1, 2. (a) Maudigu musinke ava ligwanekere nago vanavazinyetu vamwe? (b) Mapuro musinke natu lipura?

MUNAZINYETUGARA gedina Lije kwa tanta asi: “Apa yita ya tamekere moBurundi, epata lyetu kwa kere kosigongi. Ose kwa mwene vantu vana kuduka ano vamwe kuna kuroya. Vakondi vange novamumbya vange novakuru vange kwa tjwayukire noyininke tupu yoyisesu. Vamwe vemepata lyetu kwa zire kokamba zovatjwayuki moMalawi, awo kwa gendere sinano sokusika ponokilometa 1 600. Ano sinzi setu kwa lihene.”

² Mouzuni mudima, ngesi pana kara vatjwayuki wokupitakana pomamiliyona 65 000 000 morwa yita nomahepeko. * Mosivaro oso kuna kara mo mayovi govatjwayuki goNombangi daJehova. Sinzi sawo kwa zumbanesa vahali vawo ntani noyiweka yawo. Maudigu musinke hena ava ligwanekere nago? Ngapi natu vhura kuvatera vanavazinyetu owo va karere Jehova ‘noruhafo’? (Epis. 100:2) Ntani nkedi musinke zongwa natu ruganesa  mokuzuvhisira vatjwayuki va dira kudiva Jehova?

3. Ngapi omu Jesus novarongwa vendi va ya kere vatjwayuki?

³ Konyima apa muengeli gwaJehova ga rondwere Josefa asi hompa Herodesa ana hara kudipaga Jesus, makura Jesus novakondi vendi yipo va tjwayukilire koEgipite. Awo kwa ka kere kooko dogoro apa ga fire Herodesa. (Mat. 2:13, 14, 19-21) Konyima zonomvhura dononzi, varongwa vaJesus “kwa lihanene monomukunda daJudeya naSamaliya” morwa mahepeko. (Yirug. 8:1) Jesus ga yi divire asi vasikuli vendi wovanzi ngava tjwayuka mo momambo gawo. Age kwa tente asi: “Nye nsenesi ngava mu hepekera mositata simwe, tjwayukireni kosikwawo.” (Mat. 10:23) Kapi ya kara ureru kutjwayuka.

4, 5. Maudigu musinke ava ligwanekere nago vatjwayuki (a) apa ava tjwayuka? (b) apa ava tungu monokamba?

⁴ Vatjwayuki kuligwanekera nomaudigu gokulisiga-siga apa ava tjwayuka ndi apa ava ka tunga monokamba dovatjwayuki. Mumbya Lije gedina Gad kwa tanta asi: “Ose kwa gendere yivike yoyinzi nokugwana yimpu monzira. Ame kwa kere nonomvhura 12. Nompadi dange kwa dundire yipo na tanterere epata lyetu va sige nge awo va ze. Nye otate, kapi va here kusiga nge va ya gwane nge vakwayita, makura yipo va damwine nge. Nkenye ezuva ngatu kanderere nokuhuguvara mwaJehova, poyiruwo yimwe ngatu li yimango eyi ya kere konontere donzira.”—Fil. 4:12, 13.

⁵ Sinzi sava vemepata lyaLije kwa ka kere nomvhura dononzi monokamba dovatjwayuki edi za tulisire po mbunga zelipakerero zonomuhoko. Nye simpe va kere moudigu. Lije, ogu ana kara ngesi mutareli gonombunga kwa tanta asi: “Vantu wovanzi kapi va kere noyirugana. Awo ngava li gamba nokunwa marovhu nokuta ukarata nokuvaka ntani nokuhondera.” Mokunyokera po nkareso ozo, Nombangi edi da kere monokamba da hepere kulitura mo moyirugana yomombungakriste. (Heb. 6:11, 12; 10:24, 25) Awo kwa ruganesere siruwo sawo nawa yipo va pame pampepo, ano wovanzi kwa rugene uzuvhisi wokukarerera. Awo va kere nehuguvaro asi ezuva limwe ngava tunda mo mokamba ngwendi moomu tupu Vaisraeli va ya tundire momburundu omu va kere.—2 Kol. 4:18.

