1. Mauzera musinke ga geve Jehova kuhamena nkore zetu konyima zapa va zonene oAdamu naEva?

ADAMU ga yi divire asi mazoka kapi aga uyunga. Yipo nye, apa ga ya divire asi ezoka kwa uyungire naEva, nampo ga ya dimbwilire asi alyo kwa kere sisitwa sopampepo. (Gen. 3:1-6) Adamu naEva kapi va divire yoyinzi kuhamena sisitwa oso. Nampili ngoso, Adamu kwa tokwere kuhama kosisitwa oso nokurwanesa Oguhwe. (1 Tim. 2:14) Jehova yipo ga tamekere kugava mauzera kuhamena nkore ezi nokutumbwidira asi ngava zi zonagura po. Nye Jehova ga rondwere hena asi sisitwa oso ngasi kara nononkondo dokurwanesa ava va hara Karunga.—Gen. 3:15.

2, 3. Morwasinke va dililire kutumbura ko mauzera gomanzi kuhamena Satana komeho aya moneke Mesiyasa?

² Pomuhowo, Jehova kapi ga tumbwire edina lyomuengeli ogu ga mu rwanesere. * Age kwa ya lidivisire tupu konyima zonomvhura 2 500 kutunda apa ga rwanesere. (Joba 1:6) Age  kwa ya divikwa asi “Satana” kutanta asi “Murwanesi.” Age kwa mu tumbura monobuke ntatu tupu doMatjangwa goRuhebeli, 1 Histoli, Joba ntani mwaSakaliya. Morwasinke va dililire kutumbura ko mauzera gomanzi kuhamena nkore ezi komeho aya moneke Mesiyasa?

³ Jehova kapi ga tura mauzera gomanzi moMatjangwa goRuhebeli kuhamena Satana noyirugana yendi. Sitambo sendi kwa kere sokuvatera vantu va dimburure Mesiyasa nokumukwama. (Ruk. 24:44; Gar. 3:24) Apa ga wizire Mesiyasa, Jehova kwa mu ruganesere kumwe novarongwa vendi va gave mauzera gomanzi kuhamena Satana novaengeli vendi. * Aso sininke sosiwa morwa Jehova nga ka ruganesa simpe Jesus novagwavekwa mokuyazonagura po Satana nava ava mu kwama.—Rom. 16:20; Ehor. 17:14; 20:10.

4. Morwasinke natu dilira kutjira Muzonaguli?

⁴ Mupositoli Peturusa kwa singonona Satana Muzonaguli ngwendi “nyime gokununga.” Ano Johanesa kwa tumbura Satana asi “ezoka” ntani “emukongoro.” (1 Pet. 5:8; Ehor. 12:9) Nye kapi twa hepa kumutjira morwa koyili eyi a dili kuvhura kurugana. (Resa Jakopo 4:7.) Jehova naJesus ntani vaengeli kutupopera. Nevatero lyawo, ose kuvhura tu funde nkore zetu. Nye simpe twa hepa kudiva malimbururo komapuro aga: Kupi da hulira nonkondo daSatana? Ngapi a hetekere ko kupukisa vantu? Ntani yininke musinke a dili kuvhura kurugana? Ngomu natu ka limburura mapuro aga, tatu ka tarurura hena eyi natu lirongera ko.

5, 6. Morwasinke mapangero aga dilire kugatompoka kugava nayinye eyi va hepa vantu?

⁵ Komeho zoRuhanzo, Satana kwa pukisire vaengeli vamwe va ligwanekere panyama novakadi. Bibeli kwa faturura usili ou pasifanekeso apa azi uyunga asi emukongoro tali kombo ko siutatu sonombungururu dekeguru, tali di zugumine pevhu. (Gen. 6:1-4; Juda 6; Ehor. 12:3, 4) Apa vaengeli owo va sigire epata lyaJehova, awo kwa ya kere mepangero lyaSatana. Twa ha gazara asi vaengeli owo kapi va kara megendeso. Satana kwa tura po epangero lyamwene mokuhonena Uhompa waKarunga. Age kwa litura mwene a kare hompa ano nompepo donondona kwa di wapaika nokudipa nonkondo ntani kwa di ninka di kare vapangeli.—Efe. 6:12.

