aga tuna kuhafera ngesi. Tu zeni tu ka tare omu paradisa zopasifanekeso a zi tu kundama ntani neyi natu dilira kutunda mo.

NGAPI OMU AVA LIZUVHU AVA VA HAMENA KOPARADISA ZOPASIFANEKESO?

5. Ngomu va yi tumbura mwa Jesaya 65:13, yisinke atu hafere moparadisa zopasifanekeso?

⁵ Ose kugwana nondya dononzi dopasifanekeso ntani epwizumuko. Uporofete waJesaya kulikida elisigo lyenene eli lya kara pokatji keparu lyovantu ava va kara moparadisa zopasifanekeso ntani keparu lyovantu ava va dira kukara mo. (Resa Jesaya 65:13.) Jehova kugava kovakareli vendi nayinye eyi va hepa yipo va twikire kukara pepi nendi. Ose twa kara nompepo zokupongoka noBibeli ntani nayimwe hena eyi ya zogera kuhamena Bibeli yipo tu vhure ‘kulya nokunwa ntani nokuhafa.’ (Hetakanesa Ehororo 22:17.) Mokulisiga, ava va dira kukara moparadisa zopasifanekeso, kulizuvha ‘nzara nenota ntani nokuhepa.’ Awo kapi va kara nelikwatakano kumwe naKarunga.​—Amosa 8:11.

6. Ngapi omu etjangwa lyaJowera 2:21-24 lya faturura yininke yimwe eyi Jehova a tupe ntani mauwa musinke natu gwanena mo?

⁶ Mouporofete waJowera, age kwa ruganesere mo yininke yomulyo ngwendi yilya, vhinyu ntani magadi gononzwe mokulikida asi Jehova kuvhura kutupa nkenye eyi tuna hepa yipo tu twikire kukara nepuro lyokupama kukwatera mo nayimwe eyi ya zogera kuhamena Bibeli. (Jow. 2:21-24) Age kuyirugana oyo kupitira moBibeli, moyimbapiratjangwa yetu, kointaneta zetu, komapongo ntani koyigongi. Ose kugwanena mo mauwa apa atu lihameke mo momawapaiko ogo nkenye ezuva, ano ngoyitudwamo ose kuyalizuvha asi yina tu gwanene po ntani kulizuvha epwizumuko.

7. Yisinke ayi tu ninkisa tu hafe? (Jesaya 65:14)

⁷ Ose kulizuvha ruhafo nokulizuvha asi yina tu gwanene po. Vantu vaKarunga kuvhura va hafe unene morwa awo va kara norupandu rorunene. (Resa Jesaya 65:14.) Mausili gokukorangeda nomatumbwidiro gokuhengagwida aga ga kara moNonkango daKarunga ntani nehuguvaro eli twa kara nalyo kupitira monzambo zaKristusa kutuhafesa. Apa atu zogere yininke eyi kumwe novanavazinyetu, ayo kutuhafesa unene.​—Epis. 34:8; 133:1-3.

8. Yikara musinke yivali yoyinene po eyi ya kara moparadisa zopasifanekeso?

⁸ Eharo ntani uumwe ou wa kara mokatji kovantu vaJehova kuna kara yikara yivali yoyinene po moparadisa zopasifanekeso. Uumwe ou kutuvatera tu gazadare ko omu eparu ngali ka kara mouzuni woupe omu vakareli vaJehova ngava ka kara neharo lyenene nouumwe,  kupitakana neina. (Koros. 3:14) Munazinyetu gumwe gomukadi kwa fatwilire eyi ga dimbwilire kuhamena vantu vaJehova apa ga li gwene noNombangi daJehova sikando sokuhova. Age kwa tente asi: “Kapi na divire omu nani kara noruhafo, vemepata lyetu nawo kapi va divire omu nava kara noruhafo. Sikando sange sokuhova na mwene vantu vana kulilikida eharo lyosili kuna kara apa na ligwene noNombangi daJehova.” Nkenye ogu ana hara kukara noruhafo rosili ntani nokulizuvha asi yina mu gwanene po, ga hepa kukara moparadisa zopasifanekeso. Yikare asi monkedi musinke vantu ava tara vakareli vaJehova, awo kwa kara nedina lyewa ndi nonkareso zongwa.​—Jes. 65:15.

9. Yisinke lya tu tumbwidira etjangwa lyaJesaya 65:16, 17 kuhamena yininke eyi ayi tu koresa ntani nokutuninkisa tu hepe?

⁹ Ose kulizuvha epwizumuko ntani tuna litura. Jesaya 65:14 kwa uyunga asi ava va dira kuhamena moparadisa zopasifanekeso ‘ngava kuga nonomutjima dina dompo.’ Nye ngapi kuhamena yininke nayinye eyi ayi ninkisa vantu vaKarunga va zuvhe kukora ntani va hepe? Ntaantani tupu yininke oyo ngava yi ‘divare.’ (Resa Jesaya 65:16, 17.) Jehova nga ka gusa po maudigu getu ntani kapi ngatu ka ga diworoka .

