KOYIHA yomvhura 1910 vakondi vange kwa tundire mosirongo saGeorgia va dirukilire moKanada, makura tava ka tunga pofarama momukunda gwaSaskatchewan. Ame kwa hampurukire nge mo-1928, kwa tu reta ntazimwe, ano ame nyame nsiraura. Otate kwa dogorokere makwedi ntazimwe komeho va hampuruke nge, ano onane kwa dogorokere ame simpe nimukeke. Konyima zosiruwo, mukurwange gombeli Lucy, nage ta dogoroka nonomvhura 17. Makura hekurwange, Nick yipo ga tu gusire novakuru vange a ka tu rere.

Ezuva limwe ame simpe munona, vemembo tava mono nge kuna kudera musira gonkambe zongara. Awo kwa tukukire asi nampo na zi sanga nge, makura tava zigire asi ni hageke, nye kapi na hagekere. Ame kwa va pere mugongo, kapi na zuvhire mazwi gawo. Erago, nkambe kapi za senge nge, makura ezuva olyo yipo va yi dimbwilire vemembo asi ame sipurupuru.

Mugara gumwe ta gava egano asi va ka tjangese nge kosure zoyipurupuru, makura hekurwange Nick yipo ga ka tjangesere nge kosure zoyipurupuru mositata. Sure ozo kwa kere ure nokulyatungire epata lyetu, ano ame kwa kere nowoma morwa nomvhura dange ntano tupu da kere. Pepato lyosure nomapwizumuko gamwe yipo ngani dingura epata lyetu. Konyima, tani ya diva rupurupuru makura ngani hafere kudanauka novakwetetu.

Momvhura 1939, mukurwetu gomukadi Marion taya mukwara Bill Danylchuck, makura yipo va tu gusire name namukurwange gomukadi Frances va ka tu rere. Marion namugara gwendi yiwo va hovere kulironga Bibeli noNombangi daJehova mekoro lyetu. Pepato lyosure, awo ngava hetekere ko kuronga nge eyi ngava lirongo moBibeli. Kutanta usili, kapi ya kere ureru kusimwitira nawo morwa kapi  va divire rupurupuru. Nye va yi dimbwilire asi ame na here eyi ngani lirongo kuhamena Jehova. Na kwete egano asi eyi ngava rugana kwa liza neyi azi uyunga Bibeli, yipo na tamekere kuza nawo mokuzuvhisa. Konyima zosiruwo, name kwa here kugwana ekuho. Makura momazuva 5 Sitarara 1941, Bill yipo ga kuhwire nge mondoroma zomema aga va gusire metope. Mema ogo kwa kere utenda sili!

Momvhura 1946 apa na zire kembo kepato, yipo twa zire kosigongi esi sa kere moCleveland, Ohio, moAmerika. Mokuvatera nge ni kwame elikwamo posigongi ezuva lyokuhova, vakuru vange kwa lipere marufo mokutjangera nge yitwa eyi va zogerere posigongi. Ano ezuva lyauvali lyosigongi, na hefe unene apa na mwene kambunga koyipurupuru nomuntu gokuvatorokera. Ame na vhulire kuhafera sigongi, ntani yiso sikando sokuhova na vhulire kukwata nawa-nawa egano usili woBibeli!

Apa tupu ya hege yita yauvali youzuni, vantu kwa fumadekere unene yirongo yawo. Apa na ka tundire kosigongi ame kwa tokomenene kulimburukwa Jehova nampili kosure. Yipo na hagekere kudjamena erembe nokudimba rusumo rosirongo. Ntani na hagekere hena kulihameka moyipito yosipagani ndi momalikwamo gonongereka. Vamitili kapi va yi haferere ntani ngava tjilisa nge nokukumbagera nge yipo ni litjindje. Vanasure vakwetu va divire eyi ya horokere, ano eyi kwa pere nge mpito zokugava umbangi. Vakwetu wokosure ngwendi Larry Androsoff naNorman Dittrick ntani Emil Schneider kwa tambwire usili ntani awo kuna kukarera Jehova noulimburukwi dogoro ngesi.

Apa ngani dingura yitata yapeke, ame nkenye apa kwa tulire po sitambo sokuzuvhisira yipurupuru. Pasihonena, sikando simwe apa yipurupuru ya ka pongere mositata saMontreal, ame kwa ka zuvhisilire Eddie Taeger ogu ga hamenene kombunga zovakorokotji. Age ga ya tambwire usili ntani ga ya kere mombungakriste zorupurupuru moLaval, Quebec ano mo-2015 yipo ga dogorokere. Na gwene hena Juan Ardanez, ogu ga here kukonakona Bibeli ngwendi Vabereya yipo a dive nsene asi usili. (Yirug. 17:10, 11) Nage kwa tambwire usili nokuyakara mukuronambunga moOttawa, Ontario dogoro konomfa dendi.

Momvhura 1950, yipo na dirukilire kositata saVancouver. Nampili ngomu na hara kuzuvhisira morupurupuru, ame kapi ani divara eyi ya horokerere nge apa na zuvhisilire mukadi gokuuyunga gedina Chris Spicer mositarata. Age ga yi tambwire mokumutumina moposa yifo ntani ga here ni ka zogere namugara gwendi Gary. Yipo na ka va dingwire, nokuzogera nawo siruwo sosire kupitira mokutjanga. Aso kwa kere sikando sange sokuhulira kuvamona nye na tetukire apa ezuva limwe va ya morwere nge posigongi esi sa kere moToronto, Ontario. Ezuva olyo, yilyo ga gwene ekuho Gary.  Sihorokwa oso sa diworokesere nge eyi ya karera nomulyo kuzuvhisa nkenye apa, morwa kapi to diva nsene nkenye ogu atu zuvhisire nga tambura usili ndi hawe.