6, 7. (a) Yisinke ali tu tumangeda ‘eharo lyetu lyokuhara Karunga’ tu rugane? (b) Gava sihonena.

⁶ ‘Eharo lyetu lyokuhara Karunga,’ kututumangeda tu hare vakwetetu, unene po ava vana kuhepa. (Resa 1 Johanesa 3:17, 18.) Apa Vakriste womoJudeya va kere merumbu, vapuli vakwawo kwa tulire po mawapaiko va va vatere. (Yirug. 11:28, 29) Mupositoli Paurusa naPeturusa nawo kwa korangedere Vakriste va tambure vapuli vakwawo. (Rom. 12:13; 1 Pet. 4:9) Mokumona asi Vakriste kutambura vapuli vakwawo wokoyirongo, awo va hepa hena kutambura vapuli vakwawo ava vana kara mosiponga ndi ava vana kuhepeka morwa epuro lyawo.—Resa Yisewe 3:27. *

⁷ Nombangi daJehova dononzi kukwatera mo vagara novakadi ntani vanona kwa tjwayuka momambo gawo morwa yita nomahepeko moUkraine. Nye ehudi, vamwe kwa va dipagere. Sinzi sawo kwa va tambura momambo govapuli vakwawo momaruha gamwe gomoUkraine, ano vamwe kwa ka va tambura vapuli vakwawo womoRusia. Moyirongo nayinye oyo, awo kapi ava lihameke moupolitika  morwa kapi va ‘hamena kouzuni’ ntani awo kutwikira ‘kuudisa mbudi zongwa,’ noupampi.—Joh. 15:19; Yirug. 8:4.

8, 9. (a) Maudigu musinke nampo ava ligwanekere nago vatjwayuki komavango aga ava tjwayukire? (b) Morwasinke va hepera evatero lyetu?

⁸ Vantu vamwe kutjwayukira komaruha gamwe gomosirongo sawo, nye wovanzi kutjwayukira koyirongo oku va dira kudiva. Epangero kuvhura li va pe nondya noyidwara nomararo, nye pamwe nondya odo kapi va di yika. Vatjwayuki ava va tundilira koyirongo youpyu kuvhura va dire kudiva omu nava dwara momukarompepo goutenda. Ntani vamwe ava va tundilira konomukunda kuvhura va dire kudiva kuruganesa yininke yomodoropa.

⁹ Mapangero gamwe kwa tura po mawapaiko mokuvatera vatjwayuki va yike ukaro woupe. Nye mwaza siruwo, awo va hepa kulirera vene. Marunduruko ogo kuvhura kuvadigopera. Pasihonena, va hepa kulironga eraka lyapeke nokuyika noveta nomparukiso zomosirongo oso nokufuta mutero noyihepwa yemembo nokudimba sure ntani monkedi omu ava pisura vanona. Ayo ya wapa tu vatere vanavazinyetu vana kupita momaukaro ogo monkedi zefumadeko ntani kapisi tu nyegenye.—Fil. 2:3, 4.

10. Ngapi omu natu pameka epuro lyovatjwayuki? (Tara efano pepenuno 3.)

¹⁰ Poyiruwo yimwe, mapangero kudigopekesera vanavazinyetu mokugwana vapuli vakwawo womonomukunda omu va tjwayukira. Nombunga dimwe edi da karera po vatjwayuki kunyoka kuvatera vanavazinyetu nsene kapi vana kutambura yirugana eyi nayi va ninkisa va faure komapongo. Vanavazinyetu vamwe kutambura yirugana oyo morwa woma ntani kulizuvha asi kwato eyi nava rugana ko. Yipo nye ya kara nomulyo kugenderera usimbu kuligwana novanavazinyetu wovatjwayuki nsene vana ya siki mosirongo setu. Awo va hepa kuyidimburura asi ose kwa va hara. Evatero nonkenda ezi atu va likida kuvhura kupameka epuro lyawo.—Yis. 12:25; 17:17.

11. (a) Yininke musinke va hepa vatjwayuki pomuhowo? (b) Ngapi omu vatjwayuki nava likida rupandu?