10. Morwasinke ono kulizuvhira asi alyo kuna kara etungiko mokukara kumwe novanavazinyetu? (Tara hena efano.)

¹⁰ Nampili ngesi, ose kukara tuna litura apa a tu kara komapongo oku a tu gwana epwizumuko ntani nokudira kudemenena koyininke eyi ayi tu retere sinka mouzuni ou. Ose hena kuvatera vanavazinyetu va lizuvhe asi vana litura apa atu likida eharo, ehafo, mbili, nkenda ntani ugomoki, yikara eyi azi retesa po mpepo zokupongoka. (Gar. 5:22, 23) Alyo kuna kara etungiko sili kweyi twa hamena kombunga zaKarunga. Vantu ava ava twikire kukara moparadisa zopasifanekeso ngava ka limonena etumbwidiro lyaKarunga eli asi “evhu lyepe neguru lyepe.”

11. Kuliza naJesaya 65:18, 19, ngapi omu paradisa zopasifanekeso ezi ga tulisa po Jehova a zi tu vatere?

¹¹ Ose kulizuvha rupandu ntani ruhafo. Jesaya kwa fatwilire hena konda zeyi natu karera ‘noruhafo’ moparadisa zopasifanekeso. Jehova yige ga retesa po paradisa ezi zopasifanekeso. (Resa Jesaya 65:18, 19.) Ayo kapi ayi tu tetukisa pokudiva asi Jehova kuturuganesa tu vatere vantu va tunde mo monombunga domouzuni ou, edi adi dili kuvaronga usili kuhamena Karunga nokuvavatera va ya hamene koparadisa zopasifanekeso. Tuna hafa sili unene komauwa aga atu hafere mousili ntani tuna tokomene  kutantera ko wopeke kuhamena mauwa ogo.​—Jer. 31:12.

12. Ngapi omu o lizuvhu kuhamena matumbwidiro aga ga kara mwaJesaya 65:20-24 ntani morwasinke o lizuvhire ngoso?

¹² Ose tuna hafa ntani kupandura kehuguvaro eli twa kara nalyo morwa yeeyi twa hamena koparadisa zopasifanekeso. Gazadara ko kwanayinye eyi ngatu ka mona nokukarugana mouzuni woupe. Bibeli kwa tumbwidira asi: “Vakeke kapi ngava fa mounona, ano vantu navenye ngava kara ntaka. Ava ngava kara nonomvhura efere, ngava kara ngovadinkantu.” Ose ‘ngatu ka litungira mambo nokukatapeka moyipata nokukahafera vhinyu. Yirugana eyi ngatu ka rugana ngayi ragopa morwa Jehova nga tu tungika.’ Age kwa tu tumbwidira eparu lyewa eli lya kara nositambo sosiwa. “Nampili awo simpe kuna kukanderera,” age nga diva eyi ana hepa nkenye ogu ntani nga ‘kutika nayinye moufenkenda wendi.’​—Jes. 65:20-24; Epis. 145:16.

13. Ngapi omu etjangwa lyaJesaya 65:25 lya faturura marunduruko aga va tura po vantu meparu lyawo apa va tamekere kukarera Jehova?

¹³ Ose kulizuvha mbili ntani epopero. Nevatero lyompepo zaKarunga, vantu wovanzi ava va kere nonkareso zondona va tura po malitjindjo gomanene meparu lyawo. (Resa Jesaya 65:25.) Awo kwa rugene paapa va hulira yipo va nyokere po nkareso zawo zondona. (Rom. 12:2; Efe. 4:22-24) Vantu vaKarunga kapi va sikilira mo, yipo nye ose ngatu twikira kutura mapuko. Nye nampili ngoso, Jehova kwa reta kumwe vantu wokulisiga-siga ava va li hara-hara unene nokukara nombili. (Tit. 2:11) Esi kuna kara sitetu esi na rugana tupu Karunga munankondo nadinye.

14. Ngapi omu sihorokwa samunazinyetu gumwe gomugara a si likida usili ou wa kara mwaJesaya 65:25?

¹⁴ Kuvhura sili yi va tompoke vantu kutjindja nkareso zawo ndi? Tu tareni sihonena esi sina kukwama ko. Mudinkantu gomugara ogu ngava tura tura modorongo age opo nomvhura dendi 20, nga li hameke unene moyininke yoyidona ntani kwa kere nonyanya. Age ngava mu tura modorongo morwa kuvaka matuwa, kuteza nonzugo ntani nomaukorokotji gamwe gomanene. Age ga liwapaikilire kurwanesa nkenye ogu. Sikando sendi sokuhova apa ga zuvhire usili womoBibeli nokutameka kuza komapongo goNombangi daJehova, ga yi pulire nawa-nawa asi ana gwana sitambo meparu, ano sitambo oso kwa kere sokukarera Jehova moparadisa zopasifanekeso. Konyima zokugwana ekuho, age nkenye apa nga gazadara ko omu etjangwa lyaJesaya 65:25 lya tembe kwendi. Age kwa tjindjire nkareso zendi zondona nokuyakara muntu gomuwa.

