MWASITARARA 1922, vantu wokusika po-8 000 kwa pongere mosala kongurangura. Munasipundi kwa geve madiviso asi nkenye ogu ga here kupwaga mo mosala kuvhura ayi rugane, nye kapi nava mu pulisira a ya hwilire mo hena.

Ketameko lyosigongi, awo kwa dimbire nonsumo ano konyima Joseph F. Rutherford ta zi kositantara. Wovanzi kwa liwapaikilire mokupurakena ano wovasesu kwa gendagwire momutenya. Muuyungi yipo ga va korangedere va hingire nokupurakena nawa. Ngomu sa tamekere siuyungwa, nampo kapi va dimbwilire ekehe eli va kulikire.

Munazinyetu Rutherford kwa geve siuyungwa sosiparatjangwa asi: “Uhompa wemeguru pepi una kara.” Age kwa uyungire ure wovili zimwe kuhamena vaporofete vanare ava ngava zuvhisa nouradi kuhamena Uhompa ou ngau tameka kupangera. Kouhura wosiuyungwa ta pura vapurakeni asi: “Mwa yi pura asi Hompa ga tameka kupangera ndi?” Vapurakeni tava limburura pokuzigira asi: “Nhi!”

Munazinyetu Rutherford kwa uyungire nezwi lyomukumo asi: “Tengureni nye mu ka zuvhise, one vana vaKarunga. Konekeni asi Hompa kuna kupangera! One nyone vakarelipo vendi. Yipo nye, diviseni, diviseni, diviseni.”

Ngomu ga uyungire nonkango odo, ekehe tava likurura ko nokuhorora nonkango edi asi: “Diviseni Hompa noUhompa wendi.”

Ray Bopp kwa tanta asi: “Vapurakeni kwa hefe sili unene.” Anna Gardner kwa tanta asi: “Nomukambo kwa linyungangere morwa vantu kwa sakererere unene.” Ano Fred Twarosh kwa tanta asi: “Vapurakeni navenye kwa sikeme posikando simwe.” Ntani Evangelos Scouffas kwa tanta asi: “Ayo kwa kere ngwendi kweli gononkondo ga tu katwire natuvenye poyipundi yetu ntani ose kwa lilire morwa ruhafo.”

Wovanzi ava va kere posigongi nare va tameka kuzuvhisa mbudi zongwa kuhamena Uhompa. Nye simpe kwa lizuvhire asi va hepere kutura po marunduruko. Ethel Bennecoff kwa tanta kuhamena Valirongi woBibeli asi apa sa pwire sigongi ‘eharo noupampi wawo kwa ligwederere.’ Odessa Tuck ogu ga kere nonomvhura 18, kwa tundire kosigongi netokomeno lyokurugana ko yuma kepuro eli va pulire asi: “Yilye ogu na za?” Age kwa tanta asi: “Kapi na divire oku nani za ndi omu nani yi sikisa mo. Nye ame kwa here kuhonena Jesaya ogu ga tente asi: ‘Nyame ogu, tuma nge.” (Jes. 6:8) Ralph Leffler kwa tanta asi: “Kutunda posigongi sina, Uhompa kwa u divisa unene mouzuni mudima.”

 Sigongi somo-1922, esi sa kere moCedar Point moOhio, kwa retere marunduruko mosirugana sokuzuvhisa. George Gangas kwa tanta asi: “Sigongi sina kwa tumangedere nge ni kare neharo lyokudira kufaura koyigongi.” Eparu lyendi nalinye kapi ga faura kosigongi. Julia Wilcox kwa tjanga asi: “Ame kuhafa nkenye apa ani resa kuhamena sigongi somo-1922 moCedar Point. Ayo kuninkisa nge ni uyunge asi: ‘Mpandu Jehova kweyi wa pere nge mpito zokukara po.’”

Sinzi setu kudiworoka yigongi eyi ya tu hafesere nokunkondopeka eharo lyetu lyokuhara Karunga naHompa gwetu. Nkenye apa atu diworoka kuhamena yigongi oyo, ngano yi tu tumangede nose tu uyunge asi: “Mpandu Jehova kweyi wa pere nge mpito zokukara po.”