1, 2. (a) Kwalye da tembe pomuhowo nonkango daJesus domwaMateusa 24:12? (b) Ngapi buke zoYirugana za likida asi Vakriste kwa twikilire kulikida eharo? (Tara efano.)

RUHA rumwe rosidiviso esi ga geve Jesus kuhamena ‘uhura wouzuni’ kuna kara asi ‘eharo lyovantu wovanzi ngali tenda.’ (Mat. 24:3, 12) Mosiruwo sovapositoli, Vajuda ava ngava tanta asi kwa kere vantu vaKarunga, kwa tarerere eharo lyawo lyokuhara Karunga li tende.

² Nye mokulisiga, sinzi soVakriste posiruwo sina kwa litulire mo unene ‘mokuudisa mbudi zongwa zaJesus, asi yige Kristusa’ nokulikida eharo kwaKarunga nokoVakriste vakwawo ntani kovantu wopeke. (Yirug. 2:44-47; 5:42) Nampili ngoso, vasikuli vamwe vaJesus kwa tarerere eharo lyawo li tende.

3. Yisinke ya ninkisire Vakriste vamwe va zumbe eharo lyawo?

³ Jesus kwa tanterere Vakriste womoEfeso asi: “Nye eyi nina kukuvyuka ko, yeyi yokuzumba eharo lyoge lyokuhara nge moomu wa here nge muhowo.” (Ehor. 2:4) Konda musinke za va  ninkisire va zumbe eharo lyawo? Awo nampo kwa honenene nkareso zovantu ava va here kukwama madowo gavene. (Efe. 2:2, 3) Ngwendi yitata yoyinzi naina, moEfeso kwa vhukire mo yirugana yoyidona. Aso kwa kere sitata soungawo omu vantu ngava kondjere emona, malihafeso ntani neparu lyokuzeruka. Awo kwa lihere vene kupitakana omu va here Karunga novakwawo. Ntani hena yirugana yokunyata kwa vhukire mo unene.

4. (a) Mononkedi musinke eharo lyovantu lina tende momazuva getu? (b) Momaruha musinke gatatu natu nkondopeka eharo lyetu?

⁴ Uporofete waJesus kuhamena eharo lyovantu asi ngali tenda kuna kusika mo nomomazuva getu. Naina, eharo lyovantu lyokuhara Karunga kuna kutenda. Vantu wovanzi kapi va huguvara mwaKarunga nye awo kuhuguvara movantu mokugusa po maudigu gawo. Eyi yiyo eharo lyovantu ava ava dili kukarera Jehova lina kutwikira kutenda. Ngwendi Vakriste wombungakriste zomoEfeso, Vakriste wousili naina nawo kuvhura va tarere eharo lyawo li tende. Ngesi tatu ka konakona maruha gatatu omu natu nkondopeka eharo lyetu (1) lyokuhara Jehova, (2) lyokuhara usili womoBibeli (3) ntani lyokuhara vanavazinyetu.

5. Morwasinke natu karera neharo lyokuhara Karunga?

⁵ Yilye twa hepa kuhara po unene? Jesus kwa tente asi: “O hare HOMPA Karunga goge nomutjima goge nagunye nomwenyo goge nagunye nonondunge doge nadinye. Esi yiso sipango po sosinene sokuhova.” (Mat. 22:37, 38) Yosili, kuhara unene Jehova Karunga kutuvatera tu limburukwe nompango dendi nokulididimikira ntani tu nyenge udona. (Resa Episarome 97:10.) Nye Satana nouzuni wendi kukondja unene mokutuninkisa tu hageke kuhara Karunga.