⁶ Satana kuruganesa mbunga zendi zopampepo mokupangera mapangero nagenye govantu. Kuvhura tu yi pure oyo morwa Satana kwa likidire Jesus “mauntungi nagenye gouzuni” nokumutantera asi: “Tani ku pe nonkondo nadinye edi nomauwa nagenye aga, yeeyi oyo kwa yi pa nge ni yi gave kwankenye ogu nina hara.” (Ruk. 4:5, 6) Nampili ngoso, sinzi somapangero kuhetekera ko kuruganena vantu mauwa. Ntani vapangeli vamwe kwa hara kuvatera vantu. Nye kwato epangero lyovantu ndi muntu gongandi gokuvhura kugava nayinye eyi va hepa vantu.—Epis. 146:3, 4; Ehor. 12:12.

7. Ngapi a ruganesa Satana maukarelikarunga nonongesefa? (Tara efano pepenuno 22.)

⁷ Satana kuruganesa maukarelikarunga nonongesefa ‘mokupukisa uzuni naunye.’ (Ehor. 12:9) Age kuhanesa yimpempa kuhamena Jehova kupitira momaukarelikarunga  goyimpempa. Ntani hena age kuna tokomene kupukisa vantu yipo va divare Karunga. (Jer. 23:26, 27) Ngoyitundwamo, vantu ava ava gazara asi kuna kukarera Karunga kwa va pukisa va karere nompepo donondona. (1 Kol. 10:20; 2 Kol. 11:13-15) Satana kuhanesa hena yimpempa kupitira monongesefa. Pasihonena, vantu kuvaronga asi mokugwana ruhafo ntudi va hepa kugwana yimaliwa yoyinzi nokukara nemona lyenzi. (Yis. 18:11) Ava va pura moyimpempa oyo, kuruganesa eparu lyawo mokukondjera ‘emona’ mevango lyokukarera Karunga. (Mat. 6:24) Konyima zosiruwo, awo kuya hara unene emona kupitakana Karunga.—Mat. 13:22; 1 Joh. 2:15, 16.

8, 9. (a) Yitwa musinke yivali tuna lirongere ko kwaAdamu naEva nokovaengeli wovarwanesi? (b) Mauwa musinke atu gwanene mo pokudiva asi Satana kuna kupangera uzuni ou?

⁸ Sihonena saAdamu naEva kuturonga yitwa yivali yomulyo. Sokuhova, twa hepa kudiva asi pwa kara nonzira mbali, nye twa hepa kuhorowora po zimwe. Tatu horowora po kuhama kwaJehova ndi kwaSatana. (Mat. 7:13) Sauvali, ava ava kwatesa ko Satana kugwana tupu mauwa gomasesu. Adamu naEva va kere nompito mokuhorowora vene yoyiwa neyi yoyidona. (Gen. 3:22) Nye, kuhama kwaSatana narunye kureta yitundwamo yoyidona. Kwato mauwa.—Joba 21:7-17; Gar. 6:7, 8.

⁹ Morwasinke ya karera nomulyo tu dive asi Satana yige ana kupangera uzuni ou? Ayo kutuvatera tu kare nomutaro gomuwa komapangero ntani kututumangeda tu zuvhise mbudi zongwa. (1 Pet. 2:17) Jehova kuna tu harere tu limburukwe mapangero nsene asi noveta edi va tura po kapi dina kulirwanesa nonompango dendi. (Rom. 13:1-4) Nye nampili ngoso, kapi tatu vhuru kulihameka moyita ndi tu kwatese ko maupolitika novampitisili. (Joh. 17:15, 16; 18:36) Mokumona asi, Satana kuna kuhetekera ko kuhoreka edina lyaKarunga, twa hepa kuronga vantu kuhamena Karunga. Ose kuruganesa edina lyendi morwa twa yi diva asi kuhara Karunga mulyo unene kupitakana kuhara yimaliwa ndi nkenye eyi.—Jes. 43:10; 1 Tim. 6:6-10.