Konyima, yipo na tengwire koSaskatoon. Yipo na ka gwene mukadi ogu ga pulire nge ni lironge Bibeli novana vendi vavali wovakadona womapange Jean naJoan Rothenberger, ava ngava dimbire kosure zorupurupuru ezi ngani dimbire. Konyima zosiruwo, awo ngava tantere ko vanasure vakwawo eyi va lirongere moBibeli. Eyi kwa ninkisire vakwawo vatano woyipurupuru va ya kare Nombangi daJehova. Gumwe gwawo kwa kere Eunice Colin. Ame kwa li gwene naEunice apa na kere moharade zokuhulilira posure ozo zorupurupuru. Age kwa pere nge ureke nokupura nge nsene kuvhura tu kare vakaume. Konyima, age kwa ya kere mukadange.

Apa ozina vaEunice va dimbwilire asi age kuna kulironga Bibeli, awo kwa tanterere mukuronasure a mu hagekese. Mukuronasure ogo kwa gusire yimbapiratjangwa yaEunice. Nye Eunice kwa tokomenene kulimburukwa Jehova. Apa ga here kugwana ekuho, vakondi vendi kwa mu tanterere asi: “Nsene ono hara kukara Mbangi zaJehova ntudi to tundu mo membo.” Eunice kwa tundire membo apa ga kere nonomvhura 17, ano epata limwe lyovanavazinyetu kwa mu tambwire va ka mu rere. Age kwa twikilire kulironga dogoro ta ya gwana ekuho. Apa twa li kwere momvhura 1960, vakondi vendi kapi va wizire ko kekwareko lyetu. Nye ngomu pwa pitire siruwo, awo kwa ya tu fumadekere morwa epuliro lyetu ntani monkedi omu ngatu rere vana vetu.

Name namukadange kwa rerere vana vetu wovamati ntambali wokuuyunga. Kapi ya kere ureru  kwetu, nye ose kwa divilisire asi va dive rupurupuru yipo tu uyunge nawo nokuvaronga Bibeli. Vanavazinyetu mombungakriste kwa tu vaterere unene. Pasihonena, munazinyetu gumwe kwa tu tjangerere asi munwetu gumwe kuruganesa nonkango donondona moSinyanga soUhompa. Twa hetekerere ko kukohonona po udigu owo. Vana vetu vane James naJerry naNicholas ntani Steven kuna kukarera Jehova noulimburukwi kumwe nomapata gawo. Ano navenye vane kuna kara vakuronambunga. Nicholas namukadendi Deborah kuvatera kutoroka rupurupuru komberewa zomutayi zaBritania ano Steven namukadendi Shannan awo kutoroka rupurupuru moBeteli zomoAmerika.

Kwedi kumwe komeho tu gwanese nomvhura 40 mononkwara detu, mukadange Eunice yipo ga dogorokere kokankera. Nampili moukaro owo woudigu age kwa kere nehuguvaro mevhumbuko. Ame kuna kundindira nononkondo mokukamumona hena.

MwaMurongankuru 2012, ame kwa gwire nokuteka nyonga, na yi dimbwilire asi ngani hepa evatero. Yipo na dirukire ni ka kare membo lyamunwange kumwe namukadendi. Ngesi ose kuna kara mombungakriste zorupurupuru moCalgary omu nina kara mukuronambunga. Esi kuna kara sikando sange sokuhova kukara mombungakriste zorupurupuru! Nye ngapi omu na nkondopekere elikwatakano lyange naJehova nomvhura nadinye edi na kere mombungakriste zoRuingilisa? Jehova kwa sikisa mo etumbwidiro lyendi lyokukwafa nonsigwe. (Epis. 10:14) Ame nahara kupandura navenye ava va litulire mo unene mokutjangera nge yitwa komapongo nokulironga rupurupuru ntani nokuhetekera ko kutorokera nge yipo name ni lironge.

Poyiruwo yimwe, ame ngani dompo mutjima ntani ngani hara kuhageka morwa kapi ngani kwata egano eyi ngava uyunga komapongo ntani ngani lizuvhu ngwendi asi kwato ogu ga diva kuvatera yipurupuru. Poyiruwo yangoso, ame ngani diworoka nonkango daPeturusa edi ga tanterere Jesus asi: “Hompa, kwalye natu za? Ove nyove wa kara nononkango domwenyo gwanarunye.” (Joh. 6:66-68) Ngwendi sinzi sovanavazinyetu woyipurupuru ava va kara mousili siruwo sosire, name na lironga kulididimika. Ame na lironga kuhuguvara mwaJehova nomombunga zendi ano eyi kwa retera nge mauwa gomanzi. Ngesi tuna kara noyimbapiratjangwa yoyinzi morupurupuru ntani ngesi ame kuhafa kukara kumwe novanavazinyetu komapongo nokoyigongi yorupurupuru romoAmerika. Yosili ame na gwana ruhafo nomatungiko gomanzi pokukarera Jehova.