6. Yitundwamo musinke ava ligwanekere nayo vantu ava va dira kuhara Karunga?

⁶ Vantu wovanzi kwa kara nomutaro gwepuko kuhamena eharo. Mevango lyokuhara Musiti, awo kwa “lihara tupu vene.” (2 Tim. 3:2) Uzuni ou waSatana kukorangeda “edowo lyorutu nedowo lyomeho nomalitumbadekero gemona.” (1 Joh. 2:16) Mupositoli Paurusa kwa rondwere Vakriste vakwawo kuhamena kukwama madowo gawo asi: “Kugongama yopasintu kureta nomfa. . . Yitambo yopasintu kureta unkore naKarunga.” (Rom. 8:6, 7) Yosili, ava ava kondjere emona nava ava lihameke moruhonda kuligwanekera nomaudigu ntani ayo kuvakoresa.—1 Kol. 6:18; 1 Tim. 6:9, 10.

7. Maudigu musinke vana kuligwanekera nago vasikuli vaKristusa naina?

⁷ Sinzi sava va dira kupura mwaKarunga ntani nava va pura melisinto, kuronga marongo aga aga ninkisa vantu va dire kuhara Karunga ntani va dire kupura asi yipo ga kara. Awo kuninkisa vantu va pure asi nsene o pura mwaKarunga ove mugova ndi kapi wa lironga. Ntani vantu wovanzi kwa fumadeka vadiviunsitwe kupitakana Musiti. (Rom. 1:25) Nsene tu purakena komarongo gawo kuvhura tu sige Jehova ntani eharo lyetu ngali tenda.—Heb. 3:12.

8. (a) Maukaro musinke gokudompesa ava ligwanekere nago vakareli vaJehova? (b) Ekorangedo musinke atu gwana mEpisarome 136?

⁸ Nsene tu twikira kudompa mutjima, kuvhura kusesupika epuro lyetu nokuninkisa eharo lyetu li tende. Mouzuni ou ana kupangera Satana, natuvenye kuligwanekera nomaukaro aga aga tu dompesa mutjima. (1 Joh. 5:19) Nampo kuna kuligwanekera noudigu ngwendi ukurupe, uvera ndi udigu  woyikweparu. Ndi nampo kuvhura tu guve morwa kapi tuna kusikisa mo yitambo yetu ndi eyi twa ndindira kapi yina kusika mo ndi morwa mapuko aga twa tura po. Twa ha pulisira maukaro ogo ga tu ninkise tu gazare asi Jehova ana tu sigilire. Nye twa hepa kuteda ko kononkango dehegangwido daJehova kuhamena eharo lyendi lyanarunye kwetu. Nonkango odo kwa kara mEpisarome 136:23 asi: ‘Kapi ga tu divarere meswauko lyetu; yeeyi nkenda ndi eharo lyendi lyanarunye.’ Yosili, eharo lyaJehova kovakareli vendi kapi ali haga. Yipo nye natu karera nehuguvaro asi age kupurakena “makanderero” getu nokugalimburura.—Epis. 116:1; 136:24-26.

9. Yisinke ya nkondopekere Paurusa a twikire kuhara Karunga?

⁹ Ngwendi mutjangi gepisarome, Paurusa nage ya mu nkondopekere mokugazadara ko omu Jehova ga mu vaterere. Paurusa kwa tente asi: ‘Karunga yige Mukwafi gwange, yinke nani tjilira. Muntu a tompore nge yinke?’ (Heb. 13:6) Ehuguvaro lina ga kere nalyo mwaJehova lya mu vaterere a lididimikire maudigu. Paurusa kapi ga pulisilire maudigu ga mu dompese. Apa ga kere modorongo, age kwa tjenge nombilive dekorangedo. (Efe. 4:1; Fil. 1:7; Fir. 1) Nampili ngomu ga pitire momaudigu gomanzi, age kwa twikilire kunkondopeka eharo lyendi kwaKarunga. Yisinke ya mu nkondopekere? Age kwa twikilire kuhuguvara “Karunga ogu a kwafa nkenye apa. Age yige a tu kwafa momaudigu getu nagenye.” (2 Kol. 1:3, 4) Ngapi natu honena Paurusa nokunkondopeka eharo lyetu kwaJehova?