10-12. (a) Ngapi omu Satana nampo ga pukisire vaengeli vamwe? (b) Yisinke natu lirongera ko kweyi ya horokerere vaengeli vena?

¹⁰ Satana kuruganesa nonkedi edi adi mu tompoka a pukise vantu. Pasihonena, age  kuruganesa yiraha mokuninkisa vantu va rugane eyi ana hara. Ntani poyiruwo yimwe kuhetekera ko kuvahepeka.

¹¹ Satana kwa ruganesere siraha mokupukisa vaengeli wovanzi. Age nampo nga nomene nomvhura dononzi mokudiva eyi ngayi va pukisa. Vaengeli owo kwa honderere novakadi, ano vanona ava va retere kwa kere nyanya. (Gen. 6:1-4) Kugusa ko kweyi Satana ga zedagwilire vaengeli vena va hondere age nampo ga va tumbwidilire hena asi ngava pa nonkondo dokupangera vantu. Sitambo sendi nampo kwa kere sokuzonagura po ‘ruvharo romukadi’ rwetumbwidiro. (Gen. 3:15) Nye Jehova kwa retere Ruhanzo oru rwa zonagwire po nayinye eyi ga here kurugana Satana novaengeli wovarwanesi.

¹² Yisinke natu lirongera ko? Ruhonda ntani elinenepeko kuna kara yiraha eyi a ruganesa Satana. Vaengeli ava va ya lipakerere naSatana kwa kere nomvhura dononzi meguru. Nampili ngoso, wovanzi kwa tamekere kukara nomadowo gomadona ano konyima ga ya kulire. Mokulifana, nose kuvhura tu karere Jehova nomvhura dononzi. Nye simpe kuvhura tu tameke kukara nomadowo gomadona. (1 Kol. 10:12) Ayo mulyo tu likonakone yipo tu nyokere po kulinenepeka nomagazaro goruhonda.—Gar. 5:26; resa Vakorosi 3:5.

13. Siraha musinke hena a ruganesa Satana, ntani ngapi natu si nyokera po?

¹³ Siraha simwe hena a ruganesa Satana kuna kara mokuninkisa vantu va hare kutarera nompepo donondona. Naina, age kapi tupu a ninkisa vantu va hafere nompepo donondona kupitira momaukarelikarunga goyimpempa nye hena moyilihafeso. Nomuvi nomaudano gamwe ntani yilihafeso yimwe kuninkisa umpure u moneke ngwendi sininke sosiwa. Ngapi natu nyokera po siraha oso? Mbunga zaJehova kapi nga zi tu tjangera elikwamo lyoyilihafeso yoyiwa neyi yoyidona. Natuvenye twa hepa kudeura ezwi lyetu lyokomutjima kuliza nonompango daKarunga. (Heb. 5:14) Ano nsene asi ose kwa hara Karunga twa hana “uyilipaki” ngatu tura po matokoro gomawa. (Rom. 12:9) Twa hepa kulipura asi: ‘Yilihafeso yange kuninkisa nge ni moneke ngwendi muyilipaki ndi? Yisinke ngava gazara varongwa vange nsene ngava mona yilihafeso yange?’ Nsene tu kwama eyi atu rongo vantu, ngayi tu rerupira kunyokera po yiraha yaSatana.—1 Joh. 3:18.

