GAIYUSI noVakriste vakwawo kwa ligwanekerere nomaudigu koyiha yomvhura 98. Vantu ava ngava uyunga yimpempa kwa ninkisire nombungakriste di tengure monyima nokuligaunuka. (1 Joh. 2:18, 19; 2 Joh. 7) Mugara gedina Diwoterefesi nga ‘uyunga yimpempa’ kuhamena mupositoli Johanesa novakwawo, ntani kapi ga here kutambura Vakriste vakwawo ntani nga pukisa vakwawo va kwame sihonena sendi. (3 Joh. 9, 10) Owo yiwo ukaro wa kere po apa Johanesa ga tjangerere Gaiyusi. Mbilive zomupositoli Johanesa kwa zi tjenge koyiha yomvhura 98, azo kwa kara mbilive zaJohanesa zautatu moMatjangwa goSikriste goSigereka.

Nampili ngomu Gaiyusi ga ligwanekerere nomaudigu, age kwa twikilire kukarera Jehova noulimburukwi. Ngapi omu ga likidire ulimburukwi? Morwasinke natu kwamena sihonena saGaiyusi? Ngapi omu mbilive zaJohanesa nazi tu vatera tu yi sikise mo?

Mupositoli Johanesa kwa li tumbwire mwene mo mbilive zendi zautatu asi “mukurona.” Ntanto ozo kwa vaterere Gaiyusi a dimburure asi mbilive ozo kwa tundilire komupositoli Johanesa. Age kwa tumbwire Gaiyusi asi mukwetu “ogu na hara sili unene.” Nokutanta hena asi ngano nayinye yi mu gende po nawa a tende parutu moomu ga wapa pampepo. Nonkango odo kwa kere donongwa sili.—3 Joh. 1, 2, 4.

Gaiyusi nampo kwa kere mukuronambunga nye mbilive ozo kapi za yi tumbura. Johanesa kwa pandadekere Gaiyusi kweyi nga tambura vapuli vakwawo nampili ngomu va kere vageni. Johanesa ga dimbwilire asi Gaiyusi mulimburukwi, morwa kutambura vagenda sikara sovakareli wousili vaKarunga.—Gen. 18:1-8; 1 Tim. 3:2; 3 Joh. 5.

Nonkango daJohanesa depandadeko kweyi Gaiyusi nga tambura vapuli vakwawo kulikida asi Vakriste ngava gendi unene momukunda ogu ga kere mupositoli Johanesa nokudingura nombungakriste. Nampo Johanesa nga gwana nombudi kupitira movantu owo.

Vagenda nampo ngava gwana mararo kovapuli vakwawo. Nohotera kapi ngadi  tekura nawa vantu ntani kwa vhukire mo yirugana yoruhonda. Eyi yiyo vagenda ngava rarere momambo govapuli vakwawo.

Johanesa kwa korangedere Gaiyusi a twikire kukwafa vagenda pokumutantera asi: “Va kwafa ngorooro pokutwikira rugendo rwawo, moomu ga yi harera Karunga.” Oyo kwa tente asi, vagenda va hepere kuvapa nayinye eyi va hepere va ka sike oku vana tamba. Ayo kulikida asi Gaiyusi nga tambura nawa vagenda morwa vagenda owo ngava tantere ko Johanesa omu Gaiyusi nga va tekura.—3 Joh. 3, 6.

Vagenda owo kwa kere nampo vatumwa ndi vatareli wonombunga. Awo ngava gendi morwa mbudi zongwa. Johanesa kwa tente asi: “Awo kwa zire medina lyendi.” (3 Joh. 7, NW) Ntanto ezi ga ruganesere Johanesa asi: “Awo kwa zire medina lyendi,” kwa tembe kwaJehova. Yipo nye, vapuli vakwawo owo va hepere kuvatambura nawo momambo gawo. Eyi yiyo mupositoli Johanesa ga tjenge asi: “Ose twa fira kukwafa vantu vangoso, tu va kwatese ko moukereli wousili.”—3 Joh. 8.

Johanesa kapi tupu ga tjangerere Gaiyusi mokumupandura, nye kwa here kumuvatera a lididimikire hena maudigu. Diwoterefesi ogu ga hamenene mombungakriste zawo kapi ga here kutambura vagenda. Age hena nga nyokesa vakwawo va dire kutambura vagenda.—3 Joh. 9, 10.