10. Ngapi natu twikira kunkondopeka eharo lyetu kwaJehova?

¹⁰ Paurusa kwa tumbwire nkedi zimwe omu natu nkondopeka eharo lyetu kwaJehova. Age kwa tanterere vapuli vakwawo asi: “Omu kanderere narunye.” Ntani konyima ga ya tjenge asi: “Omu kanderere narunye, walye omu dwapa.” (1 Tes. 5:17; Rom. 12:12) Kuuyunga naKarunga kupitira mekanderero kunkondopeka elikwatakano lyetu nendi. (Epis. 86:3) Apa atu litulire po siruwo sokugwanena po tu uyunge naJehova nokumupwagesera malizuvho getu, ose kuhedera pepi naGuhyetu ‘ogu a zuvhu makanderero.’ (Epis. 65:2) Ntani hena apa atu dimburura asi Jehova kulimburura makanderero getu, eharo lyetu kwendi kunkondopara. Ose kuyadimburura asi Jehova “kwa kara pepi nava navenye ava mu zigida.” (Epis. 145:18) Nsene tu huguvara asi Jehova nga tu vatera, ose ngatu lididimikira maudigu.

11, 12. Ngapi omu natu tunga po eharo lyokuhara usili womoBibeli?

¹¹ NgoVakriste ose kwa hara usili. MoNonkango daKarunga yimo atu gwana usili. Apa Jesus ga kanderere koGuhwe age kwa tente asi: “Nonkango doge yido usili.” (Joh. 17:17) Yipo nye, mokuhara usili ntudi twa hepa kukara nediwo lyosili kuhamena Karunga. (Koros. 1:10) Nampili ngoso, yinzi ya hamena mo kupitakana tupu kukara nediwo. Koneka omu mutjangi gEpisarome 119 ga tu vatera tu kwate egano eyi ayi tanta kuhara usili womoBibeli. (Resa Episarome 119:97-100.) Ose kulitulira po siruwo sokuteda ko eyi tuna resa moMatjangwa mwaza ezuva ndi? Eharo lyetu lyokuhara usili ngali nkondopara nsene tu teda ko komauwa aga natu vhura gwanena mo mokulimburukwa nompango domoBibeli.

¹² Mutjangi gepisarome kwa tente hena asi: “Ee, nompangera doge utovara musi, utovara  wado kwa pitakana wousi mokana kange.” (Epis. 119:103) Mokulifana, yimbapiratjangwa yoBibeli eyi atu gwana kombunga zaKarunga kwa fana ngwendi nondya donontovara edi atu vhuru kuhafera. Nsene tu litulira po siruwo sokuteda ko kweyi atu resa moyimbapiratjangwa yoBibeli ngayi tu vatera tu diworoke “nonkango dehengagwido” nokuvateresa ko vakwetu.—Muud. 12:10.

13. Yisinke ya vaterere Jeremiya a hare Nonkango daKarunga, ntani ngapi ga lizuvhire?

¹³ Muporofete Jeremiya kwa here usili womoMatjangwa. Koneka omu ga lizuvhire kuhamena nonkango daKarunga. Age kwa tente asi: “Ove kuna uyungisa nge, nye ame nina purakene nkenye nkango. Ame koge na hama, ove HOMPA Karunga Munankondo. Ano nonkango doge kuna zwida mutjima gwange epemburo nehafo.” (Jer. 15:16) Jeremiya nga purakene nokuteda ko koNonkango daKarunga. Pokurugana ngoso, ya mu ninkisire a kare norupandu kositumbukira esi ga mu pere Karunga sokukarera po edina lyendi. Nsene twa hara usili womoBibeli, ngayi tu tumangeda tu dimburure asi twa kara nositumbukira somulyo sokukarera po edina lyaKarunga nokuzuvhisa mbudi zongwa zoUhompa.