¹¹ Pomuhowo, ose kuvhura kugava nondya noyidwara ndi yihepwa yimwe hena kovanavazinyetu wovatjwayuki. * Kuvhura kuvapa nampili yininke yoyinunu ngwendi taye. Nsene vatjwayuki va likida rupandu va hana kuhundira unene yoyinzi ngayi ninkisa ava vana kuvavatera va kare neharo lyokugava. Mwaza siruwo, vatjwayuki va hepa kulipakera vene mbili, eyi ngayi va ninkisa va kare nelikwatakano lyewa novapuli vakwawo ntani va va fumadeke. (2 Tes. 3:7-10) Nye simpe va hepa evatero lyetu.

12, 13. (a) Ngapi omu natu gava evatero kovatjwayuki? (b) Gava sihonena.

¹² Kugava evatero kovatjwayuki kapi tupu ya kwatera mo kugava yimaliwa nye unene po siruwo neharo lyetu. Pasihonena, kuvhura tu va likide nzira omu nava vhura kuza kodoropa ndi koyitora oku ava randesa yininke yombiliha ndi eyi nava vhura kurugana yipo va lirere vene. Unene po, kuvhura tu va vatere va lihameke mo moyirugana yomombungakriste. Ntani hena kuvhura o ka va piture mu ze kumwe nawo komapongo. Kuvhura hena o va fatwilire omu nava zuvhisira vantu womomukunda. Ntani pwaga nawo mokuzuvhisa.

 ¹³ Apa vadinkantu wovatjwayuki va ka sikire kombungakriste zimwe, vakuronambunga vamwe kwa rongere vadinkantu owo kusinga, kutopa-topa, kupapara yirugana ntani nomu nava litulira po siruwo sokukarera Jehova. (Gar. 6:10) Konyima, navenye moune wawo kwa ya tamekere uzuvhisi wokukarerera. Evatero eli va gwene ntani nelituromo lyavene kwa va vaterere va ture po ezokomeho nokunyokera po kuhama kouzuni waSatana.

14. (a) Maheteko musinke va hepa kunyokera po vatjwayuki? (b) Gava sihonena.

¹⁴ Ngwendi Vakriste navenye, vatjwayuki nawo va hepa kunyokera po maheteko nomakondjeso aga naga va ninkisa va ture yininke yopanyama muhowo kupitakana elikwatakano lyawo naJehova. * Lije ogu tuna tumbura ketameko kumwe novamumbya vendi novakuru vendi kudiworoka sirongwa sepuro esi gava rongere guhyawo apa va tjwayukire. Awo kwa tanta asi: “Otate kwa zugumine yininke ya hana mulyo eyi twa simbire simwe nasimwe. Makura tava zerura ndjato nokutanta asi: ‘Tareni. Yininke nayinye yina kapi tuna yi hepa.’”—Resa 1 Timoteusa 6:8.

15, 16. Ngapi omu natu vatera vatjwayuki (a) pampepo? (b) pamalizuvho?

¹⁵ Yomulyo eyi va hepa vatjwayuki kuna kara ekorangedo lyokutunda moBibeli, kupitakana kuvapa yidwara nonondya. (Mat. 4:4) Vakuronambunga kuvhura va gwane yimbapiratjangwa yomomaraka govatjwayuki ntani nokuvavatera va gwane vapuli vakwawo ava ava uyunga eraka lyawo. Vatjwayuki wovanzi kwa siga nomukunda dawo nokuligaunuka nomapata gawo ntani nonombungakriste dawo. Awo va hepa kulizuvha asi Jehova ga va hara ntani vapuli vakwawo. Nsene tu dira kuyirugana, awo kuvhura ngava pure evatero kovantu ava ava dili kukarera Jehova. (1 Kol. 15:33) Nsene ngatu va tambura mombungakriste zetu, ose ngatu ruganena kumwe naJehova ‘mokupopera vanayirongo.’—Epis. 146:9.

