DANIEL NAMIRIAM kwa likwere mokwedi kwaSitarara 2000, makura tava ka tunga mositata saBarcelona moSipanye. Daniel kwa tente asi: “Ose kwa kere neparu lyewa. Morwa ngatu tambura yimaliwa yoyinzi, ose ngatu li konorestauranda dondiro nokudingura yirongo ntani kudwara yikoverero yondiro. Ntani ngatu pwaga nkenye apa moyirugana yokuzuvhisa.” Nye tapa horoka marunduruko.

Posigongi somazuva gatatu somo-2006, Daniel kwa mu gumine komutjima siuyungwa omu va pulire epuro asi: “Ose kuna kurugana paapa twa hulira ‘mokuparura owo vana kerere edipago’ yipo ngava ka gwane mwenyo gwanarunye ndi?” (Yis. 24:11) Aso kwa nkondopekere situmbukira sokudivisa mbudi zeparu atu gwana moBibeli. (Yirug. 20:26, 27) Daniel kwa tente asi: “Kwa lizuvhire ngwendi asi Jehova ana kuuyungisa nge.” Mosiuyungwa kwa tumbwire mo asi kulihameka unene mosirugana sokuzuvhisa kutwaredesa koruhafo rorunene. Daniel ga yi divire oyo, morwa mukadendi Miriam nare ga tamekere uzuvhisi wokukarerera ntani ga limonena ruhafo oro.

Daniel kwa tanta asi: “Na hepere kutura po marunduruko.” Oyo yiyo ga rugene. Ta sesupike novili doyirugana yendi nokutameka uzuvhisi wokukarerera ntani ga gazadarere ko koruhafo oru ngava vhura kugwana nage namukadendi pokudirukira oku kuna hepa vazuvhisi woUhompa.

MwaKudumonkuru 2007, Daniel naMiriam kwa hagekere yirugana yawo makura tava dirukire kosirongo saPanama, esi va dingwire nare. Awo ngava zuvhisire poyirudi yokulisiga-siga momukunda gwaBocas del Toro, omu mwa kara vantu worudi roVaguaymi. Daniel naMiriam kwa gazarere asi nsene va ruganesa yimaliwa eyi va pungura, awo kuvhura ngava kare moPanama ure womakwedi ntantatu.

Morugendo rwawo ropoyirudi, awo ngava ruganesa wato ntani mbasikora. Awo kudiworoka rugendo rwawo rokuhova oru va singire nombasikora nokilometa 32 monzira zokupita monondundu ntani kwa kere mutenya gomunene. Daniel nkare a pwilire morwa eroroko. Nye mapata goVaguaymi kwa va tambwire momambo gawo, unene po morwa va divire ko nonkango dimwe demeraka olyo. Mwaza siruwo, va ya kere novarongwa woBibeli 23.

Apa ya pwire yimaliwa yawo eyi va pungwire, tava guwu. Daniel kwa tanta asi: “Ose kwa lilire nokugazara kutengura koSipanye. Ose kwa guvire sili pokugazara asi ngesi tatu sigi varongwa vetu.” Nye konyima zokwedi kumwe, tatu gwana mbudi zoruhafo. Miriam kwa tanta asi: “Ose kwa tu zigidire tu kare vazuvhisi wosiruwo nasinye. Ayo kwa tu hafesere kutwikira nosirugana setu!”

Momvhura 2015, morwa marunduruko gombunga zaJehova, Daniel naMiriam kwa va pulire va kare vazuvhisi wokukarerera. Yisinke va rugene? Awo kwa huguvarere etumbwidiro lyemEpisarome 37:5 eli asi: “Ligava kwaHOMPA, ove o huguvare mwendi, makura age nga ku kwafe.” Awo va gwana yirugana eyi ayi va vatere va twikire nosirugana sokuzuvhisa ano ngesi awo kuna kara mombungakriste zomomukunda gwaVeraguas moPanama.

Daniel kwa tanta asi: “Apa twa tundire koSipanye, kapi twa yi ndindilire asi ngatu vhura kurerupika eparu lyetu. Nye naina, ose twa yi sikisa mo oyo ntani tuna kara noyininke eyi twa hepa.” Yisinke ayi va retere ruhafo? Awo kwa tanta asi: “Kuvatera vantu wokulinunupika va lironge kuhamena Jehova kutuhafesa unene.”