14. Ngapi natu nkondopeka eharo lyetu lyokuhara usili womoBibeli?

¹⁴ Kugusa ko kuresa Bibeli noyimbapiratjangwa yetu, ngapi hena omu natu nkondopeka eharo lyetu lyokuhara usili womoBibeli? Kuvhura tu li nkondopeke pokuwiza nkenye apa komapongo. Elirongo lyoBibeli lyankenye sivike kupitira moRuhungu, kuna kara nkedi zimwe omu ava vhuru kuturonga. Mokukwata egano eyi atu lirongo mo, twa hepa kuliwapaikira nawa Ruhungu rwElirongo. Nkedi zimwe omu natu yi rugana kuna kara pokuresa matjangwa nagenye. Sifo soRuhungu kuvhura kusikwateka kointaneta zetu jw.org ndi kuvhura kusigwana hena ko JW Library app ezi za kara momaraka gomanzi. Yikwakonentu yimwe kutuvatera tu gwane usimbu matjangwa va tura moyirongwa. Yi kare asi nkedi  musinke atu ruganesa, kuresa matjangwa nokuteda ko ngayi nkondopeka eharo lyetu lyokuhara Bibeli.—Resa Episarome 1:2.

15, 16. (a) Kuliza naJohanesa 13:34, 35, situmbukira musinke twa kara naso? (b) Ngapi eharo lyetu lyokuhara vanavazinyetu lya likwatakana neharo lyetu lyokuhara Jehova ntani Bibeli?

¹⁵ Momasiku gendi gokuhulilira pevhu, Jesus kwa tanterere varongwa vendi asi: “Sipango sosipe nina kumupa asi, omu lihara-hare moomu na mu hara ame, yimo nomu lihara-hara none. Nsene mu lihara-hara, yipo ngava divira vantu asi one sili varongwa vange.”—Joh. 13:34, 35.

¹⁶ Eharo lyetu lyokuhara vanavazinyetu kwa likwatakana neharo lyetu lyokuhara Jehova. Ano nsene kapi twa hara vanavazinyetu kapi tatu vhuru kuhara Karunga. Mupositoli Johanesa kwa tjenge asi: “Yeeyi ogo ga nyenga mukwawo ogu a mono, omu na hara-hara nye Karunga ogu ga dira kumona, ngapi?” (1 Joh. 4:20) Ntani hena eharo lyetu lyokuhara Jehova ntani vanavazinyetu kwa likwatakana neharo lyetu lyokuhara usili womoBibeli. Morwasinke? Morwa eharo lyetu lyokuhara Bibeli kututumangeda tu limburukwe konompangera domoBibeli ngwendi kuhara Karunga novanavazinyetu.—1 Pet. 1:22; 1 Joh. 4:21.

17. Mononkedi musinke dimwe natu likida eharo kovanavazinyetu mombungakriste?

¹⁷ Resa 1 Vatesaronika 4:9, 10. Mononkedi musinke dimwe natu likida eharo kovanavazinyetu mombungakriste? Kuvhura tu vatere munazinyetu gomukurupe ogu ana hepa ugendero komapongo. Ntani kuvhura tu vatere mufisayendi pokumuwapaikira yininke yemembo lyendi. (Jak. 1:27) Yi kare asi vanona ndi vakondi, vanavazinyetu ava vana dompo mutjima ndi ava vana kuligwanekera nomaudigu gapeke, va hepa evatero nekorangedo nehengagwido lyetu. (Yis. 12:25; Koros. 4:11) Ose kuyilikida asi twa hara “vapuli vakwetetu,” kupitira mononkango ntani moyirugana yetu.—Gar. 6:10.

18. Yisinke ngayi tu vatera tu kohonone po madiro kulizuvha novanavazinyetu?

¹⁸ Bibeli kwa pumba asi “pomazuva gopouhura,” vantu ngava lihara tupu vene nokudowokera yimaliva. (2 Tim. 3:1, 2) Yipo nye, ngoVakriste twa hepa kurugana unene tu nkondopeke eharo lyetu kwaKarunga nokoBibeli ntani kovanavazinyetu. Poyiruwo yimwe kuvhura tu dire kulizuvha novanavazinyetu. Nye morwa twa va hara, ngatu hetekera ko kukohonona po madiro kulizuvha monkedi zongwa. (Efe. 4:32; Koros. 3:14) Yipo nye, kapisi tu tarere eharo lyetu li tende. Ngano tu twikireni kukara neharo lyenene kwaJehova nokoNonkango dendi ntani kovanavazinyetu.