Yosili, kwato Mukriste gomulimburukwi ga here kukara naDiwoterefesi. Age kwa here kulitura mwene muhowo ntani kapi ge here kupurakena kwaJohanesa, age nga mu uyunga momudona navamwe. Nampili ngomu Johanesa ga dilire kutumbura Diwoterefesi asi munayimpempa nye Diwoterefesi kapi nga purakene kweyi ngava uyunga vapositoli. Nkareso zendi zokulinenepeka kwa likidire asi age kapisi mulimburukwi. Sihorokwa esi kulikida siponga ava retesa po vantu wokulinenepeka mombungakriste. Yiyo nye Johanesa ga tanterere Gaiyusi asi: “Walye o honene yoyidona.” Nose twa hepa kukwama nonkango odo.—3 Joh. 11.

Mukriste gedina Demetereusi kwa lisigire naDiwoterefesi, Johanesa kwa tente kumuhamena asi: “Nkenye ogu kuuyunga Demetereusi momuwa. . . Nose tatu gwederere ko undipo wetu, nove wa yi diva tupu asi eyi tuna kuuyunga yosili.” (3 Joh. 12) Nampo Demetereusi kwa here evatero lyaGaiyusi ano mbilive zaJohanesa zautatu kwa pandadekere Demetereusi, ntani nampo Demetereusi mwene yige ga twere mbilive kwaGaiyusi. Mokumona asi age kwa kere mutumwa ndi mutareli gonombunga nkareso zendi za likidire asi eyi ga tjenge Johanesa kumuhamena usili.

Morwasinke Johanesa ga tanterere Gaiyusi a twikire kutambura vagenda nampili ngomu nga yi rugana nare? Age kwa dimbwilire asi Gaiyusi kuna hepa ekorangedo ndi? Ndi age kwa kere nosinka asi Gaiyusi kuvhura a hageke kutambura vagenda morwa Diwoterefesi nga tjida mombungakriste vantu ava ngava tambura vagenda? Yi kare asi konda musinke, Johanesa kwa here kumukorangeda asi: “Ogu a rugana yoyiwa, kwa hamena kwaKarunga.” (3 Joh. 11) Ozo kuna kara konda zongwa mokurugana yoyiwa.

Mbilive zaJohanesa za tumangedere Gaiyusi a twikire kutambura vagenda ndi? Mokumona asi mbilive ezi kwa kara moBibeli  ntani kwa zi tjangerere zi korangede wopeke va “honene po yoyiwa” eyi kulikida asi za mu korangedere.

Nampili ngomu Bibeli za dira kusimwitira yoyinzi kuhamena Gaiyusi, simpe kuvhura tu li rongere ko yoyinzi kwendi.

Sokuhova, sinzi setu kwa gwana usili kovanavazinyetu ava va lizamberere mokutunda koure va ya tu ronge usili, yipo nye, twa hepa kuvapandura. Naina, kapisi nkenye Mukriste kuza komavango gokoure a ka zuvhise mbudi zongwa. Ngwendi Gaiyusi, nose kuvhura kutambura nokukorangeda vanavazinyetu ngwendi mutareli gonombunga namukadendi. Ndi kuvhura tu vatere vanavazinyetu ava va dirukira mombunga ndi kosirongo oku kuna hepa vazuvhisi. Yipo nye, ‘tu li tambura tambureni.’—Rom. 12:13; 1 Tim. 5:9, 10.

Sauvali, kapisi yi tu tetukise nsene wopeke mombungakriste va rwanesa vakuronambunga. Johanesa naPaurusa ava ngava pitisire mombunga nawo kwa va rwanesere. (2 Kol. 10:7-12; 12:11-13) Yisinke natu rugana nsene u horoka udigu wangoso mombungakrise zetu? Paurusa kwa korangedere Timoteusa asi: “Mukereli gwaHompa kapi a kara nonompata. A kare nombili kovantu navenye, age hena a dive kuronga oku ta lididimikire yoyidona. A pukurure nombili vakondjesi vendi.” Nsene tu kara nombili apa ava tu handukisa, ngayi ninkisa vantu vamwe va rundurure nkareso zawo. Ngoyitundwamo, Jehova “kuvhura a va tezwilise va dive usili.”—2 Tim. 2:24, 25.

Sautatu, twa hepa kupandadeka vanavazinyetu ava ava karere Jehova noulimburukwi nampili momakwama-kwamo. Mupositoli Johanesa kwa korangedere Gaiyusi asi eyi nga rugana kwa kere yoyiwa. Mokulifana, vakuronambunga va hepa kukwama sihonena saJohanesa mokukorangeda vanavazinyetu yipo va dire ‘kuroroka.’—Jes. 40:31; 1 Tes. 5:11.

Mbilive zomupositoli Johanesa ezi ga tjangerere Gaiyusi yizo zonsupi po moBibeli. Nye azo mulyo unene koVakriste naina.