14. Ngapi a hetekere ko Satana kutuhepeka, nye ngapi natu lididimika?

 ¹⁴ Satana kuhetekera ko hena kutuhepeka yipo tu dire kulimburukwa Jehova. Pasihonena, kuvhura a gendese mapangero ga silike sirugana setu sokuzuvhisa. Ndi kuvhura a ruganese varugani ndi vanasure vakwetu va tu swaure morwa kukwama nompango doBibeli. (1 Pet. 4:4) Ntani kuvhura a ruganese vekoro lyetu mokutudompesa yipo tu dire kuza komapongo. (Mat. 10:36) Ngapi natu vhura kulididimika? Sokuhova, twa hepa kuyindindira asi ngatu ligwanekera nomarwaneso gangoso morwa Satana kuturwanesa. (Ehor. 2:10; 12:17) Ntani twa hepa kudiworoka sitwa somulyo. Satana kwa tente asi ose kukarera Jehova apa tupu ayi tu rerupire. Age kwa tente hena asi nsene tu ligwanekera nomaudigu ngatu hageka kukarera Jehova. (Joba 1:9-11; 2:4, 5) Nye twa hepa kuhundira Jehova a tu pe nonkondo. Diworokeni asi age kapi ngatu sigilira.—Heb. 13:5.

15. Kuvhura Satana a tu sininike tu rugane eyi tuna dili kuhara kurugana ndi? Faturura.

¹⁵ Satana kapi ta vhuru kusininika vantu va rugane eyi vana dili kuhara. (Jak. 1:14) Vantu wovanzi kapi va yi dimburura asi awo kwa hama kwaSatana. Nye apa ava ya lirongo usili awo kuyatokora nsene tava hama kwaJehova ndi kwaSatana. (Yirug. 3:17; 17:30) Nsene tu tokomena kusikisa mo mpango zaKarunga, kwato eyi nga rugana ko Satana mokuteza po ulimburukwi wetu.—Joba 2:3; 27:5.

16, 17. (a) Yininke musinke yimwe a dili kusikisa mo Satana nonompepo donondona? (b) Morwasinke natu dilira kukara nowoma kuziguruka kukanderera kwaJehova?

¹⁶ Pwa kara yininke yimwe hena eyi a dili kusikisa mo Satana nonompepo dendi donondona. Pasihonena, Bibeli kapi za uyunga asi awo kuvhura va dive eyi ya kara momutjima gomuntu. Jehova naJesus yiwo velike wokuyirugana oyo. (1 Sam. 16:7; Mar. 2:8) Ngapi kuhamena kukanderera kuziguruka? Kuvhura nye tu kare nosinka asi Muzonaguli ndi nompepo donondona kuvhura di zuvhe makanderero getu nokurugana ko yuma ndi? Hawe. Morwasinke? Kapi tatu vhuru kukara nowoma mokurugana yininke yoyiwa mosirugana saJehova morwa yeeyi asi Muzonaguli kuvhura a tu zuvhe. Nose kapi tatu vhuru kukara nowoma mokukanderera kuziguruka morwa asi Muzonaguli nampo kuvhura a tu zuvhe. MoBibeli kwa kara mo yihonena yoyinzi yava va kanderere kuziguruka, nye kwato oku va tjanga asi va kere nowoma morwa asi Muzonaguli tava zuvhu. (1 Vah. 8:22, 23; Joh. 11:41, 42; Yirug. 4:23, 24) Nsene tu kondja kurugana eyi ana tu harere Jehova, kuvhura tu kare nehuguvaro asi age kapi nga pulisira Muzonaguli a twikire kutukoresa.—Resa Episarome 34:7.

¹⁷ Twa hepa kudiva nkore zetu nye kapi twa hepa kuzitjira. Nampili ngomu twa dira kusikilira mo, kuvhura tu funde Satana. (1 Joh. 2:14) Nsene tu mu rwanesa, nga tu suwurukwa. (Jak. 4:7; 1 Pet. 5:9) Vadinkantu yiwo ana di taparara po unene Satana. Yisinke nava rugana yipo va rwanese Muzonaguli? Ngatu ka yi zogera mosirongwa sokukwama ko.