¹⁶ Ngwendi Jesus nepata lyawo, vatjwayuki kapi ava vhuru kutengura konomukunda  dawo posiruwo oso vahepeki vawo simpe kuna kupangera. Lije kwa tanta asi: “Vakondi wovanzi ava va mona vemepata lyawo kuna kuvakwatera kononkondo nokuvadipaga, kapi va hara kutengwida vana vawo koyirongo oku va tunda.” Mokuvatera vanavazinyetu owo, twa hepa kulikida ‘eharo lyosiumumbya nonkenda nelinunupiko.’ (1 Pet. 3:8) Mahepeko kwa ninkisa vamwe va dire kuhara kukara novakwawo ntani awo kulizuvha nomuga kusimwitira ruhepo oru va pita, unene po nsene kuna kara novana vawo. Lipura asi: ‘Ngano nyame nina kara moukaro wawo, ngapi omu nina hara va tekure nge vakwetu?’—Mat. 7:12.

17. Ngapi omu sirugana setu sokuzuvhisa asi kundama vatjwayuki?

¹⁷ Vatjwayuki wovanzi kwa tunda koyirongo oku va silika sirugana setu sokuzuvhisa. Morwa upampi wokuzuvhisa wovanavazinyetu womoyirongo omu ava tambura vatjwayuki, mayovi govatjwayuki kuna kuzuvha ‘nonkango doUhompa.’ (Mat. 13:19, 23) Sinzi sava “wa rorora udigu” kuna kugwana makorangedo komapongo ntani awo kuyikwatesa ko asi: ‘Yosili Karunga mweli mokatji ketu!’—Mat. 11:28-30; 1 Kol. 14:25.

18, 19. Ngapi natu ruganesa nondunge pokuzuvhisira vatjwayuki?

¹⁸ Ava ava zuvhisire vatjwayuki, va hepa ‘kurungama’ ndi kutakamesa nokukara ‘nonondunge.’ (Mat. 10:16; Yis. 22:3) Va purakena nawa nsene tava pwagesa yinka yawo, nye wa ha zogera nawo youpolitika. Kwama mavyukiso gokutunda komberewa zomutayi ntani gokutunda komapangero yipo o dire kulitura nyamoge moudigu ndi wopeke. Diva ntani fumadeka maukarelikarunga nonompo dovatjwayuki. Pasihonena, vamwe monompo dawo kwa harera vakadi va dware monkedi zongandi. Yipo nye, pokuzuvhisira vatjwayuki, wa hepa kudwara monkedi ezi nazi dira kuvapundukisa.

¹⁹ Ngwendi Musamaliya gomosifanekeso saJesus, tu vatereni vantu ava vana kuhepa, nampili kapisi Nombangi daJehova. (Ruk. 10:33-37) Nkedi zongwa pokuyirugana oyo kuna kara pokuvazuvhisira ko mbudi zongwa. Mukuronambunga gumwe ogu ga vaterere vatjwayuki wovanzi kwa tanta asi: “Ayo mulyo mokulidivisa asi ose Nombangi daJehova ntani sitambo setu sosinene po sokuvavatera va dive Bibeli, nye kapisi soyihepwa yopanyama. Nsene tu dira kuyirugana, awo ngava hara tupu kukara nose morwa kuhara kugwanena mo mauwa.”

20, 21. (a) Yitundwamo musinke ayi kara apa atu likida eharo lyoSikriste kovatjwayuki? (b) Yisinke ngatu ka zogera mosirongwa sokukwama ko?

²⁰ Kulikida eharo lyoSikriste ‘kovanayirongo’ kureta yitundwamo yoyiwa. Munazinyetukadi gedina Alganesh, apa mugara gwendi ga fire ta tjwayuka mo mosirongo sawo saEritrea novana vendi ntazimwe morwa mahepeko. Konyima zorugendo romazuva ntantatu momburundu, awo va vhulire kukasika koSudani. Age kwa tanta asi: “Vanavazinyetu kwa tu tekwire ngwendi ekoro lyawo pokutupa nondya, yidwara, mararo ntani yimaliwa yokurondesa. Yosili, kwato hena gokuvhura kutambura vageni morwa asi yeeyi ava karere Karunga gumwe, ntudi Nombangi daJehova delike dokuyirugana.”—Resa Johanesa 13:35.

²¹ Ngapi kuhamena vanona ava ava tjwayuka kumwe novakondi vawo? Sirongwa sokukwama ko, ngasi ka zogera omu natuvenye natu va vatera va karere Jehova noruhafo.