15. Morwasinke tuna harere kuvatera wopeke va wize moparadisa zopasifanekeso ntani ngapi omu natu yi rugana?

¹⁵ Jesaya 65:13 kwa tameka nononkango edi asi: “Ame [Jehova] kuna kumutantera asi.” Jehova kusikisa mo nkenye apa matumbwidiro gendi. (Jes. 55:10, 11) Paradisa zopasifanekeso azo ngesi pozili. Jehova kwa tulisa po epata lyewa lyovanavazinyetu. Mokumona asi ose kwa hamena kepata eli, ose kwa kara mombili ntani kulizuvha epopero mouzuni ou wonyanya. (Epis. 72:7) Morwa nokonda odo, tuna hara kuvatera vantu wovanzi va ya hamene kepata eli. Ose kuyirugana eyi apa a tu demenene mokutulisa po varongwa.​—Mat. 28:19, 20.

OMU NO VATERA WOPEKE VA WIZE MOPARADISA ZOPASIFANEKESO

16. Yisinke a yi ninkisa vantu va wize moparadisa zopasifanekeso?

¹⁶ Nkenye gumwe gwetu kuvhura kuvatera vantu wopeke yipo va wize moparadisa zopasifanekeso. Ose kuyirugana oyo apa honene  Jehova. Age kapi a sininike vantu va wize mombunga zendi. Nye age ‘kuvakoka’ monkedi zeharo yipo va wize kwendi. (Joh. 6:44; Jer. 31:3) Vantu wovawa ava ava lirongo eharo eli ga kara nalyo Jehova noyikara yendi yimwe yoyiwa, awo kumuhedera pepi. Ngapi omu yikara yetu yoyiwa nonkareso zetu zongwa a yi ninkisa vantu va wize moparadisa zopasifanekeso?

17. Ngapi omu natu vatera vantu yipo va wize moparadisa zopasifanekeso?

¹⁷ Nkedi zimwe omu natu vatera vantu va wize moparadisa zopasifanekeso kuna kara pokutekura vanavazinyetu neharo ntani nonkenda. Apa vantu wovape ava wiza komapongo getu, tuna hara va lizuvhe ngwendi moomu va lizuvhire vantu ava va dilire kukara asi kapisi Vakriste ava ngava zi komapongo mositata saKolinte. Awo kwa uyungire asi: “Karunga sili mokatji keni ga kara.” (1 Kol. 14:24, 25; Sak. 8:23) Yipo nye, twa hepa kutwikira kukwama epukururo eli asi: “Namuvenye kareni nombili.”​—1 Tes. 5:13.

18. Yisinke nayi vhura kukoka vantu va wize kombunga zetu?

¹⁸ Twa hepa kuhetekera ko nkenye apa kutara vanavazinyetu ngwendi moomu a va tara Jehova. Ose kuyirugana oyo pokudemenena koyikara yawo yoyiwa nye kapisi kediro kusikilira mo lyawo eli ngali dira kukakara ko. Ose kuvhura kukohonona po madiro kulizuvha monkedi zongwa po kulifira fira “nkenda nokulidongwenena-dongwenena po nomutjima nagunye.” (Efe. 4:32) Nsene tu tekura vanavazinyetu monkedi zongwa, ngayi koka vantu wopeke va wize moparadisa zopasifanekeso. b

 TWIKIRA KUKARA MOPARADISA ZOPASIFANEKESO

19. (a) Kuliza nokakende  “Awo kwa hagekere kukarera Jehova ano konyima yipo va ka tengwire,” yisinke va uyunga ko vamwe apa va ka tengwire moparadisa zopasifanekeso? (b) Yisinke tuna tokomene kurugana? (Tara hena efano.)

¹⁹ Ose kupandura koparadisa zopasifanekeso. Azo ngwa unene ntani mwa kara vakareli vaJehova wovanzi kupitakana nare. Ose tuna hara kutwikira kukara norupandu koparadisa ezi zopasifanekeso ezi Jehova ga tulisa po. Nkenye gumwe ogu ana hara kulizuvha epwizumuko nokukara yina mu gwanene po nokukara ana litura ntani nokulizuvha epopero, ga hepa kuwiza moparadisa zopasifanekeso nokutwikira kukara mo. Nye twa hepa kutakamesa morwa Satana kuna kukondja paapa ga hulira yipo a tu ninkise tu tunde mo. (1 Pet. 5:8; Ehor. 12:9) Twa ha mu pulisira yi mu tompoke. Tu ruganeni unene yipo tu popere eharo ntani mbili ezi za kara moparadisa zopasifanekeso.